Kala wa lenga iilonga yaJehova

“Otandi ka hokolola iilonga yoye iiwanawa; esiku kehe ondi na okutya: ‘Ongoye omuhupithi.’”—EPS. 71:15.

OTO YAMUKULA NGIINI?

Noowa, Moses, Jeremia naPaulus oya li ya lenga shike monkalamwenyo yawo?

Owa tokola okuninga shike monkalamwenyo yoye?

Omolwashike wa hala okutula iilonga yaJehova pondondo yotango?

1, 2. (a) Omuntu ngoka i iyapulila Jehova oha kala a fa ta ti ngiini? (b) Uuwanawa washike tatu likola mwaashoka sha li sha ningwa kuNoowa, Moses, Jeremia naPaulus?

NGELE owi iyapulila Jehova nowu li omulanduli gwaJesus a ninginithwa, owa ninga oshinima sha simana. Kehe gumwe oha ningi etokolo lyokwiiyapulila Kalunga paumwene. Uuna to shi ningi oho kala wa fa to ti: ‘Jehova onda hala wu kale Omuwiliki gwandje mokanima kehe hoka te ningi monkalamwenyo. Ongame omupiya gwoye. Onda hala wu kale Omuwiliki gwandje nokulombwela ndje nkene ndi na okulongitha ethimbo lyandje, shoka ndi na okupititha komeho, nkene ndi na okulongitha iiniwe yandje nosho wo uunkulungu wandje.’

² Ngele owu li Omukriste a ninginithwa, shoka osho wu uvanekela Jehova. Owu shi okupandulwa, omolwetokolo ndyoka lyu uka noli li pandunge. Ihe ngele Jehova oye Omuwiliki gwoye owu na okulongitha ngiini ethimbo lyoye? Shoka Noowa, Moses, Jeremia nosho wo omuyapostoli Paulus ya li ya ningi, otashi tu kwathele twi ikonakone nawa. Ayehe oya li haya longele Jehova nuudhiginini. Onkalo yetu oya fa owala yawo. Omatokolo ngoka ya li ya ningi otagu ulike shoka ya li ya lenga monkalamwenyo yawo notage tu kwathele tu konakone nawa nkene tu na okulongitha ethimbo lyetu.—Mat. 28:19, 20; 2 Tim. 3:1.

MANGA EYELU INAALI YA

3. Ongiini aantu yopethimbo lyetu ya faathana naamboka yopethimbo lyaNoowa?

³ Jesus okwa faathanitha ethimbo lyetu nolyaNoowa. Okwa ti: “Ngaashi sha li pethimbo lyaNoowa, osho tuu taku ka kala, uuna Omuna [gwomuntu] te ya.” Aantu pethimbo lyaNoowa oya kala “taa li notaa nu, taa hokana notaa hokanitha, sigo esiku ndyoka Noowa a yi monguluwato, yo inaye shi tseya, sigo eyelu lye ya nolye ya hanagula po ayehe.” (Mat. 24:37-39) Aantu oyendji kunena ohaya kala owala ya pwila momaipyakidhilo gawo gakehe siku. Ihayi ipula ko kethimbo ndyoka tu li mulyo lye endelela, yo inaya tseya elondodho ndyoka tali gandjwa kaapiya yaKalunga. Oyendji inayi itaala nokuli kutya Kalunga ote ya a hanagule po aakolokoshi. Oya fa owala aantu yopethimbo lyaNoowa. (2 Pet. 3:3-7) Noowa okwa li a longitha ngiini ethimbo lye, nonando kwa li mokati kaantu ya yonana?

4. Noowa okwa li a longitha ethimbo lye ngiini sho Jehova e mu lombwele shoka ta ka ninga po, nomolwashike?

⁴ Noowa okwa li a tungu onguluwato, opo a hupithe aantu niinamwenyo. Okwe shi ningi sho Kalunga e mu lombwele shoka ta ka ninga po. (Gen. 6:13, 14, 22) Noowa okwa li a londodha aantu kombinga yaashoka Jehova te ke eta. Omuyapostoli Petrus okwe mu popi e li “omuuvithi guuyuki” shoka tashi ulike kutya Noowa okwa li a kwathele aantu pethimbo lye ya mone kutya oye li monkalo ya nayipala. (Lesha 2 Petrus 2:5.) Mbela sho to tala osha li ngaa pandunge kuNoowa negumbo lye ya kale taya humitha komeho oongeshefa pethimbo lyawo? Mbela osha li ngaa nawa kuyo yi ikongele iinima yuuzeko ya kale nonkalamwenyo ombwaanawa? Hasho nando! Inaya ninga iinima mbyoka tayi ya piyaganeke, molwaashoka oya li ye shi shoka tashi ka ningwa komeho.

EHOGOLOLO NDYOKA MOSES A NINGI

5, 6. (a) Elongo ndyoka Moses a li a mona olya li tali vulu oku mu etela uuwanawa wuni? (b) Omolwashike Moses a li kee na ko nasha nuuwanawa womuEgipiti?

⁵ Ngashingeyi natu taleni koshiholelwa shaMoses. Okwa li a putukile muuwa muEgipiti ongomwanamati gwomuna gwokombanda, omwanakadhona gwaFarao. Moses okwa li owala a fa omuna gwokombanda. Sho a li omugundjuka, okwa li a longwa “uunongo auhe wAaegipiti.” (Iil. 7:22; Eks. 2:9, 10) Elongo ndyoka olya li tali vulu oku mu petha ondondo ya simana mombala yaFarao. Okwa li ta vulu okukala a simana mepangelo enankondo lyopethimbo ndiyaka. Okwa li wo ta vulu okukala omukengeli noku na ondondo ya simana ndjoka hayi pewa aawagona. Mbela Moses okwa li ta lalakanene iinima mbyono? Aawe.

⁶ Moses otashi vulika a li a tseya shoka Kalunga u uvanekela hekulululwa Abraham, Isak naJakob. Shika otashi vulika a li e shi lombwelwa kaavali ye sho a li omushonalela. Moses okwa li i itaala mwaashoka Jehova u uvanekela oohekulululwa. Okwa li ha dhiladhila lela shi na ko nasha nonakuyiwa ye nosho wo nkene e na okulongela Jehova nuudhiginini. Oshike a ningi po sho a li e na okuhogolola pokati kokukala omuna gwokombanda Omuegipiti nokukala omupika Omwiisraeli? Okwa li a hogolola “okuhepekwa pamwe naantu yaKalunga ye ina zimina uutoye wuulunde wokathimbo kowala.” (Lesha Aahebeli 11:24-26.) Okwa kala nokulonga ehalo lyaJehova monkalamwenyo ye. (Eks. 3:2, 6-10) Omolwashike Moses a li a hogolola okulonga ehalo lyaKalunga? Omolwaashoka okwa li i itaala momauvaneko ge. Okwa li e shi shi kutya uuwanawa womuEgipiti owopakathimbo. Konima Kalunga okwa li a tumine Aaegipiti omageelo omulongo. Kunena Aakriste ayehe otaya vulu okwiilonga sha koshiholelwa shaMoses. Natu longele Jehova monkalamwenyo yetu, pehala lyokulalakanena omaithano nomainyanyudho muuyuni mbuka.

JEREMIA OKWA LI E SHI SHOKA TASHI KA NINGWA

7. Omolwashike tatu vulu okutya Jeremia okwa li monkalo naanaa ya fa yetu?

⁷ Omupolofeti Jeremia okwa li omulumentu a lenga iilonga yaJehova. Okwa li a pewa oshilonga kuJehova u uvithile aashunimonima yomuJerusalem nomuJuda epangulo ndyoka tali ke ya adha. Jeremia okwa li lela “momasiku gahugunina.” (Jer. 23:19, 20, NW) Okwa li e shi shi lela kutya onkalo moka a li onayi ka hule po konahiya.

8, 9. (a) Omolwashike tatu tile kutya Baruk okwa li e na omadhiladhilo ga penga? (b) Uuna tatu ningi omalongekidho monkalamwenyo yetu, oshike tu na okukaleka momadhiladhilo?

⁸ Jeremia okwa li a henuka okuninga shike? Ina kambadhala okwiikongela edhina monkalelo ndjoka ya li pokuhula po. Kuye osha li sha nika uusama oku shi ninga. Ihe Baruk, amushanga gwaJeremia okwa li e na etaloko lya penga. Kalunga okwa li a wilike Jeremia a lombwele Baruk ta ti: “Otandi ka kumuna po shoka nda tungu, notandi ka tudha mo shoka nda tsike. Shika otandi ke shi ninga moshilongo ashihe. Oto ikongele iinima iinene? Ino yi konga. Oshoka otandi ka undulila aantu ayehe oshiponga, . . . oto kala u na omwenyo, shaa mpoka to yi.”—Jer. 45:4, 5.

⁹ Katu shi naanaa kutya “iinima iinene” mbyoka Baruk a li ti ikongele iikwashike.a Ihe iinima mbyoka oya li yanathangwa notu shi kutya oya li ya hulu po sho Babilonia a hanagula po Jerusalem mo 607 K.E.N. Moshinima shaBaruk otatu ilongo mo shike? Otatu ilongo mo kutya sho tatu ikongele iipumbiwa yetu yonkalamwenyo natu kale wo tu na onakuyiwa momadhiladhilo. (Omayel. 6:6-11) Mbela oshi li ngaa pandunge tu manene ethimbo lyetu noonkondo dhetu miinima yaa na omungunda? Kashi li pandunge, molwaashoka ehangano lyaJehova otali ningi omalongekidho pu tungwe Iinyanga yUukwaniilwa iipe, iitayimbelewa nosho wo iinima yilwe. Iinima mbyoka otayi tu etele uuwanawa monakuyiwa molwaashoka otayi humitha komeho Uukwaniilwa waKalunga. Oshi li nawa kaapiya yaJehova ayehe mboka ye mu iyapulila ya pitithe komeho iinima mbyoka uuna taya dhiladhila onakuyiwa yawo. Ipula to ti: Mbela otandi ‘kongo ngaa tangotango Uukwaniilwa nosho wo uuyuuki waJehova?’—Mat. 6:33, yelekanitha NW.

‘ONDE YI TALA YI LI IIYAGAYA YOWALA’

10, 11. (a) Paulus okwa li e na onkalamwenyo ya tya ngiini manga inaa ninga Omukriste? (b) Oshike sha li sha ningitha Paulus a lundulule onkalamwenyo ye?

¹⁰ Oshiholelwa sha hugunina tatu ka tala oshaPaulus. Omanga inaa ninga Omukriste okwa li a longwa ompango yAajuda komulongi a simanenena ngoka a li ko pethimbo lye. Elongo ndyoka olya li tali vulu oku mu petha ondondo ya simana. Paulus okwa li e na oonkondopangelo ndhoka a li a pewa kaayambi aakuluntu. Okwa li ependa meitaalo lyOshijuda e vule Aajuda ooyakwawo yepipi lye. (Iil. 9:1, 2; 22:3; 26:10; Gal. 1:13, 14) Ihe okwa li a lundulula iikala ye sho a mono kutya nani Jehova ke na we onkwa noshigwana shAajuda.

¹¹ Paulus okwa li e shi wete kutya okwiikongela ondondo monkalelo yiinima yOshijuda kaku na onakuyiwa yasha nongushu momeho gaKalunga. (Mat. 24:2) Nonando okwa li Omufarisayi, ontseyo ndjoka a li e na nale okwa li e yi tala ko “iiyagaya yowala,” moku yi yelekanitha nontseyo ompe yokutseya elalakano lyaKalunga nosho wo uuthembahenda wiilonga yuukalele. Paulus okwa li a thigi po iinima ayihe yOshijuda nokulongitha onkalamwenyo ye ayihe kombanda yevi miilonga yokuuvitha onkundana ombwanawa.—Lesha Aafilippi 3:4-8, 15; Iil. 9:15.

TALA SHOKA WA PITITHA KOMEHO

12. Konima sho Jesus a ninginithwa okwa li a gandja eitulomo kushike?

¹² Noowa, Moses, Jeremia, Paulus nayalwe oyendji oya li ya longitha ethimbo lyawo olindji noonkondo dhawo mokulongela Kalunga. Oye tu tulila po oshiholelwa oshiwanawa. Ihe mokati kaapiya ayehe mboka yi iyapulila Jehova, Jesus oye e tu tulila po oshiholelwa kamana. (1 Pet. 2:21) Konima sho a ninginithwa, okwa longitha onkalamwenyo ye ayihe kombanda yevi mokuuvitha onkundana ombwanawa nokusimanekitha Jehova. Omukriste ngoka e shi kutya Jehova oye Omuwiliki gwe, oku na okupititha komeho iilonga yoku mu longela monkalamwenyo ye. Mbela owe shi ninga? Oshike tashi ke ku kwathela wu longe oshindji miilonga yaJehova, ngoye to gwanitha po ngaa iilonga yoye yilwe?—Lesha Episalomi 71:15; 145:2.

13, 14. (a) Aakriste ayehe mboka yi iyapulila Jehova otaya ladhipikwa ya ninge shike? (b) Oshike hashi nyanyudha aapiya yaKalunga?

¹³ Ehangano olya kala nokukuladhipika Aakriste iikando niikando ya pule Jehova megalikano e ya kwathele ya vule okukokola ondjila. Omolwoonkalo ndhoka dha yoolokathana, aapiya yaJehova yamwe aadhiginini otashi vulika itaaya vulu okukala haya uvitha oowili 70 momwedhi kehe. Ihe kaye na okwiipa uusama. (1 Tim. 5:8) Ongiini kombinga yoye? Mbela ito vulu okuninga omukokolindjila?

¹⁴ Aapiya yaJehova oyendji oya li ya nyanyukwa noonkondo poomwedhi dhEdhimbuluko nuumvo. Mboka ya li ya kutha uukwathelikokolindjila muMaalitsa oya li ya pewa ompito ya hogolole ngele oya hala okulonga oowili 30 nenge 50. (Eps. 110:3, NW) Omamiliyona oya li ya kutha uukwathelikokolindjila, nomagongalo agehe oga li ga tuntukwa noga li menzile lyenyanyu. Mbela ito vulu okwiiyunganeka wu kale ho kutha olundji uukwathelikokolindjila? Ngele owe shi ningi, pehulilo lyesiku kehe, oto ka kala wa nyanyukwa noto ka vula okutya “Jehova onda ninga ngaashi te vulu miilonga yoye.”

15. Aagundjuka Aakriste otaya ladhipikwa ya ninge shike shi na ko nasha nelongo lyosikola?

¹⁵ Otashi vulika wu li omugundjuka nowu li pokumana osikola yongula, owu na uukolele noku na naanaa iinakugwanithwa yasha. Mbela ito vulu okuninga omukokolindjila gwondjigilile? Aalongi otaye ke ku ladhipika wu lalakanene elongo lyopombanda nowu kale wu na ondondo yontumba. Ohaye shi ningi, molwaashoka oyi inekela miinima yopakathimbo ngaashi momahangano gopantu nomoshimaliwa. Ihe ngele owa yi miilonga yethimbo lyu udha, nena oto lalakanene oshinima shoka shi na ongushu notashi kalelele shili. Kungawo, oto landula oshiholelwa shaJesus. Ngele owe shi ningi, oto ka kala wu na elago nompolo. Otashi ke ku gamena wo noshi li euliko kutya owa halelela okukalela Jehova ngoka wi iyapulila.—Mat. 6:19-21; 1 Tim. 6:9-12.

16, 17. Omapulo geni omupiya gwaJehova kehe ta vulu okwiipula?

¹⁶ Aapiya yaKalunga oyendji ohaya longo oowili odhindji, opo ya sile oshimpwiyu aanegumbo yawo. Yamwe ohaya longo oowili dha pitilila inaashi pumbiwa. (1 Tim. 6:8) Aanangeshefa muuyuni oya hala tu itaale kutya onkalamwenyo itayi ke enda nawa ngele katu na iinima oyindji iipe mbyoka opo tayi ndulukwa notayi kondo. Ihe Aakriste yashili ihaya pitike uuyuni waSatana wu ya tokolele shoka ye na okupititha komeho. (1 Joh. 2:15-17) Mboka mwa penzelwa, mbela itamu vulu okuya miilonga yuukokolindjila shoka tashi ulike kutya omwa lenga iilonga yaJehova?

¹⁷ Kehe ngoka i iyapulila Jehova ota vulu okwiipula ta ti: Oshike nda tula pondondo yotango monkalamwenyo? Mbela onda lenga ngaa Uukwaniilwa waKalunga? Mbela ondi na ngaa ombepo yeiyambo ya fa yaJesus? Ohandi landula ngaa shoka Jesus e tu ladhipika tu ninge? Mbela ite vulu okuninga po elunduluko lyasha ndi ninge oshindji miilonga yokuuvitha Uukwaniilwa nenge miinima yilwe yopambepo? Ngele onkalo yandje itayi pitike ndje ndi tamunune mo iilonga yandje, ohandi kongo ngaa ompito opo ndi ninge ngaashi te vulu miilonga yaJehova?

‘OKULONGA NOKUTSAKANITHA EHALO LYAKALUNGA’

18, 19. Oto vulu okugalikana kombinga yashike, nomolwashike hashi nyanyudha Jehova?

¹⁸ Ohashi nyanyudha okumona aapiya yaKalunga taya longo nuulaadhi. Ihe yamwe mboka taya vulu okukokolondjila otashi vulika kaaye na ehalo lyoku shi ninga nenge tashi vulika ye wete kaaye na owino yoku shi ninga. (Eks. 4:10; Jer. 1:6) Ngele owi iyadha monkalo ndjoka, owu na okuninga shike? Pula Jehova megalikana e ku kwathele. Paulus okwa lombwele ooitaali ooyakwawo kutya Jehova ota “longo aluhe mune oku mú pa ehalo noonkondo, opo a tsakanithe elalakano lye ewanawa.” (Fil. 2:13) Ngele owu wete wa fa itoo vulu okutompola sha, pula Jehova e ku pe ehalo nomatha wu tamunune mo uukalele woye.—2 Pet. 3:9, 11.

¹⁹ Noowa, Moses, Jeremia, Paulus naJesus oya li aalumentu aalaadhi. Oya li ya longitha ethimbo noonkondo dhawo ya gandje kaantu etumwalaka lyaJehova lyelondodho. Inaye etha nando osha shi ya piyaganeke. Ehulilo lyonkalelo ndjika tu li muyo oli li pokuya. Onkee ano, atuhe mboka twi iyapulila Kalunga otwa pumbwa okushilipaleka kutya otatu landula ekumagidho ndyoka li li muMateus 24:42 nosho wo muTimoteus omutiyali 2:15. Ngele otatu tula miilonga oohapu ndhoka, nena otatu ka nyanyudha Jehova note ke tu laleka nuuyamba.—Lesha Maleaki 3:10.

[Omanyolo gopevi]

[Ethano pepandja 21]

Aantu inaya pulakena sho Noowa te ya londodha

[Ethano pepandja 24]

Mbela ito vulu okuninga omukokolindjila gwondjigilile?