Mbela opu na ngaa ngoka hu uvu omagalikano?

“Onda li handi kala nda limbililwa ngele Kalunga oko ngaa e li shili. Ihe nonando ongaaka, omathimbo gamwe onda li ngaa handi galikana. Kanda li ndi na uushili ngele opu na ngaa ngoka ha pulakene ndje, ihe onda li handi kala nda hala pu kale ando pu na gumwe ngoka ta pulakene. Onda li kaandi uvite ombili nokanda li ndi na elalakano monkalamwenyo. Onda li nda tila okwiitaala muKalunga, molwaashoka onda li handi dhiladhila kutya aantu owala mboka kaaye na oondunge yi itaala muye.”—PATRICIA,a GWOKUIRLANDA.

MBELA nangoye owu na omaiyuvo ga fa gaPatricia? Mbela oho galikana nonando oho kala wa limbililwa ngele Kalunga oko ngaa e li? Ngele osho, hangoye awike ho shi ningi. Natu taleni komakonakono taga landula.

◼ Maantu 2 200 yomuBritania mboka ya li ya pulapulwa, oopelesenda owala 22 dhi itaala kutya oku na Kalunga ngoka a shita uuyuni nohu uvu omagalikano. Ihe nonando ongawo, oopelesenda 55 dhaamboka ya li ya pulwapulwa, ohadhi galikana.

◼ Maantu 10 000 yomomanenevi gane mboka ya li ya pulwapulwa, oopelesenda 30 lwaampono dhaamboka ya ti kutya inayi itaala muKalunga oya ti ohaya galikana.

Omolwashike ye na omalimbililo?

Omulumentu gwedhina Allan, gwokuIngilanda, okwa ti: “Onda li handi ti kutya inandi itaala muKalunga, molwaashoka onda li tandi dhiladhila kutya elongelokalunga olya totwa po owala okupangela aantu nosho wo okukonga iimaliwa. Onda li handi itompo kutya ando Kalunga oko a li, ando kaku na okwaanuuyuuki ku thike mpoka. Ihe nonando ongaaka, omathimbo gamwe onda li handi kuutumba nda mwena e tandi galikana, nonando kanda li ndi shi kutya otandi popi nalye. Onda li wo handi ipula tandi ti: ‘Olye a shita ndje?’”

Kehe gumwe ngoka e na omaiyuvo ga tya ngaaka oku na omatompelo ge kutya omolwashike a limbililwa ngele opu na ngaa ngoka ha yamukula omagalikano. Olundji otashi vulika ya limbililwa, omolwomapulo gawo ngoka inaaga yamukulwa, ngaashi:

◼ Mbela oku na ngaa Omushiti?

◼ Omolwashike elongelokalunga olundji hali nwetha mo aantu ya ninge iinima iiwinayi?

◼ Omolwashike Kalunga e etha okumona iihuna ku kale po?

Ngele owa tseya omayamukulo gomapulo ngano, mbela oto ka kala wu na omukumo gwokugalikana?

[Enyolo lyopevi]