Oto dhimbulukwa?

Owa lesha ngaa nawa iifo yOshungolangelo mbyoka opo ya zi ko? Tala ngele oto vulu okuyamukula omapulo taga landula:

• Oolye ye na okulonga aanona kombinga yaKalunga?

Nonando yalwe otashi vulika ya kwathele aavali, aavali oyo ye na oshinakugwanithwa shokulonga aanona yawo kombinga yaKalunga nosho wo kombinga yankene a hala uukwanegumbo wu kale tawu longo.—10/1, epandja 7.

• Mbela Kalunga okwa li a hala okutya shike sho a lombwele Aalevi a ti: “Ongame mwene oshipewa shoye”?

Omazimo galwe gAaisraeli oga li ga pewa oshitopolwa shago shevi, ihe Aalevi kaya li ya pewa molwaashoka Jehova oye a li “oshipewa” shawo. (Num. 18:20) Nonando Aalevi kaya li ya pewa uuthiga wevi, oya li ya pewa uuthembahenda wiilonga yi ikalekelwa. Jehova oye a li ha sile oshimpwiyu oompumbwe dhawo dhopalutu. Mboka taya humitha komeho iilonga yUukwaniilwa kunena, otaya vulu okukala neinekelo kutya Jehova ote ke ya kwathela moompumbwe dhawo dhakehe esiku.—9/15, epandja 7-8, 13.

• Omolwashike wu na okusimaneka kuume koye kopandjokana?

Okukala wa simaneka kuume koye kopandjokana ohaku eta ombili nohaku kwathele ondjokana yi kalelele. Oku li oshinima sha simana molwaashoka ohaku gamene ondjokana.—10/1, epandja 10-12.

• Oshike tashi vulu okukwathela Omukriste uuna ta hogolola omainyanyudho?

Opo omuntu a mone kutya omainyanyudho ngoka a hala okukutha ombinga mugo omawanawa nonokutya oga hokiwa kuKalunga, oshi li nawa i ipule ta ti: “Oshike sha kwatelwa mo? Uunake tandi ka kutha ombinga mugo? Oolye tandi ka nyanyukilwa pamwe nayo?—10/15, epandja 9-12.

• Mbela otu na ngaa okufuta iifendela?

Sho Jesus a li a pulwa ngele oshi li nawa momeho gaKalunga okufuta iifendela komupangeli gwepangelo lyaRoma, okwa li a yamukula noohapu ndhika dha simana a ti: “Shono shomupangeli, shi peni omupangeli naashono shaKalunga, shi peni Kalunga.” (Mark. 12:13-17) Omapangelo ngoka ge lilwe po ‘kaapangeli’ ogo haga longo iimaliwa nokukwathela okukaleka po ongushu yayo. Onkee ano, pataloko lyaKalunga, aapangeli oye na uuthemba wokupula iifendela.—10/1, epandja 13-15.

• Ongiini oohapu ndhoka dhi li mOmayeletumbo 7:6-23 tadhi vulu oku tu kwathela tu yande okutala omathano giipala?

Oohapu ndhoka otadhi ti kutya omulumentu omugundjuka okwa li te ende mepandaanda moka hamu kala ohonda. Ohonda oya li ye mu hongolola. Oshi li nawa kunena tu yande okuya komahala gokointaneta hoka ku na omathano ngoka taga pendutha omahalo gopamilalo. Osha simana omuntu a konge ekwatho kuKalunga okupitila megalikano, omanga inaa tameka okulongitha ointaneta.—11/15, epandja 8-10.

• Ongiini to vulu okundhindhilika mo elongelokalunga lyashili?

Aalongelikalunga yashili oya tala ko Ombiimbeli yi li Oohapu dhaKalunga. Ohaya simaneke edhina lyaKalunga, Jehova, nohaya uvitha kombinga yUukwaniilwa we. Kaye shi oshitopolwa shuuyuni mbuka wa kolokosha noye holathane nohole ya hwama.—10/1, epandja 16, 17.

• Mbela Kalunga okwa lenga omuhoko gumwe shi vulithe dhilwe?

Aawe, hasho nandonando. Ombiimbeli otayi popi sha yela tayi ti: “Kalunga aantu ayehe ohe ya tala ye thike pamwe. Ngoka he mu tila noha longo shoka shu uka, Kalunga ote mu taamba, na kale ogwomoshigwana sha tya ngiini.” (Iil. 10:34, 35)—10/1, epandja 26.