“Tu pa ompito tu galukile kegumbo”

Mbela owa li nale ho longele Jehova? Mbela oho dhiladhila okukala ho mu longele ishewe, ihe otashi vulika to dhiladhila kutya ite ku taamba ko we? Otatu ku indile wu leshe nomutima aguhe oshitopolwa shika naashi tashi landula ko. Oya nyolwa nelalakano lyoku ku kwathela.

“ONDA li nda galikana kuJehova a pe ndje ompito ndi galukile kegumbo ye a dhimine ndje po molwaashoka onde mu uvitha nayi.” Oohapu ndhoka odha li dha popiwa komukiintu gumwe ngoka a li a thigi po egongalo lyopaKriste moka a putukila. Mbela ku mu uvitile olukeno? Mbela sho to tala ‘Kalunga oku uvitile ngiini mboka ya li haye mu longele nale? Mbela oku ya shi ngaa natango? Mbela okwa hala ya “galukile kegumbo”?’ Opo tu yamukule omapulo ngoka, natu konakone oohapu ndhika dha nyolwa kuJeremia. Nopwaahe na omalimbililo, omayamakulo otage ke ku nyanyudha.—Lesha Jeremia 31:18-20.

Tala kutya sho Jeremia a nyola oohapu ndhoka Aaisraeli oya li monkalo ya tya ngiini. Momumvo 740 K.E.N., oomvula omilongo manga Jeremia inaa valwa, Jehova okwa li e etha omazimo omulongo guukwaniilwa waIsraeli ga falwe muupongekwa kAayassur.a Kalunga okwa li a pitike oshigwana she shi ye muupyakadhi onga egeeloputudho molwaashoka osha li sha yono omayono ga kwata miiti nokasha li sha vulika komalondodho ogendji ngoka ga li ga gandjwa kaapolofeti ye. (2 Aakwaniilwa 17:5-18) Mbela uupyakadhi mboka wa li we ya adha sho ye li muupongekwa, sha hala okutya sho ya za po puKalunga noye li kokule noshilongo shawo, owa li wa nengeneke omitima dhawo? Mbela Jehova okwa li e ya dhimbwa? Mbela okwa li ngaa te ke ya pitika ya galukile kegumbo?

“Otwa hala tu galuke”

Oshigwana osha li sha dhiladhila nawa shi na ko nasha nonkalo ndjoka sha li muyo e tashi itedhulula. Jehova okwa li a mono kutya oyi iyela ombedhi tashi zi komutima. Tala kunkene Jehova ta popi iikala yAaisraeli nankene ya li yu uvite.

Jehova okwa ti: “Ondu uvite shili, Aaisraeli taa lili.” (Ovelise 18) Okwa li u uvu Aaisraeli taya lili omolwiizemo yuulunde wawo. Omulongwantu gumwe okwa ti kutya uutumbulilo “taa lili” otawu vulu wo okugandja edhiladhilo “lyokukakama nenge okwiipukapuka.” Oya li ya fa omumati ngoka a li tu ulike kutya okwiiyela ombedhi mokwiipuka komutse sho ta dhiladhila kuupyakadhi mboka i iyetela nokwa yuulukwa onkalamwenyo ombwanawa ndjoka a li e na nale sho a li kegumbo. (Lukas 15:11-17) Mbela oshigwana osha li tashi ti ngiini?

“Otwa li twa fa okatana okandandi, ihe owe tu longo okuvulika.” (Ovelise 18) Oshigwana osha li sha zimine kutya osha pumbwa egeeloputudho, shaashi osha li shili sha fa okatana okandandi. Embo limwe olya ti kutya efaathanitho ndika otali vulu okugandja edhiladhilo kutya oya li ya fa okatana hoka “kali kaake na okutsuwa noshishongitho ando oka li inaaka pinya ko.”

“Tu galula; otwi ilongekidha okugalukila kungoye, OMUWA Kalunga ketu.” (Ovelise 18) Oshigwana osha li shi ifupipike, e tashi galikana Kalunga. Osha li shi li muulunde, ihe pethimbo mpoka osha galikana Kalunga e shi kwathele shi kale ishewe sha hokiwa kuye. Ombiimbeli yimwe oya toloka ovelise ndjoka ya ti: “Ongoye Kalunga ketu, tu pa ompito tu galukile kegumbo.”—Contemporary English Version.

“Otwa hala tu galuke. . . . Otwa sa ohoni notwa gugwa.” (Ovelise 19) Oshigwana osha li shi uvite nayi molwaashoka osha li sha longo uulunde. Osha li sha taamba ko epuko lyasho. Osha li sha fa tashi idhenge montulo omolwoluhodhi nosha li wo sha sa ohoni nosha polimana.—Lukas 15:18, 19, 21.

Aaisraeli oya li yi iyele ombedhi shili. Oya li ya nika oluhodhi, ya hempululile Kalunga omayono gawo noye etha po iilonga yawo iiwinayi. Mbela okwiiyela ombedhi kwawo okwa li ngaa taku ka ningitha Kalunga e ya dhimine po? Mbela okwa li ngaa te ke ya pitika ya galukile kegumbo?

‘Otandi ku sile ohenda’

Jehova okwa li e na ekwatathano li ikalekelwa noshigwana shaIsraeli. Okwa ti: “Ongame he yaIsraeli, naEfraim oye osheeli shandje.” (Jeremia 31:9) Mbela otashi vulika ngaa he omunahole a kale inaa taamba ko omwana ngoka i iyela ombedhi tashi zi komutima? Tala kunkene Jehova tu ulike nkene u uvitile oshigwana she ngaashi he omuvali ha kala u uvitile oyana.

“Israeli, ngoye omumwandjelela omuholike, omunona ndi mu hole unene. Shaa tandi tumbula edhina lyoye, otandi ku dhiladhila nohole.” (Ovelise 20) Oohapu ndhoka itadhi ulike tuu uukwawo wanankali! Ngaashi naanaa omuvali omunahole ngoka ha ganda oyana ngele taya ningi omapuko, Kalunga okwa li a tokola a katukile oyana onkatu, moku ya londodha lwiikando omolwomayono gawo. Sho ya kukutike omitse dhawo, okwa li e etha ya falwe muupongekwa, sha hala okutya e ya etha ya ze mo megumbo. Ihe nonando okwa li e ya geele, ka li e ya dhimbwa. Ke na nando esiku a ninge oshinima sha tya ngaaka. He omunahole iha dhimbwa oyana. Jehova okwa li u uvite ngiini nduno sho a mono nkene oyana yi iyela ombedhi shili?

“Omwenyo gwandje otagu ku tukulukile, notandi ku sile ohenda.” (Ovelise 20) Jehova okwa li a yuulukwa oyana noonkondo. Eiyelombedhi lyawo tali zi komutima olya li lya gumu omutima gwe, nokwa li a halelela ya galukile kuye. Ngaashi naanaa omusamane omuvali gwomeyele lyaJesus kombinga yomumati a kanene, Jehova ‘okwa li e ya uvile olukeno’ nokwa li a halelela okuhambelela oyana sho taya galukile kegumbo.—Lukas 15:20.

‘Jehova pe ndje ompito ndi galukile kegumbo!’

Oohapu ndhoka dhi li muJeremia 31:18-20 otadhi tu ulukile kutya Jehova oku na olukeno nohenda. Kalunga iha dhimbwa mboka ya li nale haye mu longele. Ongiini ngele oohandimwe mboka oya hala okugalukila kuye? Kalunga ‘oha dhimine po.’ (Episalomi 86:5) Ke na nando esiku a pilamene mboka taya galukile kuye yi iyela ombedhi. (Episalomi 51:17) Mepingathano naashono, oha kala a nyanyukwa oku ya taamba megumbo lye.—Lukas 15:22-24.

Omukiintu ngoka a tumbulwa petameko okwa li a katuka onkatu opo a galukile kuJehova nokwa li a kwatathana negongalo lyOonzapo dhaJehova ndyoka li li moshitopolwa she. Petameko, okwa li e na okukondjitha omadhiladhilo omawinayi ngoka a li e na. Ota ti: “Onda li ndi wete kaandi na oshilonga sha sha.” Ihe aakuluntugongalo oya li ye mu tsu omukumo noye mu kwathele a kale ishewe e na ekwatathano ewanawa naJehova. Nomutima gu na olupandu ota ti ngeyi: “Onda nyanyukwa shili sho Jehova a pa ndje ompito ndi galukile kegumbo.”

Ngele owa li nale ho longele Jehova noto dhiladhila oku mu longela ishewe, otatu ku hiya wu kwatathane negongalo lyOonzapo dhaJehova lyomoshitopolwa sheni. Dhimbulukwa kutya Jehova oha ulike olukeno nohenda ye ngele mboka yi iyela ombedhi oye mu indile taya ti: “Tu pa ompito tu galukile kegumbo.”

[Enyolo lyopevi]