Ngashingeyi ondi shi Kalunga ngoka handi longele
Nakuhokolola: Marieta Manuel Bacudio
Omuevaangeliste gwongeleka yaPentekoste ngoka kwa li haku tiwa oku na oonkondo dhokwaaludha okwa li e ya e tu talele po. Sho a gumu ndje, onda kambuka, aniwa ndu “udhithwa ombepo.” Sho nda papudhuka po, onda li ndu uvite nda pewa oonkondo dhokwaaludha ndhoka nda li nda hala. Oshike sha li she eta ndje ponkatu ndjika, nosha li sha gumu ngiini onkalamwenyo yandje? Omanga inaandi mu lombwela kombinga yaashoka, nandi mu hokololele manga onakuziwa yandje.
ONDA valelwa moIlocos Norte shaFilipine, mo 10 Desemba 1968. Otwa valwa omulongo, ngame omutiheyali. Otwa putuka tu li Aakatoolika, ngaashi Aafilipine oyendji. Onda mana osikola yongula mo 1986 nonda li nda hala okuninga omupangi. Ihe ondjodhi ndjoka inayi ka tsa we, molwaashoka onda li nda kwatwa kuuvu uunene. Onda li nokuli ndi shi otandi yi konakupila. Molwaashoka onda li nda gwililwa po kuuwehame, ondi indile Kalunga a kwathele ndje nonde mu lombwele kutya ngele onda aluka, otandi ke mu longela sigo aluhe.
Konima yethimbo sho nda aluka, onda dhimbulukwa shoka ndu uvanekela Kalunga. Onkee ano, muJuni 1991 ondi inyolitha mosikola yOmbiimbeli mongeleka yaPentekoste. Omusindalongo gwosikola ogwa li gwa kwatela mo okupewa ‘omagano gombepo ondjapuki.’ Onda li nda hala okukala ndi na oonkondo dhokwaaludha. Mosikola otwa longwa kutya, opo tu dhi mone otu na okukala hatu galikana nokwiidhilika iikulya. Oshikando shimwe sho nda li tandi kambadhala ndu ulike kutya ondi na “omagano” gombepo, onda li nda pulakene meholamo kugumwe gwomongundu yetu ngoka a li ta galikana mokule e li pokakololo pethimbo lyegalikano. Sho e li pokumana, onda shuna nziya pehala lyandje mpoka nda li nda tsa oongolo. Konima yokathimbo, onde mu lombwele shoka a li ta pula megalikano nokwa li i itaala kutya ngashingeyi ondi na “omagano” gombepo.
Sho tandi tsikile neilongo lyandje, onda li ndi na omapulo ogendji. Pashiholelwa, Mateus 6:9 ota popi kombinga ‘yaTate’ nosho wo ‘yedhina’ lye. Onda li nda pula omapulo ngaashi: “Tate ngoka a tumbulwa kuJesus olye?” nosho wo kutya “Edhina ndyoka li na okuyapulwa olyalye?” Omayamukulo gaalongi yetu kaga li ga yela nawa nokaga li taga mbilipaleke. Oya li haya ti kutya Uukwatatu oshiholekwa. Osha li sha ngwangwaneke ndje. Nonando ongawo, onda tsikile neilongo lyandje lyuusita.
Ekwatathano nOonzapo dhaJehova
Mosikola yOmbiimbeli otwa li twa longwa kutya elongelokalunga lyOonzapo dhaJehova olya puka noonkondo. Oya li wo haya ithanwa antikristus. Onda tameke okukala ndi tonde lela elongelokalunga ndika.
Sho ndi li momvula yandje ontiyali, onda yi ndi ka talele po aavali yandje pethimbo lyefudho. Carmen, gumwe gwomaamwamemekadhona aakuluntu, oku uvu kutya onde ya po e te ya naye a talele ndje po. Pethimbo mpoka okwa li nale e li Onzapo yaJehova ya ninginithwa noku li omukalele miilonga yethimbo lyu udha. Sho a li ta kambadhala okulonga ndje kombinga yaKalunga, onde mu yamukula nda geya nda ti: “Ngaye Kalunga ngoka handi longele ondi mu shi nale.” Konima onde mu tuku mokule e tandi mu undulile hwi noinandi mu pa we nando ompito a popye nangame.
Sho nda shuna kosikola yOmbiimbeli, Carmen okwa tumine ndje okabroshure Should You Believe in the Trinity?a Onde ka tonyagula po nziya e tandi ku umbile momulilo, molwaashoka onda li nde mu geela natango.
Tandi humu komeho ndi li omusita
Sho nda tsikile neilongo lyandje lyOmbiimbeli, onda li nda vulu okweeta mo aantu mongeleka. Onda li nda nyanyukwa sho meme nomumwamememati nayo ya ningi yelongelokalunga lyoPentekoste.
MuMaalitsa 1994 onda mana osikola yOmbiimbeli mongeleka yaPentekoste. Ngaashi sha popiwa petameko, omuevaangeliste ngoka a li ta talele po naye opo a li. Atuhe mboka twa li twa mana osikola otwa li twa hala okukala puye, molwaashoka otwa li twi itaala kutya oku na omagano gokwaaludha. Otwa yi ku ye komutuni, tatu nuka, tse tatu hakele omake sho obenda tayi dhana. Opo nduno, kehe gumwe a li a gumwa komuevaangeliste okwa gu aniwa u “udhithwa ombepo.”b Sho a gumu ndje, nangame onda gu e tandi kambuka. Sho nda papudhuka po, onda li nda tila, ihe onda li nda nyanyukwa, molwaashoka onda li ndi uvite kutya ngashingeyi ondi na oonkondo dhokwaaludha.
Nziya konima yaashoka onda ka longitha oonkondo ndhika okwaaludha okanona hoka ka li ke na olwiidhi. Sho nde ka galikanene, oka tameke okupusha nolwiidhi olwa kodha. Ngashingeyi onda li ndi wete kutya otandi vulu okugwanitha po euvaneko lyandje ndyoka nda li ndu uvanekela Kalunga. Ihe nonando ongawo, onda li ndi wete pu na sha natango sha kambela po. Muule womutima gwandje, onda li ndi itaala kutya oku na owala Kalunga gumwe, ihe kanda li ndi mu shi. Onda li nokuli nda limbililwa ogendji gomomalongo gongeleka.
Shoka sha lundulula okudhiladhila kwandje
Konima yiiningwanima mbyoka, uutondwe wandje wokutonda Oonzapo dhaJehova owa lundu. Shampa ndi itsu iileshomwa yOonzapo, onda li handi yi fike po. Osho nduno pwa ka ningwa oshinima inaandi shi tegelela. Onda li nda haluka noonkondo sho meme a ka kala inaa hala we ongeleka yetu. Nani Carmen oye a kala ta konakona Ombiimbeli naye. Carmen okwa li a geyitha ndje shili!
Osho nda ka mona po oshifo shimwe sho-Awake! nde shi adha megumbo lyameme. Ando oshito, ando onde shi fike po. Ihe molwaashoka onda li nda hala okutseya shoka ta lesha, onde shi pandja. Onda mono mo oshitopolwa shimwe tashi hokolola omuntu ngoka a li nale i itaala omalongo gongeleka. Ihe sho a tameke okulesha iileshomwa yOonzapo pamwe nOmbiimbeli ye okwa li a tompwa kutya omalongo ngaashi lyUukwatatu, lyomulilo gwoheli nolyomwenyo ihaagu si itaga tsu kumwe nelongo lyOmbiimbeli. Shika osha li sha gumu ndje komutima. Iinima mbika oyo naanaa nda kala nda hala okuuva ko! Okuza kesiku ndyoka onda kala nda hala ndi uve ko oshili yOmbiimbeli.
Konima sho nda lesha ishewe moshifo sho-Awake! kombinga yondjokonona yagumwe ngoka a li a pikwa kiikolitha nokiingangamithi e te yi etha sho a konakona Ombiimbeli, onda ka tameka okulesha iileshomwa oyindji yOonzapo dhaJehova. Onda ka mona okabroshure kedhina The Divine Name That Will Endure Forever.c Sho nde ka lesha, ondi ilongo kutya edhina lyaKalunga oJehova. Osha li sha nyanyudha ndje noonkondo okwiilonga oshili kombinga yaKalunga awike kashili.—Deuteronomium 4:39; Jeremia 10:10.
Onda kala handi lesha meholamo e tandi ilongo oshindji kombinga yoshili yOmbiimbeli. Pashiholelwa, mosikola yOmbiimbeli yongeleka yaPentekoste onda li nda longwa kutya Jesus oye Kalunga, ihe ngashingeyi ondi ilonga mOmbiimbeli kutya Jesus oye “Omuna gwaKalunga omunamwenyo.”—Mateus 16:15, 16.
Omalunduluko monkalamwenyo yandje
Sho twa ka tsakanena ishewe naCarmen, okwa li a kumwa sho nde mu pula a pe ndje okabroshure kedhina The Divine Name That Will Endure Forever nosho wo iileshomwa yilwe. Mosikola yOmbiimbeli onda kala mo oomvula odhindji, ihe inandi longwa mo oshili, onda li nda tsikithwa owala. Ngashingeyi omutima gwandje ogwa li tagu hunga enyanyu omolwoshili ndjoka nda li tandi ilongo mOmbiimbeli. Onda li nda mono uushili woohapu dhaJesus ndhoka tadhi ti: “One otamu ka tseya oshili, noshili otayi ke mú mangulula.” (Johannes 8:32) Oshili ndjika oya li ya tameke okulundulula onkalamwenyo yandje.
Uule wokathimbo, onda li ndi shi otandi vulu okukala omusita omanga tandi longele Jehova Kalunga meholamo. Nziya onda ka mona kutya itandi vulu we okulonga aantu omalongo gongeleka. Ihe nonando ongawo, onda li ndi na uumbanda kutya otandi ka adha oshimaliwa peni ngele onde etha po uusita? Itashi ka kala tuu ohoni onene kongeleka ngele gumwe gwomaasita yongeleka okwa ningi Onzapo yaJehova! Onkee ano, onda tsikile nuusita wandje, ihe onda li handi yanda okulonga aantu omalongo gongeleka ngoka ga puka.
Sho twa ka tsakanena ishewe naCarmen, okwa pula ndje ndi ye kokugongala kwOonzapo dhaJehova. Onda tokola ndi konge meholamo Oshinyanga shUukwaniilwa moLaoag City, molwaashoka olundji onda li handi yi kongeleka yetu onene ndjoka yi li moshilando moka. Onda ka tseya mo Alma Preciosa Villarin ngoka hi ithanwa wo “Precious,” omuuvithi gwethimbo lyu udha megongalo moka. Nonando onda li kaandi hole natango Oonzapo dhaJehova lelalela, onda zimine a longe ndje Ombiimbeli.
Omumwamemekadhona okwa li ha lombwele ndje oshili kombinga yOmbiimbeli a ngungumana. Ngashingeyi uukwatya mboka ondi wu wete muPrecious. Okwa li a kwathele ndje ndu uve ko nawa Ombiimbeli, nonando onda li handi geye, handi kambadhala oku mu tamaneka nohandi yi pombanda omathimbo gamwe, molwaashoka nda li inaandi hala okweetha po iinima mbyoka nda longwa nale. Okunakonasha, eifupipiko nombili ndjoka yu ulikwa kuPrecious nokOonzapo dhilwe oya li ya gumu omutima gwandje. Shika osha ningitha ndje ndi kale nda hala okulongela Jehova.
MuJuli 1995 onda ka mona kutya kandi na we nkene ndi na okuninga, ondi na owala oku etha po uusita. Omolwashike mbela? Ehololo 18:4 otali popi kombinga yelongelokalunga lyiifundja pathaneko tali ti: “Zii mo mokati kawo, one aantu yandje! Iyoololii mo muyo! Inamu kwatathana noondjo dhawo; inamu ihilila omageelo gawo!” Ihe openi tandi ka adha oshimaliwa? Aahebeli 13:5 oya longa ndje kutya ngele otwa longo ehalo lyaKalunga, ote tu uvanekele ta ti: “Itandi ku etha nando; itandi ku thigi po.”
Nonando tate nomumwamememati oya li ngashingeyi taya pataneke ndje noonkondo, sho ku na iiwike iyali ndi ninginithwe, onda tula omwenyo mombinzi e tandi yi kegumbo ndi ka fike po iinima ayihe mbyoka nda li handi longitha miilonga yandje yuusita. Konima sho nde shi ningi, onda dhimbulula kutya kandi na we oonkondo dhokwaaludha adhihe ndhoka nda li nda pewa. Nale uuna nda kotha onda li handi kala ndu uvite pwa fa pu na oshinima sha laminina ndje. Oshinima shoka nasho ihandi shi uvu we. Omizizimbe ndhoka nda li handi mono pekende lyondunda yandje ngashingeyi ihadhi kala po we. Sho nda konakona Ombiimbeli, onda mona kutya omagano kehe ngoka aantu ye na kunena, ngaashi oonkondo dhokwaaludha, ihaga zi kuKalunga, ihe okoombepo dhoompwidhuli. Onda nyanyukwa noonkondo sho nda manguluka ko kudho, ngaashi omupika omukadhona ngoka a li a mangululwa kuPaulus naBarnabas “kombepo ombwinayi, ndjoka ya kala hayi mu longitha okuhunganeka onakuyiwa.”—Iilonga 16:16-18.
Kanda li tuu nda nyanyukwa sho tandi ninginithwa pamwe nameme tu ninge Oonzapo dhaJehova muSeptemba 1996! Konima sho nda ninginithwa onda ningi omukalele gwethimbo lyu udha nonda kala handi shi ningi ethimbo ele.
Ngashingeyi onda hokanwa kuSilver. Ohatu longo nuudhiginini okuputudhila okamwanakadhona ketu mondjila yoshili yOmbiimbeli. Aamwameme yamwe nayo ohaya longele Jehova pamwe natse. Nonando onda kala oomvula odhindji inaandi tseya Kalunga, ngashingeyi onda nyanyukwa sho nda tseya Kalunga ngoka handi longele.
[Omanyolo gopevi]
a Ka nyanyangidhwa kOonzapo dhaJehova, ihe ngashingeyi ihaka nyanyangidhwa we.
b Uutumbulilo ‘okuudhithwa ombepo’ ohawu longithwa okupopya kombinga yoshinima shimwe shoka hashi ningwa momalongelokalunga gamwe ngoka gi itaala kutya “ombepo” ohayi ya mooitaali yi na oonkondo ndhoka hadhi ya hata pevi.
c Ka nyanyangidhwa kOonzapo dhaJehova.
[Oohapu dha simana pepandja 27]
Onda li nda longitha oonkondo ndhika okwaaludha okanona hoka ka li ke niwe kolwiidhi
[Oohapu dha simana pepandja 28]
Oshili ndjika oya li ya tameke okulundulula onkalamwenyo yandje
[Oohapu dha simana pepandja 29]
Osha li sha nyanyudha ndje noonkondo okwiilonga oshili kombinga yaKalunga awike kashili
[Ethano pepandja 27]
Sho nda mana osikola yuusita
[Ethano pepandja 28, 29]
Precious okwa li a longo ndje Ombiimbeli
[Ethano pepandja 29]
Esiku twa ninginithwa nameme
[Ethano pepandja 29]
Sho ndi li omukalele gwethimbo lyu udha
[Ethano pepandja 29]
Ndi li nomusamane gwandje, okamwanakadhona ketu nosho wo oyendji yomaakwanezimo mboka ye li natse melongelokalunga lyashili