Otwa pewa oonkondo dhokusinda emakelo kehe

“Ngame otandi vulu shaa shoka, oshoka Kristus ota koleke ndje.”—FIL. 4:13.

1. Omolwashike oshigwana shaJehova hashi taalelwa komaupyakadhi ogendji?

OSHIGWANA shaJehova olundji ohashi makelwa momikalo dhi ili nodhi ili. Omamakelo gamwe ohage tu adha omolwokwaaha gwanenena nenge ge li oshilanduliko shonkalelo yethimbo tu li mo. Galwe ohage tu adha omolwuutondwe mboka wu li pokati kaamboka haya longele Kalunga naamboka ihaaye mu longele. (Gen. 3:15) Okuza nale mondjokonona yaantu, Kalunga okwa li a kwathele aapiya ye aadhiginini yi idhidhimikile omapataneko omolwelongelokalunga, ya kondjithe ethiminiko lya kwata miiti lyoomakula noyi idhidhimikile omaupyakadhi agehe galwe. Ombepo ye ondjapuki otayi vulu oku tu nkondopaleka tu ninge sha faathana.

Ombepo ondjapuki ohayi tu kwathele tu idhidhimikile omapataneko omolwelongelokalunga

2. Onelalakano lini aantu haya hepekwa omolwelongelokalunga, nomahepeko ngoka ohaga vulu okuningwa momikalo dhini?

² Omapataneko omolwelongelokalunga ohaga ningwa nelalakano lyokuhepeka nenge lyokweehameka owina aantu omolweitaalo lyawo. Ohaga ningwa nelalakano lyokweethitha po aantu eitaalo lyawo, okukeelela kaali taandele nenge okuteya po uudhiginini wooitaali. Omapataneko otaga vulu okuningwa momikalo dhi ili nodhi ili, dhimwe odhi iwetikile nadhimwe odhiineya. Ombiimbeli otayi faathanitha omaponokelo gaSatana naangoka gonimegona neyoka.—Lesha Episalomi 91:13.

3. Omapataneko geni taga vulu okufaathanithwa naangoka gonime nogeyoka?

³ Ngaashi onime ohahu, Satana olundji oha ponokele aantu momikalo dhi iwetikile okupitila melongithonkondo, oku ya tulitha mondholongo nenge oku ya tulila po oondjindikila. (Eps. 94:20) Olopota yomo-Yearbook ndjoka hayi hokolola iilonga yOonzapo dhaJehova methimbo lyongashingeyi omu na omahokololo ogendji taga popi kombinga yomakoto ngoka. Oongundu dhokuhangakena dhokulonga omuyonena, dhimwe ndhoka dha li tadhi wilikwa kaasita nenge kwaamboka ye hole opolotika, odha li dha hepeke oshigwana shaKalunga miilongo oyindji. Omaponokelo ngoka ga fa gonime oga li ga ningitha oyendji ye ethe po okulongela Jehova. Ngaashi eyoka, Ondiaboli ohayi ponokele wo aantu nomakoto meholamo opo yi yonagule omadhiladhilo gawo noyi ya pukithe ya longe ehalo lyayo. Ihe otatu vulu okukondjitha omapataneko gomaludhi agehe okupitila mombepo ondjapuki yaKalunga.

4, 5. Omukalo dhingi oguni gwokwiilongekidhila omahepeko, nomolwashike? Gandja oshiholelwa.

⁴ Okudhiladhila kunkene omahepeko taga ka kala kaku shi omukalo gwa dhenga mbanda yokwiilongekidhila omahepeko. Uushili owo kutya katu shi kutya omahepeko geni tage ke tu adha monakuyiwa, onkee ano, itatu vulu okukala tatu ipula niinima mbyoka tashi vulika kaayi ka ningwe nando. Ihe opu na oshinima shontumba shoka tatu vulu okuninga. Oyendji yomwaamboka ya li yi idhidhimikile omahepeko osho ya ninga ngaaka, mokukala taya tedhatedha kiiholelwa yaakakateli yuudhiginini, ngaashi ya popiwa mOmbiimbeli nosho wo komalongo gaJesus nokoshiholelwa she. Shika osha li she ya ningitha ya vule okukokeka ohole yawo yokuhola Jehova. Ohole ndjoka otayi ke ya kwathela ya kondjithe omahepeko kehe ngoka tage ke ya adha.

⁵ Tala oshiholelwa shaamwameme yaali yokuMalawi. Aalongithi yoonkondo oya li ye ya dhenge, ye ya hula noye ya tilitha kutya otaye ya kwata koonkondo shoka ya li taye shi ningi nelalakano lyoku ya ningitha ya lande uukalata wuukwashilyo wopolotika. Ongundu ndjoka oya li ye ya fundju kutya nokuli nuukwanegumbo waBetel owu na uukalata mboka. Mbela omumwameme okwa li e ya yamukula ngiini? Okwa ti: “Tse ohatu longele owala Jehova Kalunga. Onkee ano, ngele aamwatate koshitayimbelewa oya landa uukalata mboka, shoka itashi ti sha kutse. Itatu ki igandja, nokuli nonando omu tye otamu tu dhipaga.” Aamwameme mboka oya li ya ethiwa konima sho ya kondjitha nuulaadhi emakelo ndyoka.

6, 7. Jehova oha nkondopaleke ngiini aapiya ye uuna ya taalelwa komahepeko?

⁶ Omuyapostoli Paulus okwa li a popi kutya Aakriste yomuTessalonika oya li ya taamba ko etumwalaka lyoshili “nenyanyu” nonando oya li “moothina odhindji.” (1 Tes. 1:6) Dhoshili, Aakriste oyendji yopethimbo lyonale nolyongashingeyi, mboka ya li ya taalele noya sindi omahepeko oya li ya popi kutya nonando omahepeko oga li gi indjipala, oya li ye na ombili yokomwenyo, ndjoka yi li uukwatya wumwe wiiyimati yombepo Ondjapuki yaKalunga. (Gal. 5:22) Ombili ndjoka otayi ya kwathele wo ya gamene omitima dhawo noonkondo dhawo dhopamadhiladhilo. Eeno, Jehova oha longitha oonkondo dhe tadhi longo okunkondopaleka aapiya ye ya vule okwiidhidhimikila omapataneko nokukatuka pandunge uuna taya adhika komaupyakadhi.a

⁷ Mboka ya li po oya li ya kumithwa kokutokola toko kwoshigwana shaKalunga shi kakatele uudhiginini washo nokuli nonando osha taalelwa komapataneko ga kwata miiti. Oonzapo odha li tadhi monika dha fa dha pewa oonkondo dhi vule dhopantu, nodha li tuu dhe dhi pewa shili. Omuyapostoli Petrus ote tu shilipaleke ta ti: “Ngele tamu shekwa molwaasho tamu landula Kristus, one aanelago, oshoka Ombepo yuuyelele, Ombepo yaKalunga, oyi li kombanda yeni.” (1 Pet. 4:14) Uushili kutya ohatu hepekwa omolwokudhiginina omithikampango dhuuyuuki otawu ulike kutya otwa hokiwa kuKalunga. (Mat. 5:10-12; Joh. 15:20) Enyanyu ndika tu na itali ulike tuu kutya otwa yambekwa kuJehova!

Oya li ya kwathelwa ya kondjithe omathiminiko goomakula

8. (a) Oshike sha li sha kwatha Josua naKaleb ya kondjithe ethiminiko lyoomakula? (b) Oshike tatu vulu okwiilonga moshiholelwa shaJosua naKaleb?

⁸ Ethiminiko li li momukalo gwiineya ndyoka Aakriste ye na okwiidhidhimikila olyo ethiminiko ewinayi lyoomakula. Ihe molwaashoka ombepo yaJehova oyi na oonkondo yi vule ombepo yuuyuni, otatu vulu okukondjitha aantu mboka taye tu sheke, mboka taya taandeleke iifundja kombinga yetu nenge mboka taya kambadhala oku tu thiminika tu tse kumwe nomithikampango dhawo. Pashiholelwa, oshike sha li sha kwathele Josua naKaleb kaaya tse kumwe nomataloko goondaadhi dhilwe omulongo ndhoka dha li dha tumwa dhi ka ndaadhe evi lyaKaanana? Ombepo ondjapuki ndjoka ya li ye ya nkondopaleke, oya li “ombepo” yi ili nenge iikala yopamadhiladhilo yi ili.—Lesha Numeri 13:30; 14:6-10, 24.

9. Omolwashike Aakriste ye na okukala ye na ehalo okukala ya yooloka ko kuyalwe?

⁹ Sha faathana, ombepo ondjapuki oya li ya nkondopaleke aayapostoli yaJesus ya vulike kuKalunga pehala lyokuvulika kwaamboka aantu oyendji ya li ya tala ko ye li aalongi yelongelokalunga lyashili. (Iil. 4:21, 31; 5:29, 32) Aantu oyendji oye hole okuninga shoka tashi ningwa kaantu oyendji, opo ya yande okupatanekwa. Ihe Aakriste yashili olundji oye na okudhiginina shoka ye shi kutya oshi li mondjila. Nokuli nonando osho shi li ngawo, molwaashoka ohaya nkondopalekwa kombepo yaKalunga, ihaya kala ya tila okukala ya yooloka ko kaantu yalwe. (2 Tim. 1:7) Natu ka kundathaneni onkalo yimwe moka kaatu na nando okwiigandja kethiminiko lyoomakula.

10. Aakriste yamwe otashi vulika ya tsakaneke eshongo lyoludhi luni?

¹⁰ Otashi vulika shi kale eshongo enene kaagundjuka yamwe ngele oya mono kutya kuume kawo gumwe okwa yona. Otashi vulika ya kale yu uvite kutya okukonga ekwatho lyopambepo omolwookuume kawo otashi ka yona po einekelo lyawo muyo; onkee ano, ohaya tindi okupopya kombinga yoshinima shoka molwaashoka oya hala okukaleka ookuume kawo ya gamenwa. Otashi vulika omuyoni a kale ta thiminike ookuume ke ya kale nokuholeka omayono ge. Dhoshili, uupyakadhi woludhi nduka kawu shi oshinima oshipe kaagundjuka. Aakuluntu yamwe nayo wo otashi vulika ya mone oshidhigu okulombwela aakuluntugongalo omayono gookuume kawo nenge giilyo yuukwanegumbo wawo. Ihe Aakriste yashili oye na okutala ko ngiini omathiminiko ga tya ngaaka?

11, 12. Ngele gumwe gwomegongalo lyeni okwe ku lombwele kuu popye kombinga yepuko lye, oto ke mu yamukula momukalo guni omwanawa, nomolwashike?

¹¹ Thaneka onkalo ndjika momadhiladhilo. Natu tye nduno ando omumwatate omugundjuka, Alex, okwa tseya kutya kuume ke Steve gwomegongalo lyawo oku na omukalondjigilile gwokutala omathano giipala. Opo nduno, Alex okwa ka lombwela Steve kutya ohi ipula noonkondo kombinga yaashoka ha ningi. Nonando ongawo, Steve ka li i itula mo naanaa mwaashoka a lombwelwa. Sho Alex e mu lombwele a popye naakuluntugongalo kombinga yaashoka, Steve okwa li e mu yamukula kutya ngele yo yaali ookuume lela, Alex ite ke shi lombwela aakuluntugongalo. Mbela Alex oku na okukala a tila okukanitha kuume ke? Otashi vulika a kale a kumwa kutya aakuluntugongalo otaye ki itaala lye ngele Steve oti ipatana. Nonando ongawo, onkalo itayi ka hwepopala nando ngele Alex ina popya kombinga yaashoka. Dhoshili, shika otashi ka kanithitha owala ekwatathano ndyoka Steve e na naJehova. Alex ota ka ninga nawa ngele ta dhimbulukwa kutya “okutila omuntu okulukila omwigo, ihe ngoka ti inekele OMUWA, ota gamenwa.” (Omayel. 29:25) Mbela Alex okwa li ta vulu okuninga po shike ishewe? Otashi vulika a ka kundathane naSteve nohole kombinga yuupyakadhi mboka. Shoka osha li tashi ka pula uulaadhi. Otashi vulika, oshikando shika Steve ta ka taamba ko ompito ndjoka opo ya popye kombinga yuupyakadhi we. Alex oku na okuladhipika ishewe Steve a ka popye naakuluntugongalo noku mu lombwela kutya ngele ine shi ninga muule wethimbo lyontumba, Alex ote ke ya lombwela.—Lev. 5:1.

¹² Ngele owe ki iyadha monkalo ya tya ngawo, kuume koye ngoka to kwathele otashi vulika petameko kaa kale a hokwa oonkambadhala dhoye dhoku mu kwathela. Ihe otashi vulika mokweendela ko kwethimbo a ka mone kutya shoka wa li to ningi owa li to shi ningi omolwuuwanawa we. Ngele ngoka a yona okwa pewa ekwatho e te li taamba ko, otashi vulika a ka kale aluhe e na olupandu omolwuulaadhi nuudhiginini woye. Mepingathano naashono, ngele okwa kala e ku geela, mbela oye ngaa kuume kashili ngoka wa hala okukala wu na? Oshi li nawa aluhe okunyanyudha Kuume ketu omunenenene, Jehova. Ngele otwe mu pititha komeho, yalwe mboka ye mu hole otaye ke tu simaneka omolwuudhiginini wetu nokuninga ookuume ketu kashili. Katu na nando okweethela Ondiaboli megongalo lyopaKriste. Ngele otwa ningi ngawo, otatu ka nikitha lela uuthigwa ombepo ondjapuki yaJehova. Ihe ohatu katuka metsokumwe nayo, mokukaleka egongalo lyopaKriste lya yogoka.—Ef. 4:27, 30.

Otwa pewa oonkondo opo tu idhidhimikile uupyakadhi kehe

13. Mbela uupyakadhi wuni oshigwana shaJehova sha taalela, nomolwashike iinima ya tya ngawo yi li apuhe?

¹³ Uupyakadhi otashi vulika wu holoke po momukalo kehe, ngaashi eshunopevi lyopamahupilo, okukanitha iilonga, iiponga yopaunshitwe, eso lyagumwe ngoka tu hole, uupyakadhi wuukolele nosho tuu. Molwaashoka otu li ‘momathimbo omadhigu,’ atuheni otwa tegelela masiku nenge konima yethimbo oku ka ungaunga nomamakelo goludhi lwontumba. (2 Tim. 3:1) Ngele shika oshe tu ningilwa, inatu pumbwa okukala twa ngwangwana. Ombepo ondjapuki otayi vulu oku tu pa oonkondo tu idhidhimikile uupyakadhi kehe.

14. Oshike sha li sha nkondopaleke Job i idhidhimikile omaupyakadhi?

¹⁴ Job okwa li a adhika komaupyakadhi ga landulathana. Okwa li a kanitha iiniwe ye, aanona, ookuume ke oya li ye mu ekelehi, a kwatwa kuunkundi nomukulukadhi gwe ka li we i inekela muJehova. (Job 1:13-19; 2:7-9) Nonando ongawo, Job okwa li a mono omuhekeleki gwashili, Elihu. Jehova okwa li a pe Job etumwalaka nenedhiladhilo olya li tali ti: “Job, pulakena! Ilongelela, ndhindhilika iilongankumwe yaKalunga!” (Job 37:14) Mbela oshike sha li sha kwathele Job i idhidhimikile omahepeko? Oshike mbela tashi vulu oku tu kwathela tu i idhidhimikile omahepeko ngoka tatu ningilwa? Shoka sha li sha kwathele Job notashi vulu oku tu kwathela osho okudhimbulukwa nokutedhatedha kombinga yiinima mbyoka ya longwa kekwatho lyombepo ondjapuki nosho wo koonkondo dha yoolokathana ndhoka dha li dha gandjwa kuJehova. (Job 38:1-41; 42:1, 2) Otashi vulika pu na ethimbo limwe monkalamwenyo yetu tatu dhimbulukwa nkene Kalunga a li u ulike ohokwe mutse pauhandimwe. Sigo ongashingeyi okwe tu hokwa.

15. Oshike sha li sha nkondopaleke omuyapostoli Paulus i idhidhimikile omahepeko?

¹⁵ Omuyapostoli Paulus okwa li i idhidhimikile omaupyakadhi ogendji monkalamwenyo omolweitaalo. (2 Kor. 11:23-28) Oshike sha li she mu kwathele a kale nondjele noku ngungumaneke omaiyuvo ge sho a li moonkalo ndhoka oondhigu? Okwa li i inekela Jehova okupitila megalikano. Pethimbo lyokumakelwa kwe otashi vulika sha li she mu fala sigo omokuhepekwa kwe, Paulus okwa nyola a ti: “Omuwa okwa kala pamwe nangame nokwa pe ndje oonkondo, onkee onda vulu okuuvithila aapagani ayehe, yu uve elaka etoye. Ihe onda hupithwa mokana konime.” (2 Tim. 4:17) Onkee ano, okupitila moshimoniwa she, Paulus okwa li a vulu okushilipaleka ooitaali ooyakwawo kutya ka li a pumbwa ‘okukala nando e na oshimpwiyu shasha.’—Lesha Aafilippi 4:6, 7, 13.

16, 17. Gandja oshiholelwa nkene Jehova ha nkondopaleke oshigwana she shi idhidhimikile omaupyakadhi kunena.

¹⁶ Omukokolindjila gwedhina Roxana okwa li a mono nkene Jehova a li a sile oshimpwiyu oshigwana she. Sho a li a pula omugandji gwiilonga gwe epitikilo e mu pe omasiku gontumba opo a vule okuya koshigongi, okwa li e mu yamukula nondjahi kutya ngele okwa yi ota kanitha iilonga ye. Nonando ongawo, Roxana okwa yi nokwa li ta galikana kee na ezimbuko opo kaakanithe iilonga ye. Konima yaashoka okwa li a pepelelwa. Shilishili, Omaandaha konima yoshigongi, omugandji gwiilonga okwa li e mu tidha miilonga. Roxana okwa li u uvite nayi. Nonando iilonga mbyoka oya li yi na ondjambi onshona okwa li e yi pumbwa opo a kwathele uukwanegumbo we. Okwa li a galikana ishewe, nokwa li ta dhiladhila kutya Kalunga okwe mu sila oshimpwiyu pambepo koshigongi, onkee ano ote ke mu sila wo oshimpwiyu palutu. Sho ta shuna kegumbo, okwa li a mono endhindhiliko lya nyolwa “Otwa pumbwa ekwatho” lyaangoka e na ontseyo yokulonga nomashina gokuhondja mofabulika nokwa li a ningi eindilo. Omukuluntu gwiilonga nonando okwa tseya kutya ke na ontseyo yokulonga nomashina ngoka, okwe mu pe iilonga, nondjambi ndjoka a li ha mono konyala oya li yi vulithe lwaali pwaandjoka a li ha mono tango. Roxana okwa li a mono kutya egalikano lye olyu uvika. Elalekonuuyamba enenenene olyo kutya okwa li a vulu okuuvithila aaniilonga ooyakwawo onkundana ombwanawa. Yatano yomuyo, mwa kwatelwa omukuluntu gwiilonga yawo, oya li ya taamba ko oshili e taya ninginithwa.

¹⁷ Omathimbo gamwe, otashi vulika omagalikano getu ga kale ga fa itaaga yamukulwa, sha hala okutya, pethimbo mpoka nenge momukalo moka twa tegelela. Ngele oshi li ngawo, nopwaahe na omalimbililo, opu na etompelo ewanawa. Jehova oku shi shi, ihe otashi ke tu yelela owala monakuyiwa. Otatu vulu okukala nuushili kutya Kalunga ihe ekelehi mboka ye mu inekela.—Heb. 6:10.

Otwa kwathelwa tu sinde omahepeko nomamakelo

18, 19. (a) Omolwashike tatu vulu okukala twa tegelela okwaadhika komahepeko nosho wo komamakelo? (b) Ongiini to vulu okutaalela omahepeko nomupondo?

¹⁸ Oshigwana shaJehova ihashi kala sha kumwa ngele tashi adhika komamakelo, ketekomukumo, komahepeko nosho wo komathiminiko goomakula. Uushili owo kutya uuyuni owu tu tonde. (Joh. 15:17-19) Natango, ombepo ondjapuki otayi vulu oku tu kwathela tu sinde omapataneko kehe ge tu taalela mokulongela kwetu Kalunga. Jehova ite ke etha tu makelwe nemakelo li vule oonkondo dhetu. (1 Kor. 10:13) Kapu na nando esiku limwe e tu thige po nenge e tu ekelehi. (Heb. 13:5) Okuvulika kOohapu dhe dha nwethwa mo otaku tu gamene noku tu nkondopaleka. Kakele kaashono, ombepo yaKalunga otayi vulu okwiinyengitha ooitaali ooyakwetu ye tu kwathele uuna twa pumbwa ekwatho.

¹⁹ Atuheni natu tsikileni okukonga ombepo ondjapuki okupitila megalikano nomokukonakona Omanyolo. Natu tsikileni okunkondopalekwa ‘koonkondo ndhoka tadhi zi mesimano lyoonkondo dhaKalunga, nadhi tu koleke, opo tu wape okwiidhidhimikila ashihe shoka tashi tu adha.’—Kol. 1:11.

[Enyolo lyopevi]

Oto yamukula ngiini?

• Ongiini to vulu okwiilongekidhila okukondjitha omahepeko?

• Oto ki inyenga ngiini ngele gumwe te ku ladhipike kuu lombwele aakuluntugongalo eyono lye?

• Oto vulu okukala neinekelo lini nonando owa taalelwa komaupyakadhi gontumba?

[Ethano pepandja 30]

Oshike tatu vulu okwiilonga kuJosua naKaleb?

[Ethano pepandja 31]

Ongiini to vulu okukwathela kuume ngoka a yona?