Jehova ohe tu kwatha muudhigu wetu awuhe
‘Kalunga ngoka kuye haku zi ekwatho alihe ohe tu kwatha muudhigu wetu awuhe.’ — 2 KOR. 1:3, 4.
1, 2. Jehova ohe tu kwatha ngiini muudhigu wetu, nOohapu dhe otadhi tu shilipaleke ngiini?
OMUMWATATE gumwe omugundjuka inaa hokana, gwedhina Eduardo, okwa li a lombwele omukuluntugongalo omukokele a hokana gwedhina Stephen, nkene u uvite. Eduardo okwa kala ta dhiladhila Aakorinto yotango 7:28, ndjoka tayi ti: ‘Mboka taa hokana otaya ka kala ye na uudhigu monkalamwenyo yawo.’ Okwa li a pula a ti: “‘Uudhigu’ mbuno owa kwatela mo shike, nongiini tandi ka ungaunga nawo ngele nda hokana?” Manga inaa yamukula epulo ndyoka, Stephen okwa li a pula Eduardo a dhiladhile ishewe oshinima shimwe shoka omuyapostoli Paulus a li a nyola kombinga yasho, sho a ti kutya Jehovah ‘oKalunga, ngoka kuye haku zi ekwatho alihe. Oye ngoka he tu kwatha muudhigu wetu awuhe.’ — 2 Kor. 1:3, 4.
2 Jehova oku li shili Tate omunahole nohe tu kwatha uuna tu li muudhigu. Otashi vulika wa mona nkene e ku kwathela nokwe ku wilika, nolundji ohe shi ningi okupitila mOohapu dhe. Otatu vulu okukala nuushili kutya okwe tu halela uuwanawa, ngaashi a li e shi ningile aapiya ye yopethimbo lyonale. — Lesha Jeremia 29:11, 12.
3. Omapulo geni tatu ka kundathana?
3 Ohashi kala oshipu kutse okwiidhidhimikila uudhigu ngele otu shi kutya owe etwa kushike. Naashoka osho shi li ngawo mondjokana nenge monkalamwenyo yuukwanegumbo. Mbela iinima yimwe yini mbyoka ya tumbulwa kuPaulus tayi vulu okweeta ‘uudhigu wonkalamwenyo’? Iiholelwa yini yopethimbo lyOmbiimbeli noyopethimbo lyetu tayi vulu oku tu kwathela tu mone ehekeleko ndyoka twa pumbwa? Okukala tu yi shi otashi ke tu kwathela tu vule okuungaunga nuudhigu wetu.
‘UUDHIGU WONKALAMWENYO’
4, 5. Iinima yimwe yini hayi etitha ‘uudhigu monkalamwenyo’?
4 Otatu vulu okulesha shoka Kalunga a tile petameko sho a shiti omuntu, a ti: “Omulumentu oku na okuthiga po he nayina e ta kwatathana nomukadhi, oyo notaa ningi omuntu gumwe.” (Gen. 2:24) Jehova shoka okwe shi popi sho a dhike po ondjokana yotango. Ihe omolwokwaagwanenena, okuya mondjokana nokutameka uukwanegumbo otaku vulu okudhigupaleka ekwatathano lyuukwanegumbo. (Rom. 3:23) Omukiintu ngele a hokanwa, ke li we kohi yepangelo lyaavali ye, ihe olyomusamane gwe. Kalunga okwa pa omusamane oonkondopangelo a kale omutse gwomukulukadhi gwe. (1 Kor. 11:3) Mboka opo ya yi mondjokana ihaya mono oshipu oku shi ninga. Oohapu dhaKalunga otadhi ti kutya omukulukadhi oku na okuzimina kutya ota ka kwatelwa komeho komusamane gwe, ihe hakaavali ye. Mboka opo ya yi mondjokana otashi vulika pokati kawo noosuwala pu holoke okwaauvathana, naashoka otashi vulu okweeta uupyakadhi.
5 Dhiladhila owala nkene omusamane ha kala u uvite uuna a lombwelwa komukadhi kutya oku li metegelelo. Aayihokani mbono ohaya kala ya nyanyukwa sho ya tegelela okanona kawo, ihe ohaya kala wo tayi ipula niinima yi na ko nasha nuunamiti pethimbo omukulukadhi e li metegelelo nokonima ngele a mono. Oye na wo okudhimbulukwa kutya ngashingeyi iifutomwa otayi ka kala oyindji. Ohapu kala pwa pumbwa okuningwa omalunduluko ogendji ngele okanona ka valwa. Omukulukadhi ngele a mono okanona oha kala ta gandja unene eitulomo koku ka sila oshimpwiyu. Aasamane oyendji ohaya kala yu uvite kaaye niwe nayo, molwaashoka omukulukadhi oha kala ta gandja unene eitulomo kokanona. Omusamane naye oha kala e na oshinakugwanithwa sha gwedhwa po shokuyambidhidha omukulukadhi gwe. Iinakugwanithwa ye ohayi ningi oyindji, molwaashoka ngashingeyi muukwanegumbo omwa gwedhwa okanona hoka nako e na oku ka sila oshimpwiyu.
6-8. Ongiini okwaavula okumona aanona taku vulu okukala uudhigu kugumwe?
6 Aaihokani yamwe oye na omaudhigu gi ili nogi ili. Ohaya kala ya halelela okumona aanona, ihe ihaye ya mono. Ngele omukulukadhi ina ninga etegelelo otashi vulika a kale u uvite nayi noonkondo. Kutya nduno omuntu oku kale mondjokana e na aanona nenge kee ya na, ota vulu okukala e na ‘uudhigu monkalamwenyo.’ (Omayel. 13:12) Pethimbo lyOmbiimbeli ngele omuntu iha mono aanona, olundji osha li hashi kala esithahoni. Rakel, omukadhi gwaJakob, okwa li u uvu nayi sho e wete omumwayina e na aanona. (Gen. 30:1, 2) Aatumwa mboka haya longele kiilongo hoka aantu ya tegelelwa ya kale ye na uukwanegumbo wu na aanona oyendji, ohaya pulwa olundji kutya omolwashike kaaye na aanona. Nonando aatumwa oya kambadhale shi thike peni ye ya yelithile kutya omolwashike kaaye wu na, yamwe ohaya kala natango taya ti: “Oo! otatu mu galikanene.”
7 Nenge dhiladhila konkalo yomumwameme moEngland ngoka a li a hala noonkondo okanona, ihe ine ka mona. Sho a mono kutya ita vulu okumona okanona muuyuni mbuno, okwa li u uvite nayi. Ye nomusamane gwe oya li ya tokola okwiikongela okanona ye ka tekule onga kawo yene. Ihe nonando ongawo, okwa popi a ti: “Onda li natango nda nika oluhodhi. Onda li ndi shi shi kutya okwiikongela okanona inashi fa okumona okanona koye mwene.”
8 Ombiimbeli oya popya kombinga yomukiintu Omukriste kutya ota vulu ‘okuhupithwa omolwokuvala uunona.’ (1 Tim. 2:15) Ihe shika itashi ti kutya okumona aanona otashi vulu okweetela omuntu omwenyo gwaaluhe. Pehala lyaashono, otashi ti kutya omukulukadhi ngoka e na aanona nosho wo iinima yilwe mbyoka e na okuninga megumbo, ohayi mu kaleke i ipyakidhila nohayi mu gamene kaa kale ta popile yalwe muuwinayi nokwiidhopa miinima yaantu. (1 Tim. 5:13) Ihe nonando ongawo, ota vulu natango okwaadhika komaupyakadhi ge na ko nasha nondjokana nosho wo nonkalamwenyo yuukwanegumbo.
Ongiini omuntu ta vulu okwiidhidhimikila eso lyomuholike gwe? (Tala okatendo 9, 12)
9. Omolwashike okusilwa kuume kopandjokana ku li uudhigu uunene?
9 Uuna taku popiwa uudhigu womondjokana, otashi vulika pu na uudhigu wumwe mboka ihaatu dhiladhila kombinga yawo. Uudhigu mboka owo okusilwa kuume kopandjokana. Eeno, okusilwa kuume kopandjokana oku li shili uudhigu uunene mboka oyendji ihaaya vulu oku wu idhidhimikila momasiku ngaka gahugunina. Aakriste oyi itaala lela meuvaneko lyaJesus lyokuyumudha aantu. (Joh. 5:28, 29) Mbela etegameno ndyono otali kwathele ngiini kuume kopandjokana ngoka a thigwa po? Otali gandja ehekeleko kaaku na we. Nguka ogwo omukalo gumwe moka Tate gwetu omunahole ha gandja ehekeleko okupitila mOohapu dhe kwaamboka ye li muudhigu. Natu konakoneni nkene aapiya yamwe yaJehova haya kala yu uvite nankene haya mono uuwanawa mehekeleko ndyoka hali zi kuJehova.
EHEKELEKO UUNA TU LI MUUDHIGU
10. Hanna okwa li a mono ngiini ehekeleko sho a li a nika oluhodhi? (Tala kethano lyopetameko.)
10 Hanna, omukulukadhi omuholike gwaElkana, okwa li e na uupyakadhi wokwaamona aanona. Ihe Peninna ngoka naye a li omukulukadhi gwomusamane gwe, okwa li e na aanona. (Lesha 1 Samuel 1:4-7.) “Omimvo nomimvo,” Hanna okwa kala nokushekwa kuPeninna. Shoka osha ningitha Hanna a kale a nika oluhodhi noonkondo nokwa gwililwa po. Hanna okwa li a kongo ehekeleko kuJehova megalikano. Ombiimbeli otayi ti kutya “okwa tsikile okugalikana Omuwa olule.” Mbela okwa li ngaa a tegelela Jehova a yamukule egalikano lye? Oku na okukala a li e na einekelo kutya ote li yamukula. Sho a galikana “ina sa we oluhodhi.” (1 Sam. 1:12, 17, 18) Okwa li e na einekelo kutya Jehova ote ke mu pa okanona nenge e mu hekeleke momukalo gwontumba.
11. Ongiini egalikano tali vulu oku tu hekeleka?
11 Uudhigu otawu tsikile, molwaashoka otu li aantu inaatu gwanenena notu li muuyuni mbuka tawu pangelwa kuSatana. (1 Joh. 5:19) Kashi shi tuu oshiwanawa okutseya kutya Jehova oye “Kalunga, ngoka kuye haku zi ekwatho alihe”! Egalikano otali vulu oku tu kwathela tu ungaunge nuudhigu wetu. Hanna okwa mbumbulile Jehova omutima gwe. Sha faathana, uuna tu li muudhigu, otwa pumbwa okuninga oshindji kaashi shi owala okulombwela Jehova nkene tu uvite. Otwa pumbwa oku mu tseyithila megalikano tali zi komutima omaiyuvo getu. — Fil. 4:6, 7.
12. Oshike sha li sha kwathele omuselekadhi Anna a kale a nyanyukwa?
12 Nonando otu uvite nayi unene, molwaashoka kaatu na aanona nenge molwaashoka twa silwa aaholike yetu, natango otatu vulu okumona ehekeleko. Pethimbo lyaJesus, omuhunganeki omukiintu gwedhina Anna okwa li a silwa omusamane gwe konima owala yomimvo heyali mondjokana yawo. Ombiimbeli inayi popya kutya oya li ye na aanona. Mbela Anna okwa li a tsikile okuninga shike naasho e na omimvo 84? Lukas 2:37 otayi ti: “Ethimbo alihe okwa kala motempeli koshipala shaKalunga uusiku nomutenya ti idhilike iikulya nokugalikana.” Anna okwa li a mono ehekeleko nenyanyu mokulongela Jehova.
13. Gandja oshiholelwa shankene kuume kashili ta vulu okukala ehekeleko kukuume ke uuna aakwanezimo itaaye shi ningi.
13 Ngele otwa kala hatu endathana naamwatate naamwameme, otatu ka mona ookuume kashili mboka tu na ekwatathano lyopothingo nayo. (Omayel. 18:24) Paula sho a li e na omimvo ntano ota dhimbulukwa nkene a li u uvite nayi sho yina e etha po oshili. Kasha li oshipu okwiidhidhimikila onkalo ndjoka. Ihe sho Ann, omukokolindjila gwomegongalo lyawo a kala e na ko nasha nuupambepo we, oshe mu tsu omukumo noonkondo. Paula okwa ti: “Nonando Ann ka li omupambele gwandje, okwa li ekwatho enene kungaye. Okwa li a kwathele ndje ndi tsikile okulongela Jehova.” Paula okwa tsikile okulongela Jehova nuudhiginini. Okwa nyanyukwa wo noonkondo sho meme gwe a galukile megongalo. Ann naye okwa nyanyukwa sho Paula e li okamwanakadhona kopambepo.
14. Mboka taya tsu yalwe omukumo otaya vulu okumona omayambeko geni?
14 Odhoshili kutya uuna tatu ulukile yalwe ohole nokukala tu na ko nasha nayo, otashi vulu oku tu kwathela tu ethe po omadhiladhilo omawinayi. Aamwameme ya hokanwa naamboka inaaya hokanwa, oya mona enyanyu enene mokutaandelitha onkundana ombwanawa sho taya longo pamwe naKalunga. Elalakano lyawo okusimaneka Kalunga mokulonga ehalo lye. Yamwe oya tala ko nokuli okukutha ombinga muukalele ku li epepelelo. Odhoshili kutya atuheni otatu vulu okukoleka egongalo ngele otwa kala tu na ko nasha nayalwe, mboka ye li miitopolwa yetu naamboka ye li megongalo. (Fil. 2:4) Omuyapostoli Paulus okwa li oshiholelwa oshiwanawa. Okwa li a fa “yina ta sile oyana oshimpwiyu” kwaamboka ya li megongalo lyomuTessalonika; okwa li wo a fa tate gwawo gwopambepo. — Lesha 1 Aatessalonika 2:7, 11, 12.
EKWATHO MUUKWANEGUMBO
15. Oolye unene ye na oshinakugwanithwa shokulonga aagundjuka oshili?
15 Omaukwanegumbo nago oga pumbwa okutsuwa omukumo nokuulukilwa okunakonasha. Omathimbo gamwe, aavali mboka opo taye ya moshili ohaya pula aauvithi mboka ya pyokoka pambepo ye ya kwathele ya longe oyana oshili, nokuli ohaye ya pula wo ya konakone noyana mboka aashona. Omanyolo otagu ulike kutya aavali oyo unene ye na oshinakugwanithwa shokulonga nokuputudha oyana. (Omayel. 23:22; Ef. 6:1-4) Poompito dhimwe ekwatho okuza kuyalwe olya pumbiwa notali pandulwa noonkondo. Ihe shoka inashi ya ningitha ya kale ya dhina oshinakugwanithwa shaavali yaanona mboka. Osha simanenena aavali ya kale haya kundathana noyana esiku kehe.
16. Mboka taya kwathele aanona yagumwe oye na okukaleka shike momadhiladhilo?
16 Ngele omuvali okwa tokola a pule gumwe a konakone noyana, ngoka te shi ningi ina kambadhala okukutha po oshinakugwanithwa shaavali. Opwa li omathimbo gamwe aavali mboka kaaye na ohokwe moshili ya pula gumwe gwomOonzapo a konakone noyana. Onzapo oyi na okudhimbulukwa kutya, nonando otayi kwathele aanona mboka pambepo, itashi ti kutya oya ninga po omuvali gwawo. Ngele tatu konakona naanona mboka kaaye shi yetu, otashi ka kala pandunge okukonakona nayo maandjawo uuna aavali yawo nayo omo ye li nenge okuya ko nomukuluntu gulwe nenge okukonakonena pehala mpoka aantu taya vulu oku mu mona. Momukalo gwa tya ngaaka, itatu ka ningitha aantu ya kale ye na omalimbililo. Ano mokweendela ko kwethimbo, aavali oya tegelelwa ya gwanithe po oshinakugwanithwa shawo shoka ya pewa kuKalunga, shokusila oshimpwiyu pambepo oyana.
17. Ongiini aanona taya vulu okukala ekwatho enene muukwanegumbo?
17 Aagundjuka mboka ye hole Kalunga kashili nohayi iyutha komayele ge, otaya vulu okukala ekwatho enene muukwanegumbo. Otaya vulu oku shi ninga mokusimaneka aavali yawo noku ya kwathela painiwe. Otaya vulu wo okuninga omaiyambo gopambepo omanene. Manga Eyelu inaali ya, Lamek, omukwanezimo gwaSet, okwa li ha longele Jehova. Lamek okwa popi kombinga yomwanamati, Noa a ti: “Oye ote tu etele epupalitho netalaleko miilonga nomomaupyakadhi giikaha yetu mevi ndika lya thingwa kuKalunga.” Ehunganeko ndika olya gwanithwa sho Kalunga evi inee li geelela we omuntu. (Gen. 5:29; 8:21) Kunena aanona mboka ye li aadhiginini kuJehova otaya vulu okukala ekwatho enene kuukwanegumbo, otaya vulu wo okukwathela kehe gumwe muukwanegumbo i idhidhimikile uudhigu wongashingeyi nowomonakuyiwa.
18. Oshike tashi vulu oku tu kwathela tu idhidhimikile omaudhigu ngoka taga vulu oku tu adha?
18 Egalikano, okutedhatedha kiiholelwa mbyoka yi li mOmbiimbeli neendathano naapiya yaJehova otayi kwathele aantu omamiliyona ngashingeyi ya mone ehekeleko momaudhigu gawo agehe. (Lesha Episalomi 145:18, 19.) Okukala tu shi kutya Jehova oye Onzo yehekeleko tali kalelele, ohashi tu kwathele twi idhidhimikile omaudhigu kehe ngoka taga vulu oku tu adha ngashingeyi nomonakuyiwa.