Omikalo omipe dhokugandja uunzapo womontaneho
1. Aakriste yomethelemumvo lyotango oya tula po oshiholelwa shini?
1 Kakele owala kokuuvitha egumbo negumbo, Aakriste yomethelemumvo lyotango oya li haya uvitha momikalo odhindji. Oya li wo haya uvitha montaneho. (Iil. 20:20) Pashiholelwa, oya li haya yi kotempeli, molwaashoka oya li ye shi kutya ohaku kala aantu oyendji. (Iil. 5:42) Sho Paulus a li muAtena okwa li u uvithile aantu mehalandjandja esiku kehe. (Iil. 17:17) Ihe okulonga egumbo negumbo okwo omukalo gwa dhenga mbanda gwokutaandelitha onkundana ombwanawa kunena. Ohatu uvithile wo mpoka hapu thikama iiyenditho, pomahala goongeshefa, mooparka, momapandaanda moka hamu ende aantu olundji nosho wo pomahala galwe mpoka tatu vulu okupopya nakehe ngoka tatu adha. Nonando aauvithi ayehe ohaya ladhipikwa ya ninge ngaashi taya vulu ya gandje uunzapo womontaneho, oyendji otaya ka mona ompito okuuvitha momikalo mbali ndhika omipe, gumwe okuyala iitaafula nosho wo okulongitha uutemba wiileshomwa ya gandje uunzapo womontaneho.
2. Omukalo omupe guni gwokugandja uunzapo gwa li gwa tamekwa muNovomba 2011?
2 Omukalo gwi ikalekelwa gwokugandja uunzapo womontaneho miilando: Ngaashi sha popiwa membo 2013 Yearbook, pepandja 16-17, mo-New York City omwa li mwa tamekwa omukalo omupe gwokugandja uunzapo womontaneho muNovomba 2011. Iitaafula ya yalwa iileshomwa momalaka ogendji nosho wo uutemba hawu undulwa wu na iileshomwa mbyoka yi wetike kukehe gumwe oya li ya tulwa pomahala mpoka hapu ende aantu oyendjiyendji moshilando moka. Yamwe yomuyo oomboka haya kala momalukalwa ngoka haga kala ga gamenwa nosho wo mboka ihaya adhika momagumbo olundji. Aantu oyendji oya li yu ulike ohokwe miileshomwa yetu. Momwedhi gumwe owala opo gwa zi ko aamwatate naamwameme oya li ya gandja iifo 3 797 nomambo 7 986. Aantu oyendji oya li ya hala okukonakona. Molwaashoka elalakano olya li okutameka omakonakonombiimbeli, oondjukithi dhaamboka yu ulika ohokwe odha li dha tumwa nziya komagongalo, opo ya ka talelwe po pomagumbo gawo.
3. Oonkambadhala dhini tadhi ningwa, opo omukalo nguka gu longithwe miilando yilwe?
3 Omukalo ngoka gwokuuvitha ogwa li gwe ende nawa, notwa hala oshinima shoka shi ningwe miilando yilwe muuyuni moka hamu kala oombunga dhaantu. Oshitayimbelewa moshitopolwa kehe otashi ka hogolola kutya iilando yini tayi ka uvithilwa momukalo ngoka. Olundji oshi li nawa okuuvithila miilando moka mu na uupale wokuthikamena iiyenditho, nenge mu na oombelewa odhindjidhindji, nenge omagumbo ngoka ga tungwa ge li kumwe moka hamu mu kala omainyengo gaantu oyendjiyendji. Oshitayimbelewa ohashi nyolele komagongalo ngoka taga ka kutha ombinga noku ya pa omalombwelo ga gwedhwa po. Olundji aakokolindjila yondjigilile naamboka yi ikalekelwa oyo haya longithwa. Ihe momahala gamwe mboka ya kutha uukwathelikokolindjila ohaya longithwa wo.
4. Omukalo gwokugandja uunzapo wi ikalekelwa womontaneho miilando ohagu ningwa ngiini?
4 Nkene uunzapo mboka wu na okugandjwa: Mboka haya kutha ombinga momukalo nguka gwi ikalekelwa gwokugandja uunzapo womontaneho miilando, olundji ohaya tegelele aantu ye ye poshitaafula nenge pokatemba hoka ye na haka undulwa. Uuna omuntu e ya po, oha lombwelwa a kuthe po oshileshomwa shoka a hokwa. Aakolindjila ohaya yamukula nenyanyu omapulo ngoka omuntu e na taya longitha Ombiimbeli. Aakokolindjila kaye na okupopya kutya iileshomwa yetu ohayi ambidhidhwa pashimaliwa, uuna omuntu a kutha po oshileshomwa. Ngele omuntu ota pula kutya iilonga yetu ohayi ambidhidhwa ngiini, mu lombwela kutya ota vulu okutuma omaambidhidho kuyimwe yoomondjukithi ndhoka dhu ulikwa moshileshomwa. Uuna tashi vulika aakokolindjila ohaya pula omuntu kutya “ino hala wu kale ho talelwa po pegumbo lyoye kugumwe gwomutse?” nenge “ino hala tu konakone nangoye Ombiimbeli oshali tatu longitha iileshomwa mbyono?”
5. Uuwanawa wuni aaihokani yamwe ya mona konima sho ya kutha ombinga momukalo nguka omupe gwokuuvitha?
5 Okukutha ombinga mokugandja uunzapo womontaneho oku na uuwanawa owundji. Aaihokani yamwe oya nyola taya ti: “Okukala wa thikama poshitaafula nokutala aantu omayuvi nomayuvi taya piti po esiku nesiku osha thindila momitima dhetu tu mone nkene iilonga iinene tayi longwa muuyuni awuhe, opo aantu ayehe yu uvithilwe. Okumona ongundu yaantu ndjoka nokudhiladhila nkene Jehova ha sile kehe gumwe oshimpwiyu oshe tu kwathela tu tsikile nokupititha komeho iilonga yokuuvitha monkalamwenyo yetu. Ohatu kala tu uvite lela tu li popepi naayengeli, molwaashoka ohaya kala pamwe natse miilonga yokuuvitha.”
6. (a) Omagongalo ogendji ohaga unganeke omukalo guni omupe gulwe gwokugandja uunzapo womontaneho, nomukalo ngoka ogwa yooloka ko ngiini kokugandja uunzapo womontaneho miilando? (b) Ongiini omagongalo taga vulu okulongela kumwe uuna taga gandja uunzapo womontaneho?
6 Okuunganeka iilonga yokugandja uunzapo womontaneho moshitopolwa sheni: Kakele owala kokugandja uunzapo womontaneho miilando, aakuluntugongalo momagongalo ogendji oyu unganeka omukalo gwokuuvitha omupe gwa fa ngoka miitopolwa yawo. Ohaya ladhipike aauvithi ya longithe iitaafula ya yalwa iileshomwa nenge uutemba hawu undulwa wu na iileshomwa pomahala mpoka hapu kala omangathithi gaantu moshitopolwa moka egongalo lyawo hali longo. Omukalo nguka ogwa yooloka ko kwaangoka gokugandja uunzapo womontaneho miilando, molwaashoka ehangano olyo hali hogolola oshilando shoka shi na okulongwa. Yo aauvithi ohaya hogololwa okuza momagongalo ogendji ye ku uvithile moshitopolwa shimwe. — Tala okampungu “Elongelokumwe ewanawa olya pumbiwa.”
7. Ongiini aakuluntugongalo taya vulu okuunganeka iilonga yokugandja uunzapo womontaneho moshitopolwa moka egongalo hali longo?
7 Aakuluntugongalo otaya ka tala ngele moshitopolwa moka egongalo lyawo hali longo omu na iitopolwa mbyoka hamu ende aantu oyendjiyendji nokutala ngele otashi opalele okuunganeka iilonga yokugandja uunzapo womontaneho. Omahala mpoka aauvithi taya vulu okulonga ongaashi uupale wokuthikamena iiyenditho, mpoka hapu thikama iiyenditho yaayehe, mooparka, momapandaanda moka hamu ende aantu olundji, pomahala goongeshefa, piiputudhilo yelongo, puupale woondhila nosho wo pomahala giiningwanima yokomumvo. Oshi li nawa oshitaafula shi kale hashi kala pehala limwe, mesiku lya faathana moshiwike kehe nopethimbo lya faathana. Ngele owa tula oshitaafula shoye pehala mpoka pu na oositola odhindji dhi li metungo limwe enenenene aantu ohaya kala ye na ohokwe okukutha iileshomwa, okuyelekanitha noku shi dhika positola yimwe ndjoka yi ilile, mpoka aantu haye ya owala ya hala shoka ye endela. Iitopolwa yimwe, ngaashi pomahala mpoka hapu ende olundji aayendi yokolupadhi, otapu opalele unene okulongwa nuutemba wokuulika iileshomwa. Otwa hala oku mu tseyithila kutya opu na nale omathano gokulongithwa okuulika Oshungolangelo no-Awake! nosho wo embo Omalongo gOmbiimbeli naakuluntugongalo otaya vulu oku ga tapa ko-www.pr2711.com. Omathano ngoka otse ga nuninwa tu ga longithe ngele tatu gandja uunzapo womontaneho. Mboka taya ka kutha ombinga oye na okulandula omalombwelo ngoka taya pewa komutonateli gwiilonga megongalo. Ngele opu na omuntu tu ulike ohokwe, ihe iha kala moshitopolwa sheni, udhitha nziya ofooloma Please Follow Up (S-43) noku yi pa amushanga gwegongalo lyeni.
8. Ongiini tamu vulu okuuvitha montaneho, nonando moshitopolwa shegongalo lyeni kaamu na omahala ngoka tamu vulu okugandja uunzapo womontaneho?
8 Gandja uunzapo womontaneho muukalele: Iitopolwa moka omagongalo gamwe haga longo otashi vulika kaamu na omahala ngoka hage ende aantu oyendjiyendji nenge tashi vulika itamu opalele okuyalwa iitaafula yiileshomwa nokulongitha uutemba wokuulika iileshomwa. Ngele osho shi li ngawo, aauvithi momagongalo ngoka otaya ladhipikwa ya kale haya gandja uunzapo womontaneho uuna ye li muukalele. Mbela moshitopolwa sheni omu na ehala lyoongeshefa nenge mu na ositola ndjoka hayi landwa unene. Mbela moshitopolwa sheni omu na ooparka nenge omahala mpoka aantu haya gongala? Mbela omu na iiningwanima yontumba mbyoka hayi kala ko omumvo kehe? Ngele osho, nena otamu vulu okugandja uunzapo womontaneho moshitopolwa sheni.
9. Omolwashike tu na okuninga oonkambadhala dha mana mo tu uvithile aantu kehe mpoka taya adhika?
9 Jehova okwa “hala, aantu ayehe ya hupithwe noya tseye oshili.” (1 Tim. 2:4) Onkee ano, otatu ningi oonkambadhala ngaashi tashi vulika tu uvithele aantu oyendji manga ehulilo inaali ya. (Mat. 24:14) Momahala ogendji aantu ihaya adhika momagumbo. Ihe otatu vulu oku ya pa uunzapo pethimbo sho ye li momahala gaayehe. Otashi vulika aantu yamwe taya ka uva owala onkundana ombwanawa okupitila mokugandja uunzapo womontaneho. Onkee ano, natu longele Kalunga muukalele wetu mokukala tatu uvithile aantu kehe pamwe mpoka taya adhika. — 2 Tim. 4:5.
[Oshimpungu pepandja 5]
Elongelokumwe ewanawa olya pumbiwa
Opu na aauvithi yamwe mboka ya za momagongalo gopuushinda to adha taya longo mepaandaanda limwe, nenge mpoka hapu thikama iiyenditho nosho wo komeho yehala lyoongeshefa limwe nenge muupale wokuthikamena iiyenditho. Aauvithi okuza momagongalo gi ili nogi ili oya li ya thigi iifo mehala limwe moka hamu thikile aantu. Oya li wo yu uvitha mehala lya faathana lyoongeshefa. Oshikando shimwe, aanangeshefa nosho wo aantu momudhingoloko oya li ya kenyanana, nonando aauvithi inaye ya po powili yimwe. Onkee ano, onawa tu longe moshitopolwa shegongalo lyetu uuna tatu gandja uunzapo womontaneho.
Ngele aauvithi oya hala oku ka gandja uunzapo womontaneho moshitopolwa shegongalo lyopuushinda oye na okupopya nomutonateli gwiilonga. Ota ka ninga ekwatathano nomutonateli gwiilonga gwegongalo ndyoka hali longo moshitopolwa shoka komeho yethimbo, opo a pewe epitikilo. Aauvithi kaaye na oku ka longa koshitopolwa shoka ngele inaya lombwelwa ye shi ninge. Opo kaatu ningile nayi aantu, aatonateli yiilonga momagongalo ngoka haga longo oshitopolwa shimwe oye na okuunganeka iinima nawa. Onkee ano, iinima ayihe otayi ka kala owala “palandulathano nopamukalo omwaanawa,” ngele opu na elongelokumwe. — 1 Kor. 14:40.
[Ethano pepandja 6]
[Ethano pepandja 6]