Atusheni ohatu dulu okuyandja sha kuJehova
1 Mbela ou shi shii kutya omunhu keshe ota dulu okuyandja sha kuKalunga? Abel, Noa naJob ova li va yambela Jehova omayambo oinamwenyo e na ongushu. (Gen. 4:4; 8:20; Job 1:5) Oshoshili kutya omayambo a tya ngaho kaa li a yambapaleka Omushiti Jehova, molwaashi oinima aishe i li meshito oyaye. Ndelenee mokuyamba omayambo a tya ngaho, ovalumenhu ovo ovadiinini ova ulika kutya ova li ve hole Kalunga neenghono. Kunena, ohatu dulu okulongifa efimbo letu, eenghono detu nosho yo oiniwe yetu, opo tu dule okuyambela Jehova “omahambeleloyambo.” — Heb. 13:15.
2 Efimbo letu: Otu na okulungama tuha hepife efimbo letu moinima oyo inai fimana lela. Ponhele yaasho, otu na ‘okulongifa nawa’ efimbo letu opo tu dule okukufa ombinga pauyadi moukalele. (Ef. 5:15, 16) Otashi dulika twa pumbwa okuninga po omalunduluko opo tu dule okukala hatu kufa oukwafelikokolindjila lumwe modula ile lwoikando i dulife pushimwe. Ohatu dulu okulelepeka efimbo olo hatu longo moukalele. Pashihopaenenwa, ngeenge otwa weda ko ominute 30 kefimbo olo hatu longo shito moukalele oshivike keshe, ohatu ka weda ko eevili mbali lwaapo omwedi keshe.
3 Eenghono detu: Opo tu kale tu na eenghono dokuwanifa po oukalele wetu, otu na okuhenuka omalihafifo ile oilonga oyo hai tu lolokifa ndele hatu kala tuhe na vali eenghono dokulongela Jehova pauyadi. Otu na yo okulungama tuha efe oisho yonghalamwenyo i “fidimike” omitima detu, molwaashi itatu ka kala tu na ondjungu yokulongela Jehova. (Omayel. 12:25) Nonande otu na etomheno liwa lokukala noisho, oshixwepo ‘okuundulila omitengi detu kOmwene.’ — Eps. 55:23; Fil. 4:6, 7.
4 Oiniwe yetu: Ohatu dulu yo okulongifa oiniwe yetu opo tu yambidide oilonga yokuudifa. Paulus okwa li a ladipika Ovakriste vakwao va kale hava “tuvikile sha” alushe opo va dule okukwafela ovo ve na omhumbwe. (1 Kor. 16:1, 2) Sha faafana, nafye ohatu dulu okulitulila po elalakano lokukala hatu yandje omayambidido e na sha neongalo letu nosho yo e na sha noilonga yetu yomounyuni aushe. Jehova oha pandula keshe osho hatu yandje tashi di komutima, kashi na nee mbudi kutya oshi fike peni. — Luk. 21:1-4.
5 Jehova okwe tu pa eeshali dihapu. (Jak. 1:17) Onghee hano, ohatu dulu okuulika olupandu letu moku mu longela nehalo liwa, hatu longifa efimbo letu, eenghono detu nosho yo oiniwe yetu. Mokuninga ngaho, ohatu ke mu hafifa, molwaashi oku “hole ou ta yandje nehafo.” — 2 Kor. 9:7.