Mbela oto vulu okutseya edhina lyaKalunga?
Ngele owa pulwa wu popithe nenge wu popye nomuntu gwontumba a simana to mu popi kedhina, ohashi kala uuthembahenda. Aanamitse ominene ohayi ithanwa olundji nomadhinasimaneko ngaashi “Omusimanekwa.” Ngele gumwe ngoka e na ondondo yopombanda e ku lombwele a ti: “Ithana ndje owala kedhina,” osha yela kutya oto ka kala wu uvite etumba.
OOHAPU dhaKalunga kashili Ombiimbeli, otadhi tu lombwele tadhi ti: “Jehova Ofule; edhina lye Jehova.” (Eksodus 15:3, OB-1954) Nonando oku na wo omadhinasimaneko ogendji ngaashi “Omushiti,” “Omunankondoadhihe,” nosho wo “Omuwa Omupangeliawike,” okwa simaneka aluhe aapiya ye aadhiginini moku ya pitika ye mu ithane kedhina.
Pashiholelwa, peyapulo lyotempeli muJerusalem, omukwaniilwa Salomo okwa tameke egalikano lye ta ti: “[Jehova], Kalunga kaIsraeli.” (1 Aakwaniilwa 8:22, 23)a Omupolofeti Elia okwa li i indile Kalunga a ti: “Yamukula ndje, [Jehova].” (1 Aakwaniilwa 18:37) Natango, sho omupolofeti Jesaja a popi naKalunga pehala lyoshigwana shaIsrael, okwa li a ti: “Ngoye [Jehova], ongoye mwene Tate.” (Jesaja 63:16) Osha yela kutya Tate yetu yomegulu ohe tu hiya tu mu ithane kedhina.
Nonando osha simana okwiithana Jehova kedhina, okutseya shili edhina lye osha kwatela mo oshindji. Jehova oku uvanekela ngoka e mu hole nokwi inekela muye a ti: “[Onda] hala oku mu gamena, oshoka edhina lyandje e li shi.” (Episalomi 91:14, OB -1954) Osha yela kutya, okutseya edhina lyaKalunga osha kwatela mo oshindji, molwaashono osho oshinima sha simanenena shoka tashi ningitha omuntu a kale a gamenwa kuKalunga. Oshike nduno sha tegelelwa opo wu tseye edhina lyaKalunga?
[Enyolo lyopevi]
a Movelise ndjika nosho wo momanyolo gaali ga landula ko, sha hala okutya, mAakwaniilwa yotango 18:37 naJesaja 63:16, Ombiimbeli yOshindonga otayi popi aapiya yaJehova taye mu ithana “OMUWA.” Ihe melaka ndyoka Ombiimbeli ya nyolwa tango, Kalunga oti ithanwa kedhina lye Jehova moovelise ndhika.