Oto ilongekidhile ngaa edhimbuluko?

Osha li 13 gaNisan omumvo 33 E.N. Jesus okwa li e shi kutya oku na ko owala ongulohi yahugunina okukala nookuume ke kopothingo manga inaa dhipagwa. Okwa li e na okudhana nayo Opaasa yahugunina opo a tote po edhano epe, Uulalelo wOmuwa. Oshiningwanima shoka sha simana oshi na okukala sha li sha pumbwa eilongekidho. Onkee ano, okwa li a tumu Petrus naJohannes ya ka longekidhe iinima. (Luk. 22:7-13) Omumvo kehe okuza kesiku ndyoka, osha kala sha pumbiwa kAakriste mboka ya hala okudhana edhimbuluko yi ilongekidhile oshiningwanima shika. (Luk. 22:19) Iinima yini ya simana tu na okuninga opo tu ilongekidhile Edhimbuluko ndyoka twa tegelela mu-3 gaApilili?

Okwiilongekidha kwaakuluntugongalo:

Ningeni omalongekidho opo mu longithe Oshinyanga shUukwaniilwa nenge ehala lilwe tali opalele. Omu na okukala mu na iipundi ya gwana, oolamba nenge olusheno nosho wo ombepo ya gwana. Longekidheni opo ehala li opalekwe nawa komeho yethimbo.
Hogololeni omupopi a pyokoka, omunashipundi, nosho wo aamwatate mboka taya ka galikanena omandhindhiliko.
Ngele mehala moka otamu ka gongalelwa lwiikando oyindji ongulohi ndjoka, kundathaneni omathimbo ngoka mu na okugongala nokuninga omalongekidho gokuya mo nokuza mo nosho wo omahala giihauto.
Hogololeni aayakuli noku ya unganeka.
Longekidheni opo pu ka kale omandhindhiliko ngoka gu uthwa okulongithwa, uuyaha, uuhalasa womaviinu, oshitaafula tashi opalele, nosho wo oshilapi shokoshitaafula.

Okwiilongekidha kwaauvithi:

Longekidheni opo mu ka kuthe ombinga pakuudha moshikonga shokuhiya aantu kEdhimbuluko.
Ningeni omusholondondo gwaakonakoni, gwaapambele, gwaanasikola pamwe nane, gwaaniilonga pamwe nane nosho wo gwaashiwikile yalwe, ne tamu ya hiya.
Lesheni nokutedhatedha kelesho lyOmbiimbeli lyEdhimbuluko.
Ileni kEdhimbuluko mwi ilongekidha okutaamba ko aayenda.