Iilonga mbyoka ya simanenena
1. Omaiyambo geni tatu vulu okuninga opo tu ulike olupandu lwetu muukalele?
1 Omolwashike hatu ladhipikwa aluhe tu longithe ethimbo lyetu, oonkondo dhetu niiniwe yetu muukalele? Omolwaashoka owa simanenena. Ngele tatu kaleke oshinima shoka momadhiladhilo otashi ka kokeka ehalo lyetu lyokukutha ombinga miilonga mbyoka kaayi na siku yi ke endululwe. — Iil. 20:24.
2. Iilonga yetu yokuuvitha ohayi tu kwathele ngiini tu yapulithe edhina lyaJehova lya tumbala?
2 Natu yapulithe edhina lyaJehova: Okupitila miilonga yetu yokuuvitha ohatu gandja etumwalaka kutya Uukwaniilwa waJehova mboka wu li miikaha yaJesus Kristus otawu ka pingena po omapangelo agehe gopantu nowo owala tawu ka kandula po omaupyakadhi ngoka ga taalela aantu. (Mat. 6:9, 10) Jehova okwa tumbala nomolwaashono oye awike ta vulu okuhulitha po omikithi neso. (Jes. 25:8; 33:24) Molwaashoka otwa humbata edhina lye, mboka haya mono omikalo dhetu omiwanawa nuulaadhi wetu otashi vulika ya hambelele Kalunga. (1 Pet. 2:12) Itashi nyanyudha tuu sho tatu tseyitha kombanda yevi alihe edhina lyaJehova, omunamapangeloagehe! — Eks. 15:3, OB-1954.
3. Mboka taya taamba ko etumwalaka lyUukwaniilwa ohaya mono omayambeko geni?
3 Natu hupithe oomwenyo: Jehova “ina hala ku kale nando ogumwe ta geelwa, ihe okwa hala, aantu ayehe ye ethe uulunde wawo.” (2 Pet. 3:9) Ngele aantu inayu uvithilwa, otaya ka tseya ngaa mbela eihumbato ndyoka Jehova a tala ko li li mondjila nenge ndyoka lya puka? (Jona 4:11; Rom. 10:13-15) Uuna oohandimwe taya taamba ko onkundana ombwanawa onkalamwenyo yawo ohayi hwepopala sho taye etha po omikalo omiwinayi. (Mika 4:1-4) Shika ohashi ya pe etegameno lyomwenyo gwaaluhe. Otatu ihupitha tse yene naamboka taye tu pulakene ngele ohatu uvitha nokulonga yalwe neitulomo. (1 Tim. 4:16) Inatu pewa tuu oshilonga sha simanenena!
4. Omolwashike tu na okukala twa lenga iilonga yokuuvitha Uukwaniilwa nokuninga aantu aalongwa?
4 Masiku uudhigu uunene otawu ka fala sigo omehulilo lyonkalelo ndjika tu li yuukolokoshi. Mboka ya gama kuJehova otaya ka hupithwa. Iilonga yokuuvitha oye endelela unene, yo oya simana notayi kwathele shili kunena. Natu kale twe yi lenga monkalamwenyo yetu ayihe. — Mat. 6:33.