Shoka sha kwatelwa mo mokutseya edhina lyaKalunga

MBELA edhina lyoye oli na eityo lyontumba? Aantu oyendji oye na omukalondjigilile gwokuluka okanona edhina ndyoka li na eityo. Edhina ndyoka hali lukwa okanona otashi vulika li kale lyi ikolelela keitaalo lyaavali nokomithikampango dhawo nenge kwaashoka ya halela onakuyiwa yokanona.

Okuluka aanona omadhina ngoka ge na eityo kashi shi oshinima oshipe. Methimbo lyOmbiimbeli omadhina oga li haga lukwa aanona molwaashoka oga li ge na eityo lyontumba. Omadhina ohagu ulike shoka omuntu a tegelelwa a ka ninge monakuyiwa. Pashiholelwa, sho Jehova a li a lombwele David kombinga yonakuyiwa yomwana Salomo, okwa ti: “Edhina lye otali ithanwa Salomo [lya za koshitya tashi ti “Ombili”] oshoka muuyuni we otandi ka pa Israel ombili negameno.”—1 Ondjalulo 22:9.

Omathimbo gamwe Jehova okwa li ha lukulula omuntu ngoka e na okudhana onkandangala ompe. Omukulukadhi gwaAbraham ngoka a li ihaa mono aanona okwa li a lukululwa edhina Sara, ndyoka tali ti “Omwanakadhona gwomukwaniilwa.” Omolwashike mbela? Jehova okwa li a yelitha ta ti: “Otandi mu yambeke notandi mu pe oluvalo, e ku valele omumati. Otandi mu yambeke e ta ningi yina yiigwana, nomoluvalo lwe otamu ka za aakwaniilwa.” (Genesis 17:16) Osha yela kutya okuuva ko nawa kutya omolwashike Sara a pewa edhina epe otashi kwatele mo okuuva ko onkandangala ompe ndjoka a li a dhana.

Mbela ongiini shi na ko nasha nedhina ndyoka lya simanenena, Jehova? Olya hala okutya shike? Sho Moses a li a pula Kalunga kombinga yedhina lye, Jehova okwa li a yamukula a ti: “Ngame nda kala ngu NGAME-NDA-KALA.” (Eksodus 3:14) Omatoloko ogendji gOmbiimbeli otaga toloka eyamukulo lyaJehova noohapu ndhika, ihe etoloko lyaRotherham otali ti: “Otandi ka kala shoka nda hala okukala.” Edhina lyaJehova otali holola kutya oku li Kalunga ngoka ha vulu okudhana onkandangala mukehe shimwe. Natu shi thaneke paunathangwa: Omukulukadhi omuvali otashi vulika a dhane oonkandangala odhindji mokusila oshimpwiyu oyana ngaashi okukala e li omupangi, omuteleki, omulongi, nosho tuu, shi ikolelela koompumbwe ndhoka tadhi vulu okuholoka po. Osha faathana wo naJehova, nonando ye ohe shi ningi momikalo dha dhenga mbanda. Opo a gwanithe po elalakano lye lyopahole li na ko nasha naantu, ota vulu okukala shoka a hala okukala mokudhana onkandangala ndjoka a hala. Okutseya Jehova okwa kwatela mo okuuva ko nokutaamba ko oonkandangala odhindji ndhoka ta dhana.

Shinikitha oluhodhi, uuwanawa wuukwatya waKalunga owa holekwa mboka kaaye mu shi kedhina. Ihe mokukonakona Ombiimbeli, oto vulu okukala wu na olupandu lwonkandangala ndjoka Jehova ta dhana e li Omupukululi omunandunge, Omuhupithi omunankondo nOmugandji nomutima aguhe, okutumbula po owala dhimwe. Dhoshili, eityo lyedhina lyaJehova oli li tali kumitha.

Nonando ongaaka, okutseya edhina lyaKalunga kashi shi aluhe oshipu. Oshitopolwa tashi landula otashi ku ulika kutya omolwashike.