Opu na mboka ye li mehala moka hamu kala iishitwa yopambepo, ihe mbela oolye?
Omukiintu gumwe omukokele gwokuEuropa okwa li a yi mongeleka e na olusaalia yomagalikano peke e ta tsu oongolo nesimaneko komeho goshihongwathano Maria. MuAfrika omaukwanegumbo ogendji ohaga tile omagadhi koombila dhoonakusa yawo mboka ya simaneka. Omulumentu gumwe omugundjuka gwokuAmerika okwa kala i idhilika iikulya nokutedhatedha e na einekelo kutya ota vulu okukwatathana naangoka i itaala kutya omuyengeli omutonateli gwe. MuAsia omusita okwa li ta fike oombapila dhi na omalwaala ogendji shi li omukalo gwokuyambela aakwampungu omayambo.
EFAATHANO lini li li pokati kaantu ayehe mboka? Ayehe oyi itaala kutya opu na iishitwa iinandunge yi li mehala moka hamu kala iishitwa yopambepo mbyoka tayi vulu okupopiwa nayo noyi na oonkondo okunwetha mo onkalamwenyo yaantu. Dhoshili, okwiitaala ngaaka kaku shi oshinima oshipe noitashi kumitha. Shoka tashi kumitha osho owala kutya opu na omadhiladhilo ogendji taga kondjithathana kombinga yedhiladhilo kutya oolye ye li mehala moka hamu kala iishitwa yopambepo.
Aamoslema ohaya galikana Kalunga ngoka hayi ithana Allah.a Aantu yUukwakriste ohaya ti kutya Kalunga oku li Katatugumwe, Kalunga He, Kalunga Omwana naKalunga Ombepo Ondjapuki. Aahindu ohaya galikana iikalunga oyindji yi vulithe peyuvi limwe ihaayi monika. Aantu yalwe ohaya ti kutya miinamwenyo yontumba, momiti, momamanya nomomilonga omu na aakwampungu. Natango yalwe ohaya nwethwa komambo, koomuvi nosho wo koopolohalama ndhoka hadhi kala ko-TV tadhi popi kombinga yaayengeli, yoompwidhuli, yiiluli, yomangungule nosho wo yiikalungakiintu.
Ngaashi owala ku na omadhiladhilo ogendji kombinga yiikalunga oyindji, opu na wo omadhiladhilo ogendji taga kondjithathana kombinga yankene omuntu ta vulu okupopya nayo. Oshi li pandunge okuthika pehulithodhilalo kutya hamukalo kehe gwokupopya noshinima shontumba nenge nomuntu gu li mondjila. Dhiladhila kwaashika: Manga inaatu dhengela omuntu gwontumba, otwa pumbwa okukala tu shi kutya olye tatu dhengele notu na okukala tu na einekelo kutya omuntu ngoka oko e li shili note ke tu yamukula. Okukambadhala okudhengela omuntu ngoka kee ko shili itashi ka kwatha sha. Natango okukambadhala okupopya nomuntu kuu mu shi osha nika oshiponga.
Ano oolye lela ye li mehala moka hamu kala iishitwa yopambepo? Ombiimbeli itayi yamukula owala epulo ndika, ihe otayi yelitha wo kutya olye tu na okupopya naye notatu ka kala twa tegelela e tu yamukule. Lesha wo iitopolwa ya landula ko. Otashi vulika wu kale wa kumwa kwaashoka Ombiimbeli tayi ka yamukula.
[Enyolo lyopevi]
a Oshitya “Allah” kashi shi edhina lyolela, ihe otashi ti owala “Kalunga.”