Nkene ohole hayi tu kwathele tu sinde uumbanda

1. Uumbanda wumwe wuni aantu haya kala ye na?

DHILADHILA koonkalo ndhika moka Oonzapo dhaJehova dhimwe dha li dhi iyadha. Nestor nomukulukadhi gwe Maria, oya li ya hala oku ka longa koshitopolwa shoka ku na ompumbwe onene.b Ihe opo ye shi ninge, oya li ye na okwiilonga okukala ye na iimaliwa iishona. Nonando ongawo, oya li ya tila kutya itaya ka kala shili ya nyanyukwa, ngele kaye na iimaliwa oyindji. Sho Biniam a ningi Onzapo yaJehova moshilongo moka iilonga yetu yi indikwa, okwa li e shi mono kutya e li gumwe gwomoshigwana shaKalunga, naye ota ka hepekwa. Oshinima shoka osha li she mu tilitha. Ihe okwa li unene a tila kutya aakwanezimo ye otaye ki inyenga ngiini ngele oya uvu kombinga yelongelokalunga lye epe. Valérie okwa li a monika okankela ya kwata miiti nokwa li a kondjo nuudhigu a mone ndohotola ngoka te mu tanda, ihe ota ka simaneka omakotampango gomOmbiimbeli ge na ko nasha nombinzi. Onkee, oku na okukala a li a tila kutya otashi vulika a se.

2. Omolwashike twa pumbwa okulonga nuudhiginini tu sinde uumbanda wetu?

² Mbela nangoye opu na ethimbo limwe wa li wa tila? Oyendji yomutse opu na oshikando shimwe twa li twa tila. Ihe ngele ihatu ilongo okupangela uumbanda wetu, otashi vulika tu ninge omatokolo omawinayi ngoka taga vulu okunkundipaleka lela ekwatathano lyetu naJehova. Shoka Satana osho a hala. Oha kambadhala wo okulongitha uumbanda wetu tu yone oompango dhaJehova, mwa kwatelwa oshipango shokuuvitha onkundana ombwanawa. (Eh. 12:17) Satana omukolokoshi, ke na ohenda, ye oku na oonkondo. Ihe oto vulu okwiigamena kuye. Ngiini mbela?

3. Oshike tashi tu kwathele tu sinde uumbanda wetu?

³ Uuna twa tompwa kutya Jehova oku tu hole, ano kutya oku li kombinga yetu, Satana ite ke tu tilitha. (Eps. 118:6) Pashiholelwa, omunyoli gwEpisalomi 118 okwa li moonkalo dhimwe oondhigu noonkondo. Okwa li e na aatondi oyendji, mwa kwatelwa naamboka ye na oondondo dhopombanda (ovelise 9, 10). Omathimbo gamwe, okwa li a thiminikwa noonkondo (ovelise 13). Okwa li wo a geelwa sha kwata miiti kuJehova (ovelise 18). Ihe Omupisalomi ngoka okwa li i imbi a ti: “Itandi tila sha.” Oshike she mu ningitha a kale e uvite a gamenwa? Okwa li e shi kutya nonando Jehova okwe mu pa uutekuvuliko, He ngoka gwomegulu okwa li e mu hole natango noonkondo. Omupisalomi ngoka okwa li a tompwa kutya, kutya nduno oku kale monkalo ya tya ngiini, Kalunga ke omunahole okwi ilongekidha aluhe oku mu kwathela. — Eps. 118:29.

4. Otatu ka vula okusinda uumbanda wuni ngele otwa tompwa kutya Jehova oku tu hole?

⁴ Otwa pumbwa okukala twa tompwa kutya Jehova oku tu hole pauhandimwe. Ngele otwa tompwa momukalo ngoka, otashi ke tu kwathela tu sinde uumbanda wopatatu, ano, (1) uumbanda wokukala twa tila ngele otatu ka vula okusila oshimpwiyu uukwanegumbo wetu, (2) uumbanda wokutila aantu, nosho wo (3) uumbanda wokutila eso. Aamwatate naamwameme mboka ya tumbulwa mokatendo kotango oya li ya vulu okusinda uumbanda wawo, molwaashoka oya li ya tompwa kutya Kalunga oku ya hole.

OKUKALA TWA TILA NGELE OTATU KA VULA NGAA OKUSILA OSHIMPWIYU OMAUKWANEGUMBO GETU

5. Oonkalo dhini tashi vulika dhi ningithe omutse gwuukwanegumbo gu kale tagu ipula unene? (Tala ethano lyokombanda.)

⁵ Omutse gwuukwanegumbo Omukriste ohagu tala ko oshinakugwanithwa shokusila oshimpwiyu palutu uukwanegumbo wago ku li oshinima sha kwata miiti. (1 Tim. 5:8) Ngele owu li omutse gwuukwanegumbo, otashi vulika pethimbo lyomukithi gwekomba gwo-COVID-19 wa li wu wete kutya otashi vulika lela wu kanithe iilonga yoye. Otashi vulika wa li wa limbililwa ngele oto ka vula ngaa okupalutha uukwanegumbo woye nokufutila egumbo moka hamu zi. Otashi vulika wo wa li wa tila kutya ngele owa kanitha iilonga yoye, ito ka mona po yilwe. Nenge ngaashi Nestor naMaría mboka ya tumbulwa metetekelo, wa li to ongaonga okuninga omalunduluko ngele tashi ya piilonga yoye yokwiikongela omboloto, oshoka omwa li mu wete kutya itamu ka vula okuhupa noshimaliwa oshishona. Satana okwa pondola mokuningitha aantu ye ethe po okulongela Jehova molwaashoka ya li ye uvite ngaaka.

6. Satana oha kambadhala oku tu itaalitha shike?

⁶ Satana oha kambadhala oku tu itaalitha kutya Jehova ke na ko nasha natse pauhandimwe, ke tu hole nosho wo kutya ite ke tu kwathela tu sile oshimpwiyu omaukwanegumbo getu. Omolwoshinima shoka, otashi vulika tu thike pehulithodhiladhilo kutya otu na okuninga kehe shimwe opo tu kaleke po iilonga yetu, tashi vulika nokuli tu ipwililikile omithikampango dhOmbiimbeli.

7. Jesus okwe tu shilipaleka shike?

⁷ Jesus, ngoka e shi nawa He e vule kehe gumwe, okwe tu shilipaleka kutya Kalunga ketu “oku shi shi nale shoka [twa] pumbwa, manga [inaatu] mu indila.” (Mat. 6:8) Jesus oku shi wo kutya Jehova okwi ilongekidha oku tu pa shoka twa pumbwa. Tu li Aakriste, otu li iilyo yuukwanegumbo Jehova. Molwaashoka oye Omutse gwuukwanegumbo wetu, otatu vulu okukala nuushili kutya ota ka ninga shoka a lombwela omitse dhomaukwanegumbo dhi ninge muTimoteus gwotango 5:8.

8. (a) Oshike tashi tu kwathela tu sinde uumbanda wokukala twa tila ngele otatu ka vula ngaa okusila oshimpwiyu uukwanegumbo wetu? (Mateus 6:31-33) (b) Ongiini tatu vulu okuholela aaihokani mboka ya ulikwa methano taya li pamwe nomumwameme?

⁸ Ngele otwa tompwa kutya Jehova oku tu hole nosho wo kutya oku hole uukwanegumbo wetu, otatu vulu okukala tu na uushili kutya ote ke tu pa shoka twa pumbwa. (Lesha Mateus 6:31-33.) Jehova okwa hala oku tu sila oshimpwiyu noku li Omugandji omunahole. Sho a shiti evi, okwa ningi oshindji shi vulithe poku tu pa owala shoka twa pumbwa, opo tu kale nomwenyo. Oku udhitha evi niinima oyindji mbyoka hayi tu etele enyanyu. (Gen. 2:9) Nonando omathimbo gamwe ohatu kala owala tu na shoka twa pumbwa, otu na aluhe okudhimbulukwa kutya Jehova oye te tu sile oshimpwiyu. (Mat. 6:11) Otu na wo aluhe okudhimbulukwa kutya Jehova ote ke tu pa oshindji shi vulithe pukehe shimwe shoka twa thiga po, nomonakuyiwa ote ke tu pa omwenyo gwaaluhe. Shoka osho Nestor naMaría ya ndhindhilike. — Jes. 65:21, 22.

9. Oshike tatu vulu okwiilonga koshiholelwa shaNestor naMaría?

⁹ Nestor naMaría oya li ye na egumbo niilonga iiwanawa moColombia. Oya ti: “Otwa dhiladhila kombinga yokukaleka onkalamwenyo yetu paunathangwa nokutamununa mo uukalele wetu, ihe otwa li twa tila kutya itatu ka kala twa nyanyukwa ngele otwa kala tu na iimaliwa iishona.” Oshike she ya kwathele ya sinde uumbanda wawo? Oya dhiladhila komikalo odhindji moka Jehova e ya ulukila ohole. Molwaashoka oya li ya tompwa kutya ote ke ya sila oshimpwiyu, oye etha po iilonga yawo hayi futu nawa. Oya landitha po egumbo lyawo, e taya tembukile koshitopolwa shilwe moColombia hoka kwa li ku na ompumbwe onene yaauvithi yUukwaniilwa. Ohaya kala yu uvite ngiini kombinga yetokolo lyawo ndyoka ya ninga? Nestor okwa ti: “Otwa gwanithilwa oohapu ndhoka dhi li muMateus 6:33. Ohatu kala aluhe tu na shoka twa pumbwa. Nongashingeyi otwa nyanyukwa lela.”

OKUTILA AANTU

10. Omolwashike aantu haya tila aantu ooyakwawo?

¹⁰ Okuza sho Adam naEva ya tukulile Jehova uunashipotha, aantu oya kala nokuhepeka aantu ooyakwawo. (Omuuv. 8:9) Pashiholelwa, aantu ohaya longitha nayi oonkondopangelo dhawo, aakolokoshi ohaya ningi iinima iiwinayi noonkondo, aanasikola mboka haya hindi ohaya tuku nohaya ningile aanasikola ooyakwawo omatilitho, naantu yamwe ohaya ungaunga nayi noonkondo niilyo yomaukwanegumbo gawo. Onkee itashi kumitha sho aantu haya tila aantu ooyakwawo! Satana oha longitha ngiini uumbanda wokutila aantu?

11-12. Satana oha longitha ngiini uumbanda wokutila aantu e tu ningithe iinima ya puka?

¹¹ Satana oha kambadhala oku tu ningitha tu kale twa tila aantu e tatu etha po okuuvitha nokuninga iinima yilwe mbyoka Jehova te tu lombwele tu ninge. Oha longitha omapangelo gi indike iilonga yetu yokuuvitha noge tu hepeke. (Luk. 21:12; Eh. 2:10) Aantu oyendji muuyuni waSatana ohaya taandeleke uuyelele wa puka niifundja kombinga yOonzapo dhaJehova. Aantu mboka haya itaale iifundja mbyoka ohashi vulika ye tu sheke nenge ye tu ponokele e taye tu dhenge. (Mat. 10:36) Mbela otu na okukala twa kuminwa iinima mbyoka Satana ha ningi? Aawe. Nomethelemumvo lyotango okwa ninga iinima ya tya ngaaka. — Iil. 5:27, 28, 40.

¹² Uumbanda wokukala twa tila tu patanekwe komapangelo hawo owala oshilongitho Satana ha longitha. Aantu yamwe ohaya kala ya tila kutya aakwanezimo yawo otaye ke ya tila ngiini ngele ya ningi Oonzapo. Omathimbo gamwe ohaya kala unene ya tila oshinima shoka shi vulithe pokudhengwa. Oye hole aakwanezimo yawo noonkondo noya hala ya tseye Jehova noya kale ye mu hole. Ohashi ya uvitha nayi uuna ya uvu aakwanezimo yawo taya popile muuwinayi nonondhino Kalunga kashili noshigwana she. Ihe poompito dhimwe, aakwanezimo yamwe mboka ya li haye ya pataneke lwanima oye ke ya moshili. Ihe natu tye andola aakwanezimo yetu oya tameke okukala kaaye na ko nasha natse omolweitaalo lyetu epe? Otatu ka ninga po shike?

13. Ngele otwa kala twa tompwa kutya Kalunga oku tu hole, otashi tu kwathele ngiini uuna tatu patanekwa kaakwanezimo yetu? (Episalomi 27:10)

¹³ Oohapu ndhoka dhi li mEpisalomi 27:10 (lesha), otadhi vulu oku tu hekeleka. Uuna twa dhimbulukwa kutya Jehova oku tu hole shi thike peni, ohatu kala tu uvite twa gamenwa ngele aakwanezimo yetu otaye tu pataneke. Ohatu kala wo tu na omukumo kutya ote ke tu pa ondjambi ngele otwi idhidhimike. Jehova ote ke tu sila oshimpwiyu palutu, pamaiyuvo, note ke tu kwathela tu kale popepi naye shi vulithe omuntu kehe! Shoka osho Biniam ngoka a popiwa metetekelo a ningilwa.

14. Oshike to vulu okwiilonga koshiholelwa shaBiniam?

¹⁴ Biniam okwa ningi Onzapo yaJehova nonando okwa li e shi kutya ota ka patanekwa noonkondo. Molwaashoka okwa li e shi kutya Jehova oku mu hole, oshe mu kwathele a sinde uumbanda wokutila aantu. Okwa ti: “Onda li nda patanekwa unene noonkondo shi vulithe pwaashoka nda li tandi dhiladhila. Ihe nonando onda li nda tila okuhepekwa kepangelo, shoka unene sha li sha tilitha ndje, okupatanekwa kaakwanezimo. Onda li nda itala kutya etokolo lyandje lyokuninga Onzapo yaJehova otali ka yemateka tate ngoka a li kee shi Onzapo nosho wo kutya aakwanezimo yandje itaya ka simaneka ndje we.” Ihe Biniam okwa li a tompwa kutya Jehova oha sile aluhe oshimpwiyu mboka ye mu hole. Biniam okwa ti: “Onda dhiladhila kunkene Jehova a kwathela yalwe yi idhidhimikile uuhupilo tawu nyangwanyangwa, okatongo nosho wo okuponokelwa koongundu dhaantu. Onda li ndi shi kutya ngele onda kala omudhiginini kuJehova, ota ka yambeka ndje. Sho nda kala handi kwatwa po iikando oyindji nokuli nokuhepekwa, onda li nde shi mono kutya Jehova ohe tu kwathele pethimbo tu na ompumbwe, ngele otwa kala aadhiginini kuye.” Jehova okwa kala onga He yaBiniam, naamwatate naamwameme oye oshi ulike kutya oye li lela aakwanezimo ye yashili.

OKUTILA ESO

15. Omolwashike shi shi okuuviwa ko sho hatu tila eso?

¹⁵ Ombiimbeli otayi popi kutya eso omutondi. (1 Kor. 15:25, 26) Otashi vulika tu kale tatu ipula unene kombinga yeso, unene tuu ngele tse nenge omuholike gwetu ota ehamenene. Omolwashike hatu tila eso? Omolwaashoka Jehova okwe tu shita nehalo lyokukala nomwenyo sigo aluhe. (Omuuv. 3:11) Ihe uumbanda wokutila eso otawu vulu oku tu kwathela tu igamene. Pashiholelwa, otawu vulu oku tu inyengitha tu lye iikulya mbyoka yi na uukolele, tu ninge omadhewo gopalutu, okukonga ekwatho koondohotola nomiti ngele osha pumbiwa, nokuyanda okutula oomwenyo dhetu moshiponga.

16. Satana oha kambadhala ngiini okulongitha uumbanda wetu wokutila eso?

¹⁶ Satana oku shi kutya otwa lenga omwenyo. Ihe nonando ongawo, oha ti kutya otatu vulu okweetha po kehe shimwe, nokuli nekwatathano lyetu naJehova, opo tu kale tu na omwenyo. (Job 2:4, 5) Satana ina puka tuu! Ihe molwaashoka oye ha “eta eso,” oha kambadhala okulongitha uumbanda wetu wokutila eso, opo e tu ningithe tu ethe po okulongela Jehova. (Heb. 2:14, 15) Poompito dhimwe, Satana oha longitha aalanduli ye ya tilithe aalongeli yaJehova neso ngele inaya hala okweetha po eitaalo lyawo. Shimwe ishewe, oha vulu okulongitha ompumbwe yepango lyopaunamiti lye endelela e tu ningithe tu ethe po okuvulika kuJehova. Oondohotola dhopaunamiti nenge aakwanezimo yetu mboka kaaye shi Oonzapo otashi vulika ye tu thiminike tu taambe ko okutulwa ombinzi, oshinima shoka shi li lela eyono lya kwata miiti kuKalunga. Nenge gumwe otashi vulika a kambadhale oku tu ladhipika tu taambe ko epango lyopaunamiti ndyoka kaali li metsokumwe nomithikampango dhOmbiimbeli.

17. Metsokumwe nAaroma 8:37-39, omolwashike inaatu pumbwa okutila eso?

¹⁷ Nonando ihatu kala twa hala okusa, otu shi kutya Jehova ota tsikile okukala e tu hole nonando otu se. (Lesha Aaroma 8:37-39.) Uuna ookuume kaJehova ya si, ohe ya kaleke momadhiladhilo ya fa ye na omwenyo. (Luk. 20:37, 38) Okwa halelela okuyumudha oonakusa. (Job 14:15) Jehova okwa futa ofuto onene opo tu ka ‘kale nomwenyo gwaaluhe.’ (Joh. 3:16) Otu shi kutya Jehova oku tu hole noonkondo noku na ko nasha natse. Onkee pehala lyoku mu etha po uuna tatu ehama nenge tatu tilithwa neso, ohatu kala twi ikolelela muye e tu hekeleke, e tu pe uunongo noku tu nkondopaleke. Shoka osho naanaa Valérie nomusamane gwe ya ningi. — Eps. 41:3.

18. Oshike tatu vulu okwiilonga koshiholelwa shaValérie?

¹⁸ Sho Valérie a li e na omimvo 35, okwa li a monika okankela ya kwata miiti. Tala nkene ohole ye mu kwathele a sinde uumbanda wokutila eso. Okwa ti: “Sho nda monika okankela, ngame nomusamane gwandje otwa li twa haluka noonkondo. Onda li nda pumbwa okutandwa etando lya kwata miiti opo ndi hupe. Onda yi koondohotola odhindji ndhoka hadhi tanda, ihe odha tindi okutanda ndje nopwaa na okutulwa ombinzi. Onda li nda tila noonkondo, ihe metsokumwe nompango yaKalunga, kanda li nando tandi ka taamba ko okutulwa ombinzi! Monkalamwenyo yandje ayihe, Jehova oku ulika kutya oku hole ndje noonkondo. Ngashingeyi oyo ya li ompito yokuulika kutya ondi mu hole. Oshikando kehe tandi uvu onkundana ombwinayi [kombinga yuuvu wandje], ohashi ningitha ndje ndi kale nda tokola toko okunyanyudha Jehova, ihe haSatana. Osho ngaa nduno nda ka tandwa inaandi tulwa ombinzi. Nonando natango kandi na uukolele, Jehova okwa kala aluhe noku tu pa ekwatho ndyoka twa pumbwa. Pashiholelwa, pokugongala kwetu kwegongalo hoka kwa tetekele ehuliloshiwike moka nda ka monika okankela, otwa li twa konakona oshitopolwa ‘Nkene to vulu okwiidhidhimikila omaupyakadhi kunena.’c Oshitopolwa shoka osha li she tu hekeleke noonkondo. Ohatu shi lesha noku shi leshulula. Iitopolwa ngaashi mbyoka, okuuvitha nosho wo okukala pokugongala kwegongalo, oye tu kwathela nomusamane gwandje tu kale twa ngungumana notu ninge omatokolo omawanawa.”

NKENE TATU VULU OKUSINDA UUMBANDA MBOKA TU NA

19. Oshike tashi ka ningwa masiku?

¹⁹ Kekwatho lyaJehova, Aakriste ayehe yashili muuyuni oya vula okupita moonkalo oondhigu noya pondola lela mokukondjitha Ondiyapoli. (1 Pet. 5:8, 9) Nangoye oto vulu oku shi ninga. Masiku, Jehova ota ka longitha Jesus Kristus naapangeli pamwe naye ya “hanagule po iilonga yOmuhindadhi.” (1 Joh. 3:8) Konima yaashono, aantu mboka taya longele Kalunga ngashingeyi kombanda yevi itaya ka ‘tila sha, nokapu na shoka tashi ke ya halutha.’ (Jes. 54:14; Mika 4:4) Ihe manga ethimbo ndyoka inaali thika, otwa pumbwa okulonga nuudhiginini tu sinde uumbanda mboka tu na.

20. Oshike tashi tu kwathele tu sinde uumbanda mboka tu na?

²⁰ Natu tsikile okukoleka einekelo lyetu muushili mboka kutya Jehova oku tu hole nosho wo kutya oha gamene aapiya ye. Shoka tashi tu kwathele opo tu shi ninge, okutedhatedha nokupopya kombinga yankene Jehova a li a gamene aapiya ye monakuziwa. Shimwe ishewe, otwa pumbwa okukala hatu dhiladhila kunkene e tu kwathela pauhandimwe sho twa li tu li moonkalo oondhigu. Kekwatho lyaJehova, otatu vulu okusinda uumbanda mboka tu na! — Eps. 34:4.