Oshileshwa 5
Elalakano lyaKalunga Olyashike Li Na Ko Nasha nEvi?
Omolwashike Jehova a shiti evi? (1, 2)
Omolwashike evi kaali shi oparadisa ngashingeyi? (3)
Oshike tashi ka ningilwa aakolokoshi? (4)
Monakuyiwa Jesus ota ka ningila shike aavu? aakulupe? oonakusa? (5, 6)
Opo u kale nombinga momalaleko nuuyamba gomonakuyiwa, ou na okuninga shike? (7)
1. Jehova okwa shiti evi ndika opo aantu ya vule okunyanyukilwa okukala kulyo sigo aluhe. Ye okwa li a hala kevi ku kalwe aluhe kaantu aayuuki ye uvite elago. (Epsalmi 115:16; Jesaja 45:18) Evi itali ka hanagulwa po nando; otali ka kala po sigo aluhe.—Epsalmi 104:5; Omuuvithi 1:4.
2. Manga Kalunga inaa shita omuntu, Ye okwa hogolola okatopolwa kamwe okashona kevi nokwe ka ningi oparadisa ombwanawa. Okwe ka luku oshikunino shaEden. Omo moka kwa li a tula omulumentu nomukiintu gwotango, Adam naEva. Elalakano lyaKalunga olya li opo ya mone aanona nokuudhitha evi alihe. Kashona nakashona yo oya li ando taya ka ninga evi alihe oparadisa.—Genesis 1:28; 2:8, 15.
3. Adam naEva oya yono mokutaaguluka owina ompango yaKalunga. Onkee ano Jehova okwe ya tidha mo moshikunino shaEden. Oparadisa oya kanithwa. (Genesis 3:1-6, 23) Ihe Jehova ina dhimbwa elalakano lye li na ko nasha nevi ndika. Ye otu uvaneke oku li ninga oparadisa, moka aantu taya ka kala sigo aluhe. Shika ote ke shi ninga ngiini?—Epsalmi 37:29, OB-1986.
4. Manga evi ndika inaali vula okuninga oparadisa, aakolokoshi oye na okukuthwa ko. (Epsalmi 37:38) Shika otashi ka ningwa piita yaKalunga yokuhulitha po uukolokoshi, mbyoka hayi ithanwa Harmagedon. Konima yaashono, Satana ote ke edhililwa uule woomvula 1 000. Shika otashi ti kutya itapu ka thigwa aakolokoshi ya yone evi. Oshigwana shaKalunga osho owala tashi ka hupa po.—Ehololo 16:14, 16; 20:1-3.
5. Opo nduno Jesus Kristus ota ka pangela e li Omukwaniilwa kevi ndika uule woomvula 1 000. (Ehololo 20:6) Ye ota ka kutha po kashona nakashona uulunde momadhiladhilo nomomalutu getu. Tse otatu ka ninga aantu ya gwanenena naanaa ngaashi Adam naEva ya li manga inaaya yona. Opo nduno itapu ka kala we omikithi, uukulupe neso. Aavu otaya ka aludhwa, naakulupe otaya ka ninga ishewe aagundjuka.—Job 33:25; Jesaja 33:24; Ehololo 21:3, 4.
6. Pethimbo lyElelo lyaJesus lyOomvula Eyuvi, aantu aadhiginini otaya ka longa opo ya lundululile evi alihe moparadisa. (Lukas 23:43, NW) Oonakusa omamiliyona otaya ka yumuninwa wo momwenyo gwopantu kombanda yevi. (Iilonga 24:15) Ngele otaya longo ngaashi Kalunga ta pula kuyo, otaya ka tsikila okukala sigo aluhe kombanda yevi. Ngele hasho, yo otaya ka hanagulwa po sigo aluhe.—Johannes 5:28, 29; Ehololo 20:11-15.
7. Onkee ano elalakano lyaKalunga lyopetameko li na ko nasha nevi otali ke shi pondola. Owa hala mbela u ka kale nombinga momalaleko nuuyamba ngaka monakuyiwa? Ngele osho, ou na okukala to ilongo kombinga yaJehova nokuvulika kiitegelelwa ye. Okukala ho yi kokugongala pOshinyanga shUukwaniilwa shOonzapo dhaJehova shopune otaku ku kwathele okuninga ngawo.—Jesaja 11:9; Aaheberi 10:24, 25, OB-1986.
[Picture on page 10]
Oparadisa ya kana
[Pictures on page 11]
Konima yaHarmagedon, evi otali ka ningwa oparadisa