Uvitha oshili nuulaadhi kombinga yaJesus

Uulaadhi wetu ohawu hwama uuna tu shi nkene tu na okuuvithila yalwe oshili kombinga yaJesus. Jesus oye ekankameno hoka kwa tungilwa eitaalo lyashili. (Ef. 2:20) Ando okwa li kee po, ando inatu vula okukala tu na etegameno lyokukala nomwenyo. (Iil. 4:12) Onkee ano, osha simana opo aantu ayehe ya kale ye shi kutya Jesus ota dhana onkandangala yini melalakano lyaKalunga. Oyendji oya pukithwa komalongo kaage li pamanyolo. Shinikitha oluhodhi, oye li monkalo ndjoka tayi ya ningitha kaaya mone uuwanawa momauvaneko ngoka ge li mOohapu dhaKalunga ngoka e nine mboka ye na eitaalo muJesus. Uulaadhi wetu woshili otawu ke tu inyengitha tu kwathele aanamitima omiwanawa ya mone euvoko lyashili kombinga yaJesus, yekwatathano lye naKalunga noyonkandangala ndjoka ta dhana melalakano lyaKalunga. Pethimbo ndika lyoomwedhi dhEdhimbuluko, oto ka uvitha ngaa nuulaadhi oshili kombinga yaJesus?