Tatu uvitha kombinga yUukwaniilwa uule womimvo 100!
1. Oshigwana shaJehova osha li sha ladhipikwa shi ninge shike konyala omimvo 100 dha ka pita?
1 Omumwatate Rutherford okwa li a popi oohapu dhituntula konyala omimvo 100 dha ka pita. Okwa ti: “Tseyeni kutya Omukwaniilwa ota pangele nale! One aakalelipo ye yoku mu tseyitha. Onkee ano, uvitheni, uvitheni, uvitheni Omukwaniilwa nuukwaniilwa we!” Oshigwana shaJehova osha li sha ladhipikwa, opo shi taandelithe etumwalaka lyUukwaniilwa sigo okooha dhuuyuni. Oshinima shono osho naanaa twa ninga. Otwa kala nokuuvithila “aantu ayehe yomuuyuni” onkundana ombwanawa yUukwaniilwa. Aakriste yopetameko nayo osho ya li ya ningi. (Kol. 1:23) Otwa kala nokuninga shike muule wethimbo ndyono ngele tashi ya pokuuvitha Uukwaniilwa waKalunga? Ongiini tatu vulu okutsikila niilonga yokuuvitha Uukwaniilwa sho wu li pokugwanitha omimvo 100?
2. Iileshomwa yetu oya kala ngiini nokuhumitha komeho Uukwaniilwa waKalunga?
2 Onakuziwa: Iileshomwa yetu oya kala nokuhumitha komeho Uukwaniilwa waKalunga omimvo omilongo odhindji dha ka pita. Okuza ngaa mo 1939 oshifo shetu sha simana osha kala nokwiithanwa: Oshungolangelo tayi tseyitha Uukwaniilwa waJehova. Ohashi kundathana olundji kombinga yUukwaniilwa naashoka tawu ka ninga. O-Awake! nayo ohayi tsu omuthindo kutya Uukwaniilwa waKalunga owo owala tawu ka kandula po omaupyakadhi gaantu. Ngashingeyi Oshungolangelo no-Awake! oyi li iifo mbyoka hayi tolokwa momalaka ogendji, nokutaandelithwa muuyuni awuhe. — Eh. 14:6.
3. Omikalo dhini twa longitha mokuuvitha Uukwaniilwa?
3 Oshigwana shaJehova osha kala nokulongitha omikalo dhi ili nodhi ili dhokuuvitha Uukwaniilwa. Nalenale otwa li hatu longitha iihauto yi na omambako, okupopya mooradio nosho wo oongalamathona. Omikalo ndhoka odha li dha kwathele, opo onkundana ombwanawa yi taandele pethimbo ndyoka pwa li aauvithi aashona yUukwaniilwa. (Eps. 19:4) Omimvo opo dha zi ko, onkundana ombwanawa oya thiki kaantu omamiliyona ogendji sho twa tameke okutula uuyelele wetu kointaneta ko-jw.org. Aantu yamwe oomboka nokuli ye li miilongo moka iilonga yetu yi indikwa.
4. Omikalo dhi ikalekelwa dhini hatu longitha tu uvithile aantu?
4 Oshigwana shaJehova osha kala nokulongitha omikalo dhi ikalekelwa mokutaandeleka etumwalaka lyUukwaniilwa. Pashiholelwa, okuza lwopetameko lyomumvo 1990, otwa li twa tamununa mo uukalele wetu. Kakele kokuuvitha egumbo negumbo, otwa tameke okuuvitha moopaarka, moopaakinga nopomahala goongeshefa. Opo owala twa tameke nomukalo omupe gwokuuvithila aantu mboka haya kala miilando iinene muuyuni. Shimwe ishewe, omagongalo ogendji ohaga kutha ombinga mokugandja uunzapo womontaneho miitopolwa yago. Ohaga longitha uutemba niitaafula yiileshomwa mbyoka hayi kala pomahala mpoka hapu ende aantu oyendji. Ihe nonando ongaaka, iilonga yegumbo negumbo oyo yi li ehukamugongo lyiilonga yetu yokuuvitha Uukwaniilwa. — Iil. 20:20.
5. Oompito dhini dhe ku egulukila momumvo gwiilonga omupe?
5 Onakuyiwa: Omumvo gwiilonga omupe otagu tameke muSeptemba. Aantu oyendji otaya ka ya miilonga yuukokolindjila wondjigilile. Mbela ngoye ito ke ya waimina? Otashi vulika onkalo yoye itayi shi pitike. Mbela ito vulu okukala ho kutha uukwathelikokolindjila omathimbo nomathimbo? Otashi vulika wu kale to vulu okukokolondjila nenge itoo vulu. Ihe kala wu na uushili kutya Jehova ota ka laleka nuuyamba eiyambo kehe ndyoka to ningi sho to kutha ombinga pakuudha mokuuvitha Uukwaniilwa we. — Mal. 3:10.
6. Omolwashike omwedhi gwaKotoba 2014 gwi ikalekelwa?
6 MuKotoba 2014, Uukwaniilwa otawu ka gwanitha omimvo 100. Oshungolangelo yuukalele yaKotoba otayi popi unene kombinga yUukwaniilwa waKalunga. Omolwashike ito ningi oonkambadhala wu ka gandje oshifo shoka kaantu oyendji ngaashi tashi vulika? Onkee ano, tsikila nokuuvithila kehe gumwe ngoka ta pulakene “onkundana ombwanawa yUukwaniilwa waKalunga.” — Iil. 8:12, NW.