Mbela oto ka landula ngaa ewiliko lyaJehova lyopahole?
‘Otandi tondo ondjila kehe yuugoyoki.’—EPS. 119:128, yelekanitha NW.
1, 2. (a) Uuna to pula kuume koye omayele, elondodho lini to ka nyanyukilwa okutaamba ko, nomolwashike? (b) Jehova ohe tu londodha kombinga yashike, nomolwashike?
DHILADHILA kwaashika: Natu tye owa hala okuya kehala lyontumba, ihe owa pumbwa ekwatho molwaashoka ku na uushili kutya ondjila yini wu na okuya nayo. Owu na kuume ngoka e shi nawa ondjila ndjoka wu na okuya nayo. Owe mu inekela, onkee ano, oto mu pula e ku kwathele. Ote ku pe uuyelele mboka wa pumbwa nosho wo omayele gontumba ngoka tage ku kwathele opo wu yande iiponga mondjila. Pashiholelwa, ote ku londodha kutya mondjila omu na endhindhiliko inaali yela nawa. Aantu oyendji ohaye li landula e taya kana. Mbela ito ka kala wa nyanyukilwa okutaamba ko elondodho lye nokupulakena kwaashoka e ku lombwele? Sha faathana, natse otu li molweendo. Olweendo lwetu olwu uka komwenyo gwaaluhe. Jehova oye kuume ketu nohe tu pe omayele ngoka twa pumbwa opo tu kale nomwenyo sigo aluhe. Ohe tu londodha wo kombinga yiiponga mbyoka tayi vulu oku tu ningitha tu kale ihaatu vulika kuye.—Deut. 5:32; Jes. 30:21.
2 Moshitopolwa shika nomwaashoka tashi landula, otatu ka kundathana kombinga yayimwe yomiiponga mbyoka. Dhimbulukwa kutya kuume ketu Jehova Kalunga, ohe tu londodha kombinga yayo molwaashoka oku tu hole. Okwa hala tu kale nomwenyo sigo aluhe. Ohashi mu yemateke uuna oshigwana she tashi ningi omatokolo ga puka nokweetha po oku mu longela. (Hes. 33:11) Moshitopolwa shika, otatu ka kundathana kombinga yiiponga itatu. Shotango, ohashi tu zile kaantu ooyakwetu. Oshitiyali, oshi na ko nasha nokwaahagwanenena kwetu. Oshititatu, oshi na ko nasha noshinima shoka kaashi shi shoshili. Otwa pumbwa okutseya kutya iiponga mbika oyini naanaa nonkene Jehova he tu kwathele tu yi yande. Omunyoli gumwe gwOmbiimbeli okwa li e shi iiponga mbika kutya oyini nokwa ti: ‘Otandi tondo ondjila kehe yuugoyoki.’ (Eps. 119:128) Okwa li e tonde kehe shimwe shoka tashi vulu oku mu ningitha kaa vulike kuJehova. Mbela nangoye osho we shi tala ko ngawo? Natu kundathaneni kombinga yankene tatu vulu okuninga etokolotoko okuyanda ondjila kehe ‘yuugoyoki.’
Ino “landula ongundu”
3. (a) Uuna kaatu shi kutya ondjila yini yi li mondjila okuya nayo molweendo, omolwashike tashi vulu okukala sha nika oshiponga okulandula owala aantu yalwe? (b) Ekotampango lini lya simana tatu adha muEksodus 23:2?
3 Natu tye kutya owu li molweendo olule nohaluka ku shi kutya ondjila yini yi li mondjila wu na okuya nayo. Owu wete aantu oyendji taya hogolola okuya nondjila yontumba. Otashi ka kala oshipu noonkondo oku ya landula. Ihe osha nika oshiponga okuya nondjila yontumba molwaashoka owala aantu oyendji taye yi landula. Otashi vulika itaaya yi hoka wa hala okuya. Nenge tashi vulika ya kana owala ngaashi ngoye. Oshiholelwa shika otashi tu kwathele tu uve ko ekotampango nenge oshiilongomwa shoka Jehova a li a hala okulonga Aaisraeli okupitila muyimwe yomoompango ndhoka a li e ya pe. Jehova okwa li a popi naamboka ya li aapanguli nosho wo oonzapo moshipotha shopampangu. Okwa li e ya londodha kombinga yoshiponga shokulandula ongundu noshokuninga omatokolo ga puka opo owala yo opalele aantu yalwe. (Lesha Eksodus 23:2.) Oshipu noonkondo kaantu inaaya gwanenena okuninga ngaaka. Ihe ekotampango ino “landula ongundu” kalya li owala lya pewa aapanguli noonzapo moshipotha shopampangu.
4, 5. Uunake Josua naKaleb ya li ye li moshiponga shokulandula ongundu? Oshike sha li she ya kwathele ya kale ye na omukumo?
4 Konyala monkalo kehe yonkalamwenyo, ngele otatu landula ongundu yaantu otatu vulu okuya moshiponga. Oonkalo ndhika ohadhi vulu okuholoka po ombaadhilila, notashi vulu okukala oshidhigu noonkondo okwaaha ninga shoka aantu yalwe taya ningi. Pashiholelwa, dhiladhila kombinga yaashoka sha li sha ningilwa Josua naKaleb. Aaisraeli mbaka yaali oya li ya ka ndaadha Evi lyEuvaneko pamwe naalumentu yalwe omulongo. Opo nduno sho ya galuka, aalumentu omulongo oya li ya popi iinima kombinga yEvi lyEuvaneko mbyoka ya li ya tilitha Aaisraeli yalwe. Pashiholelwa, oya li ya popi kutya aantu yako oya li aalefule yomezimo lyAanefilim. (Gen. 6:4) Shika osha li itaashi wapa molwaashoka Aanefilim ayehe oya li ya sila mEyelu lyopEthimbo lyaNoowa oomvula omathele dha piti, noka ya li ye na nando aanona. Ihe Aaisraeli oya li yi itaala shoka sha li sha popiwa kaalumentu mboka omulongo molwaashoka eitaalo lyawo olya li enkundi. Uuna omuntu e na eitaalo enkundi, ohe etha okukala i inekela muKalunga noha tameke okwiitaala iifundja mbyoka tayi popiwa kaantu. Nziya, oyendji yomAaisraeli oya li ya tameke okudhiladhila kutya kaye na okuvulika kelombwelo lyaJehova lyokuya mEvi lyEuvaneko. Josua naKaleb oya li ya ningi po shike monkalo ndjoka ondhigu?—Num. 13:25-33.
5 Josua naKaleb kaya li ya “landula ongundu.” Nonando Aaisraeli kaya li ya hala okupulakena oshili, aalumentu mboka yaali kaya li ya tila oku yi popya. Oya li ya ningi shoka shi li mondjila nokuli naasho Aaisraeli ya li ya hala oku ya dhipaga. Oshike sha li she ya tsu omukumo? Eitaalo lyawo muJehova. Uuna omuntu e na eitaalo lya kola muJehova, oha kala i itaala mwaashoka Jehova Kalunga ha popi, ihe haifundja mbyoka hayi popiwa kaantu. Konima yethimbo sho Josua naKaleb ya li ya popi kutya yo oyi itaala muJehova, oya li ya lombwele kehe gumwe kutya Jehova oha gwanitha po aluhe shoka u uvaneka. (Lesha Josua 14:6, 8; 23:2, 14.) Josua naKaleb oya li ye hole Kalunga kawo noye mu inekela. Kaya li ya hala okulonga nando osha shoka tashi vulu okuyemateka Jehova opo ando ya hokiwe kaantu yalwe. Onkee ano, kaya li ya landula ongundu, noye li oshiholelwa oshiwana noonkondo kutse kunena.—Num. 14:1-10.
6. Iinima yini tayi vulu oku tu ningitha tu landule ongundu?
6 Mbela omathimbo gamwe oho kala wa hala ‘okulandula ongundu’? Aantu oyendji ihaya simaneke Jehova. Ohaya dhiladhila kutya shoka ha popi kombinga yaashoka shi li mondjila naashoka sha puka osha nika uugoya. Oye na omadhiladhilo gawo yene kombinga yaashoka shi li mondjila naashoka sha puka nohaya kambadhala oku tu itaalitha omadhiladhilo gawo giifundja. Pashiholelwa, ohaya ti kutya oopolohalama dhoko-TV, oomuvi nomaudhano gokokompiuta ngoka hagu ulike omilalo, elongithonkondo nosho wo uumpulile inayi puka. (2 Tim. 3:1-5) Oho hogolola ngiini shoka ngoye nuukwanegumbo woye tamu ka ninga opo mu inyanyudhe? Mbela oho tokola kutya sha oshi li mondjila nenge osha puka molwaashoka tashi popiwa nenge tashi ningwa kaantu yalwe? Ngele osho ho ningi omatokolo goye ngawo, nena oto “landula ongundu.”
7, 8. (a) Ohatu dheula ngiini ‘oondunge dhetu dhokunongela,’ nomolwashike edheulo ndika li li nawa li vule okulandula owala omusholondondo gwoompango? (b) Omolwashike hashi nyanyudha okumona oshiholelwa oshiwanawa shaagundjuka oyendji Aakriste?
7 Jehova okwe tu pa omagano ge na ondilo opo ge tu kwathele tu ninge omatokolo. Omagano ngoka ogo okuvula okudhiladhila nuukeka tango kombinga yiinima manga inaatu hogolola pokati kaashoka shi li mondjila naashoka sha puka. Ombiimbeli omagano ngaka ohayi gi ithana ‘oondunge dhetu dhokunongela dha dheulwa’ nohayi popi wo kutya otwa pumbwa oku dhi dheula ‘moku dhi longitha.’ (Heb. 5:14, NW) Itatu vulu okudheula oondunge dhetu dhokunongela ngele ohatu ningi owala shoka aantu yalwe taya ningi nenge ngele otwa tegelela yalwe oyo ye tu lombwele shoka tu na okuninga. Miinima oyindji, otwa pumbwa okulongitha eiyuvo lyetu nokuninga omatokolo getu yene. Pashiholelwa, oshigwana shaJehova kashi na okutegelela yalwe oyo ye shi ningile omatokolo noku shi pa omusholondondo gwoomuvi, gwomambo nosho wo gwomapandja goko-Internet ngoka shi na okuyanda. Ngele otwa kala hatu landula omusholondondo ngoka, otatu ka kala twa pumbwa omisholondondo omipe ethimbo kehe. (1 Kor. 7:31) Ihe etompelo lya simanenena kutya omolwashike kaatu na okutegelela yalwe ye tu ningile omatokolo olyo kutya otwa hala okulongitha okuvula kwetu hoka Jehova e tu pa kwokuninga omatokolo. Jehova okwa hala tu kale hatu dhiladhila nuukeka kombinga yaashoka Ombiimbeli tayi popi, hatu galikana tatu pula ewiliko lye nopo nduno tatu ningi omatokolo ngoka tage mu nyanyudha.—Ef. 5:10.
8 Uuna tatu ningi omatokolo ngoka taga tsu kumwe nOmbiimbeli, aantu yamwe itaye ke shi hokwa. Pashiholelwa, oshidhigu noonkondo kaagundjuka yetu kosikola molwaashoka aantu yalwe ohaya kambadhala aluhe oku ya ningitha ya ninge shoka tashi ningwa kukehe gumwe. (1 Pet. 4:4) Ihe aagundjuka yetu oyendji ihaya “landula ongundu.” Ohashi nyanyudha okumona aagundjuka Aakriste naakuluntu tayu ulike eitaalo ngaashi Josua naKaleb ya li ya ningi.
Inamu landula “uuhalu womitima dheni nowomeho geni”
9. (a) Uuna wu li molweendo, omolwashike hashi vulika shi kale sha nika oshiponga okuhogolola ondjila yontumba molwaashoka owala wu yi hole? (b) Omolwashike ompango ndjoka ya popiwa muNumeri 15:37-39 ya li ya simana koshigwana shaKalunga muIsraeli?
9 Oshiponga oshitiyali tatu ka kundathana kombinga yasho oshi na ko nasha nokwaahagwanenena kwetu. Dhiladhila kwaashika: Natu tye owu li molweendo to yi kehala lyontumba hoka kuu shi nawa, nowu na okaalita hoka taka vulu oku ku kwathela opo wu mone kutya ondjila yini wu na okuya nayo. Oshike tashi ka ningwa po ngele owa tokola okwaahe ka longitha e to hogolola owala okuya nondjila kehe ndjoka to dhiladhila kutya oyi li nawa okuya nayo? Ito ka thika nando hoka wa hala okuya. Oshiholelwa shika otashi tu kwathele tu uve ko ekotampango lilwe ndyoka Jehova a li a hala okulonga Aaisraeli. Oli li mompango yilwe ndjoka a li e ya pe. Otatu vulu okulesha kombinga yalyo muNumeri 15:37-39. (Lesha.) Aantu oyendji kunena kayu uvite ko omatompelo gompango ge na ko nasha noondjendjelela nosho wo oongodhi oombulau. Mbela owu uvite ko kutya omolwashike ompango ndjoka ya li ya simana? Etompelo limwe olyo kutya oya li ya ningi oshigwana shaKalunga shi kale sha yooloka ko kiigwana ayihe yilwe mbyoka ya li ye shi kundukidha. Nongele oya li ya hala shili okuhokiwa kuJehova, oya li ye na okukala ya yooloka ko kiigwana yilwe. (Lev. 18:24, 25) Ihe opwa li etompelo lilwe li na ko nasha nompango ndjoka. Natu kundathaneni kombinga yetompelo ndyoka nokwiilonga oshindji kombinga yoshiponga oshitiyali shoka tashi vulu oku tu ningitha kaatu vulike kuJehova.
10. Ongiini Jehova a li u ulike kutya oku shi nawa onshitwe yaantu?
10 Sho Jehova a li a gandja ompango ndjoka koshigwana she, okwa li e shi pe etompelo ndika a ti: ‘Inamu landula uuhalu womitima dheni nowomeho geni.’ Jehova okwa li e shi popi molwaashoka onshitwe yaantu oku yi shi nawa lela. Oku shi kutya oshipu komitima dhetu nokuuntu wetu womeni okukala twa hala iinima mbyoka tu wete nomeho getu. Molwaashoka Jehova oku shi kutya omitima dhetu odha nika oshiponga nohadhi vulu oku tu ningitha iinima ya puka, ote tu londodha ta ti: “Omwenyo ogwo omunamakoto kombanda yiinima ayihe, nokagu shi kwaaludhwa. Olye ta vulu oku gu uva ko?” (Jer. 17:9) Shoka osho molwaashoka Jehova a li a lombwele Aaisraeli kaaya landule omitima dhawo nomeho gawo. Jehova okwa li e shi kutya sho Aaisraeli ya li ya tala kiigwana mbyoka ihaayi mu longele, otashi vulika ya li ya hala okukala ye yi fa. Otashi vulika ya li ya hala okukala ngaashi yo nopo nduno tashi vulika taya tameke okudhiladhila nokukatuka ngaashi yo.—Omayel. 13:20.
11. Uunake tashi vulika tu gwile moshiponga shokulandula omitima dhetu nomeho getu?
11 Kunena oshi li nokuli oshipu lela komitima dhetu ndhoka dha nika oshiponga okukala dha hala shoka tu wete nomeho getu. Otu li muuyuni mbuka tawu shi ningi oshipu kutse tu landule omahalo ga puka. Mbela omomukalo guni ekotampango ndyoka tali adhika muNumeri 15:39 tali vulu oku tu kwathela? Otatu vulu okukala moshiponga shokulandula omitima dhetu nosho wo omeho getu momukalo moka hatu zala. Aantu momudhingoloko gwetu ohaya zala momukalo ngoka tagu hilile yalwe momilalo dha nyata. Ohatu mono aantu ya zala momukalo ngoka kosikola, kiilonga nomomidhingoloko moka tu li. Molwaashoka iinima mbika ohatu yi mono ethimbo kehe, ehalo lyetu okukala twe ya fa otali vulu okukala li na oonkondo. Opo nduno otashi vulika tatu tameke okuzala lela twe ya fa noitatu kala we tatu monika twa fa Aakriste.—Rom. 12:1, 2.
12, 13. (a) Oshike tu na okuninga ngele omathimbo gamwe ohatu kala twa hala okutala shoka sha nyata? (b) Omolwashike kaatu na okuninga iinima mbyoka tayi ningitha yalwe ya kale ye na omahalo ga puka?
12 Osha simana noonkondo okupangela omahalo getu. Otwa pumbwa okukeelela omeho getu kaaga tale shoka sha puka. Oshiholelwa shomulumentu omudhiginini Job otashi vulu oku tu kwathela. Okwa li a popi a ti kutya okwa ninga euvathano nomeho ge. Okwa li a tokola toko kaa tale nando nokahalu omukiintu ngoka kee shi omukulukadhi gwe. (Job 31:1) Omukwaniilwa David naye okwa li a ningi etokolo lya faathana. Okwa ti: “Omeho gandje inandi hala oku ga talitha iinima yisitha ohoni.” (Eps. 101:3, KB) Ngaashi David, otu na okukala twa tokola kaatu tale “iinima yisitha ohoni.” “Iinima yisitha ohoni” oyo iinima mbyoka tayi vulu okuhulitha po uukuume wetu naJehova. Oya kwatela mo kehe shimwe tatu tala shoka tashi vulu okuweeta omahalo ga puka momitima dhetu e tashi tu ningitha tu longe shoka sha puka.
13 Otatu vulu nokuli okukala “iinima yisitha ohoni” kuyalwe ngele ohatu ningi iinima mbyoka tayi ya ningitha ya kale nehalo lya puka. Shika otatu vulu oku shi ninga momukalo moka hatu zala. Osho molwaashoka tu na okuvulika kwaashoka Ombiimbeli tayi popi tayi ti kutya otu na okuzala ‘oonguwo dhi shi okutalwa nodha yogoka.’ (1 Tim. 2:9) Ngele otwa zala oonguwo dha “yogoka,” shoka otashi ku ulika kutya ohatu yaalele yalwe notwe ya simaneka. Shoka otashi ku ulika kutya otwa hala okwoopalela yalwe, ihe hakwiiyopalela tse yene. (Rom. 15:1, 2) Momagongalo gopaKriste omu na aagundjuka oyendji omayuvi mboka ye li iiholelwa ya dhenga mbanda momukalo moka haya zala. Ohashi tu nyanyudha okumona kutya ihaya landula omitima dhawo nomeho gawo. Ohaya hogolola okwoopalela Jehova mukehe shimwe taya ningi.
Inamu landula ‘iifundja’
14. Elondodho lini kombinga “yiifundja” Samuel a li a gandja?
14 Natu tye ando owu li molweendo, to ende mombuga onene. Sho wa tala komeho, owu wete kwa fa ku na omeya, ihe nani kage shi omeya shili. Oshike tashi vulu okuningwa po ngele owa zi mo mondjila wu ka tale shoka to dhiladhila kutya omeya? Oto vulu okukana nokusila mombuga. Komukalo gwa faathana, Jehova oku shi nkene sha nika oshiponga okukala twi inekela sha shoka kaashi shi shoshili. Oshikando shimwe, okwa li e na okulondodha Aaisraeli kombinga yoshiponga shika. Iigwana ayihe ye ya kundukidha oya li yi na omukwaniilwa gwopantu, onkee ano, Aaisraeli nayo oya li ya hala okukala ye na omukwaniilwa a tya ngaaka. Ehalo lyawo ndyoka ya li ye na olya li eyono lya kwata miiti molwaashoka olya li lyu ulike kutya inaya hala Jehova a kale Omukwaniilwa gwawo. Pehulilo, Jehova okwa li e etha ya kale ye na omukwaniilwa gwopantu, ihe okwa li a tumu omupolofeti gwe Samuel e ya londodhe. Samuel okwa li e ya londodha kombinga yoshiponga shokulandula ‘iifundja,’ sha hala okutya, oshiponga shokwiinekela sha shoka itaashi vulu lela oku ya kwathela.—Lesha 1 Samuel 12:21.
15. Omomikalo dhini Aaisraeli ya li ya landula ‘iifundja’?
15 Otashi vulika Aaisraeli ya li ya dhiladhila kutya otaya vulu okukala yi inekela omukwaniilwa gwopantu shi vulithe okwiinekela Jehova. Ngele osho ya li ya dhiladhila ngawo, nena oya li taya landula ‘iifundja.’ Molwaashoka oya li yi itaala moshinima shimwe showala, osha li tashi ke ya ningitha nuupu yi itaale iinima yilwe “yiifundja” oyindji mbyoka hayi humithwa komeho kuSatana. Pashiholelwa, omukwaniilwa gwopantu okwa li ta vulu oku ya ningitha ya galikane iikalunga. Aantu mboka haya galikana iikalunga ohaya dhiladhila kutya otaya vulu okukala yi inekela iikalunga mbyoka ya ningwa miiti nenge momamanya molwaashoka otaya vulu oku yi mona noku yi guma. Inayi inekela muKalunga ihaa monika, Jehova, ngoka a shita iinima ayihe. Ihe omuyapostoli Paulus okwa li a popi iikalunga mbika a ti kutya oyo “iinima ihaayi kwatha sha.” (1 Kor. 8:4) Iikalunga ihayi vulu okumona ko, okuuva ko, okupopya nenge okulonga sha. Onkee ano, osha nika uusama oku yi galikana molwaashoka owala tatu vulu oku yi mona noku yi guma. Iikalunga ihayi vulu okukwathela nando omuntu. ‘Oyiifundja’ nosho wo mboka haye yi inekele “otaa ka faathana nayo.”—Eps. 115:4-8.
16. (a) Ongiini Satana ha ningitha aantu ya landule ‘iifundja’ kunena? (b) Omolwashike tatu vulu okutya kutya iinima yopamaliko ‘oyiifundja,’ unene tuu moku yi yelekanitha naJehova?
16 Satana omunamakoto noonkondo, nota ningitha natango aantu ya landule ‘iifundja’ kunena. Pashiholelwa, oha ningitha aantu oyendji yi itaale kutya ngele oye na iimaliwa, iilonga iiwanawa nosho wo iinima oyindji iiwanawa yopamaliko, otaya ka kala ya nyanyukwa noya gamenwa. Ohaya dhiladhila kutya iinima mbyoka otayi vulu oku ya kwathela okukandula po omaupyakadhi gawo agehe. Ihe iinima ya tya ngaaka otayi vulu ngaa oku ya kwathela uuna taye ehama nenge uuna omahupilo kaage li nawa nuuna pu na iiponga yopaunshitwe? Iinima mbyoka otayi vulu ngaa oku ya kwathela uuna yu uvite kutya onkalamwenyo yawo kayi na elalakano? Mbela otayi vulu okuyamukula omapulo gawo ga simana ngoka ye na kombinga yonkalamwenyo? Mbela iinima mbyoka ohayi kwathele aantu uuna ye li pokusa? Ngele otwa kala twi inekela iimaliwa niinima yilwe, otashi ke tu yemateka. Iimaliwa niinima itayi vulu oku tu pa shoka twa pumbwa opo tu kale twa nyanyukwa noitayi vulu oku tu gamena komikithi neso molwaashoka ‘oyiifundja.’ (Omayel. 23:4, 5) Ihe Jehova ke shi ‘gwiifundja.’ Oye Kalunga kashili. Onkee ano, otatu vulu okukala twa nyanyukwa notwa gamenwa lela uuna tu na uukuume wa kola naye. Oye owala ta vulu oku tu kwathela momaupyakadhi getu agehe. Otwa nyanyukwa noonkondo okukala ookuume ke. Inatu hala nando oku mu etha po nokulandula ‘iifundja.’
17. Oto ka ninga po shike kombinga yomalondodho ngoka ga kundathanwa moshitopolwa shika?
17 Otwa nyanyukwa sho Jehova e li kuume ketu naasho he tu wilike molweendo lwetu lwoku ka mona omwenyo gwaaluhe. Ngele otwa tsikile nokuvulika komalondodho ge, otatu vulu okukala nomwenyo sigo aluhe. Moshitopolwa shika otwi ilonga kombinga yiiponga itatu mbyoka hayi ningitha aantu oyendji ya landule ondjila ya puka: okulandula ongundu, omitima dhetu yene nosho wo iinima “yiifundja.” Moshitopolwa tashi landula otatu ki ilonga kombinga yomalondodho gatatu ga gwedhwa po ngoka Jehova a li e tu pe oku tu kwathela tu tonde notu yande “uugoyoki” kehe.—Eps. 119:128.
Oto yamukula ngiini?
Ongiini to vulu okulongitha omakotampango ngoka taga adhika mOmanyolo ngaka?
• Eksodus 23:2
• Numeri 15:37-39
• 1 Samuel 12:21
• Episalomi 119:128
[Ethano pepandja 11]
Mbela opu na ethimbo limwe nangoye wa li wa kwatwa kegamo ‘lyokulandula ongundu’?
[Ethano pepandja 13]
Omolwashike sha nika oshiponga okulandula uuhalu womitima dhetu nowomeho getu?
[Ethano pepandja 14]
Mbela oho landula iinima “yiifundja”?