Konga mboka ya gwana
1. Ohatu ulike ngiini kutya otwa pandula uuthembahenda wokulonga muukalele?
1 Pethimbo lyuukalele we kombanda yevi, Jesus okwa li a ningi ngaashi ta vulu opo a hekeleke aaifupipiki nonkundana ombwanawa. (Jes. 61:1, 2) Tu li aakalelipo naatumwa yaKristus, otu na uuthembahenda kunena oku mu holela mokukonga nopwaahe na okuvulwa ayehe mboka ya gwana moshitopolwa shetu. — Mat. 10:11; 2 Kor. 5:20.
2. Openi Paulus a li u uvithile aantu, noshizemo osha li shini?
2 Natu uvithile aantu pomahala ga yoolokathana: Omuyapostoli Paulus okwa li e na ondjigilile yokuuvithila unene Aajuda mosinagoga naamboka kaaye shi Aajuda. (Iil. 14:1) MuFilippi, Paulus naSilas oya li ya yi ya ka konge aantu ‘hoka ya tengeneke kutya oku na ehala lyokugalikanena.’ Oya tameke okuuvithila ongundu yaakiintu, na gumwe gomuyo Lidia okwa taamba ko mbala oshili. — Iil. 16:12-15.
3. Oompito dhokuuvitha dhini tu na muukalele, kakele owala kokuuvitha egumbo negumbo?
3 Kakele owala kokulonga egumbo negumbo, mbela ito vulu okuuvithila aantu mboka to adha pomahala gokuhelulilwa, mooparka, aaniilonga yomoombelewa, mboka taye ende momapandaanda, pomahala goongeshefa nopomahala gokulandithila moshitopolwa sheni? Oto vulu okuuvithila aantu mboka haya kala momahala moka ihaamu yiwa nuupu moku ya nyolela oontumwafo nenge moku ya dhengela oongodhi. Otatu ka kala twi “ipyakidhila aluhe miilonga yOmuwa” ngele ohatu konenene oonkalo dhaantu moshitopolwa shetu. — 1 Kor. 15:58.
4. Openi ishewe tatu vulu okuuvitha ngele egongalo lyetu oli na oshitopolwa sha ngambekwa?
4 Aauvithi oyendji oya tamununa mo uukalele wawo mokuya kegongalo limwe tashi vulika moshilongo shawo nenge kushilwe shi ili. Yalwe oyi ilonga elaka lilwe opo ya vule okuuvithila aantu moshitopolwa mboka ya za kiilongo yi ili.
5. Otu na okutala ko onkalo ndjika tu li ngiini, notu na okukala twa tokola toko okuninga shike?
5 Atuheni otu na okukaleka momadhiladhilo kutya “epya olyo uuyuni.” (Mat. 9:37; 13:38) Kehe gumwe oku na okutala nawa onkalo ye, iipewa ye, oompito ndhoka e na nonkene ta vulu okutamununa mo uukalele we, molwaashoka ehulilo lyonkalelo ndjika yuukolokoshi oli li popepi. Ngele tatu pititha komeho Uukwaniilwa nopwaahe na omalimbililo, Jehova ota ka yambeka oonkambadhala dhetu tu tamunune mo uukalele wetu. — Mat. 6:33.