Ihatu yi mefudho
1. Otu shi shi ngiini kutya aauvithi yomethelumumvo lyotango kaye na nando esiku limwe ya dhiladhilile kutya oye li mefudho?
1 Aauvithi yonkundana ombwanawa yomethelemumvo lyotango oya li ya tsikile ‘noinaye etha’ okuuvithila aantu kehe mpoka ye ya adha. (Iil. 5:42, yelekanitha NW.) Onkee ano, otatu vulu okukala nuushili kutya kaya li haya pitilile aantu mepandaanda inaaye ya uvithila uuna taya ka longa egumbo negumbo. Yo kaya li haya kala inaaya gandja uunzapo wontukuluka uuna ye li pomalandithilo ngele ya zimbuka miilonga yawo yuukalele. Ngaashi Jesus, kaye na nando esiku limwe ya dhiladhilile kutya oye li mefudho. — Mark. 6:31-34.
2. Oshike sha kwatelwa mokukala metsokumwe nedhina lyetu?
2 Kala aluhe wi ilongekidha: Edhina lyetu, Oonzapo dhaJehova, itali holola owala shoka hatu ningi ihe otali holola wo muule kutya otse oolye naanaa. (Jes. 43:10-12, yelekanitha NW.) Onkee ano, ohatu kala aluhe twi ilongekidha okupopila etegameno ndyoka tu na, nokuli nuuna itaatu longo egumbo negumbo. (1 Pet. 3:15) Oho kala ngaa wi ilongekidha okutsakaneka oonkalo ndhoka tadhi pula u gandje uunzapo wontukuluka, ngoye to dhiladhila kwaashoka to vulu okutya? Mbela oho kala ngaa wu na iileshomwa opo wu pe ngoka tu ulike ohokwe? (Omayel. 21:5) Mbela oho uvitha owala egumbo negumbo, nenge oho uvitha wo nopomahala galwe ngele onkalo tayi shi pitike?
3. Omolwashike okuuvitha momapandaanda, pomahala gokuthikama oohauto, moopaarka, pomalandithilo nosho wo pomahala galwe taku tsuwa omuthindo?
3 Uvitha “montaneho”: Ohatu uvitha momapandaanda, pomahala gokuthikama oohauto, moopaarka, pomalandithilo nosho wo pomahala galwe. Mbela okuuvitha kwa tya ngaaka ohaku ningwa owala omalupita nongele owala omuntu a hala? Omuyapostoli Paulus okwa ti kutya oku uvitha “montaneho” nosho wo egumbo negumbo. (Iil. 20:20) Okuuvitha egumbo negumbo okwo omukalo dhingi nohaku pondola mokuuvithila aantu onkundana ombwanawa. Ihe aauvithi yomethelemumvo lyotango oya li haya gandja eitulomo kaantu hakomagumbo. Oya li haya longitha ompito kehe opo ya popye naantu kombinga yoshili montaneho, ontukuluka nosho wo egumbo negumbo. Natse natu kale hatu gwanitha po thiluthilu uukalele wetu twa fa aauvithi mboka. — 2 Tim. 4:5.