Tukulilafana navamwe she likolelela keemhumbwe davo
1 Jehova okwa ninga omafiloshisho a wanife po eemhumbwe detu dopamhepo okupitila ‘momupiya’ omudiinini. (Mat. 24:45-47) Mahapu omomafiloshisho aa oku li molupe lomambo, Eembibeli, omambo manene Oshungonangelo noAwake!, eevideo, oukasete nosho yo oungalo vokombiuta ve na sha nokuhada omauyelele Ombibeli. Osho Jehova a yandja alushe osha wana mokukala itashi hepifwa. Okwa teelela tu tukulilafane nakeshe umwe nokushilipaleka kutya aveshe otava mono mo ouwa shi fike pamwe.
2 Omafiloshisho aeshe a tya ngaha okwa etwa po nomukoshelo munene wopaimaliwa. Eefuto di na sha nomafiloshisho a tya ngaha ohadi ningwa koumwainafana womounyuni aushe. Eshi oshoshili unene tuu okudja eshi ehangano la tota po elongekido lokuyandja oileshomwa nopehena okupula ondado yasha kondadalunde, okuyandja kwa tya ngaha okwa kala kwe likolelela ashike filufilu komayambidido ehalo liwa okufuta omakoshelo. Natango, oitaimbelewa ihapu ohai mono omafiloshisho aa kEhangano kondado oyo tai kwafele ovamwatate va mone osho va pumbwa omolwokwoongala nosho yo oilonga yomomapya nonande ove na eedjo doyuuyemo yopamaliko da ngabekwa.
3 Ongahelipi hatu dulu okukwafela: Ohatu dulu oku linyengifwa kekumaido laPaulus tu tukulilafane navamwe “meemhumbwe davo.” (Rom. 12:13) Ngeenge hatu ningi omayambidido opaimaliwa e na sha noilonga yomounyuni aushe, ohatu tukulilafana osho tu na novamwatate mounyuni aushe. Okukaleka eshi momadiladilo, vamwe ova tokola okulitulila po omuvalu wonhumba va yambidide oilonga yomounyuni aushe omwedi keshe, ngaashi ashike hava ningi omolweefuto dOlupale lOuhamba. Ove shii kutya eefuto edi ihadi longifwa ashike mokunyanyangida oileshomwa ndelenee omeembinga yo dihapu doilonga. Diladila ouwa munene oo oumwainafana wetu womounyuni aushe tau ka mona ngeenge vahapu tava kufa ombinga panghedindjikilile.
4 Natango, ohatu dulu oku tukulilafana navo mokukala alushe nondjele ngeenge hatu pula oinima oyo tu na nale. Okumbeshitela ashike osho twa pumbwa shili, otashi pitike ovamwatate keenhele dimwe di lili va mone omafiloshisho opamhepo oo va pumbwa yo va kale va pama nosho yo okuxumifa komesho eudifo longhundana iwa moitukulwa yavo omo ve li.—Heb. 13:16.
5 Otu na okudimbulukwa eshi unene tuu ngeenge hatu pula oinima oyo hai nyanyangidwa kEhangano nomafutilo manene. Ei oya kwatela mo eevidio, oungalo vousidi, omambo manene omauyelele, omambo manene Oshungonangelo noAwake! nosho yo omalishangifo Oshungonangelo noAwake! moukasete. Ponhele yokupula opo oshilyo keshe shoukwaneumbo shi kale noinima oyo, mbela oukwaneumbo aushe itau dulu okulongifa ashike shimwe? Ngeenge ohatu ngabeke osho hatu kufa, otashi ka pitika vamwe va mone oinima iwa ya faafana naayo hatu hafele.—Fil. 2:4.
6 Omafutilo e na sha noileshomwa oyo twa yandja momapya otaa dulu okufutilwa po komayambidido oilonga yEhangano yomounyuni aushe oo twa yandja pOlupale lOuhamba nosho yo oo a yandjwa kwaavo ve na ohokwe ovo ve i tambula. Ndelenee, ngeenge tashi ya koileshomwa oyo hatu pula tu longife paumwene, ya kwatela mo omambo omaimbilo, oYearbooks, Eembibeli dondilo nosho yo ikwao, ita tu dulu okuteelela ovanhu vamwe ve lili ovo va file oshisho eemhumbwe detu. Ovapiya vaJehova ve liyandja ovo odjo yotete yeyambidido la tya ngaha lopaimaliwa. Okudimbuluka eshi, ovaudifi vahapu ohava tengeneke osho oinima oyo tai dulu okukosha ngeno oya li hai landifwa meefitola, nopo nee tava yambidida shi fike pwaasho va tengeneka. Pashihopaenenwa, Ombibeli yondilo yomingenge doshingoli otai dulu okukosha noupu N$150 ile shi dulife po, embo lomauyelele otali dulu okukosha N$300 sha yuka pombada, okalindeli komaluvala mahapu otaka dulu okulandifwa lwopo N$40, oensiklopedia i li mo moungalo vousidi otai kosho okudja N$400 fiyo N$800 ile shi dulife po, oungalo vousidi luhapu ohava kosho N$100 nosho yo ouvideo vamwe luhapu ohava landifwa shi dulife po. Okuhayambidida sha wana eendado odo otashi ka ngabeka osho ehangano la hala okuwanifa okuxumifa komesho oilonga yomounyuni aushe.
7 Jesus okwa ti kutya ovahongwa vaye vashili otava ka konekwa kohole yavo yokuholafana. (Joh 13:34, 35) Okuyandja kwetu nehalo liwa oinima yopamaliko nosho yo okutukulilafana navakwetu paemhumbwe davo nopehena okulihola-mwene doshili oko eenghedi diwa okuulika kutya fye otu li Ovakriste vashili.