Oto vulu okugandia uunzapo wontukuluka
1. (a) Uunzapo wontukuluka oshike? (b) Aantu yangapi mokati ketu ya mona oshili okupitila muunzapo wontukuluka?
1 Aantu yangapi megongalo lyeni ya mona oshili okupitila muunzapo wontukuluka? Otashi vulika wu kale wa kumwa ngele wu uvu omwaalu gwawo. Uunzapo wontukuluka owa kwatela mo okuuvithila mboka hatu tsakaneke momukokomoko gwesiku onkundana ombwaanawa, uuna tu li molweendo, tatu talele po aapambele nenge aashiinda, uuna twa ka landa sha, kosikola, kiilonga nosho tuu. Maauvithi 200 mboka ya ninginithwa, aantu 80 yomuyo oya mona oshili okupitila muunzapo wontukuluka. Onkee ano, omukalo gwokuuvitha ngoka ohagu eta iizemo iiwanawa noonkondo.
2. Iiholelwa yini yokugandja uunzapo wontukuluka yi li mOmbiimbeli?
2 Aauvithi yevaangeli methelemumvo lyotango olundji oya li haya gandja uunzapo wontukuluka. Pashiholelwa, sho Jesus a piti muSamaria, oku uvithile omukiintu ngoka a li ta teke omeya momuthima gwaJakob. (Joh. 4:6-26) Filippus okwa li a tameke oonkundathana nelenga lyokuEtiopia ndyoka lya li tali lesha muJesaja, sho e li pula a ti: “Ou uvite ko tuu omadhiladhilo gaashoka to lesha?” (Iil. 8:26-38) Sho omuyapostoli Paulus a li mondjedhililo muFilippi oku uvithilile omulangeli gwondholongo. (Iil. 16:23-34) Konima sho e edhililwa megumbo lyoonkwatwa, Paulus okwa li a “kundathana naayehe mboka ye ya oku mu talela po. Nuulaadhi uunene oye oku uvithile aantu Oshilongo shaKalunga nokwe ya hokololele Omuwa Jesus Kristus.” (Iil. 28:30, 31) Oto vulu wo okugandja uunzapo wontukuluka, nonando owu na ohoni. Ngiini mbela?
3. Oshike tashi vulu oku tu kwathele tu sinde uumbanda wokupopya naantu?
3 Ino kakadhala okupopya: Oyendji yomutse ohatu mono oshidhigu okutameka oonkundathana naantu mboka kaatu shi. Ohashi kala nokuli oshidhigu okupopya naamboka tu shi. Ihe ngele tatu tedhatedha kuuwanawa waJehova nokeliko lyopambepo ndyoka a pa aapiya ye nosho wo konkalo yinyanyalitha yaantu muuyuni, otashi ke tu inyengitha tu popye nayalwe. (Jona 4:11; Eps. 40:5; Mat. 13:52) Natango, otatu vulu okupula Jehova e tu pe “omukumo.” (1 Tes. 2:2) Omumwatate gumwe ngoka a li kosikola yaGilead okwa ti: “Olundji onda mona kutya egalikano ohali kwathele ndje ngele ondi wete oshidhigu okupopya naantu.” Ngele oto kwatakwata okupopya, galikana paufupi meimweneneno. — Neh. 2:4.
4. Omalalakano geni tatu vulu okwiitulila po, nomolwashike?
4 Ngele tatu gandja uunzapo wontukuluka katu na okupopya momukalo gwa fa ngoka hatu longitha muukalele nokatu na okutameka tatu lesha Enyolo. Otashi ke tu kwathela ngele tatu tameke oonkundathana tadhi ti sha, nopwaahe na omaiyuvo kutya otu na okugandja uunzapo pethimbo mpoka. Aauvithi oyendji oye shi popya kutya okuninga ngaaka ohashi ya kwathele ya kale ye na omukumo okutameka okuuvitha onkundana ombwanawa. Ngele omuntu ina hala okupopya nangoye, ino mu thiminika. Pehala lyaashoka, hulitha oonkundathana nombili e to yi.
5. Oshike hashi kwathele omumwameme gumwe ngoka e na ohoni a gandje uunzapo wontukuluka?
5 Omumwameme gumwe e na ohoni, oha kala nokutala aantu kiipala nokwiimemeha uuna ta landa pomatala gomalandithilo. Ngele omuntu naye okwi imemeha oha ningi etyokosha paufupi, naashoka ohashi mu pe omukumo a popye naye. Oha pulakene nawa nokutala kutya oshike tashi opalele okupopya naye ngele te mu uvithile. Mokulongitha omukalo nguka okwa li a gandja iileshomwa oyindji nokutameka omakonakonombiimbeli.
6. Ongiini tatu vulu okutameka oonkundathana dhontukuluka?
6 Tameka oonkundathana: Oshike tatu vulu okutya ngele tatu tameke oonkundathana? Sho Jesus a popi nomukiintu pomuthima, okwe mu pula owala e mu pe omeya gokunwa. (Joh. 4:7) Otatu vulu wo okutameka oonkundathana nepopitho nenge nepulo lyopambili. Sho tamu kundathana oto vulu okulongitha ompito ndjoka wu kwatele mo omadhiladhilo gopamanyolo noto ka kuna oombuto dhoshili. (Omuuv. 11:6) Yamwe ohaya mono kutya okupopya oohapu tadhi nywitha omakutsi notadhi ningitha omuntu a kale a hala okuuva nawa ohashi pondola. Pashiholelwa, omanga wa tegelela ndohotola e ku yakule oto vulu okutameka oonkundathana to ti: “Otandi ka kala nda nyanyukwa uuna itaandi ke ehama we.”
7. Okutala nawa otaku ke tu kwathela ngiini tu gandje uunzapo wontukuluka?
7 Okutala nawa otaku ke tu kwathela wo tu tameke oonkundathana. Ngele owa mono omuvali e na okanona haki ihumbata nawa, oto vulu oku mu pandula noku mu pula kutya “oshike she mu kwathela a pondole moku ka putudha?” Omumwameme gumwe oha ndhindhilike iinima mbyoka aaniilonga pamwe naye ye hole okupopya nokonima oha kundathana nayo shi ikolelela kwaashoka ye hole okupopya. Sho a mono kutya omukiintu gumwe miilonga yawo ota ka hokanwa, okwe mu pe o-Awake! ndjoka tayi popi nkene ohango yi na okulongekidhwa. Shika osha fala moonkundathana dha gwedhwa po dhopambiimbeli.
8. Ongiini tatu vulu okulongitha iileshomwa yetu mokutameka oonkundathana?
8 Omukalo gulwe gwokutameka oonkundathana omokulesha iileshomwa pomahala mpono yalwe taya vulu oku tu mona. Omumwatate gumwe oha pandja Oshungolangelo nenge o-Awake! poshitopolwa shoka e shi kutya otashi hokitha noku shi lesha a mwena. Ngele okwa mono kutya opu na gumwe ta yakele omeho moshifo she, ohe mu pula epulo nenge a ninge etyokosha lya kankamena koshitopolwa shoka. Olundji shika ohashi fala moonkundathana nomokugandja uunzapo. Ngele ohatu thigi iileshomwa yetu mpoka tayi vulu okumonika kaaniilonga pamwe natse nenge kaanasikola ooyakwetu mboka ye na okatalekonawa, otashi vulika ye ke tu pule kombinga yayo.
9, 10. (a) Omomikalo dhini tatu vulu okugandja uunzapo wontukuluka? (b) Oho shi ende ngiini wu gandje uunzapo wontukuluka?
9 Natu konge oompito: Molwaashoka iilonga yetu yokuuvitha oye endelela noonkondo okugandja uunzapo wontukuluka katu na owala okukala hatu ku ningi omaluthe. Pehala lyaashono, otu na okukala hatu kongo oompito dhoku shi ninga esiku kehe. Dhiladhila komeho yethimbo kutya oolye tashi vulika wu ka tsakanene nayo nokukala wi ilongekidha nkene wu na okutameka oonkundathana nombili. Kala wu na Ombiimbeli nosho wo iileshomwa mbyoka to vulu oku pa mboka tayu ulike ohokwe. — 1 Pet. 3:15.
10 Aauvithi oyendji oya konga omikalo dhokugandja uunzapo wontukuluka nuukeka. Yamwe ohaya kala ye na omaludhi ogendji guutrakatate uuna taya talele po moshipangelo nenge ngele ya tegelela oku ka mona ndohotola opo yu uvithile aavu. Aantu oyendji oye hole okatrakatate hoka taka popi kombinga yUuyuni uupe wombili nohaka fala moonkundathana tadhi ti sha. Yamwe ohaye ende niileshomwa yawo uuna ye li moombesa nenge mOtaxi. (Eh. 21:1-4) Mbela oto vulu okudhiladhila nkene wu na okugandja uunzapo wontukuluka?
11. Ongiini tatu vulu okushuna kwaamboka yu ulika ohokwe ngele tatu gandja uunzapo wontukuluka?
11 Shuna kwaamboka yu ulika ohokwe: Ngele wa mono gumwe ta pulakene nawa, kambadhala wu shune ko. Mpoka tashi opalele mu lombwela to ti: “Onda nyanyukwa lela okupopya nangoye. Oho kala peni, opo tu vule okupopya ishewe?” Aauvithi yamwe ohaya gandja oondjukithi dhawo noongodhi e taya ti: “Onda nyanyukilwa oonkundathana dhetu. Ngele owa hala okutseya oshindji kombinga yaashoka twa kundathana, oto vulu okumona ndje kondjukithi nokongodhi ndjika.” Ngele ito vulu okushuna komuntu ngoka u ulika ohokwe, udhitha nziya ofooloma Please Follow Up (S-43) e to yi pe amushanga gwegongalo lyeni opo e yi tume kegongalo ndyoka tali vulu okukwatathana nomuntu ngoka.
12. (a) Omolwashike tu na okuyalula ethimbo ndyoka twa gandja uunzapo wontukuluka? (b) Iizemo yini ya za mokugandja uunzapo wontukuluka? (Tala okampungu “Iizemo mbyoka ya za mokugandja uunzapo wontukuluka!”)
12 Ethimbo ndyoka tatu longitha mokugandja uunzapo wontukuluka otu na oku li yalula. Nonando otwa popya owala ominute omishona mesiku, natu dhi ndhindhilike. Dhiladhila owala kwaashika: Ngele omuuvithi kehe oha gandja uunzapo wontukuluka uule wominute ntano esiku kehe, shoka otashi tu eta tu longe oowili dhi vulithe omamiliyona 17 dha gwedhwa po momwedhi kehe.
13. Oshike hashi tu inyengitha tu gandje uunzapo wontukuluka?
13 Ohole yokuhola Kalunga naantu ooyakwetu oyo unene hayi tu inyengitha tu uvithe onkundana ombwanawa. (Mat. 22:37-39) Ohatu uvitha kombinga ‘yoshinge shuukwaniilwa’ waJehova molwaashoka omitima dhetu otadhi hunga olupandu lwokupandula uukwatya we nomalalakano ge. (Eps. 145:7, 10-12, KB) Ngele otu hole aantu ooyakwetu shili, otashi ke tu inyengitha tu longithe nawa ompito kehe tatu mono tu uvithe onkundana ombwanawa manga taku tiwa nena. (Rom. 10:13, 14) Uuna tatu shi kaleke momadhiladhilo nokwiilongekidha komeho yethimbo, atuheni otatu vulu okugandja uunzapo wontukuluka nokumona enyanyu lyokugandja oshili kugumwe ngoka e na omutima gu uka.
[Oohapu dha simana pepandja 4]
Ngele owi itulila po elalakano okupopya naantu nokutameka oonkundathana nayo, otashi ka kala oshipu oku shi ninga
[Oohapu dha simana pepandja 5]
Aauvithi oyendji oya konga omikalo dhokugandja uunzapo wontukuluka nuukeka
[Oshimpungu pepandja 5]
Nkene to vulu okutameka oonkundathana
◼ Pula ekwatho okupitila megalikano wu shi ninge
◼ Popya naamboka taya monika aanambili naamboka inaaye endelela
◼ Tala aantu kiipala, imemeha nokuninga omatyokosha kwaashoka tashi hokitha
◼ kala ho pulakene nawa
[Oshimpungu pepandja 6]
Iizemo mbyoka ya za mokugandja uunzapo wontukuluka
• Omumwatate gumwe okwa li a gandja uunzapo kaantu yopomudhingoloka noku ya pa uumbapila mboka tawu ya hiya koshipopiwa shomontaneho omanga a tegelela ohauto ye tayi pangelwa mongalashe. Konima yomvula yimwe poshigongi shoshitopolwa, puye opwe ya omulumentu gumwe ngoka e mu popitha nombili. Omulumentu ngoka okwa li gumwe gwomwaamboka omumwatate a pele uumbapila wehiyo sho a tegelela ohauto ye yi pangelwe. Omulumentu ngoka okwa li a yi a ka pulakene koshipopiwa e ta pula ekonakonombiimbeli. Ngashingeyi ye nomukulukadhi gwe oya ninginithwa.
• Omumwameme gumwe ngoka a mona oshili okupitila muunzapo wontukuluka okwa tala ko aantu mboka a tseya okupitila moyana yatatu ye li oshitopolwa she shi ikalekelwa. Oshitopolwa she shokuuvitha osha kwatela mo aashiinda she naavali mboka ha tsakanene nayo kosikola nopiigongi yaavali. Ngele ti ipopi kutya oye lye, oha popi aluhe kutya Ombiimbeli oye mu kwathela lela mokuputudha oyana nopo nduno ta landulithako iinima yilwe nawa. Kungawo, ohashi kala oshipu kuye okulandulitha ko oonkundathana okuza mOmbiimbeli. Okwa kwathela aantu 12 ya ningithwe mokulongitha omukalo ngoka.
• Sho omumwameme gumwe a li a talelwapo komulumentu ngoka ha longo mehangano ekwashilipaleki, okwa li a longitha ompito ndjoka e mu pe uunzapo. Omumwameme okwa pula omulumentu ngoka ngele okwa hala ekwashilipaleko lyokukala nuukolele nombili nosho wo lyomwenyo gwaaluhe. Omulumentu okwa zimine e ta pula kutya ehangano lini li na omakwashilipaleko goludhi ndoka. Omumwameme okwe mu ulukile omauvaneko gOmbiimbeli noku mu pa oshileshomwa shetu shimwe, shoka omulumentu e shi lesha owala uusiku wumwe. Opwa ningwa omalongekidho opo omulumentu ngoka a konakone Ombiimbeli. Okwa tameke okuya kokugongalo nokonima okwa ninginithwa.
• Omumwameme gumwe okwa li a gandja uunzapo komukiintu ngoka a kuutumba ontega naye mondhila. Sho ondhila yi li pokunambela omumwameme okwa pe omukiintu ngoka ondjukithi ye nonomola yongodhi hoka ta vulu oku mu mona nokwe mu ladhipike a pule ekonakonombiimbeli uuna Oonzapo dhaJehova tadhi mu talelele po oshikando tashi ya. Esiku lya landula ko, Oonzapo mbali odhe ya pegumbo lyomukiintu ngoka. Ekonakonombiimbeli olya tamekwa naye nokwa ningi ehumukomeho nziya e ta ninginithwa nokonima yaashoka okwa li a tameke omakonakonombiimbeli naantu yatatu.
• Omumwatate omuposi gwomimvo 100 ngoka ha kala megumbo lyaakulupe olundji oha popi ta ti: “Otwa pumbwa Uukwaniilwa.” Aapangi naanuuvu ohaye mu pula kutya Uukwaniilwa oshike nohe ya yelithile. Omukiintu gumwe ngoka ha longo megumbo lyaakulupe okwa pula omumwatate ngoka kutya ota ka ninga shike mOparadisa. Okwa yamukula a ti: “Otandi ka mona ko nokweenda notandi ka fika po okatemba kandje.” Molwaashoka omumwatate omuposi, oha pula omukiintu ngoka e mu leshele iifo yetu. Sho omwanakadhona gwomumwatate e ya oku mu talela po, omuniilonga okwe mu indile a ka leshe mo miifo mbyoka kegumbo lye. Omupangi okwa lombwele omukadhona ngoka a ti: “Oshipopiwa shetu oshipe megumbo lyaakulupe osho: ‘Otwa pumbwa Uukwaniilwa.’ ”
• Omumwameme gumwe omanga e li momukweyo mo-restolanda oku uvu aalumentu aakokele mboka ya li ya kuutumba popepi naye taya popi iinima yopapolotika. Omulumentu gumwe okwa ti epangelo itali vulu okukandula po omaupyakadhi getu. Omumwameme okwi ipopile a ti: ‘Ndjika ompito yandje yokugandja uunzapo.’ Okwa galikana paufupi e ta yi puyo. Konima sho i ipopi, okwe ya lombwele kombinga yUukwaniilwa waKalunga, epangelo ndyoka tali ka kandula po omaupyakadhi gaantu e te ya pe okabroshure hoka a li e na. Opo e li po menindjela gwo-restolanda okwe ya kuye. Omumwameme okwa li ti ipula kutya ote ke mu pula a ze mo. Ihe pehala lyaashoka, okwe mu lombwele kutya okwa li ta pulakene oonkundathana dhawo nokwa hala wo okabroshure. Omuniilonga gumwe ngoka a li naye ta pulakene, okwe ya komumwameme nomahodhi taga polinda. Omukiintu ngoka okwa li ha konakona nale nokwa hala okutameka natango nekonakonombiimbeli lye.