Gandja uunzapo u li omushiinda omwaanawa
1 Jesus okwa ti kutya “hola omukweni ngangoye u ihole.” (Mat. 22:39) Osha yela kutya ngoye oho ‘ningile uuwanawa’ ooitaali ooyakweni, ihe oto vulu mbela okumbwalangandjekela ohole yoye mboka ye li popepi nangoye? (Gal. 6:10) Omomikalo dhini?
2 Omokwiipopya mwene: Aashinda shoye oye shi kutya ngoye Onzapo? Ngele hasho, omolwashike ihoo yi kuyo miilonga yomomapya? Iizemo otashi vulika yi ku kumithe. Nenge ngele ou shi hole unene, kambadhala oku ya pa uunzapo inaashi longekidhwa. Ngele u li pondje, otashi vulika ho ya mono taya longo momalugumbo gawo nenge taye endaenda mepandaanda. Inda kuyo neimemeho lyopahole. Kambadhala okupopya nayo kombinga yeitaalo lyoye, yaampoka pu na Oshinyanga shUukwaniilwa shopune noyaashoka hashi ningwa ko e to ya tseyithile kutya oolye ishewe yopuushiinda haya kala ko. Ya hiya kokugongala. Kala wa tokola toko okugandja uunzapo nawanawa kombinga yonkundana ombwanawa kukehe gumwe ngoka u shi. — Iil. 10:42; 28:23, yelekanitha NW.
3 Mokupitila meihumbato lyoye ewanawa lela: Eihumbato lyoye lyombili otali ti oshindji kombinga yoye notashi vulika tali egulula ondjila okugandja uunzapo. Otali ‘opaleke wo elongo lyaKalunga.’ (Tit. 2:7, 10) Ulika ohokwe yashili maashiinda yoye. Kala u na ombili nolukeno. Simaneka uuthemba wawo wokukala meimweneneno nowokukala momudhingoloko gwa mwena. Ngele gumwe gwomuyo te ehama, kala we mu yaalela e to mu kwathele. Uuna uukwanegumbo uupe tau tembukile puushiinda nangoye, inda ko u ke wu hambelele. Iilonga yombili ya tya ngaaka ohayi dhiladhilitha aantu nawa kombinga yetu nohayi nyanyudha Jehova. — Heb. 13:16.
4 Mokupitila muumonikilo wegumbo lyoye: Okukala omushiinda omwaanawa okwa kwatela mo okusila oshimpwiyu egumbo lyoye opo li kale tali monika nawa. Egumbo nolugumbo mbyoka ya yela notayi monika nawa otayi gandja uunzapo kuyo yene. Ihe egumbo ndyoka lya kaka nenge ndyoka li na iinima ye ekelwahi molugumbo otali vulu okudhinitha etumwalaka lyUukwaniilwa. Onkee ano osha simana noonkondo okukaleka egumbo lyoye, olugumbo lwoye niiyenditho yoye ya yela noyi li monkalo ombwanawa.
5 Okuulika kutya ou na ko nasha naamboka kaaye shi yomegongalo lyopaKriste otaku ulike ohole yokuhola ooyakweni. Oshizemo otashi vulika mbela shi kale shike? Otashi vulika shi kale lela osho kutya “omolwiilonga yeni iiwanawa, ye yi dhimbulula moku yi tala nawa,” yamwe yomuyo taya ka ‘hambelela Kalunga.’ — 1 Pet. 2:12.