Omolwashike tu na okukala metsokumwe nomithikampango dhOmbiimbeli?

MBELA shoka Ombiimbeli yi indika kombinga yomilalo oshi li oshinima shonkuluyonale noinaashi pumbiwa? Aawe. Mepingathano naashono, shoka Ombiimbeli yi indika kombinga yomilalo otashi vulu oku tu kwathela tu henuke iinima tayi landula:

▪ Omikithi hadhi taandele okupitila momilalo

▪ Okuninga etegelelo inoo hokanwa

▪ Iilanduliko yinikitha oluhodhi yoondjokana tadhi teka

▪ Eiyuvo tali ku nyenyetele

▪ Okukala wu wete kuu na oshilonga molwaashoka yalwe ya li taye ku longitha owala yi iyuvithe nawa

Omushiti gwetu, Jehova Kalunga,a okwa hala tu nyanyukilwe omagano kehe ngoka a gandja notu mone uuwanawa mugo. Kalunga oye te ‘ku longo shoka she ku opalela.’ (Jesaja 48:17) Omuntu ngoka ha kala metsokumwe nomakotampango gOmbiimbeli ge na ko nasha nomilalo oha nyanyukilwa iinima tayi landula:

▪ Okukala a hokiwa kuKalunga

▪ Ombili yopamadhiladhilo

▪ Ekwatathano lyopothingo noyaandjawo

▪ Edhina ewanawa

▪ Okukala i iyuvitile uuntsa

Ongiini nduno, ngele ngashingeyi onkalamwenyo yoye kayi li metsokumwe nomakotampango gOmbiimbeli? Mbela oto vulu ngaa wu ethe po okukalamwenyo kwoye hoka wu li muko ngashingeyi? Mbela Kalunga ota ka kala inaa hala oku ku dhimina po?

Tala kwaashika: Yamwe mboka ya li megongalo lyopaKriste lyopetameko oya li aahondeli, omashenge naakali nomashenge. Oya li ya tokola ye ethe po okukalamwenyo kwawo kwonale noya li ya mono uuwanawa. (1 Aakorinto 6:9-11) Kunena, aantu omayuvi muuyuni nayo oya ninga sha faathana. Oya etha po okuya momilalo ngaashi ya hala noya mona uuwanawa owindji sho ya lundulula oonkalamwenyo dhawo dhi kale metsokumwe nomakotampango gOmbiimbeli. Pashiholelwa, tala koshimoniwa shaSarah ngoka a popiwa moshitopolwa shotango.

“Nziya, onda li ndu uvite nda pepelelwa”

Sarah okwa li a mono kutya onkalamwenyo ye ndjoka kaayi li metsokumwe nomithikampango dhOmbiimbeli inayi mu etela uuwanawa mboka a li ta lalakanene. Okwa ti: “Onda li nda mono kutya eiyuvo lyandje nani olya sa. Onda li shili nda sa ohoni nonda li nda tila kutya pamwe otandi ningi etegelelo nenge ndi kwatwe komukithi. Kanda li nando nda dhimbwa kutya Kalunga oko e li nonda li ndi shi shi kutya onkalamwenyo yandje oye mu henda komutima. Onda li ndi wete nda nyata naashoka osha kala tashi nyenyetele ndje.”

Pehulilo, Sarah okwa li a vulu okulundulula okukalamwenyo kwe kwonale. Okwa li a kongo ekwatho kaavali ye, mboka ye li Oonzapo dhaJehova. Okwa li wo a kongo ekwatho kaakuluntugongalo yomegongalo lyomoshitopolwa shawo. Sarah okwa ti: “Onda li nda kumwa noonkondo molwaashoka aavali yandje nosho wo aakuluntugongalo oya li yu ulukile ndje kutya oye na ko nasha nangame noye hole ndje. Nziya, onda li ndu uvite nda pepelelwa.”

Ngashingeyi Sarah oku na aanona yaali. Ota ti: “Ohandi lombwele aanona yandje nda manguluka kombinga yomatokolo ngoka nda li nda ningi. Onda hala ya kale yu uvite ko nkene sha li sha gumu ndje sho nda li inaandi vulika komithikampango dhaKalunga. Elalakano lyandje olyo oku ya kwathela ya mone nkene okuvulika komithikampango dhaKalunga shi na ko nasha nomilalo haku kwathele omuntu a kale e li nawa palutu, pamadhiladhilo nosho wo pamaiyuvo. Osha yelela ndje kutya Kalunga okwe tu tulila po omithikampango dhopamikalo molwaashoka ina hala tu mone iilanduliko.”

Nangoye oto vulu okumona uuwanawa ngele to landula ewiliko lyaKalunga lyopahole. Ombiimbeli otayi tu uvanekele tayi ti: ‘Iipango yOMUWA oyi li mondjila, naamboka haa vulika kuyo, otaa ka kala aanelago. Okuvulika kuyo oku na ondjambi.’—Episalomi 19:8, 11.b

[Omanyolo gopevi]

[Oohapu dha simana pepandja 8]

Mboka hayi ipwililikile omithikampango dhOmbiimbeli ohaya mono iilanduliko yinikitha oluhodhi

[Oohapu dha simana pepandja 9]

Mboka haya kala metsokumwe nomithikampango dhOmbiimbeli ohaya kala ye na eiyuvo lya yela nosho wo ekwatathano lyopothingo noyaandjawo