Iileshomwa moka mwa za omayamukulo gomapulo ngoka ge li mokafo Onkalamwenyo yopaKriste niilonga yetu yokuuvitha
1-7 MAALITSA
OMALIKO OKUZA MOOHAPU DHAKALUNGA | NUMERI 7–8
“Shoka tatu ilongo kontanda yAaisraeli”
it-1-E ep. 497, okat. 3
Egongalo
MuIsraeli, aalumentu mboka ya li ya langekwa po oyo ya li haya katuka oonkatu pehala lyoshigwana shoka. (Esra 10:14) Onkee, “aawiliki yomazimo” oyo ya li ya fala omayambo sho etsalihangano lya dhikwa po. (Num 7:1-11) Pethimbo lyaNehemia, mboka ya li wo ya shaina “euvaneno lyolela,” aayambi nAalevi nosho wo “aawiliki yoshigwana.” (Neh 9:38–10:27) Pethimbo Aaisraeli ya li molweendo mombuga, opwa li ‘aalumentu yomAaisraeli, aawiliki ya simana ya hogololwa kegongalo’ 250 ya li ya wayimine Kora, Datan, Abiram naOn mboka ya li ya tsile Moses naAaron ondumbo. (Num 16:1-3) Palombwelo lyaKalunga, Moses okwa li a hogolola aalumentu omilongo heyali aawiliki yoshigwana ye mu kwathe mokuhumbata “omutenge gwaantu” ngoka a li itaa vulu okuhumbata oye awike. (Num 11:16, 17, 24, 25) MuLevitikus 4:15 omwa popiwa “aawiIiki yegongalo,” naashoka otashi ulike kutya oya li aalumentu mboka ya langekwa po ano aakuluntu, omitse dhomazimo, aatokolihapu naambala yoshigwana shaIsraeli. — Num 1:4, 16; Jos 23:2; 24:1.
it-2-E ep. 796, okat. 1
Reuben
Montanda yAaisraeli ezimo lyaReuben ndyoka lya li pokati kezimo lyaSimeon naGad, olya li kuumbugantu wetsalihangano. Uuna taya katuka, omazimo ngoka oga li haga kwatelwa komeho kezimo lyaRuben nogo gali haga katuka tango, taku landula omazimo oogatatu: lyaJuda, taku landula lyaIssaskar, opo nduno olyaSebulon. (Num 2:10-16; 10:14-20) Omukalo ngoka ogwo wo gwa li gwa longithwa sho omazimo ngoka ga li ga gandja omayambo pethimbo etsalihangano tali yapulwa. — Num 7:1, 2, 10-47.
Omanenedhiladhilo okuza membo lyaNumeri
8: 25, 26. Aalumentu aakulupe oya li ya lombwelwa ye ethe po iilonga tayi dhengele nokupenzelwa omolwuukulupe wawo noku shilipalekwe wo kutya aalumentu Aalevi mboka ya pyokoka oya pewa iilonga. Ihe oya li taya vulu okwiigandja okukwathela Aalevi yalwe. Nonando mokukala omuuvithi gwUukwaniilwa nena ihamu penzelwa omuntu, ekotampango lyompango ndjika otali tu longo oshiilongomwa shi na ongushu. Ngele Omukriste ita vulu okugwanitha po iinakugwanithwa yontumba omolwuukulupe, ota vulu okukutha ombinga miilonga yoludhi lwontumba mbyoka ye eleka oonkondo dhe.
Omaliko gomOmbiimbeli
it-1-E ep. 835
Osheeli, Aatango
Molwaashoka iisheeli yaalumentu moshigwana shaIsraeli oyo ya li hayi ka ninga omitse dhomagumbo gi ili nogi ili, oya li yi lile po oshigwana ashihe. Jehova okwa li nokuli a tala ko oshigwana shoka ashihe shi li “osheeli” she, omolwehangano ndyoka a li a a hangana naAbraham. (Eks 4:22) Molwaashoka okwa li a hupitha oomwenyo dhawo, Jehova okwa li a gandja elombwelo “omutango kehe Omuisraeli omulumentu nomutango kehe gwoshimuna,” e mu yapulilwe. (Eks 13:2) Kungawo, iisheeli yaalumentu oya li ya pewa Kalunga.
8-14 MAALITSA
OMALIKO OKUZA MOOHAPU DHAKALUNGA | NUMERI 9–10
“Nkene Jehova ha wilike oshigwana she”
it-1-E ep. 398, okat. 3
Ontanda
Uuna ontanda ayihe tayi tembuka (Moses okwa popya kombinga yiikando 40 yankene ya li ya tembuka muNumeri 33) osha li hashi ningwa momukalo gu unganekwa nawa. Uuna oshikogo sha siikila etsalihangano, kaya li haya zi po. Uuna oshikogo sha yeluka po, oya li haya tembuka. “Oya li haa tembudha po oontanda noku dhi yunga palombwelo lyOmuwa.” (Num 9:15-23) Opwa li omankuma gaali goshisiliveli haga hikwa ga gandje omalondodho ngaka gaJehova koshigwana. (Num 10:2, 5, 6) Omankuma ngoka oga li haga hikwa momukalo gwi ikalekelwa, uuna oontanda tadhi tembudhwa. Oga li ga hikwa oshikando shotango “mesiku etimilongombali lyomwedhi omutiyali gwomumvo Omutiyali [1512 K.E.N.].” Oshikethahangano osha li hashi kala komeho, taku landula oongundu dhomazimo oogatatu: yotango ya kwatelwa komeho kuJuda, e taku landula onkwawo ya kwatelwa komeho kuIssaskar, opo nduno taku landula ndjoka tayi wilikwa kuSebulon. Oya li haya landulwa kAakwagerson nokAakwamerari ya humbata iitopolwa yetsalihangano mbyoka ya pewa ya humbate. Okwa li haku landula ongundu yomazimo gatatu tayi wilikwa kuReuben ya landulwa kezimo lyaSimeon naGad. Okwa li haku landula Aakwakohat ya humbata iinima iiyapuki, opo nduno taku landula ongundu yomazimo gatatu yaEfraim ya landulwa kezimo lyaManasse naBenjamin. Hugunina, konima okwa li ongundu yokugamena aatembuki yi na ezimo lyaAser nolyaNaftali ya kwatelwa komeho kezimo lyaDan. Onkee oongundu ndhoka mbali dhaantu oyendji aanankondo odha li hadhi kala yimwe okomeho nayimwe okonima tadhi wilike notadhi gamene aatembuki. — Num 10:11-28.
w11-E 4/15 ep. 4-5
Oho mono ngaa kutya Kalunga ote tu wilike?
Ongiini tatu vulu okuulika kutya otwa pandula ewiliko lyaKalunga? Omuyapostoli Paulus okwa ti: “Vulikeni kaawiliki yeni, ne mu landule omalombwelo gawo.” (Heb 13:17) Ihashi kala aluhe oshipu okuninga ngawo. Natu shi thaneke ngeyi: Natu tye nduno owa li Omuisraeli pethimbo lyaMoses. Dhiladhila andola konima sho mwe ende oshinano oshile, oshikogo otashi thikama. Otashi kala sha thikama ethimbo li thike peni? Esiku? Oshiwike? Oomwedhi dhontumba? Otwi ipula to ti, ‘Nandi pakulule ngaa iinima yandje ayihe?’ Tango otashi vulika wu pakulule owala iinima mbyoka wa pumbwa unene. Ihe konima yomasiku omashona sho wa vulwa okuhadha miinima yoye, owa tameke oku yi pakulula ayihe. Ihe sho owala wu li pokumana, owa mono oshikogo tashi yeluka po, e to tameke ishewe oku yi pakela! Shoka itashi ka kala oshipu nenge tashi opalele pethimbo mpoka. Ihe Aaisraeli oya li haya ‘tembuka po “nziya,” NW.’ — Num 9:17-22.
Ohatu inyenge ngiini ngele Kalunga e tu pe omalombwelo? Ohatu kambadhala ngaa oku ga tula miilonga “nziya”? Nenge ohatu tsikile owala okuninga iinima ngaashi twi igilila? Otu shi ngaa omalombwelo ngoka ge li pethimbo ngaashi ge na ko nasha nokuninga omakonakonombiimbeli, gokuuvithila aakwiilongo, gokuninga aluhe ekonakonombiimbeli lyuukwanegumbo, gokulongela kumwe nOkomitiye yOkukwatathana nIipangelo nogokwiihumbata nawa piigongi? Ohatu ulike wo kutya otwa pandula ewiliko lyaKalunga mokutaamba ko omayele. Uuna tu na okuninga omatokolo omanene, ihatu inekele muunongo wetu yene, ihe ohatu tala kuJehova nokehangano lye olyo li tu wilike. Ngaashi owala okanona haka ka konga egameno kaavali yako uuna ku na oshikungulu sha geya, natse ohatu kongo egameno kehangano lyaJehova uuna twa adhika koshikungulu, ano komaupyakadhi gomuuyuni mbuka.
Omaliko gomOmbiimbeli
it-1-E ep. 199, okat. 3
Oshigongi
Esimano lyokugongala piigongi. Ngaashi owala sha li sha simana okukala piigongi opo aantu ya mone mo uuwanawa moohapu dhaJehova, osha li wo sha simana ya kale haya gongala ya dhane aluhe Opaasa omumvo kehe. Omulumentu kehe a li a yogoka noka li e li molweendo, e te ethele owina okukala inaa dhana Opaasa, okwa li ha dhipagwa. (Num 9:9-14) Sho omukwaniilwa Hiskia i ithana aakalimo yomuJuda nomuIsraeli ye ye kuJerusalem ya dhane oshituthi shOpaasa, etumwalaka lye olya li tali ti: “Aaisraeli ne, . . . Galukileni kOmuwa, . . . Inamu fa oohokulu nAaisraeli ooyakweni mboka yi iteka Omuwa, Kalunga kawo. Omu shi wete nokuli kutya okwe ya geele shili. Inamu tangalala ngayo, ihe vulikeni kOmuwa. Ileni kotempeli muJerusalem, ndjoka Omuwa e yi yapula sigo aluhe, ne mu mu longele, opo kee mu geele we. . . . Omuwa, Kalunga keni, oye omunamutimahenda nomunesilohenda. Ngele tamu yi kuye, ote mu taamba.” (2Ondjal 30:6-9) Ngoka a li a ningile owina kaaye ko okwa li a ulike kutya okwi iteka Kalunga. Nonando iituthi ngaashi shoka shOpaasa kayi na okudhanwa kAakriste, Paulus okwe ya ladhipike kaaye ethe po okugongala aluhe piigongi yoshigwana shaKalunga a ti: “Tu silathaneni oshimpwiyu, tu kwathathaneni mokuholathana nomokulongelathana uuwanawa. Inatu etha po okugongala pamwe, ngaashi yamwe haa ningi. Ihe natu kumagidhathaneni, unene sho tu wete esiku lyOmuwa tali hedha popepi.” — Heb 10:24, 25; tala CONGREGATION.
15-21 MAALITSA
OMALIKO OKUZA MOOHAPU DHAKALUNGA | NUMERI 11–12
“Omolwashike tu na okuyanda ombepo yokungungutula?”
w01 7/1 ep. 13, okat. 20
Inamu ninga aapulakeni aadhimbwantu
Omwaalu omunene gwAakriste ihagu igandja nando momilalo dha nyata. Ihe otwa pumbwa okukala twa kotoka kaatu iyethele miikala mbyoka tayi tu ningitha tu kale hatu ngungutula, hoka taku vulu oku tu ningitha kaatu kale twa hokiwa kuKalunga. Paulus ote tu londodha ta ti: “Inatu hindeni Omuwa, ngaashi yamwe [yomAaisraeli] ye shi ningi e taa dhipagwa komayoka. Inamu ngungutula, ngaashi yamwe yomuyo ye shi ningi e taa yonwa po komuyengeli gweso.” (1 Aakorinto 10:9, 10) Aaisraeli oya ngungutulile Moses naAaron — eeno, noya ngungutulile wo nokuli Kalunga ye mwene — shi na ko nasha nomanna ngoka a gandja pashikumithalonga. (Numeri 16:41; 21:5) Mbela Jehova okwa li a yematekwa kashona kokungungutula kwawo shi vulithe koluhondelo lwawo? Ehokololo lyOmbiimbeli otali ulike kutya aangungutuli oyendji oya dhipagwa komayoka. (Numeri 21:6) Oshikando oshikwawo sha tetekele, aangungutuli aanashipotha ye vulithe 14 700 oya li ya hanagulwa po. (Numeri 16:49) Onkee ano, inatu shonga nando eidhidhimiko lyaJehova mokwaahasimaneka omasiloshimpwiyu ge.
‘Inamu kala aangungutuli’
Iikala yAaisraeli kaya li tuu ya lunduluka! Sho ya mangululwa muEgipiti nokupitithwa mEfuta Etiligane oya li yi imbile Jehova taye mu hambelele omolwolupandu. (Eksodus 15:1-21) Ihe molwaashoka kaya li ye na onkalamwenyo yuuzeko pethimbo ya li mombuga nomolwuumbanda wokutila Aakaanana, oya li ya kanitha olupandu lwawo e taya tameke okukala inaaya gwanenwa. Pehala lyokutsikila okukala nolupandu lwokupandula Kalunga sho e ya mangulula muupika, oya li taye mu pe uusama kutya okwe ya ekelahi. Eeno, okungungutula kwawo okwa li taku ulike kutya kaya li ye na olupandu omolwomasiloshimpwiyu gaJehova. Nomolwaashoka Jehova a li a popi a ti: “Sigo uunake aantu mbaka aawinayi taa tsikile okutamaneka ndje?” — Numeri 14:27; 21:5.
it-2-E ep. 719, okat. 4
Okunyenyeta
Okungungutula. Okungungutula ohaku teya aantu omukumo nohaku ya teya po. Aaisraeli sho opo owala ya zi muEgipiti, oya li ya ngungutulile Jehova, taya gandja uusama kewiliko ndyoka a tula po ta longitha aapiya ye Moses naAaron. (Eks 16:2, 7) Konima okunyenyeta kwawo okwa teya Moses omukumo e ta pula a se. (Num 11:13-15) Okungungutula otaku vulu okweetela oshiponga ngoka te ku ningi. Jehova okwa li a tala ko iinima mbyoka tayi popiwa kwaamboka ya li taya ngungutula kombinga yaMoses kutya oya li taya ngungutula ye li ompinge newiliko ndyoka Oye mwene e li tula po. (Num 14:26-30) Oyendji oya kanitha oomwenyo dhawo omolwokugandja uusama.
Omaliko gomOmbiimbeli
it-2-E ep. 309
Omanna
Nkene ga li ga tya. ‘Omanna oga li ga fa oombuto oonshona oontokeleshunga’ noga li ga “fa” eka lyokomuti. Oga li ge na omulyo gwa fa “gwuumbisikiti womagadhi goonyushi.” Ngele ga tsuwa koshini, oga li haga fulukithwa nenge ga andwe omakaka e taga mbakwa. — Eks 16:23, 31; Num 11:7, 8.
22-28 MAALITSA
OMALIKO OKUZA MOOHAPU DHAKALUNGA | NUMERI 13–14
“Nkene eitaalo hali tu ningitha tu kale tu na omukumo”
Uulaadhi mboka hawu etithwa keitaalo nosho wo ketilokalunga
Ihe nonando ongawo, oondaadhi mbali dhomudho, Josua naKaleb, odha li dha halelela okuya mEvi lyEuvaneko. Odha popi shi na ko nasha nAakanaan dha ti: “Otatu ya sindi nuupu. Omuwa oku li pamwe natse nokwa sindi iikalunga mbyoka tayi ya gamene, ano inamu tila.” (Numeri 14:9) Mbela Josua naKaleb oya li owala ye na omukumo nokaapu na etompelo lyasha? Hasho nandonando! Yo nosho wo oshigwana ashihe, oya li ya mono nkene Jehova a li a sitha ohoni Egipiti oshinankondo nosho wo iikalunga yasho okupitila mOmageelo Omulongo. Oya li wo ya mono sho Jehova a li a undulile Farao naakwiita ye mEfuta Etiligane. (Episalomi 136:15) Osha yela kutya oondaadhi omulongo nosho wo mboka ya li ya nwethwa mo kudho kaya li ye na etompelo lyokukala ya tila. Jehova okwa popi ta ulike okuyemata kwe noonkondo, a ti: “Sigo uunake taa tindi okwiinekela ndje, nando onda longa iikumithalonga mokati kawo?” — Numeri 14:11.
Jehova okwa li a popi kutya Aaisraeli oya li ya tila omolwokwaaneitaalo kwawo. Eitaalo nuulaadhi oya pambathana thiluthilu, nomolwaashono omuyapostoli Johannes a li a nyola shi na ko nasha negongalo lyopaKriste nosho wo nonkalonawa yalyo yopambepo a ti: “Esindano ndyoka tatu sindi nalyo uuyuni, olyo eitaalo lyetu.” (1 Johannes 5:4) Kunena, Oonzapo dhaJehova dhi vule pomamiliyona gahamano, aagundjuka naanamimvo, ndhoka dhi na uukolele naandhoka kaadhi na uukolele, otadhi uvitha onkundana ombwanawa yUukwaniilwa muuyuni awuhe molwaashoka odhi na eitaalo lya fa lyaJosua naKaleb. Kapu na nando omutondi a vulu okumweneka ongundu ndjoka yaakwiita yopathaneko aanankondo naalaadhi. — Aaroma 8:31.
Omaliko gomOmbiimbeli
it-1-E ep. 740
Evi ndyoka Kalunga a li a pe Aaisraeli
EVI ndyoka Kalunga a li a pe Aaisraeli olya li ewanawa shili. Sho Moses a tumu oondaadhi dhi ka tale Evi ndyoka lyEuvaneko dho dhi ka kuthe mo iiyimati, sho dha galuka odhe etelele ko oonkwiyu, oondunga dhomugranati nehila lyomandjembele, ndyoka lya li enene noonkondo lya humbatwa komutenge kaalumentu yaali ye li inda! Nonando oya li ya tila molwaashoka kaaye na eitaalo, oya gandja ehokololo lyaashoka ya mono: Evi ndyoka olya “tondoka shili omahini nomagadhi goonyushi.” — Num 13:23, 27.
29 MAALITSA–4 APILILI
OMALIKO OKUZA MOOHAPU DHAKALUNGA | NUMERI 15–16
“Kotokela uuntsa nokwiinekela mungoye mwene”
Jehova oku ku shi ngaa?
Ihe manga oshigwana shaIsraeli shi li mondjila shu uka kEvi lyEuvaneko, Kora okwa li e wete pu na uupyakadhi kombinga yankene tashi wilikwa kuKalunga. Opo nduno aalumentu 250 aawiliki ya simana oya li ya gama kombinga ye nonkambadhala yoku eta po elunduluko. Kora nosho wo yalwe oye na okukala ya li ye na uushili kutya oye na ekwatathano ewanawa naJehova. Oya lombwele Moses ya ti: “Omwa pitilila unene! Iilyo ayihe yegongalo oyOMUWA, nOMUWA oku li pamwe natse atuhe.” (Num. 16:1-3) Mbyoka kaya li tuu iikala yuuntsa noyeinenepeko ya pitilila! Moses okwe ya lombwele a ti: “OMUWA ota ka ulika, olye ngoka gwe.” (Lesha Numeri 16:5.) Esiku lya landula Kora nosho wo ayehe mboka ya li taye mu ambidhidha muunashipotha we oya dhipagwa. — Num. 16:31-35.
Jehova oku ku shi ngaa?
Moses naKora oya li ya katuka momikalo dha yoolokathana noonkondo ngele tashi ya pokusimaneka elongekidho nomatokolo gaJehova. Oonkatu dhawo odha li dha ningitha Jehova e ya tale ko momikalo dha yoolokathana. Kora okwa li Omulevi gwoludhi lwAakwakehat, nokwa li e na uuthembahenda owundji, mboka wa li wa kwatela mo okumona nkene Jehova a hupitha oshigwana she mEfuta Etiligane, okwa li wo a longithwa a pangule Aaisraeli mboka ya tsu ondumbo naJehova pOndundu Sinai, nokwa li a dhana onkandangala mokuhumbata oshikethahangano. (Eks. 32:26-29; Num. 3:30, 31, KB) Osha yela kutya okwa kala omudhiginini uule womimvo odhindji nokwa li a simanekwa kAaisraeli oyendji.
Omaliko gomOmbiimbeli
w98 9/1 ep. 20, okat. 1-2
Sa oshimpwiyu wu pitithe iinima ya simana komeho!
Jehova okwa li a tala ko oshikoya shika sha kwata miiti. Ombiimbeli otayi ti: “Omuwa okwa ti kuMoses: ‘Omulumentu ngoka oku na okudhipagwa.’” (Numeri 15:35) Omolwashike Jehova a li a tala ko shoka sha ningwa komulumentu nguka kutya osha kwata miiti?
Oshigwana osha li shi na omasiku gahamano moka tashi vulu okutyaya iikuni nosho wo okupongolola po oompumbwe dhasho dhi na ko nasha niikulya, iikutu nosho wo omahala gokukala. Esiku etiheyali osha li shi na oku li longitha moompumbwe dhasho dhopambepo. Nando kasha li sha puka okutyaya iikuni, osha li sha puka okulongitha ethimbo ndyoka lya li li na okulongithwa mokulongela Jehova. Ihe nonando Aakriste kaye li kohi yOmpango yaMoses, mbela kunena oshiningwanima shika itashi tu longo oshiilongomwa oshiwanawa shokupititha iinima mbyoka ya simana komeho? — Aafilippi 1:10.
5-11 APILILI
OMALIKO OKUZA MOOHAPU DHAKALUNGA | NUMERI 17–19
‘Ongame mwene uuthiga woye’
Mbela owe etha ngaa Jehova a kale oshipewa shoye?
Dhiladhila owala kAalevi mboka ya li kaaye na oshitopolwa shevi shoka shi li uuthiga wawo. Molwaashoka oya li ya lenga unene elongelokalunga lya yogoka, ohaya kala yi inekela muJehova ngele tashi ya piipumbiwa yawo molwaashoka okwa li e ya lombwele a ti: “Ongame mwene oshipewa shoye.” (Num. 18:20) Nonando ihatu longo motempeli yo yene ngaashi aasaaseri nAalevi ya li ya ningi, otatu vulu oku ya holela mokukala neinekelo kutya Jehova ote ke tu sila oshimpwiyu. Sho ehulilo tali hedha popepi, otu na okukala twi inekela kutya Jehova ote ke tu sila oshimpwiyu shi vulithe nale. — Eh. 13:17.
Jehova oye oshipewa shandje
Oshinakugwanithwa shoka osha li tashi ti shike kAalevi? Jehova okwa ti kutya oya li taya ka kala oshipewa she meityo ndyoka kutya pehala lyokupewa uuthiga wevi, oya li yi inekelelwa uuthembahenda woshilonga kaashi shi okuyelekwa nasha. “Uuyambi wOMUWA” owo wa li uuthiga wawo. (Jos. 18:7) Oohapu dhaNumeri 18:20 otadhi ulike kutya kaya li ya hepa painiwe. (Lesha Numeri 18:19, 21, 24.) Aalevi oya li ye na okupewa “iitimulongo ayihe muIsraeli, yi ninge uuthiga wawo molwiilonga mbyoka taa longo.” Oya li haya pewa oopelesenda 10 dhaashoka Aaisraeli ya likola miilikolomwa yawo nosho wo dhiimuna. Mepingathano naashoka, Aalevi oya li haya gandja oshitimulongo miinima mbyoka ya pewa, taya gandja “oshitopolwa oshiwanawa” opo ya ambidhidhe iilonga yuusaaseri. (Num. 18:25-29) Aasaaseri oya li wo ya pewa “iigandjwa ayihe iiyapuki” mbyoka Aaisraeli ya li ye eta kehala lyokulongela Kalunga. Iilyo yaasaaseri mbyoka oya li yi na omatompelo omawanawa okwiitaala kutya Jehova ote ke yi sila oshimpwiyu.
Omaliko gomOmbiimbeli
g02-E 6/8 ep. 14, okat. 2
Omongwa — Oshinimwa shi na ongushu
Omongwa ogwa li wo gwa ningi endhindhiliko lyoshinima tashi kalelele. Onkee mOmbiimbeli, ehangano tali kwatele kumwe olya li hali ithanwa ‘ehangano lyomongwa’ nolundji mboka ya li haye li ningi, oya li haya li pamwe nomongwa, opo ye li koleke. (Numeri 18:19, NW) Kohi yOmpango yaMoses, omongwa ogwa li hagu tulwa komayambo ngoka ga li haga tulwa koshiyambelo, tagu ulike kutya inaga ola nenge ga ninga nayi.
12-18 APILILI
OMALIKO OKUZA MOOHAPU DHAKALUNGA | NUMERI 20–21
“Kala wi ifupipika uuna to thiminikwa”
(Numeri 20:2-5) Mpoka ya yungu ontanda, kapwa li omeya, aantu noya gongalele Moses naAaron 3 noya tamanana ya ti: “Akutu, osha li oshihwepo, ando twa sile komeho getsalihangano pamwe nooyakwetu, sho ya yonukile po koshipala shOmuwa. 4 Omolwashike mwe tu etele mombuga muno? Otu sile mo niimuna yetu? 5 Omolwashike mwe tu tembudha mo muEgipiti mu tu ete meha ndino ewiwiwiwi noihamu mene nando osha? Mwaa na iilya nomwaa na oonkwiyu, mwaa na omandjembele nomwaa na oondunga dhomigranati. Nokuli kamu na omeya gokunwa!”
Kala omwiifupipiki, opo wu nyanyudhe Jehova
Otatu ka yanda okuninga omapuko. Dhiladhila ishewe kombinga yaMoses. Okwa kala omwiifupipiki uule womimvo odhindji nokwa nyanyudha Jehova. Ihe pehulilo lyomimvo 40 ndhoka Aaisraeli ya kala mombuga, Moses ka li a ulike eifupipiko. Omumwayinakadhona, ngoka tashi vulika oye unene a li e mu kwathele a hupe muEgipiti, okwa adhika owala opo a si e ta fumvikwa muKadesh. Aaisraeli nayo oya li ishewe taya nyenyeta kutya itaya silwa nawa oshimpwiyu. Oshikando shika oya tameke taya “tamanana” naMoses, sho kaaye na omeya gokunwa. Nonando oya li ya mono iikumithalonga ayihe mbyoka Jehova a ningi okupitila muMoses nosho wo nkene Moses a kala noku ya kwatela komeho nawa, aantu oya li taya nyenyeta. Inaya nyenyeta owala kombinga yomeya, ihe nokombinga wo yaMoses, a fa oye a li e na epuko, sho ya li ye na enota. — Num. 20:1-5, 9-11.
Kala omwiifupipiki, opo wu nyanyudhe Jehova
Moses okwa geye noonkondo e ta kanitha ombili. Pehala lyokulombwela emanya ngaashi a lombwelwa kuJehova, Moses okwa popi naantu nonyati, e ti isimanekitha ye mwene. Opo ihe okwa dhenge emanya lwaali nomwa tsipuka omeya ogendji. Uuntsa nongeyo, oye mu ningitha a ninge epuko lya kwata miiti. (Eps. 106:32, 33) Moses ka li a pitikwa a ye mEvi lyEuvaneko, omolwuuntsa mboka a li a ulike. — Num. 20:12.
Moshiholelwa shaMoses, otatu ilongo mo iiyilongomwa ya simana. Shotango, aluhe otu na okuninga ngaashi tatu vulu tu kale aaifupipiki. Ngele otwa kala inaatu shi ninga, otashi vulika tu kwatwe kuuntsa, e tawu tu ningitha tu popye notu ninge iinima yaa na omutse nandungu. Oshitiyali, ngele otwa kala twa gwililwa po, otatu vulu okukanitha eifupipiko. Onkee ano, otu na okukambadhala okukala aaifupipiki, nonando otatu li tatu pi.
w09-E 9/1 ep. 19, okat. 5
Omupanguli ngoka ha ningi aluhe shoka shi li mondjila
Shotango, Kalunga ina lombwela Moses a popye noshigwana, noku shi ithane aatangalali. Oshitiyali, Moses naAaron oya ndopa okusimaneka Kalunga. Kalunga okwa ti: ‘Inamu simaneka ndje.’ (Ovelise 12, OB-1954) Sho Moses a ti ‘natu mu kuthile omeya memanya ndika?,’ okwa popi a fa e wete kutya ye naAaron oyo ya li taya ka gandja omeya ngoka gopashikumithalonga, ihe haKalunga. Oshititatu, egeelo ndyoka Moses naAaron ya li ya pewa, olya li lya faathana nomageelo ngoka Kalunga a li a gandja monakuziwa. Kalunga okwa adhikile opo a keelele oshigwana oshinashipotha kaashi ye mevi lyaKaanan, na osho naanaa a ningile Moses naAaron. (Numeri 14:22, 23) Oshitine, Moses naAaron oya li aawiliki yoshigwana shaIsraeli. Mboka ye na iinakugwanithwa oyindji otaya ka pulwa oshindji kuKalunga. — Lukas 12:48.
Omaliko gomOmbiimbeli
Tala ko aankundi ngaashi Jehova he ya tala ko?
Iikando ayihe mbyoka, Jehova okwa li ta vulu okugeela Aaron moompadhi oontalala. Ihe okwa mono kutya Aaron ke shi omukolokoshi. Aaron otapeya a ningi omapuko ngoka molwaashoka okwe etha oonkalo nenwethomo kuyalwe li mu pugumithe mo mondjila yu uka. Ihe okwa li a zimine omapuko ge nokwa taamba ko epukululo ndyoka a pewa kuJehova. (Eks. 32:26; Num. 12:11; 20:23-27) Jehova okwa mono kutya Aaron oku na eitaalo nokwi iyela ombedhi. Konima yomathelemimvo, Aaron noluvalo lwe oya dhimbulukiwa natango kutya oya li aatilikalunga. — Eps. 115:10-12; 135:19, 20.
19-25 APILILI
OMALIKO OKUZA MOOHAPU DHAKALUNGA | NUMERI 22–24
“Jehova okwa lundululile etulomutima meyambeko”
bt-KY ep. 53, okat. 5
Oya li yu ‘uvitha elaka etoye tali popi Jesus’
Ngaashi methelemumvo lyotango, nokunena omahepeko ihaga imbi oshigwana shaKalunga shi uvithe. Odhoshili kutya Aakriste ohaya thiminikwa iikando oyindji ya tembuke, tashi vulika ya tulwe mondholongo nenge ya falwe koshilongo shilwe, ihe etembu lya tya ngawo ohali kwathele owala opo etumwalaka lyUukwaniilwa li uvithilwe aantu mboka ye li komahala ngoka. Pashiholelwa, pethimbo lyIita Iitiyali yUuyuni, Oonzapo dhaJehova odha li dha vulu okugandja uunzapo uundhindhilikwedhi nonando odha li dhe edhililwa mookamba dhoonkwatwa dhaNazi. Omujuda gumwe ngoka a li a tsakaneke Oonzapo mookamba dhaNazi okwa ti: “Uulaadhi woonkwatwa Oonzapo dhaJehova owa li wa tompo ndje ndi itaale kutya eitaalo lyadho olya kankamena kOmanyolo, nomolwaashono nda ningi Onzapo.”
it-2-E ep. 291
Uugoya
Uugoya wokukala ompinge naJehova. Omuhunganeki Bileam okwa li a hala a ninge oshinima sha nika uugoya a hunganekele Aaisraeli uuwinayi, opo a pewe iimaliwa komukwaniilwa Balak gwAamoabi, ihe Jehova okwa yi mo olunyala nokwe mu keelele kee shi ninge. Omuyapostoli Petrus okwa nyola kombinga yaBileam a ti kutya “okasino ihaaka popi, oka popi ka fa omuntu noka mweneke iilonga yuugoya yomuhunganeki nguka.” Omuyapostoli ngoka okwa longitha oshitya shOshigreka paraphronia sho a popi uugoya waBileam, shoka tashi gandja eityo lyomuntu “a pwidhuka.” — 2Pet 2:15, 16; Num 22:26-31.
Omaliko gomOmbiimbeli
Omanenedhiladhilo okuza membo lyaNumeri
22:20-22 — Omolwashike ondjahi yaJehova ya hwamene Bileam? Jehova okwa li a lombwele omuprofeti Bileam kutya ke na okuthinga Aaisraeli. (Numeri 22:12) Ihe omuprofeti [ngoka] okwa yi pamwe naalumentu yaBalak e na lela elalakano okuthinga Aaisraeli. Bileam okwa li a hala okunyanyudha omukwaniilwa gwAamoab [nokupewa] ondjambi kuye. (2 Petrus 2:15, 16; Judas 11) Nokuli sho Bileam a li a ningithwa a yambeke Aaisraeli pehala lyoku ya thinga, okwa li a lalakanene okuhokiwa komukwaniilwa a tye kutya aakiintu mboka haya galikana Baal oye na okulongithwa okupukitha aalumentu Aaisraeli. (Numeri 31:15, 16) Onkee ano Kalunga okwa li a geyele omuprofeti Bileam molwolwiho lwe lunyanyalitha.
26 APILILI–2 MEI
OMALIKO OKUZA MOOHAPU DHAKALUNGA | NUMERI 25–26
“Omuntu gumwe ota vulu ngaa okweetela aantu yalwe uuwanawa?”
“Yandeni omilalo dha nyata”
OMUYULI GWOOHI ohayi pehala mpoka ta vulu okuyula nuupu oohi ndhoka a hala. Oha hogolola uukulya mboka ta tula kokandjolo, e te ka umbile momeya. Oha kala a tegelela neidhidhimiko oohi dhi lye. Uuna ohi ya li ko e tayi kwatwa, ohe yi hili mo momeya.
Momukalo gwa faathana, aantu nayo ohaya vulu okuyulwa. Pashiholelwa, sho Aaisraeli ya li pokuthika mEvi lyEuvaneko, oya yungu ontanda molushandja lwaMoab. Omukwaniilwa gwaMoab, okwa li u uvanekele omulumentu gwedhina Bileam kutya ote mu pe iimaliwa oyindji, ngele okwa thingi Aaisraeli. Bileam okwa mono po omukalo moka Aaisraeli ya li taya vulu okwiiyetela yo yene omupya. Okwa hogolola nuukeka shoka te ke ya yula nasho. Okwa tumu aakiintu aagundjuka ya ye montanda yAaisraeli, ya ka heke aalumentu Aaisraeli ya lale nayo. — Numeri 22:1-7; 31:15, 16; Ehololo 2:14.
“Yandeni omilalo dha nyata”
Omolwashike Aaisraeli oyendji ya li ya pukithwa kuBileam? Oya li owala taya dhiladhila komahalo gawo e taya dhimbwa ashihe shoka Jehova e ya ningila. Oya li ye na omatompelo ogendji gokukala aadhiginini kuKalunga. Okwa li e ya mangulula muupika muEgipiti. Okwe ya palutha wo mombuga nokwe ya thikitha nombili poongamba dhEvi lyEuvaneko. (Aahebeli 3:12) Ihe nonando ongawo, aalumentu Aaisraeli oya li ya hekelwa momilalo dha nyata. Omuyapostoli Paulus okwa nyola a ti: “Inatu yeni momilalo dha nyata, ngaashi yamwe yomuyo ya ningi; onkee oya yonwa po.” — 1 Aakorinto 10:8, yelekanitha NW.
Omaliko gomOmbiimbeli
it-1-E ep. 359, okat. 1-2
Ongamba
Onkee otashi ulike kutya omazimo oga li haga topolelwa evi shi ikolelela kiinima iyali: koshizemo oshihogololitho uuna shu umbwa, nosho wo kutya ezimo oli thike peni. Oshihogololitho osha li hashi vulu okuulika kutya ezimo kehe nali pewe oshitopolwa shi li peni, kungawo osha li hashi ulike kutya ezimo nali pewe evi lini nenge li ka pewe palwe, ngaashi kuumbangalantu, kuumbugantu, kuuzilo nenge kuuninginino, kolusilu lwokomunkulofuta nenge moshitopolwa shoondundu. Jehova oye a li ha utha oshihogololitho, naashoka osha li hashi keelele omazimo kaaga tsilathane ondumbo nenge ga nyenyete. (Omayel 16:33) Kalunga okwa li wo a gandja ewiliko momukalo ngoka opo onkalo yezimo kehe yi tse kumwe nehunganeko ndyoka lya nwethwa mo lya li lya popiwa kutatekulululwa Jakob sho e li pokusa li li muGenesis 49:1-33.
Ngele oshihogololitho shu ulike kutya ezimo lyontumba nali ye peni, opo nduno kwa li haku talika kutya nali pewe evi li thike peni taku talika koshinima oshitiyali: uunene wezimo ndyoka. “Topoleni evi pamazimo nopamaludhi geni mokuumba iihogololitho. Oludhi olunene nalu pewe oshitopolwa oshinene, noludhi olushona oshitopolwa oshishona.” (Num 33:54) Etokolo lyoshihogololitho kutya ezimo lyontumba nali kale peni kalya li hali lundululwa, ihe uunene wevi ndyoka lya pewa owa li hawu lundululwa. Nomolwaashoka sho oshitopolwa shaJuda sha monika kutya oshinene unene, ombinga yasho yimwe oya li ya pewa ezimo lyaSimeon. — Jos 19:9.