Ilonga sha kaauvithi mboka ya pyokoka

Otwa lenga lela aauvithi ya pyokoka mboka ye li megongalo. Yamwe yomuyo oya longela Jehova nuudhiginini uule womimvo odhindji. Yo yalwe opo owala ya mono uunkulungu muukalele omimvo dha zi ko. Aauvithi mbaka oya mona nkene Jesus a kala nokuwilika egongalo lyopaKriste momasiku ngaka gahugunina, mokutamununa mo iilonga yawo yokuuvitha noyokuninga aantu aalongwa. (Mat. 28:19, 20) Oya mona “oonkondo dhi vule ndhoka dhopaunshitwe,” sho ya kala ya taalelwa komashongo nokomaupyakadhi. (2 Kor. 4:7, NW) Opu na oshindji okwiilonga kombinga yaamboka ya menekela miilonga yokuuvitha. Ohaya nyanyukilwa okulonga yalwe shoka yi ilonga. (Eps. 71:18) Onkee ano, otu na okukonga oompito dhokwiilonga sha kuyo. Ongiini tatu vulu oku shi ninga?

Uuna wu li muukalele. Opo aauvithi aape nenge mboka inaaya pyokoka ya kale haye shi pondola nawa muukalele, oya pumbwa okudheulwa. Otaya vulu okwiilonga sha mokukala haya tala aauvithi mboka ya pyokoka nkene taya uvitha muukalele. (Tala oshitopolwa: “Kala omulaadhi muukalele,” shi li mOshungolangelo yo 15 Februali 2015, epandja 29, okatendo okatitatu kohi yokapalanyolo: “Kwathela aauvithi aape.”) Uuwanawa wuni to ka mona uuna to longo pamwe nomuuvithi ngoka a pyokoka?

Mbela ito vulu okupula omuuvithi ngoka a pyokoka mu ka longe pamwe naye muukalele? Ongiini ngele omuuvithi ngoka a pyokoka ke na uukolele? Oto vulu okuya nomukonakoni gwoye kegumbo lyomuuvithi ngoka a pyokoka, oko mu ka konakonene. Ngele mwa mana ekonakono, pula omuuvithi ngoka a pyokoka e ku pe omayele mpoka wa pumbwa okuhwepopala.

Kala ho endathana naauvithi mboka ya pyokoka: Opo wu tseye aauvithi mboka ya pyokoka, owa pumbwa okulongitha ethimbo lyoye wu kale ho endathana nayo. Ya hiya ya kale po mesiku lyelongelokalunga lyuukwanegumbo lyeni noku ya pulapula. Ongiini ngele omuuvithi ngoka a pyokoka okwa nika uunkundi? Oto vulu okuninga omalongekidho mu ka ningile esiku lyelongelokalunga pamwe naye kegumbo lye. Mu pula kutya oshe ende ngiini e ye moshili. Omalaleko nuuyamba geni ta nyanyukilwa kunena? Ehumokomeho lini a mona tali ningwa moshitopolwa? Enyanyu lini a mona mokulongela Jehova?

Kala wu shi kutya aauvithi mboka ya pyokoka nayo oye na owala omangambeko. Ino kala wa tegelela ya kale ye shi okanima kehe. Omuuvithi kehe oku na omagano gi ili nogi ili. (Rom. 12:6-8) Yamwe aanamimvo, notu na okungambeka ethimbo ndyoka tatu kala pamwe nayo. Ihe nonando ongawo, otatu vulu okwiilonga oshindji kuyo, molwaashoka oya longela Jehova nuudhiginini ethimbo ele. Ohaya kala ye na ontseyo oyindji.