Aaleshi yoshifo shetu taya pula . . .
Mbela evi ota li ka hanagulwa po shili mo-2012?
▪ “Aantu oyendji mboka yi itaala kutya uuyuni otawu hulu oya li ya mbombolokele komukunda gumwe moFulaanisa . . . Aantu mbaka oyi itaala kutya shoka otashi ka ningwa mo 21 Desemba 2012 sho pwa pita oomvula 5 125 shi ikolelela keyalulo lyokalindeli okakulu kAamaya.”—Oonkundana dho-BBC.
Aawiliki yomalongelokalunga, mboka hayi i ti aanongononi nosho wo yalwe mboka hayi i ti aatengeneki yonakuyiwa yokunena ohaya tengeneke kutya anuwa evi otali ka hanagulwa po, ihe nonando ohaya ti ngawo, shika kashi na esiku shi ka ningwe. Evi kali na esiku li ka hanagulwe po mo-2012. Oshili oondjika kutya, opulanete ndjika yEvi itayi ka hanagulwa po omvula ndjoka, ihe ota yi ka kala ko oomvula noomvula.
Ombiimbeli otayi ti: “Epipi limwe tali ka pita nekwawo otali ya, ihe evi otali kala sigo aluhe.” (Omuuvithi 1:4) Tala ishewe kwaashoka Jesaja 45:18 ta ti: “OMUWA okwa shiti egulu . . . Oye a tholoma evi e te li umbu, okwe li pameke noku li kalitha ko. Ine li shita li mbugale, ihe ehala lyokukala aantu. Oye tuu nguka ta ti: ‘Ongame OMUWA, nokaku na kalunga gulwe.’”
Opu na ngaa he omunahole ngoka ta ningile okamwana oshidhanitho shi ka nyanyudhe, ihe konima yethimbo ote shi ka yugulula e te shi yonagula po? Ngele okwe shi ningi otu ulike kutya oku na onyanya. Mepingathano naashono, Kalunga okwa shiti evi opo aantu ya nyanyukilwe ko. Kalunga okwa lombwele aihokani yotango, Adam naEva a ti: “Valathaneni, ne mu indjipale nokuudha evi alihe. Li tuleni mepangelo lyeni.” Konima, “Kalunga okwa tala eshito lye alihe nokwe li mono lyo opala lela.” (Genesis 1:27, 28, 31) Elalakano lyaKalunga li na ko nasha nevi inali ponya, ke na esiku e ethe evi li hanagulwe po. Kombinga yoohapu adhihe ndhoka a popya mOmbiimbeli shi na ko nasha nomauvaneko ge, Jehova okwa ti: “Itadhi galukile kungame owala inaadhi gwanitha ehalo lyandje; otadhi tsakanitha elalakano ndyoka nde dhi li tumine.”—Jesaja 55:11.
Ihe nonando oongaaka, Jehova okwa hala ‘okuhanagula po mboka taya yonagula evi.’ (Ehololo 11:18) MOohapu dhe otu uvaneke ngeyi: ‘Aayuuki otaa ka kala kevi, naakaanashipwe oyo taa thigala ko, ihe aakaanakalunga otaa ka kombwa ko kevi naakaanuudhiginini otaa ka nakulwa ko.’—Omayeletumbulo 2:21, 22, yelekanitha NW.
Shika otashi ka ningwa uunake? Kapu na omuntu e shi shi. “Esiku notundi ndjoka kaku na ngoka e yi shi, nando aayengeli yomegulu nenge Omwana, oTate oye awike.” (Markus 13:32) Oonzapo dhaJehova ihadhi kambadhala okutengeneka kutya Kalunga ota ka hanagula po aakolokoshi uunake. Nonando odhi wete ‘endhindhiliko’ lyehulilo nodhi itaala kutya otu li ‘momasiku gahugunina’ ngoka ga popiwa mOmbiimbeli, itadhi vulu oku shi tseya kutya “ehulilo” otali ya uunake. (Markus 13:4-8, 33; 2 Timoteus 3:1, NW) Oshinima shoka odhe shi ethela momake gaTate yetu gwomegulu nogOmwana.
Manga twa tegelela ehulilo, Oonzapo dhaJehova odhi ipyakidhila nokuuvitha onkundana ombwanawa yUukwaniilwa waKalunga, nenge ano tu tye epangelo lyomegulu ndyoka tali ka pangela nokulundulula opulaneta yEvi yi ninge oparadisa yi na ombili ndjoka ‘aayuuki taya ka thigulula e taya kala mo sigo aluhe.’—Episalomi 37:29.
[Edhina lyomuthaneki gwethano pepandja 12]
Image Science and Analysis Laboratory, NASA-Johnson Space Center