Kala wi ilongekidha!

“Kaleni mwi ilongekidha, oshoka Omuna gwOmuntu ote ke ya pethimbo tuu ndyoka inaamu mu tegelela.”—MAT. 24:44.

1, 2. (a) Iiningwanima yini ya hunganekwa momahunganeko gOmbiimbeli tayi vulu okuyelekanithwa nokuponokela kongwe mwene gwayo? (b) Oshiponokela shoka shi li pokuningwa oshe ku guma ngiini?

MUULE woomvula odhindji, omunyandi gumwe a tseyika nawa okwa kala ha nyanyudha aatali mokukala ta dhana nombili noongwe dhe ndhoka a dheula. Okwa ti: “Uuna oshinamwenyo she ku inekela thiluthilu, oho kala wa fa wu wete wa pewa omagano omawanawa kaaku na we.” Ihe mu 3 Kotoba 2003 einekelo ndyoka olya li lya hulu po. Omolwomatompelo inaaga tseyika, ongwe ye yimwe yookilogram 172 oya li ye mu ponokele. Kapu na ngoka a li a tegelela omudheuli ngoka a ponokelwe kongwe ye noka li e shi ilongekidhila.

² Osha simana tu ndhindhilike kutya Ombiimbeli oya hunganeka kombinga ‘yoshilikama’ shoka tashi ke tu ponokela notwa pumbwa okukala twi ilongekidha. (Lesha Ehololo 17:15-18.) Oshilikama shika otashi ka ponokela oolye? Uuyuni wOndiaboli otawu ka lunduluka mepathimo lyeho. Oshilikama oshitiligane otashi thaneke Iigwana ya Hangana ‘nooniga omulongo’ otadhi thaneke omahangano gopapolotika agehe. Oshilikama shika otashi ka pilukila ombwanda Babiloni Oshinene, shoka shi lile po omalongelokalunga giifundja e tashi yi hanagula po. Oshiningwanima shika otashi ka ningwa uunake? Katu shi ethimbo notundi. (Mat. 24:36) Otu shi shi kutya otashi ka ningwa pethimbo mpoka inaatu shi tegelela nethimbo ndyoka lya hupa ko opo shoka shi ningwe efupi noonkondo. (Mat. 24:44; 1 Kor. 7:29) Onkee ano, osha simanenena tu kale twi ilongekidha pambepo opo ngele oshilikama shoka tashi ponokelwa naasho Kristus te ke ya e li Omupanguli, a ka kale wo Omuhupithi gwetu. (Luk. 21:28) Opo tu kale twi ilongekidha, otatu vulu okwiilonga kaapiya yaKalunga aadhiginini mboka ya li ya kala yi ilongekidha noya li ya mono sho omauvaneko ge taga gwanithwa. Mbela otatu ka katuka ngaa metsokumwe naashoka tatu ilongo miimoniwa yaantu mboka ya li ko shili?

Kala wi ilongekidha ngaashi Noowa

3. Oonkalo dhini dha li dhe shi ningi shi kale eshongo kuNoowa mokulongela kwe Kalunga nuudhiginini?

³ Nonando pethimbo lye kombanda yevi okwa li ku na oonkalo dhikenyeneka, Noowa okwa li a kala i ilongekidha a ka mone egwanitho lyeuvaneko lyaKalunga. Dhiladhila owala kombinga yomashongo ngoka Noowa a li e na okutaalela sho aayengeli aanashipotha ya li yi izaleke omalutu gopantu e taya yi momilalo naakiintu. Okuya momilalo huka kaakwa li paunshitwe okwa li kwe ya ningi ya vale aanona “oofule” mboka ya li haya ningi yalwe onyanya. (Gen. 6:4) Dhiladhila owala kelongitho lyoonkondo ndyoka lya li lya ningwa kaalefule mbaka kehe mpoka ya li ya yi. Omolwaashoka uukolokoshi wa lundu nomadhiladhilo gaantu nomikalo dhawo dha kala dha nyata. Opo nduno, Omuwa Omunamapangeloagehe, Jehova, okwa li a gandja euthompango lyopakalunga kutya uunake ta ka hanagula po aakolokoshi mboka.—Lesha Genesis 6:3, 5, 11, 12.a

4, 5. Omomikalo dhini oonkalo dhopethimbo lyetu dha faathana naandhoka dhopethimbo lyaNoowa?

⁴ Jesus okwa li a hunganeke kutya oonkalo dhopethimbo lyetu otadhi ka kala dha fa ndhoka dhopethimbo lyaNoowa. (Mat. 24:37) Pashiholelwa, natse ohatu mono nkene iishitwa yopambepo iikolokoshi hayi yi iilonga moshipala. (Eh. 12:7-9, 12) Aayengeli mbaka oompwidhuli oya li yi izaleke omalutu gopantu pethimbo lyaNoowa. Nonando ngashingeyi ihadhi vulu okukala dhi na omalutu gopantu, ohadhi kambadhala okunwetha mo aagundjuka naakokele. Aantu kaye shi shi kutya oompwidhuli ndhika dha yonuka komilalo ohadhi kala dha nyanyukilwa iilonga iiwinayi noya nyata yaantu mboka tadhi vulu okunwetha mo kombanda yevi.—Ef. 6:11, 12.

⁵ Oohapu dhaKalunga otadhi popi Ondiaboli yi li “omudhipagi” notadhi ti wo kutya ohayi “eta eso.” (Joh. 8:44; Heb. 2:14) Kalunga iha etha yi dhipage kehe gumwe ya hala okudhipaga. Kakele kaashono, oshishitwa shika shopambepo oshikolokoshi ohashi humitha komeho ombepo yokukotokela nokupukitha. Ohashi tula momitima dhaantu omadhiladhilo gokudhipaga. Pashiholelwa, okanona 1 komaanona 142 mboka haya valwa muAmerika, ohaka ningi oshihakwana shedhipago. Shi na ko nasha nelongithonkondo ndyoka li li po kunena, mbela oto dhiladhila kutya Jehova ke wete onkalo ndjoka ngaashi naanaa a li e yi mono pethimbo lyaNoowa? Mbela ota ka kala inaa ninga po sha?

6, 7. Ongiini Noowa nuukwanegumbo we ya li yu ulike kutya oye na eitaalo netilokalunga?

⁶ Konima, Kalunga okwa li a lombwele Noowa kutya okwa tokola okweeta eyelu kombanda yevi, ndyoka lya li tali ka hulitha po aantu ayehe. (Gen. 6:13, 17) Jehova okwa li a lombwele Noowa a tunge onguluwato ya fa oshiketha oshinene. Noowa nuukwanegumbo we oya li ya tameke okutunga onguluwato. Oshike sha li she ya kwathele ya vulike noyu ulike kutya oyi ilongekidha sho ethimbo lyaKalunga lyokuhanagula lya thiki?

⁷ Eitaalo lyashili netilokalunga olya li lyi inyengitha Noowa nuukwanegumbo we ya longe ngaashi Kalunga e ya lombwele. (Gen. 6:22; Heb. 11:7) Noowa e li omutse gwuukwanegumbo okwa li a kala a tonata pambepo noka li a longo uuwinayi mboka wa li hawu longwa kaantu yomoshitopolwa she. (Gen. 6:9) Okwa li e shi shi kutya uukwanegumbo we owa li wu na okukala wa kotoka opo kaawu taambe omikalo omiwinayi dhelongithonkondo niikala yokwaaha vulika yaantu mboka ya li ye ya kundukidha. Osha li sha simana kaaya kale yi itula miinima yonkalamwenyo yakehe esiku. Kalunga okwa li e ya nine iilonga, nosha li sha simanenena uukwanegumbo auhe wu gandje eitulomo lyawo alihe kiilonga mbyoka.—Lesha Genesis 6:14, 18.

Noowa nuukwanegumbo we oya li yi ilongekidha

8. Oshike tashi ulike kutya uukwanegumbo waNoowa owa li wu na eigandjo lyometilokalunga?

⁸ Ehokolo lyOmbiimbeli otali ukitha eitulomo komutse gwuukwanegumbo, Noowa, ihe omukulukadhi gwe noyana nosho wo aakulukadhi yawo oya li wo aalongeli yaJehova. Omupolofeti Hesekiel okwa li wo e shi koleke. Okwa ti kutya ando Noowa nuukwanegumbo we oya li ko pethimbo lye, ando aanona ye kaya li ya hupithwa omolwuuyuuki wahe. Oya li aakuluntu ya gwana okutokola kutya otaya vulika nenge hasho. Onkee ano, oya li yu ulike pauhandimwe kutya oye hole Kalunga noondjila dhe. (Hes. 14:19, 20) Uukwanegumbo waNoowa owa li wa pulakene shoka te wu lombwele, nowa li wu na eitaalo lya fa lye, nokawa li we etha enenwethomo lyayalwe li ya imbe ya longe oshilonga shoka ya pewa kuKalunga.

9. Otu na iiholelwa yini kunena yaantu mboka tayu ulike kutya oye na eitaalo lya fa lyaNoowa?

⁹ Otashi ladhipike shi li kunena okumona omitse dhomaukwanegumbo mehangano lyaJehova muuyuni auhe tadhi ningi ngaashi tadhi vulu dhi holele Noowa. Odhi shi kutya inashi gwana owala okusila oshimpiiyu omaukwanegumbo gadho moku ga pa iikulya, omizalo, ehala lyokukala nosho wo okutuma aanona yawo koosikola. Odhi na wo okusila oshimpwiyu omaukwanegumbo gadho pambepo. Mokuninga ngaaka, ohadhi ulike kutya odhi ilongekidhila shoka Jehova ta ka ninga masiku.

10, 11. (a) Sho Noowa nuukwanegumbo we ya li monguluwato oya li yu uvite ngiini? (b) Oshi li nawa twi ipule epulo lini?

¹⁰ Otashi vulika Noowa, omukulukadhi gwe, oyanamati naakulukadhi yawo ya li ya longo uule woomvula 50 lwaampono mokutunga onguluwato. Sho ya li taye yi tungu, osha yela kutya oya li haya yi mo lwiikando omathele. Oya shilipaleke kutya meni itamu vulu okuya omeya, oya tula mo iikulya ya gwana nokweeta mo iinamwenyo. Kala wa fa wu wete shoka tashi ningwa. Lwahugunina esiku enene osho lya thiki. Oya li ya yi monguluwato mesiku eti-17 lyomwedhi omutiyali momumvo 2370 K.E.N. Jehova okwe edhile omweelo, nomvula oya tameke okuloka. Ndjika kaya li owala omvula ondhigu. Oothithiya dhomuule noombende dhokegulu odhe eguluka nomvula yepoola oya loko onguluwato. (Gen. 7:11, 16) Aantu pondje yonguluwato oya li taya si omeya omanga mboka ya li meni ya li ya hupu. Uukwanegumbo waNoowa otashi vulika wa li wu uvite ngiini? Eeno, owa li wa pandula Kalunga noonkondo. Ihe nopwaahe na omalimbililo, otashi vulika ya li taya ti: ‘Inatu nyanyukwa tuu sho twa kala nokweenda pamwe naKalunga kashili nokuulika kutya otwi ilongekidha!’ (Gen. 6:9) Mbela owa fa wu iwete wu li handiyaka yaArmegeddon, wa pandula noonkondo ngaashi uukwanegumbo waNoowa?

¹¹ Kapu na shoka tashi vulu okukeelela Omunankondoadhihe kaa gwanithe po euvaneko lye lyokuhulitha po uuyuni waSatana mbuka. Ipula to ti: ‘Mbela ondi na ngaa einekelo kutya kapu na nando olimwe lyomomauvaneko gaKalunga tali ka kala inaali gwanithwa nokuli nando omokanima okashona nosho wo kutya agehe otaga ka gwanithwa pethimbo lye lyo opala?’ Ngele osho, ulika kutya owi ilongekidha mokukaleka momadhiladhilo kutya “esiku lyaJehova” otali ya neendelelo.—2 Pet. 3:12, NW.

Moses okwa li a kala aluhe a tonata

12. Oshike sha li tashi vulu okuya moshipala uupambepo waMoses?

¹² Natu tale koshiholelwa shilwe ishewe. Pataloko lyopantu, Moses okwa li ta monika a fa ta ka kala e li pondondo yi li nawa muEgipiti. Molwaashoka Moses okwa li a tekulwa komwanakadhona gwaFalao, osha yela kutya okwa li a simanekwa nokwa li ha li iikulya iiwanawa, ha zala nawa nokwa li megumbo lyuuzeko. Okwa li a mono elongo lya dhenga mbanda. (Lesha Iilonga 7:20-22.) Otashi vulika a li ta vulu okuthigulula iinima oyindji.

13. Ongiini Moses a li a kaleke omadhiladhilo ge komauvaneko gaKalunga?

¹³ Osha yela kutya Moses eputudho ndyoka a li a mono kaavali ye manga a li omushona lela olyo lya li lye mu kwathele a mone kutya okulongela iikalunga kwAaegipiti kaku li pandunge. (Eks. 32:8) Elongo lyaEgipiti nuuzeko wopamaliko mboka wa li megumbo lyuuwa kalya li lya ningitha Moses e ethe po elongolokalunga lyashili. Osha yela kutya okwa li ha tedhatedha muule komauvaneko gaKalunga ngoka a li u uvanekele oohekulululwa nokwa li a halelela okuulika kutya okwi ilongekidha okulonga ehalo lyaKalunga. Kakele kaashono, Moses okwa li a lombwele Aaisraeli a ti: “OMUWA . . . Kalunga kaAbraham, Kalunga kaIsak naKalunga kaJakob, okwa tumu ndje kune.”—Lesha Eksodus 3:15-17.

14. Ongiini eitaalo lyaMoses nuulaadhi we wa li wa makelwa?

¹⁴ Moses okwa li a tala ko Jehova e li Kalunga kashili inaa fa iihongwathano ayihe mbyoka ya li iikalunga yaEgipiti kaayi na omwenyo. Mokukalamwenyo kwe okwa kala ti ihumbata nawa a fa e wete ‘ngoka ihaa monika.’ Moses okwa li e na eitaalo kutya oshigwana shaKalunga osha li tashi ka mangululwa, ihe ka li e shi kutya shoka otashi ka ningwa uunake. (Heb. 11:24, 25, 27) Ehalo lye lyokukala a halelela Aahebeli ya mangululwa olya li lyu ulikwa sho a li a gamene Omuisraeli omupika ngoka a li ta monithwa iihuna. (Eks. 2:11, 12) Ihe ethimbo lyaJehova kalya li lya thika, onkee ano, Moses okwa li e na okukala ontembuki koshilongo shokokule. Nopwaahe na omalimbililo osha li oshidhigu kuye a thige po onkalamwenyo yuuzeko muEgipiti a ka kale mombuga. Natango Moses okwa li u ulike kutya okwi ilongekidha okukala a tonata nokulandula omalombwelo ngoka Jehova a li e mu pe. Kungawo, Kalunga okwa li ta vulu oku mu longitha e etele aamwayina ehupitho konima yoomvula 40 ndhoka a li muMidian. Palombwelo lyaKalunga Moses okwa li a galukile kuEgipiti. Ethimbo olya li lya thikana opo Moses a ka longe iilonga yaKalunga pahalo Lye (Eks. 3:2, 7, 8, 10) Sho e li muEgipiti, Moses “omwiifupipiki e vule aantu ayehe kombanda yevi,” okwa li a pumbwa eitaalo nomukumo opo a ka popye naFarao. (Num. 12:3) Okwa li ha yi kuFarao lwiikando opo e ke mu tseyithile omageelo ngoka ga li taga ka landula ko, nonando ka li e shi kutya oku na okushuna ko lwiikando ingapi.

15. Nonando opwa li iiyimbi, oshike sha li shi inyengitha Moses a konge oompito opo a simaneke Tate gwe gwomegulu?

¹⁵ Momukokomo gwoomvula 40 dha ka landula ko, okuza mo 1513 K.E.N. sigo omo 1473 K.E.N., Moses okwa kala ta yematekwa lwiikando oyindji. Nonando ongaaka, okwa li a kongo oompito a simaneke Jehova nokwa li a ladhipike Aaisraeli ooyakwawo nomutima aguhe ye shi ninge wo. (Deut. 31:1-8) Omolwashike? Omolwaashoka okwa li e hole edhina lyaJehova nuunamapangelo we shi vulithe edhina lye mwene. (Eks. 32:10-13; Num. 14:11-16) Nonando otu kale tu na omayeme nenge pu na iiyimbi, natse otu na okutsikila okwaambidhidha epangelo lyaKalunga tu na einekelo kutya omukalo gwe gwokuninga iinima ogwo gwa dhenga mbanda, gu li pauyuuki nogu li nawa gu vule dhilwe. (Jes. 55:8-11; Jer. 10:23) Mbela osho wu uvite ngaaka?

Kaleni mwa tonata!

16, 17. Omolwashike Markus 13:35-37 ta ti sha noonkondo kutse?

¹⁶ “Kotokeni ano, ne mu tonate, oshoka inamu tseya kutya ethimbo otali thiki uunake.” (Mark. 13:33) Jesus okwa li a gandja elondodho ndyoka sho a li ta kundathana naalongwa ye kombinga yomandhindhiliko ngoka tage ku ulika kutya otu li momasiku gahugunina guuyuni mbuka wa kolokosha. Dhiladhila koohapu dhaJesus dhahugunina dhomehunganeko ndyoka lya nyolwa kuMarkus a ti: “Tonateni, oshoka inamu tseya, uuna mwene gwegumbo te ya, ngele ongulohi nenge opokati kuusiku opokwiiga kwekondombolo nenge okoongulasha. Opo nge te ya ombadhilila, kee mú adhe mwa kotha. Shoka tandi shi mú lombwele, otandi shi lombwele wo aantu ayehe kutya: Tonateni!”—Mark. 13:35-37.

¹⁷ Ekumagidho lyaJesus otali ningitha omuntu a dhiladhile. Okwa li a popi kombinga yootundi dhi li ne dhuusiku dha yoolokathana. Potundi yahugunina ihashi kala oshipu omuntu a kale a tonata, molwaashono ohayi tameke lwopondatu yokoongulasha sigo oosho etango lya pita. Miita, aakwiita oya tala ko wo omukalo nguka hagu pondola, molwaashoka olyo ethimbo ewanawa okuponokela omutondi manga a “kotha.” Sha faathana, nokunena sho uuyuni wa kotha pambepo wa pwila mo, otashi vulika tu kale tatu kondjo twa mana mo opo tu kale twa tonata. Mbela otu na omalimbililo kutya otwa pumbwa okukala twa ‘tonata nokukala twa kotoka’ molwaashoka ehulilo nosho wo ehupitho lyetu ndyoka lya hunganekwa oli li popepi?

18. Tu li Oonzapo dhaJehova, otu na uuthembahenda wuni itaawu vulu okuyelekwa nasha?

¹⁸ Sho omudheuli gwoongwe ngoka a popiwa petameko lyoshitopolwa shika a li a ponokelwa kongwe ye, okwa li a hupu. Ihe ehunganeko lyOmbiimbeli otali popi sha yela kutya omalongelokalunga giifundja nosho wo uuyuni mbuka wa kolokosha otawu ka hulithwa po thiluthilu masiku. (Eh. 18:4-8) Aalongeli yaJehova ayehe, kutya nduno aagundjuka nenge aakokele, naya kale ye wete kutya osha kwata miiti okuninga kehe shimwe taya vulu opo yu ulike kutya oyi ilongekidhila esiku lyaJehova ngaashi Noowa nuukwanegumbo we ya li ya ningi. Otu li muuyuni muka mu na aantu inaaya simaneka Kalunga, moka aasita yomalongelokalunga giifundja nosho wo mboka yi itaala kutya Kalunga ita vulu okutseyika naamboka yi itaala kutya ke ko, haya sheke Omushiti. Ihe katu na okutula oomwenyo dhetu moshiponga moku ya holela. Natu kaleke momadhiladhilo iiholelwa mbyoka twa kundathana nokukala twa tonata tu konge oompito ndhoka tatu vulu okupopila nokusimaneka Jehova e li “Kalunga kokombanda yookalunga ayehe noye e vule oonkondo adhihe.”—Deut. 10:17.

[Enyolo lyopevi]

Oto dhimbulukwa?

• Omolwashike Noowa a li a pumbwa okupititha komeho oompumbwe dhopambepo dhuukwanegumbo we?

• Ongiini ethimbo lyetu lya faathana naanaa naandyoka lyaNoowa?

• Kakele kokuyematekwa, omolwashike Moses a kala a gandja eitulomo komauvaneko gaJehova?

• Omahunganeko gOmbiimbeli geni ge ku kwathela wu kale wa tonata pambepo?

[Ethano pepandja 25]

Noowa nuukwanegumbo we oya kala yi itula mokulonga iilonga yaJehova

[Ethano pepandja 26]

Omauvaneko gaJehova ngoka Moses a kala e na uushili kutya otaga ka gwanithwa oga li ge mu kaleke a tonata