Kala aluhe wi ilongekidha okutameka ekonakono
1. Oshike sha kwatelwa mo mokugwanitha po elombwelo lyaJesus ndyoka li li muMateus 28:19, 20?
1 Jesus okwe tu pa elombwelo tu ‘ninge aantu aalongwa noku ya longa.’ (Mat. 28:19, 20) Onkee ano, otwa hala tu kale aluhe twi ilongekidha okutameka ekonakono pethimbo kehe, kaashi shi owala mesiku lyehuliloshiwike limwe ndyoka lyi ikalekelelwa okutameka omakonakombiimbeli. Omaetopo taga landula otaga vulu oku ku kwathela.
2. Oolye tatu vulu okupula tu konakone nayo?
2 Tameka ekonakono: Mpoka ngaa pu thike okutameka kwetu omakonakono opo ngaa tapu ka kala pu thike okukala tu na oompito dhokukala tu na ekonakono. (Omuuv. 11:6) Mbela owu na esiku wa tamekele ekonakono shu ukilila? Egongalo limwe mIilongo yaHangana olya li lya ningi oonkambadhala dha gwedhwa po li ninge ngaaka uule womwedhi aguhe. Kaya li tuu ya nyanyukwa sho ya li ya tameke omakonakonombiimbeli omape 42! Ino dhiladhila kutya mboka ye na ohokwe wa talela po oye shi shi kutya oho konakona naantu Ombiimbeli. Omolwashike itoo pula omuntu ngele ina hala ekonakonombiimbeli sho to ningi eishunoko? Kapu na uupyakadhi ngele inaya hala. Oto vulu okutsikila okukokeka ohokwe momuntu ngoka. Mbela owa pula aashiinda shoye, aakwanezimo, aaniilonga pamwe nangoye naanasikola ooyakweni ngele oya hala okunonakona Ombiimbeli nangoye? Oto vulu wo okupula aakonakonimbiimbeli yoye ngele oye na okuume kawo nenge aakwanezimo mboka ya hala okukonakona Ombiimbeli.
3. Otu na oshilongitho sha simana shini shokutameka omakonakono, nuunake tatu vulu oku shi longitha?
3 Oshilongitho sha simanenena: Oshilongitho shi na ongushu osho okafo Mbela owa hala okutseya oshili? Oto vulu oku ka pa aanegumbo kutya nduno oya taamba ko iileshomwa yilwe nenge hasho. Otaka vulu okulongithwa ngele tamu longo momahala goongeshefa, uuna tamu longo iilonga yomepandaanda, uuna tamu tumu oontumwafo nuuna tamu ningi omaishunoko. Otaka vulu wo okuthigwa pomagumbo mpoka kaapu na aantu. Omolwashike itoo kala wu ka na uuna to ende miiyenditho yakehe gumwe, uuna to yi kositola nosho wo ngele wu li kiilonga? Konima yokafo okwa yelithwa paufupi shi na ko nasha nekonakonombiimbeli noka popya kombinga yembo Omalongo gOmbiimbeli.
4. Ongiini to vulu okulongitha okatraktate Mbela owa hala okutseya oshili? wu tameke ekonakonombiimbeli?
4 Ngele wa gandja okafo komuntu, otashi vulika wu tothe mo omapulo ngoka ge li kombanda yako e to mu pula to ti: “Epulo lini lyomomapulo ngaka wa hokwa unene?” Opo nduno taleni pamwe eyamukulo mokafo, e to mu leshele uuyelele mboka wu li kepandja lyokonima, mboka tawu yelitha nkene ekonanakono hali ningwa. Opo nduno oto vulu oku mu ulukila uuyelele wa gwedhwa po kombinga yoshitopolwa shoka shi li membo e to ningi omalongekidho opo wu galuke wu tsikile oonkundathana.
5. Omolwashike tu na okukala twi ilongekidha okutameka ekonakono?
5 Oshitopolwa shetu oshi na natango mboka ya hala okwiilonga omalongo gashili gOmbiimbeli. Mokukala twi ilongekidha okutameka omakonakono, otatu ka tamununa mo oompito dhetu dhokumona enyanyu ndyoka hali zi mokukwathela yalwe ye ye mondjila ndjoka tayi fala komwenyo gwaaluhe. — Matt. 7:13, 14.