Ilongekidhila nawa Edhimbuluko

Kashi li tuu uuthembahenda nenyanyu kaalanduli yaKristus okwiilongekidhila nawa ongulohi yokudhimbulukwa eso lyaJesus Kristus omumvo kehe! (Luk. 22:19) Oonkatu dhini dhi na oshilonga dhi na okukatukwa omolwokwiilongekidhila Edhimbuluko?

◼ Ethimbo nehala: Kehe gumwe oku na okukala e shi nawa kutya Edhimbuluko otali ka ningwa pongapi nopeni tali ka ningilwa. Ngele Oshinyanga shUukwaniilwa ohashi longithwa komagongalo ge vulithe pulimwe, osha simana okuthika pethimbo nokuza po melandulathano, opo mboka taya yi mo tango ya pitithe mo iiyenditho yawo kuyele noya yapukile yakwawo, po pwaaha kale evundakano. Shika osha pumbiwa molwaashoka ethimbo ndyoka omagongalo tagi ipitithile po olya ngambekwa.

◼ Uufo wokuhiya: Mbela aauvithi ayehe oye na uufo wawo wokuhiya aantu, noye shi shoka tawu ti? Mbela owi idheula nkene to ke ka gandja? Oolye to ke ka pa? Opu na okuningwa oonkambadhala opo uufo auhe wokuhiya wu kale wa gandjwa.

◼ Iiyenditho: Yamwe mboka ye na ohokwe nosho wo aamwatate naamwameme otashi vulika ya kale ya pumbwa osheenditho nenge ekwatho lilwe lyopaumwene. Omalongekidho geni ga ningwa okusila oshimpwiyu oompumbwe dhawo?

◼ Omandhindhiliko: Tseya kutya omandhindhiliko kage na okutaambathanwa manga etango inaali ningina. Ngele opu na omugwayekwa te ehama noita vulu okukala po pEdhimbuluko, napu ningwe omalongekidho opo a ka pelwe oshikwiila nomaviinu kehala hoka e li. Opu na okulongekidhwa oshikwiila nomaviinu tago opalele. — Tala Oshungonangelo ye 1 Maalitsa 2003, epandja 10-11, okatendo 14, 17.

◼ Oshinyanga shUukwaniilwa: Oshinyanga oshi na okwoopalekwa nawa komeho yethimbo. Uuyaha, uuhalasa womaviinu noshitaafula sha yalwa nawa elapi tali opalele oyi na okukala ya tulwa nale pomahala manga okugongala inaaku tameka. Ngele egongalo otali ka longitha ehala lilwe kaali shi Oshinyanga shUukwaniilwa, shilipaleka kutya omu na omambako taga longo nawa opo aapulakeni ayehe ya vule okuuva nawa omupopi. Aayakuli mboka taya yakula pEdhimbuluko oye na okuhogololwa kuyele nokutseyithilwa kutya otaya ka kala ye na iinakugwanithwa yini nomilandu ndhoka ye na okulandula, oye na wo okudhimbulukithwa ya zale momukalo gu shi okusimanekwa.

Otwa hala okwiilongekidha nawa pauhandimwe nosho wo tu li egongalo, poshiningwanima shika sha simana noonkondo, shEdhimbuluko lyeso lyaJesus Kristus. Dhoshili, Jehova ota ka laleka nuuyamba ayehe mboka tayu ulike olupandu talu zi komutima lwaashoka Jehova e ya ningila okupitila meyambo lyOmwana omuholike, Jesus Kristus.