Okukala paiyapulo lyetu
1 Kutya nduno opo wa ninginithwa nenge owa ninginithwa pwa pita oomvula omilongo, otashi vulika to dhimbulukwa oshiningwanima shoka sha simana monkalamwenyo yoye. Eninginitho lyetu kali shi ehulilo, ihe pehala lyaashono, olyo etameko lyonkalamwenyo yokwiigandjela iilonga mbyoka hayi vulu okukalelela. (1 Joh. 2:17) Oshike sha kwatelwa mokukala paiyapulo lyetu?
2 Landula oshiholelwa shaKristus: Mokukala a ninginithwa, Jesus okwa “tameke oshilonga she,” tu uvitha “evaangeli lyuukwaniilwa waKalunga.” (Luk. 3:23, KB; 4:43, KB) Sha faathana, mokuulika okwiiyapulila kwetu Jehova mokuninginithwa, otwa yapulwa tu li aakalele yonkundana ombwanawa. Nonando otashi vulika tashi pula ethimbo olindji noonkambadhala odhindji opo tu mone iipumbiwa yopanyama yonkalamwenyo, iilonga yetu ya simana oyo uukalele wopaKriste. (Mat. 6:33) Pehala lyokulalakanena okukala aayamba nenge twa tumbala, mboka yi iyapulila Kalunga ohaya lalakanene ‘okusimaneka oshilonga shawo,’ ngaashi omuyapostoli Paulus a ninga. (Rom. 11:13) Owa pandula tuu uuthemba woye wokulongela Jehova nokuninga oshindji ngaashi to vulu mwaashoka?
3 Ngaashi moshinima shaJesus, otu na ‘okukondjitha ondeveli.’ (Jak. 4:7) Satana okwa makele Jesus konima yeninginitho Lye, nonena aapiya yaJehova yi igandja oye li wo iiyodhekwa ye. (Luk. 4:1-13) Mokukala twa kundukidhwa kuuyuni waSatana, otu na okwiipangela mokuyanda kehe shimwe shoka tashi vulu okunyateka omadhiladhilo getu nenge okuyonagula omitima dhetu. (Omayel. 4:23; Mat. 5:29, 30) Aakriste otaya kumagidhwa kutya kaya “wapa okulya koshililo shOmuwa nokoshililo shoompwidhuli.” (1 Kor. 10:21) Shika otashi pula opo tu kale twi igamena komainyanyudho inaago opala, eendathano ewinayi nokiiponga yoInternet. Otashi tu pula wo tu yande iileshomwa mbyoka ya za kaashunimonima. Okukala twa tonatela iinima mbika nosho wo omakoto galwe gaSatana otashi ke tu kwathela tu kale paiyapulo lyetu.
4 Longitha omasiloshimpwiyu gaKalunga: Opo shi tu kwathe tu kale paiyapulo lyetu, Jehova okwa gandja ekwatho okupitila mOohapu dhe nosho wo megongalo lyopaKriste. Ninga elesho lyOmbimbeli nosho wo egalikano kuJehova oshitopolwa shelandulathano lyoye lyesiku kehe. (Jos. 1:8; 1 Tes. 5:17) Nyanyukilwa okugongala kwegongalo. (Eps. 122:1) Endathana naamboka haya tila Jehova nohaya dhiginine iipango ye. — Eps. 119:63, OB-1986.
5 Kekwatho lyaKalunga, oto vulu okukala pakwiiyapulila kwoye Jehova nokunyanyukilwa oku mu longela sigo aluhe. — Eps. 22:27, 28; Fil. 4:13.