Okugandja uunzapo mongodhi otaku vulu okweeta iizemo iiwanawa
1. Omolwashike tatu vulu okutala ko okugandja uunzapo okupitila mongodhi oshitopolwa sha simana shuukalele wetu?
1 Omolwashike tatu vulu okugandja uunzapo okupitila mongodhi muukalele wetu? Molwaashoka oshi li omukalo gulwe okukwathela yalwe ya mone ontseyo yashili opo ya ka hupe. (2 Pet. 3:9) Nonando okuuvitha egumbo negumbo onkundana ombwanawa yUukwaniilwa waKalunga oko omukalo gwetu gwa simana, otu na okulongitha omikalo dhilwe opo tu popye naamboka ihaatu adha momagumbo. — Mat. 24:14; Luk. 10:1-7; Eh. 14:6.
2. Okugandja uunzapo okupitila mongodhi ohaku unganekwa ngiini?
2 Nkene haku unganekwa: Ngaashi owala aauvithi haya pewa oshitopolwa shokulonga egumbo negumbo, oye na wo okupewa oshitopolwa shokugandja uunzapo okupitila mongodhi. Oto vulu okugandja uunzapo ongoye awike nenge mu li yaali nenge yatatu. Pehala mpoka tashi ningilwa inapu kala pu na omapiyagano. Oyendji ohaye shi mono shi li nawa okukuutumba poshitaafula nokulongitha iileshomwa mbyoka haya longitha uuna tayu uvitha egumbo negumbo.
3. Oshike tu na okukaleka momadhiladhilo uuna tatu gandja uunzapo mongodhi?
3 Nkene to gandja uunzapo mongodhi: Uuna tatu gandja uunzapo mongodhi, natu popye nombili. Mboka opo taye shi itoto otaya vulu okuleshela omunegumbo efalomo lyawo, ihe naye shi ninge momukalo gwoonkundathana. Omafalomo ngoka ge li membo Reasoning, Uukalele Wetu wUukwaniilwa nomokafo Mbela owa hala okutseya oshili? otaga vulu oku tu kwathela. Hogolola shoka wa hala oku ka popya uuna to ningi efalomo lyoye mwene, na kala wi ilongekidha okulesha omanyolo gontumba ngoka taga gandja eyamukulo. Longitha iileshomwa mbyoka ho kala wu na uuna to longo egumbo negumbo. Popya aluhe kashona nakashona nonewi lya yela, momukalo omwaanawa, wi itegelela nomomukalo guukuume. Omuntu ota vulu oku shi dhimbulula mo ngele to shi ningi. Pulakena sho omunegumbo ta gandja omadhiladhilo ge, e to zimine nokupandula omaetopo ge. Otu na okukala twa kotoka opo twaaha pule omayambidhidho, molwaashoka omuntu otashi vulika a dhiladhile kutya ehanga lya pya tali ningwa okupitila mongodhi.
4. Uunzapo okupitila mongodhi otawu ke tu kwathela ngiini tu longe nawa oshitopolwa shetu?
4 Omuntu ngoka to popi naye mongodhi otashi vulika a kale oshilema nenge omuvu nenge omuntu ngoka iha kala megumbo uuna tu li miilonga yuukalele wegumbo negumbo. Aantu yamwe ohaya kala momahala ngoka ga patwa aluhe nenge momahala ngoka ga gamenwa. Onkee ano, natu longitheni omikalo ndhoka tadhi pondola opo tu gwanithe po uukalele wetu nawa pakuudha okupitila mongodhi.