Iilonga mbyoka tayi pula eifupipiko
1 Oohapu dhaKalunga otadhi tu kumagidha tu kale tu na ‘eifupipiko, ihaatu shunithilathana uuwinayi netukano, aawe, ihe natu ya shunithile elaleko nuuyamba.’ (1 Pet. 3:8, 9, OB-1986) Omayelepukululo ngaka oge na shili oshilonga miilonga yokuuvitha. Dhoshili, uukalele wopaKriste otau vulu okukala emakelo lyeifupipiko lyetu.
2 Eifupipiko olyo uukwatya mboka tau tu kwatha twi idhidhimikile oonkalo oombwinayi. Uuna tatu uvitha, ohatu yi nokaayendanandjila inaaye tu pula, tu shi kutya yamwe itaye ki inyenga nombili. Opo tu kale tatu uvitha nonando otatu ningwa nayi ngawo otashi pula eifupipiko. Moshitopolwa shimwe oshidhigu noonkondo okulonga, aamwameme yaali aakokolindjila oya li haya longo ontu nontu esiku kehe uule woomvula mbali nokapwa li pu na ngoka he ya yamukula sho taya konkola komiyelo dhomagumbo. Ihe oyi idhidhimike , nonena moshitopolwa moka omu na omagongalo gaali.
3 Nkene to ka yamukula mboka kaaye na omikalo: Eifupipiko otali ke tu kwatha tu holele Jesus uuna yalwe kaaye na ombili natse nenge ye tu dhina. (1 Pet. 2:21-23) Pegumbo limwe omumwameme okwa li u ulwa nayi, tango okomukulukadhi nopo nduno okomusamane, ngoka a li e mu lombwele a thige po ehala lye. Omumwameme okwa li i imemeha owala nokwa ti kutya oku na einekelo kutya ota ka popya nayo oshikando shilwe. Shika osha li sha kumitha noonkondo aaihokani e taya pulakene kOnzapo ya landula ko ndjoka yi ile po noya taamba ko ehiyo okuya kokugongala kOshinyanga shUukwaniilwa. Omumwameme ngoka a li tango inaa taambwa ko oko a li nokwe ya popitha e te ya pe uunzapo wa gwedhwa po. Natse wo otatu vulu okunengeneka mboka ya kukuta mokukala “nombili nesimaneko.” — 1 Pet. 3:15, 16, OB-1986; Omayel. 25:15.
4 Yanda einenepeko: Ontseyo yetu yokutseya Ombimbeli itayi tu pe nando etompelo okudhina aantu nenge oku ya popya nomautumbulilo tagu ulike ondhino. (Joh. 7:49) Pehala lyaashono, Oohapu dhaKalunga otadhi tu pe omayele twaa “tuke nando omuntu.” (Tit. 3:2) Uuna twi ishonopeka momutima, ngaashi Jesus a li, otatu talaleke yalwe. (Mat. 11:28, 29) Okupopya nomuntu neifupipiko otaku gwedha ko uuwanawa ketumwalaka lyetu.
5 Eeno, eifupipiko otali tu kwatha tu idhidhimike miitopolwa iidhigu. Otali vulu okunengeneka mboka ya kukuta notali hilile yalwe ketumwalaka lyUukwaniilwa. Unene tuu, otali nyanyudha Jehova, ngoka ha “sile ohenda aaneifupipiko.” — 1 Pet. 5:5.