Mbela aamwoye oyi ilongekidha ngaa?
1. Omolwashike sha pumbiwa opo aanasikola ya kale yi ilongekidha?
1 Nopwaahe na omalimbililo, aamwoye ohayi iyadha momashongo nosho wo momathiminiko omape moshikako kehe shosikola. Oshi li wo ompito ye eguluka kuyo ‘yokupopya oshili.’ (Joh. 18:37) Mbela oyi ilongekidha ngaa?
2. Opo aamwoye ya kale yi ilongekidha, oye na okutseya shike?
2 Mbela aamwoye oye na ngaa ontseyo yi ihwa po kutya okukutha ombinga miinima yopashigwana nosho wo momadhano goshipagani osha kwatela mo shike nomolwashike sha puka? Oyi ilongekidha ngaa okwiipopila ngele taya thiminikwa ya lalakanene elongo lyopombanda, okukala ye na iihole, okunwa iikolitha nenge okulongitha iingangamithi? Mbela otaya ka tya owala oshinima shoka oshi li ompinge neitaalo lyetu, nenge oye shi ngaa okuyelitha kutya omolwashike itaaye shi ningile? — 1 Pet. 3:15.
3. Ongiini aavali taya vulu okulongitha Esiku lyElongelokalunga lyUukwanegumbo ya longekidhe oyana?
3 Longitha Esiku lyElongelokalunga lyUukwanegumbo: Otamu ka kala hamu kundathana uule womumvo aguhe naamwoye kombinga yomaupyakadhi ngoka haga holoka po omanga ye li mosikola. Otaya ka kala ye na einekelo lya kola ngele oho ningi oonkambadhala dhi ikalekelwa wu tale kutya uupyakadhi wuni tashi vulika yi iyadhe muwo kosikola. Omolwashike itoo longitha oshikando shimwe nenge iikando oyindji Esiku lyElongelokalunga lyUukwanegumbo mu kundathane oshinima shika? Oto vulu okupula aamwoye kutya ohaya kala tayi ipula unene nashike kosikola. Otamu vulu okweendulula iinima yontumba mbyoka mwa kundathana omimvo dha pita molwaashoka ngashingeyi oya koka, lyo neuvoko lyawo olya huma komeho. (Eps. 119:95) Elongelokalunga lyUukwanegumbo weni otamu vulu oku li ninga momikalo tadhi longo, ngaashi okukala wa fa omulongi, omukuluntusikola nenge omulongwa. Longa aamwoye nkene ye na okukala haya yamukula taya longitha Ombiimbeli nenge embo Reasoning nosho wo Young People Ask. Omuvali gumwe oha longitha ompito yElongelokalunga lyUukwanegumbo momukalo tagu longo a longekidhe oyana nkene taya ka popya naalongisikola yawo aape petameko lyomumvo kehe ye ya lombwela kutya oye li yamwe yomOonzapo dhaJehova. — Tala Oshungolangelo yOshiingilisa yo 15 Desemba 2010, epandja 3-5.
4. Aavali aanawino otaye ki iteteka ya ninge po shike?
4 Aagundjuka Aakriste oya taalelela omashongo “omadhigu” ogendji noonkondo pomasiku ngaka gahugunina. (2 Tim. 3:1) Onkee ano, aavali aanawino otaya ka kwathela oyana komeho yethimbo nkene ye na oku shi enda ya sinde omashongo ngoka. (Omayel. 22:3) Omanga inaaga holoka, ninga ngaashi to vulu wu kwathele aamwoye ya kale yi ilongekidha.