Etha omakondjithathano ge ku kwathele
Mbela ito tsu kumwe nasho kutya Jesus oye a li Omulongi omunenenene ngoka a li ko kombanda yevi? Otashi vulika wa kambadhala okuholela omikalo dhe dhimwe moka a li a longo aantu, ngaashi okupula omapulo nosho wo okulongitha omayele. Ihe mbela owi ipulile ngaa nale kutya olundji okwa li a longitha omakondjithathano sho ta longo aantu?
Aantu oyendji ohaya longitha omakondjithathano uuna taya popi. Nangoye otashi vulika wo ho shi ningi, olundji inoo dhiladhila kusho. Otashi vulika wu tye: “Oya ti iiyimati ayihe oya pya; ihe mbika omagongwa natango.” Nenge, “sho a li omunona, okwa li e na ohoni nayi, ihe ngashingeyi okuhole aantu.”
Mokupopya ngaaka, tango oho gandja uushili wontumba nenge edhiladhilo lyontumba; ndele e to gandja ekondjithathano mokulongitha uutumbulilo ngaashi ihe, ashike, shila, nenge kombinga yimwe. Nenge otashi vulika wu gandje ekondjithathano mokugwedha ko uuyelele nenge mokukoleka edhiladhilo lyontumba. Uuna to popi momukalo ngoka, oho popi paunshitwe nosho wo kutya ohagu kwathele yalwe yu uve ko shoka wa hala okutya.
Nonando omakondjithathano ihaga longithwa naanaa momalaka gamwe nenge momaputuko gamwe, otashi ka kala nawa tu dhimbulule ongushu yago. Omolwashike mbela? Omolwaashoka mOmbiimbeli ohatu adha mo omakondjithathano ogendji. Jesus okwa li a longitha olundji omakondjithathano. Tala kwaangaka: ‘Olamba ihayi temwa e tayi tulwa kohi yontungwa, [ihe, NW], okoshihukikwa.’ ‘Inandi ya okudhima po [ompango], ihe oku yi gwanitha.’ ‘One omu uvu kwa tiwa: “Ino hondela.” Ihe ngame otandi mú lombwele: Okehe tuu ngoka ta tala omukiintu . . . ’ ‘One mu uvu kwa tiwa: “Ngoka a tsipula mo eho lyamukwawo, naye wo na tsipulwe eho; naangoka a teya mo eyego lyamukwawo, naye wo na teywe eyego.” Ihe ngame otandi mú lombwele: Inamu shunitha uuwinayi kungoka te mú ningile uuwinayi. Ngele ku na ngoka te ku dhenge olupi kolupanda lwokolulyo, mu etha, a dhenge nolukwawo.’—Mat. 5:15, 17, 27, 28, 38, 39.
Momambo galwe gOmbiimbeli omu na wo omakondjithathano ga faathana. Otage ke ku kwathela wu uve ko oshitsa shontumba nenge wu shi uve ko nawa lela shi vulithe ngaashi sha tumbulwa mekondjithathano, opo wu shi tule miilonga. Ngele ngoye omuvali, dhiladhila kekondjithathano ndika: ‘Aakuluntu, inamu hinda aana yeni noku ya geyitha, ihe ya putudheni ne mu ya kumagidhe paukriste.’ (Ef. 6:4) Ngele omuyapostoli Paulus okwa nyolele owala kutya omusamane (nenge omuvalakadhi) oku na okuputudha omwana ngaashi Kalunga ta ti, shoka otashi ka kala shi li pandunge noshoshili. Ashike, edhiladhilo ndyoka olya yela nawa sho a longitha ekondjithathano kutya ‘inamu hinda aana yeni noku ya geyitha, ihe ya putudheni ne mu ya kumagidhe paukriste.’
Moovelise dha landula ko montopolwa oyo tuu ndjoka, Paulus okwa nyola a ti: ‘Tse itatu kondjitha aantu, ihe otatu kondjitha . . . oonkondo dhuuwinayi mewangandjo.’ (Ef. 6:12) Ekondjithathano ndyoka otashi vulika li ku kwathele wu uve ko kutya owu li molugodhi lwa kwata miiti. Itatu kondjitha aantu, ihe oonkondo dhuuwinayi.
MONA UUWANAWA MOMAKONDJITHATHANO
Natango membo ndika lyOmbiimbeli, Aaefeso, oto ka adha mo oovelise dhilwe odhindji moka Paulus a longitha omakondjithathano. Okudhiladhila kombinga yoovelise ndhika otaku vulu oku tu kwathela tu uve ko shoka Paulus a li a hala okutya nokuuva ko nawa shoka tu na okuninga.
Oto ka nyanyukilwa noto ka mona kutya oshi na oshilonga lela mokukonakona oshimpungu shoka shi li oshitopolwa shoshikundathwana shika shi na omakondjithathano gamwe ngoka taga adhika mAaefeso ontopolwa 4 nosho wo 5. Sho to lesha ekondjithathano kehe, dhiladhila konkalamwenyo yoye mwene. Ipula mwene to ti: ‘Ano shilishili, ondi na iikala ya tya ngiini? Ohandi inyenge ngiini monkalo ndjika nenge muyimwe ya faathana naandjika? Ombinga yini yekondjithathano tayi ulike nkene ndi li uuna yalwe taya dhiladhila kombinga yandje? Ngele owa mono kutya opu na ekondjithathano ndyoka tali ulike kutya owa pumbwa okulundulula, kambadhala wu shi ninge. Etha ekondjithathano ndyoka li ku kwathele.
Nenge oto vulu okulongitha oshimpungu shoka melongelokalunga lyuukwanegumbo weni. Tango, iilyo ayihe yegumbo lyoye otayi vulu okulesha omakondjithathano ngoka. Opo nduno, gumwe gwomune ota vulu okutumbula oshitopolwa shotango shekondjithathano, yalwe taya kambadhala okudhimbulukwa oshitsa shoka sha ndhindhilikwa moshitopolwa oshitiyali. Shoka otashi ka kala oonkundathana oombwanawa moka ta mu ka mona nkene ta mu vulu okutula miilonga lela oshitopolwa oshitiyali. Eeno, okukonakona omakondjithathano ngaashi ngoka otaku vulu okukwathela aagundjuka naakokele ya kale ye na eihumbato lyopaKriste megumbo nosho wo palwe.
Mbela oto vulu okudhimbulukwa oshitopolwa oshitiyali shekondjithathano?
Sho to mono ongushu yomakondjithathano, oto ka hwepopala moku ga dhimbulula mo mOmbiimbeli, nosho wo oto ka mona kutya otage ke ku kwathela muukalele. Pashiholelwa, oto vulu okutya komunegumbo: “Aantu oyendji ohaya ti kutya omuntu kehe oku na omwenyo ihaagu si, ihe tala mpaka kutya Oohapu dhaKalunga otadhi ti shike.” Nenge sho to ningi ekonakonombiimbeli, oto vulu okupula to ti: “Aantu oyendji momudhingoloko nguka oyi itaala kutya Kalunga naJesus omuntu gumwe, ihe Ombiimbeli otayi ti shike? Ngoye owi itaala shike?”
Eeno, Omanyolo oge na omakondjithathano ogendji taga longo, ngoka taga vulu oku tu kwathela tu ende mondjila yaKalunga. Notatu vulu okulongitha omakondjithathano tu kwathele yalwe ya tseye oshili yOmbiimbeli.