Mona omalaleko nuuyamba okupitila mOmukwaniilwa ta wilikwa kombepo yaKalunga
“Ombepo yOMUWA otayi mu lambele.”—JES. 11:2.
1. Aantu yamwe oya ti shike kombinga yomaupyakadhi guuyuni?
OMUNONGONONI gumwe gwewangandjo, Stephen Hawking, okwa li a pula mo 2006 a ti: “Mbela aantu otaya ka hupa ngaa konima yoomvula 100 ngele uuyuni owu na omaupyakadhi gopapolotika, gopankalathano nosho wo gopamudhingoloko?” Oshifokundaneki shedhina New Statesman osha ti: “Inatu vula okuhulitha po oluhepo nenge okweeta po ombili muuyuni. Pehala lyokuhulitha po oluhepo, otwe lu ningi owala olindji, pehala lyokuhulitha po iita, otwe yi humitha owala komeho. Shoka inashi hala ando okutya inatu ninga oonkambadhala. Otwa kambadhala omukalo kehe gwokupangela, ngaashi epangelo lyuukomunisi, epangelo lyuukapitali; otwa li twa toto po Oshipandi shIigwana notwa li twa gongele iilwitho yopalute opo tu keelele iita.”
2. Ongiini Jehova te ku ulika masiku uuthemba we wokupangela uuyuni auhe e li omunamapangeloagehe?
2 Oohapu ndhoka dha popiwa metetekelo itadhi kumitha aapiya yaJehova. Ombiimbeli otayi tu lombwele kutya aantu kaya li ya shitwa nelalakano lyokwiipangela yo yene. (Jer. 10:23) Jehova oye awike e na uuthemba wokukala Omunamapangeloagehe. Molwaashoka osho shi li ngawo, oku na uuthemba woku tu tulila po omithikampango, wokupopya kutya onkalamwenyo yetu oyi na okukala yi na elalakano lini noku tu wilika tu gwanithe po elalakano ndyoka. Kakele kaashono, masiku ota ka longitha oonkondopangelo dhe opo a hulithe po oonkambadhala dhaantu dhokwiipangela yo yene ndhoka dha hulila muunyengwi. Pompito oyo tuu ndjoka, ota ka hanagula po aantu ayehe mboka ye ekelahi uuthemba we wokukala Omunamapangeloagehe mboka tawu ka mangulula aantu muulunde, mokwaahagwanenena nosho wo ‘kukalunga komuuyuni mbuka,’ Satana Ondiaboli.—2 Kor. 4:4.
3. Jesaja okwa li u uvaneke shike kombinga yaMesiasa?
3 Muuyuni uupe mboka tawu ka kala Oparadisa, Jehova ota ka pangela aantu pahole okupitila mUukwaniilwa wopaMesiasa. (Dan. 7:13, 14) Jesaja okwa li a hunganeke kombinga yOmukwaniilwa gwawo a ti: “Oshitutuma otashi tsapuka moshithindi shaIsai; noshitayi omomidhi dhasho e tashi imi iiyimati. Ombepo yOMUWA otayi mu lambele, ombepo yowino noyoondunge, ombepo yomayele noyoonkondo, ombepo yuunongo noyokutila OMUWA.” (Jes. 11:1, 2) Omomikalo dhini dhokondandalunde Kalunga a li a longitha ombepo ye ondjapuki okugandja uuthemba wokupangela ‘koshitutuma tashi tsapuka moshithindi shaIsai,’ sha hala okutya okupa Jesus Kristus oonkondo a pangele aantu? Omalalekonuuyamba geni tage ke etwa kokupangela kwe? Opo tu mone omalalekonuuyamba ngoka otu na okuninga shike?
Jesus okwa pewa oonkondo kuKalunga a kale omupangeli
4-6. Ontseyo yini ya simanenena tayi ka ningitha Jesus a kale Omukwaniilwa, Omusaaseri Omukuluntu nOmupanguli omunongo noku na ohenda?
4 Jehova okwa hala okugalulila aalelwa ye megwaneneno kohi yewiliko lyOmukwaniilwa, Omusaaseri Omukuluntu nOmupanguli ngoka e li shili omunandunge noku na ohenda. Osho molwaashoka a hogolola Jesus Kristus okupitila mombepo ondjapuki opo a kale a gwana okugwanitha po iinakugwanithwa mbyoka ya simanenena. Tala komatompelo gamwe kutya omolwashike Jesus ta ka gwanitha po thiluthilu iilonga mbyoka a li a pewa kuKalunga.
5 Jesus oku na ontseyo yomuule yokutseya Kalunga. Omwana awike ngoka okwa kala e shi He uule wethimbo e vule kehe gumwe, tashi vulika uule woomvula omabiliyona. Pethimbo ndyoka, Jesus okwa li i ilongo oshindji kombinga yaJehova, naashoka oshe mu ningitha a popiwe e li “olupe lu wetike lwaKalunga, ngoka ihaa monika.” (Kol. 1:15) Jesus mwene okwa ti: “Kehe ngoka a mono ndje, okwa mona wo Tate.”—Joh. 14:9.
6 Jesus oye a landula ko kuJehova mokutseya nawanawa eshito alihe, mwa kwatelwa aantu. Aakolossa 1:16, 17 otaya ti: “Kalunga okwa shititha Kristus iinima ayihe yomegulu noyokombanda yevi, iinima mbyoka yi wetike naambyoka yaa wetike . . . Kristus okwa li ko manga iinima ayihe ya li yaa ko. Onkee muukumwe naye iinima ayihe otayi ka kala yi li pomahala gayolela.” Dhiladhila owala kombinga yaashoka! Jesus okwa li a longithwa kuKalunga e li “engomba” okushita iinima ayihe. Onkee ano, okwa li u uvite ko uuyelele awuhe wu na ko nasha neshito alihe, okuza kuutopolwa uushonashona sigo okuuluyi uukumithi womuntu. Eeno, Kristus oku na lela uunongo.—Omayel. 8:12, 22, 30, 31.
7, 8. Ongiini ombepo yaKalunga ya li ya kwathele Jesus muukalele we?
7 Jesus okwa li a gwayekwa nombepo ondjapuki yaKalunga. Jesus okwa ti: “Ombepo yOmuwa oya lambele ndje. Osho ngeyi Omuwa okwa gwayeke ndje, ndi uvithile oohepele elaka etoye. Okwa tumu ndje, ndi igidhile oonkwatwa emanguluko, naaposi ya tonate, okumangulula oonakuhepekwa, okutseyitha omumvo, uuna Omuwa te ya, a hupithe aantu ye.” (Luk. 4:18, 19) Sho Jesus a li a ninginithwa, osha li sha yela kutya ombepo ondjapuki oya li ye mu dhimbulukitha iinima mbyoka a li i ilongo manga inee ya kombanda yevi, mwa kwatelwa shoka Kalunga a li a hala a longe pethimbo lyuukalele we kombanda yevi e li Mesiasa.—Lesha Jesaja 42:1; Lukas 3:21, 22; Johannes 12:50.
8 Molwaashoka Jesus okwa li a nkondopalekwa kombepo ondjapuki nokwa li e na olutu nomadhiladhilo ga gwanenena, ka li owala omulumentu omunenenene ngoka a li kombanda yevi, ihe okwa li wo Omulongi omunenenene. Aapulakeni ye oya li nokuli ya “kuminwa elongo lye.” (Mat. 7:28) Oshinima shimwe, Jesus okwa li a popi kombinga yiiyetithi yomaupyakadhi gaantu ngaashi, uulunde, okwaahagwanenena nokwaahenakonasha niinima yopambepo. Okwa li wo a vulu okumoma shoka aantu ye li momitima noku ungaunga nayo shi ikolelela kwaashoka.—Mat. 9:4; Joh. 1:47.
9. Ongiini okutedhatedha konkalamwenyo yaJesus yokombanda yevi kwa koleke einekelo lyoye muye e li Omupangeli?
9 Jesus okwa li kombanda yevi e li omuntu gwopanyama. Okukalamwenyo kwe kwokombanda yevi nokweendathana kwe naantu inaaya gwanenena okwa li kwe mu kwathele lela a kale a gwana okukala Omukwaniilwa. Omuyapostoli Paulus okwa nyola a ti: “[Jesus] okwa li e na okufaathana naamwayina miinima ayihe, opo a ninge omuyambimukuluntu gwawo omunamutimahenda nomwiinekelwa meyakulo lye koshipala shaKalunga. Osho ngaaka oondjo dhaantu otadhi dhimwa po. Onkee ano ye mwene sho a makelwa nokwa hepekwa, ota vulu okukwatha mboka taa makelwa.” (Heb. 2:17, 18) Molwaashoka Jesus okwa li a “makelwa,” ota vulu okukala u uvitile olukeno mboka taya makelwa. Okwa li u ulike sha yela pethimbo lyuukalele we wokombanda yevi kutya omunahenda. Aavu, iilema, aathiminikwa nokuli naanona, oya li haya kala ya manguluka okupopya naye. (Mark. 5:22-24, 38-42; 10:14-16) Aaifupipiki naamboka ya li ya sa ondjala pambepo oya li wo ya hililwa kuye. Mepingathano naashono, aanuuntsa, aainenepeki nosho wo mboka ya li ‘kaaye na ohole yokuhola Kalunga’ oya li ye mu tondo noye mu pataneke.—Joh. 5:40-42; 11:47-53.
10. Omomukalo gwa dhenga mbanda guni Jesus e tu ulukile ohole ye?
10 Jesus okwa gandja omwenyo gwe omolwetu. Oshinima shimwe sha simanenena shoka tashi ulike lela kutya Jesus okwa gwana okukala Omupangeli osho kutya okwa li e na ehalo oku tu sila. (Lesha Episalomi 40:6-10.) Jesus okwa ti: “Ohole onenenene omuntu ta vulu okukala e yi na yokuhola ookuume ke, oyo okugandja omwenyo gwe omolwawo.” (Joh. 15:13) Jesus ngoka inaa fa aapangeli yopantu inaaya gwanenena mboka olundji haya hupu miiniwe yaalelwa yawo, okwa li a gandja omwenyo gwe omolwaantu.—Mat. 20:28.
Jesus okwa pewa oonkondo opo e etele aantu omauwanawa gekuliloyambo
11. Omolwashike tatu vulu okukala twi inekela thiluthilu muJesus e li Omukulili gwetu?
11 Inashi eleka tuu sho Jesus ngoka e li Omusaaseri Omukuluntu ta dhana onkandangala ya simana mo ku tu etela omauwanawa gekuliloyambo lye! Dhoshili, pethimbo lyuukalele we wokombambanda yevi, Jesus okwa li e tu pe ethano lyaashoka ta ka ninga e li Omukulili gwetu pethimbo lyElelo lye lyOomvula Eyuvi, shoka tatu ka nyanyukilwa ngele otwa kala aadhiginini. Okwa li a aludha aavu, iilema, a yumudha aasi, aakutitha oongundu dhaantu nokwa li nokuli a mweneke ombepo yoshikungulu. (Mat. 8:26; 14:14-21; Luk. 7:14, 15) Kakele kaashono, ka li a ningi iinima mbika, opo u ulike oonkondopangelo dhe, ihe oku ulike ohole nohenda ye. Okwa li a lombwele omunashilundu ngoka a li e mu indile e mu aludhe a ti: “Onda hala.” (Mark. 1:40, 41) Jesus ote ku ulika wo olukeno lwa faathana pethimbo lyElelo lye lyOomvula Eyuvi, ihe omuuyuni auhe.
12. Jesaja 11:9 ota ka gwanithwa ngiini?
12 Jesus Kristus nosho wo mboka taya ka pangela pamwe naye otaya ka tsikila okuwilika iilonga yokulonga aantu kombinga yaKalunga, mbyoka a li a tameke oomvula 2 000 lwaampono dha piti. Kungawo oohapu ndhoka dhi li muJesaja 11:9 otadhi ka gwanithwa, ndhoka tadhi ti: “Kondundu yandje ondjapuki itaku ka longwa uuwinayi nenge iikolokosha, oshoka evi otali ka udha okutseya OMUWA kwa fa omeya ga siikila efuta.” Osha yela kutya elongo ndyoka lyopakalunga otali ka kwatela mo uuyelele wu na ko nasha nankene tu na okusila oshimpwiyu evi niishitwa yako oyindji, ngaashi naanaa Adam a li a lombwelwa a ninge petameko. Pehulilo lyoomvula 1 000, elalakano lyaKalunga lyopetameko ndyoka lya popiwa muGenesis 1:28 otali ka kala lya gwanithwa, na ongushu yekuliloyambo otayi ka kala ya longithwa pakuudha.
Okwa pewa oonkondo dhokupangula
13. Jesus okwa li u ulike ngiini kutya oku hole uuyuuki?
13 ‘Kalunga okwa lenge Kristus a ninge omupanguli gwaanamwenyo naasi.’ (Iil. 10:42) Ano itashi hekeleke tuu okutseya kutya Jesus ke na uugoyoki! Uuyuuki nuudhiginini owa fa epaya lya mangwa lya dhiginina moombwetelo dhe. (Jes. 11:5) Okwa li u ulike kutya oku tonde olwiho, uufudhime nosho wo omaukwatya galwe omawinayi, nokwa li a pangula mboka ya li kaaye na ko nasha nokumona iihuna kwayalwe. (Mat. 23:1-8, 25-28; Mark. 3:5) Natango, Jesus okwa li u ulike kutya ka li a fundjalekwa keholokopo lyomuntu lyokombanda “oshoka okwa tseya ye mwene shoka shi li momuntu.”—Joh. 2:25.
14. Omomukalo guni Jesus u ulike kutya oku hole uuyuuki noshike tu na okwiipula?
14 Jesus ota tsikile nokuulika ohole ye yokuhola uuyuuki mokutonatela oshikonga oshinenene shokuuvitha nokulonga aantu muuyuni auhe. Kapu na omuntu, epangelo lyopantu nenge oshishitwa shopambepo tashi vulu okwiimba iilonga mbyoka kaayi longwe ngaashi Kalunga a hala. Onkee ano, otatu vulu okukala tu na einekelo kutya sho iita yaArmagedon tayi ka hula, kombanda yevi alihe otaku ka kala uuyuuki wopakalunga. (Lesha Jesaja 11:4; Mateus 16:27.) Ipula to ti: ‘Mbela ohandi ulukile ngaa aantu muukalele iikala ya fa yaJesus? Mbela ohandi longele Jehova ngaashi tandi vulu nokuli nonando uukolele nenge oonkalo dhandje dhopaumwene itadhi pitike ndje ndi shi ninge?’
15. Okukaleka shike momadhiladhilo taku ke tu kwathela tu longele Kalunga ngaashi tatu vulu?
15 Otatu ka kwathelwa tu longele Kalunga nomutima aguhe ngele otwa kaleke momadhiladhilo kutya iilonga yokuuvitha oye. Kalunga oye a ti kutya iilonga mbyoka nayi longwe; ohe yi wilike wo okupitila mOmwana noha nkondopaleke mboka haya kutha ombinga muyo okupitila mombepo ondjapuki. Mbela owa simaneka ngaa uuthembahenda mboka wu na wokukala omulongi pamwe naKalunga nosho wo nOmwana ngoka ta wilikwa kombepo ondjapuki? Olye ishewe kee shi Jehova ta vulu okwiinyengitha aantu ye vulithe pomamiliyona gaheyali, mboka oyendji yomuyo ya talika ko kutya “inaa longwa” okuuvithila aantu etumwalaka lyUukwaniilwa miilongo 236?—Iil. 4:13.
Lalekwa nuuyamba okupitila muKristus
16. Genesis 22:18 ota popi shike kombinga yomayambeko gaKalunga?
16 Jehova okwa li a lombwele Abraham a ti: “Omungoye nomoluvalo lwoye aantu yomiigwana ayihe otaa ka lalekwa nuuyamba, oshoka owa vulika kelombwelo lyandje.” (Gen. 22:18) Mboka ya tala ko kutya okulongela Kalunga nOmwana okwa simana otaya vulu okukala ye na einekelo momayambeko ngoka tage ke etwa koluvalo lwopaMesiasa. Oyi ipyakidhila kunena nokulongela Kalunga.
17, 18. Jehova okuuvaneka shike shoka shi li muDeuteronomium 28:2, notashi ti shike kutse?
17 Kalunga okwa li a lombwele oluvalo lwaAbraham lwopanyama, oshigwana shaIsraeli a ti: “Vulika ano kOMUWA Kalunga koye, nomayambeko ngaka agehe [ga popiwa mehangano lyOmpango] otaga ka ninga goye.” (Deut. 28:2) Oohapu dha faathana otadhi vulu wo okulombwelwa aapiya yaKalunga yokunena. Ngele owa hala Jehova e ku yambeke, kala ho “vulika” kewi lye. Opo ihe omayambeko ge “otaga ka ninga goye.” Ihe mbela ‘okuvulika’ okwa kwatela mo shike?
18 Dhoshili, okuvulika okwa kwatela mo okuvulika lelalela kwaashoka sha popiwa mOohapu dhaKalunga nokulya iikulya yopambepo mbyoka ha gandja. (Mat. 24:45) Otashi ti wo owu na okuvulika kuKalunga nosho wo kOmwana. Jesus okwa ti: “Hakehe ngoka ti ithana ndje ‘Omuwa, Omuwa’, ta yi [mUukwaniilwa wegulu, KB], aawe, oye tuu ngoka ta gwanitha ehalo lyaTate yomegulu.” (Mat. 7:21) Okuvulika kuKalunga otashi ti okuvulika nehalo ewanawa kelongekidho ndyoka a tula po, aakuluntugongalo mboka a langeka po megongalo lyopaKriste “ye li omagano.”—Ef. 4:8.
19. Ongiini tatu vulu okumona omayambeko?
19 Mokati kaantu mboka “ye li omagano,” omu na iilyo yOlutuwiliki, mbyoka tayi longo yi li aakalelipo yegongalo lyopaKriste alihe. (Iil. 15:2, 6) Dhoshili, iikala yetu yi na ko nasha naamwahe yaKristus yopambepo oyi li oshinima sha simanenena shoka tashi ku utha kutya otatu ka pangulwa ngiini pethimbo lyuudhigu uunene. (Mat. 25:34-40) Onkee ano, okuyambidhidha nuudhiginini aagwayekwa yaKalunga oko omukalo gumwe moka tatu vulu okumona omayambeko.
20. (a) Aamwatate mboka “ye li omagano” oye na oshinakugwanithwa sha simana shini? (b) Ongiini tatu vulu okuulika kutya otwa simaneka aamwatate mbaka?
20 Aantu mboka “ye li omagano” oya kwatela mo wo iilyo yOkomitiye yOshitayimbelewa, aatonateli aayendi naakuluntugongalo mboka ayehe ya langekwa po kombepo ondjapuki. (Iil. 20:28) Oshinakugwanithwa sha simana shaamwatate mbaka osho okutunga pambepo oshigwana shaKalunga sigo “atuheni twa hangana kumwe muukumwe womeitaalo lyetu nomontseyo yetu okutseya Omuna gwaKalunga. Otatu ka ninga ihe aakuluntu twa koka, twa thika kegwano lyuukuluntu waKristus.” (Ef. 4:13) Dhoshili, nayo inaya gwanenena ngaashi tse inaatu gwanenena. Otatu ka lalekwa nuuyamba ngele otwa taamba ko nolupandu esiloshimpwiyu lyawo lyopahole.—Heb. 13:7, 17.
21. Omolwashike she endelela tu vulike kOmwana gwaKalunga?
21 Masiku Kristus ota ka katukila onkatu uuyuni waSatana. Ngele shoka sha ningwa, okukala nomwenyo kwetu otaku ki ikolelela kwaashoka Jesus ta ka tokola, molwaashoka oye a pewa uuthemba kuKalunga wokuwilika “ongundu onene” moku yi fala “koothithiya dhomeya omanamwenyo.” (Eh. 7:9, 16, 17) Onkee ano, natu ningeni ngaashi tatu vulu ngashingeyi tu kale hatu vulika nehalo ewanawa nokukala tu na olupandu okupandula Omukwaniilwa ngoka ta wilikwa kombepo ondjapuki yaJehova.
Oshike wi ilonga momanyolo taga landula?
• Jesaja 11:1-5
• Genesis 22:18
[Ethano pepandja 25]
Olukeno lwaJesus olwa li lwi iwetikile sho a yumudha okamwanakadhona kaJairus