Nkene wu na okulonga aanona yoye kombinga yaKalunga—Omikalo dhini hadhi pondola?

“Ino dhimbwa oohapu ndhika tandi dhi ku lombwele nena. Dhi nongeka aamwoye. Dhi hokolola, uuna u li moyaandjeni nuuna u li mepola, uuna to vululukwa nuuna to longo.”—DEUTERONOMIUM 6:6, 7.

AAVALI omathimbo gamwe otashi vulika ya kale yu uvite ya gwililwa po kiinakugwanithwa yokuputudha oyana. Ihe uuna taya kongo omayele, otashi vulika ya ngwangwanekwe komaetopo ogendji ga yoolokathana ngoka tayu uvu nenge taya lesha. Aakwanezimo nookuume olundji ohaya gandja nziya omaetopo gawo. Omambo, iifo nosho wo ointaneta ohayi pe aavali omayele ogendji ngoka omathimbo gamwe haga kala taga kondjithathana.

Mepingathano naashika, Ombiimbeli otayi pe aavali omayele ge shi okwiinekelwa ge na ko nasha naashoka ye na okulonga oyana notaga gandja ewiliko li na oshilonga li na ko nasha nankene ye na oku ya longa. Ngaashi oovelise dhOmbiimbeli ndhoka dha tothwa mo metetekelo tadhi shi popi, aavali oya pumbwa okukonga ethimbo esiku kehe okupopya naanona yawo kombinga yaKalunga. Otatu ka kundathana omaetopo gane ga kankamena kOmbiimbeli ngoka ga kwathela aavali omayuvi ya longe aanona yawo kombinga yaKalunga.

1. Longa aanona yoye kombinga yaashoka taya vulu okwiilonga meshito. Omuyapostoli Paulus okwa nyola a ti: “Okuza Kalunga sho a shiti uuyuni, nando oye iha monika, okwa holola puuyelele oonkondo dhe dhaaluhe nuukalunga we.” (Aaroma 1:20) Aavali otaya vulu okuninga oshindji okukwathela oyana ya mone kutya Kalunga Omuntu gwolela ngoka taya vulu okugandja eitulomo kiilonga ye yeshito nokukwathela oyana ya mone omaukwatya ge ngoka tagu ulikwa keshito.

Jesus okwa li a longitha omikalo ndhika sho a li ta longo aalongwa ye. Pashiholelwa, okwa ti: “Taleni oondhila dhokegulu. Nando ihadhi kunu, dho ihadhi teya, dho ihadhi pungula miigandhi, Ho yeni yomegulu ohe dhi palutha. Ano hane mboka mu dhi vule?” (Mateus 6:26) Mpaka Jesus okwa li a tsu omuthindo omaukwatya gaJehova ngaashi ohole nolukeno. Ihe okwa li a ningi oshindji shi vulithe mpoka. Okwa li a kwathele aalongwa ye ya dhiladhile nkene Kalunga hu ulukile oyana omaukwatya ngoka.

Omukwaniilwa omunandunge Salomo okwa li a popi kombinga yuunongo wopaunshitwe mboka Kalunga a pa uudhidhi nokwa li a longitha iishitwa mbika iishona opo a tse omuthindo oshiilongomwa sha simana. Okwa nyola a ti: “Inda kuudhidhi, u tale oondjila dhawo e to ningi oondunge. Kau na omuthiminiki, omutaleli nenge omuleli, ihe otau longekidha iikulya yawo mothinge, tau pungula iipalutha yawo peteyo.” (Omayeletumbulo 6:6-8) Omukalo gwokulonga omuntu nkene e na okwiitulila po omalalakano ge na oshilonga nonkene e na okulongitha oonkondo ndhoka ta pewa kuKalunga oku ga adha kagu na tuu oonkondo!

Aavali otaya vulu okuholela elongo lyaJesus naSalomo li na omupondo mokuninga iinima tayi landula: (1) Ngele taya pula oyana kutya iimeno niinamwenyo yini ye hole unene. (2) Taye ya longo oshindji kombinga yiimeno niinamwenyo mbyoka. (3) Ngele taye ya longo kombinga yaashoka taya vulu okwiilonga meshito.

2. Holela iikala yaJesus mbyoka a li hu ulukile mboka a li a longo. Maantu ayehe mboka ya li ko, Jesus oye a li a popi iinima ya simana noonkondo. Ihe nonando ongaaka, okwa li a longitha ethimbo lye olindji okupula omapulo. Okwa li e na ohokwe onene mokuuva omadhiladhilo nomaiyuvo gaamboka a longo. (Mateus 17:24, 25; Markus 8:27-29) Sha faathana, aavali oye na iiyilongomwa oyindji ya simana okulonga oyana. Ihe opo ye shi pondole, oya pumbwa okuholela Jesus nokuladhipika oyana ya popye ya manguluka nkene yu uvite.

Ongiini ngele aanona oye na iikala iiwinayi nenge ohaye ende kashona okwiilonga sha shi na oshilonga? Tala omukalo ngoka Jesus a li u ungaunga naayapostoli ye. Omathimbo gamwe oya li ye na oontamanana dha kwata miiti mokati kawo noya li inaaya tseya nziya kutya oshi na uuwanawa okukala omwiifupipiki. Ihe nonando ongaaka, Jesus okwa kala e yi idhidhimikila nokwa li a popi noku shi endulula kutya oya pumbwa okukala aaifupipiki. (Markus 9:33, 34; Lukas 9:46-48; 22:24, 25) Aavali mboka haya holele Jesus ohaya pukulula neidhidhimiko oyana, nohaye shi endulula uuna sha pumbiwa sigo aanona ye shi uvu ko nawa kutya osha simana.a

3. Longa aanona yoye okupitila moshiholelwa shoye. Oshi li nawa ngele aavali taya kala haya pulakene komayele ngoka omuyapostoli Paulus a li a pe Aakriste mboka ya li ya kala muRoma. Okwa li e ya nyolele a ti: “Ngoye oho longo yalwe, ihe omolwashike ihoo ilongo ngoye mwene? Oho uvithile aantu yaa yake, ngoye oho yaka?”—Aaroma 2:21.

Omayele ngoka oga simanenena molwaashoka aanona ohaya nwethwa mo kwaashoka aavali taya ningi shi vulithe kwaashoka taya popi. Dhoshili, aavali mboka haya ningi shoka haya longo oyana, oyana ohaya pulakene kwaashoka taye ya longo.

4. Tameka okulonga okanona koye manga okashona. Timoteus, omulongi pamwe nomuyapostoli Paulus miilonga yuutumwa, okwa li ha popilwa muuwanawa pomudhingololoko gwawo. (Iilonga 16:1, 2) Etompelo limwe olyo kutya okwa li a “tseya Omanyolo omayapuki okuza kuunona.” Yina yaTimoteus nayinakulu kaya li owala haya leshele Timoteus Omanyolo, ihe oya li wo ye mu kwathele a dhiladhile muule kombinga yooshili ndhoka dhi li mo.—2 Timoteus 1:5; 3:14, 15.

Mpoka to vulu okwaadha ekwatho

Oonzapo dhaJehova ohadhi nyanyangidha iileshomwa oyindji ya nuninwa unene okukwathela aavali nkene ye na okulonga oyana oshili kombinga yaKalunga. Yimwe oya nyolelwa okukwathela aanona aashona. Yilwe otayi vulu okukwathela aavali nosho wo aanona mboka yoomvula omulongo nasha opo ya kale haya popi ya manguluka.b

Dhoshili, manga aavali inaaya tameka okulonga oyana kombinga yaKalunga, oya pumbwa okutseya omayamukulo gomapulo gontumba omadhigu ngoka aanona tashi vulika haye ya pula. Pashiholelwa, oto yamukula ngiini omapulo ngaashi ngaka taga landula: Omolwashike Kalunga e etha okumona iihuna ku kale po? Elalakano lyaKalunga li na ko nasha nevi olini? Oonakusa oye li peni? Oonzapo dhaJehova otadhi ka kala dha nyanyukwa oku ku kwathela wi ilonge okukonga omayamukulo gomapulo ngoka nosho wo galwe opo ngoye nuukwanegumbo woye mu vule okuhedha popepi naKalunga.—Jakob 4:8.

[Omanyolo gopevi]