Shoka Ombiimbeli ya popya kombinga yaashoka shi li mondjila naashoka sha puka otashi vulu shi li oku tu kwathela
Natu ka taleni koonkalo ne mono aantu omamiliyona ya ilongo kutya omayele gOmbiimbeli otaga longo noge shi okwiinekelwa.
1. Ondjokana
Aantu oye na omataloko ga yoolokathana shi na ko nasha nondjokana nosho wo shoka tashi etele aaihokani enyanyu.
OMBIIMBELI OTAYI TI: “Omulumentu kehe oku na okuhola omukiintu gwe, ngashika i ihole ye mwene, nomukiintu kehe oku na okusimaneka omulumentu gwe.” — Aaefeso 5:33.
SHA HALA KUTYA: Ondjokana elongekidho lya tulwa po kuKalunga, onkee oku shi shono sha pumbiwa opo aaihokani ya vule okukala ya nyanyukwa. (Markus 10:6-9) Aaihokani otaya ka kala ya nyanyukwa ngele oya gandja eitulomo kwaashono kehe gumwe ta vulu okuninga opo ya koleke ondjokana yawo, pehala lyokugandja eitulomo kuuwanawa wawo yene. Omusamane, ngoka e hole omukulukadhi gwe, ohe shi ulike momukalo mono ha ungaunga naye nohe mu sile oshimpwiyu. Omukulukadhi, ngoka a simaneka omusamane gwe, ote ke shi ulika momukalo moka ha popi noha ungaunga naye.
OMAYELE GOMBIIMBELI OHAGA LONGO: Quang naThi yokoVietnam oya li taya dhiladhila kutya kaye na esiku ya kale ya nyanyukwa mondjokana yawo. Quang ka li e na ohenda. Okwa ti: “Kanda li ndi na ko nasha nomaiyuvo gaThi, nonda li handi mu sitha ohoni.” Thi okwa li a hala okuteya ondjokana. Okwa ti: “Onda li ndi shi itandi vulu we okukala ndi inekela nonda simaneka omusamane gwandje.”
Mokweendela ko kwethimbo, Quang naThi oya ilongo shoka Ombiimbeli tayi longo noya tula miilonga omayele ngoka ge li mAaefeso 5:33 mondjokana yawo. Quang okwa ti: “Ovelise ndjika oya kwathela ndje ndi mone kutya onda pumbwa okukala omunahenda, nokuningitha Thi a kale e uvite e holike noku mu sila oshimpwiyu painiwe, palutu nosho wo pamaiyuvo. Sho nda ningi ngawo, osha li she shi ningitha oshipu kuye a kale e hole ndje nokwa simaneka ndje.” Thi okwa ti: “Sho nda kala tandi tula miilonga Aaefeso 5:33 nokuulukila omusamane gwandje esimaneko, onda kala ndi uvite ndi holike, nda gamenwa nondi uvite ombili.”
Opo wu mone uuyelele wa gwedhwa po kombinga yondjokana, lesha oshifo Penduka mo! No. 2 2018, shi na oshipalanyolo, “Iinima 12 mbyoka tayi kwathele aanegumbo ya pondole,” shi li kepandja lyetu lyokointaneta jw.org.
2. Nkene wu na okuungaunga nayalwe
Olundji aantu ohaya ungaunga nayi nayalwe omolwomuhoko gwawo, uukwashigwana, eholokopo, elongelokalunga nenge molwaashoka ye li omashenge.
SHOKA OMBIIMBELI TAYI TI: “Simanekeni aantu ayehe.” — 1 Petrus 2:17.
SHA HALA KUTYA: Ombiimbeli inayi tya kutya otu na okukala tu tonde yalwe omolwomuhoko gwawo, uukwashigwana nenge molwaashoka ye li omashenge. Pehala lyaashono, otayi tu ladhipike tu simaneke aantu ayehe, kashi na nduno mbudhi kutya oyomuhoko guni, oyomoshigwana shini nenge oye na ondondo yini moshigwana. (Iilonga 10:34) Kutya nduno itatu tu tsu kumwe naashoka yalwe ya itaala, nenge noonkatu dhawo, otu na owala okuungaunga nawa nayo nonesimaneko. — Mateus 7:12.
OMAYELE GOMBIIMBELI OHAGA LONGO: Omulumentu gwedhina Daniel okwa li a longwa kutya oku na okutala ko aantu yokoAsia ya nika oshiponga kaantu yomoshilongo shawo. Shoka osha li she mu ningitha a kale e tonde Omuasia kehe nokwa li nokuli he ya tuku montaneho yaantu. Daniel okwa ti: “Onda li tandi ipopile kutya otandi kondjele oshilongo. Kanda li nokuli ndi wete tandi ningi sha sha puka.”
Lwanima, Daniel okwa ilongo shoka Ombiimbeli tayi ti. Okwa ti: “Onda li ndi na okulundulula omadhiladhilo gandje thiluthilu. Onda li ndi na okutala ko aantu ngaashi Kalunga he ya tala ko, ano kutya atuhe yamwe kashi na mbudhi kutya otwa za peni.” Daniel okwa hokolola nkene ngashingeyi ha kala e uvite, uuna a tsakanene naantu. Okwa ti: “Ihandi ipula nokuli kutya oya za peni. Ondi hole aantu yomaludhi agehe nondi na ookuume kopothingo ya za kiilongo ya yoolokathana.”
Opo wu mone uuyelele wa gwedhwa po, lesha oshifo Awake! No. 3 2020, shi na oshipalanyolo “Is There a Cure for Prejudice?” shi li ko jw.org.
3. Iimaliwa
Aantu oyendji ohaya lalakanene uuyamba opo ya kale ya nyanyukwa noya ka kale nonakuyiwa ombwanawa.
SHOKA OMBIIMBELI TAYI TI: “Owino oyo egameno, ngaashi iimaliwa oyo egameno, ihe ekwatho lyuunongo olyo ndika: Owino otayi gamene omwenyo gwamwene gwayo.” — Omuuvithi 7:12.
SHA HALA KUTYA: Otwa pumbwa iimaliwa, ihe itashi ti kutya uuna tu na iimaliwa otatu ka kala twa nyanyukwa nenge tu na onakuyiwa ombwanawa. (Omayeletumbulo 18:11; 23:4, 5) Pehala lyaashono, enyanyu lyashili nosho wo onakuyiwa ya gamenwa oya ikolelela kokutula miilonga uunongo wopakalunga mboka wu li mOmbiimbeli. — 1 Timoteus 6:17-19.
OMAYELE GOMBIIMBELI OHAGA LONGO: Omulumentu gwedhina Cardo gwokoIndonesia okwa li ta gandja eitulomo kokwiikongela eliko. Okwa ti: “Onda li ndi na iinima oyindji mbyoka aantu oyendji ya hala okukala ye na. Onda li handi vulu okuya momalweendo, okulanda iinima yondilo, oohauto nomagumbo.” Ihe eliko lye inali kalelela. Okwa ti: “Onda li nda kengelelwa, niimaliwa yandje ayihe mbyoka nda longo nuudhiginini uule womimvo onde yi kanitha mepathimo lyeho. Onda longitha onkalamwenyo yandje ayihe mokwiilikolela eliko, ihe hugunina onda li ndi uvite nda fa omuntu gwowala, kaandi na oshilonga nonda gwililwa po.”
Cardo okwa tameke okutula miilonga omayele gOmbiimbeli ge na ko nasha niimaliwa. Ngashingeyi iha longitha we oonkondo dhe mokwiilikolela omaliko, ihe okwa hogolola okukala nonkalamwenyo yi li paunathangwa. Okwa ti: “Eliko lyashili notali kalelele olyo okukala nekwatathano ewanawa naKalunga. Kehe esiku ohandi kotha tandi mbonyoka nonda nyanyukwa shili.”
Opo wu mone uuyelele wa gwedhwa po kombinga yetaloko lyOmbiimbeli li na ko nasha niimaliwa, lesha oshitopolwa shi na oshipalanyolo “Mbela elongo niimaliwa oyo hayi utha kutya oto ka kala nonakuyiwa ombwanawa?” mOshungolangelo No. 3 2021, ndjoka yi li ko jw.org.
4. Omilalo
Aantu oye na omataloko ga yoolokathana kombinga yomilalo.
SHOKA OMBIIMBELI TAYI TI: “[Yandeni] oluhondelo. Omulumentu kehe gwomokati keni na kale a tseya, nkene e na okukala nomukiintu, a kale naye pamukalo gu uka nogwesimaneko. Ina kala naye pakahalu kuulunde ngashika aapagani mboka inaa tseya Kalunga.” — 1 Aatessalonika 4:3-5.
SHA HALA KUTYA: Ombiimbeli oye tu tulila po ongamba ngele tashi ya pokuulika omahalo getu gopamilalo. Oshitya “oluhondelo” osha kwatela mo okuyona ondjokana, uumbwanda, omilalo pokati kaantu inaaya hokana nosho wo uushenge. (1 Aakorinto 6:9, 10) Omilalo omagano ga za kuKalunga, ngoka a gandja komulumentu nomukiintu, mboka ya hokanathana. — Omayeletumbulo 5:18, 19.
OMAYELE GOMBIIMBELI OHAGA LONGO: Omukiintu gwokoAustralia gwedhina Kylie okwa ti: “Sho nda li inaandi hokanwa onda li tandi dhiladhila kutya ngele onda yi momilalo otandi kala ndi uvite ndi holike nonda gamenwa. Ihe shoka hasho sha ningwa. Onda li ndi uvite inaandi gamenwa nonda yemata.”
Lwanima, Kylie okwa ilongo nokwa tula miilonga shono Ombiimbeli tayi longo kombinga yomilalo. Okwa ti: “Onda mono kutya omithikampango dhaKalunga odhi lile po oku tu gamena noku tu keelela kiiponga. Ngashingeyi, ondi uvite nda gamenwa nosho wo ndi holike molwaashono ohandi ningi iinima metsokumwe nehalo lyaJehova. Okutula miilonga omayele gOmbiimbeli osha gamena ndje komaupyakadhi ogendji.”
Opo wu mone uuyelele wa gwedhwa po, lesha oshitopolwa shi li ko jw.org shi na oshipalanyolo “Ombiimbeli otayi ti ngiini kombinga yokwootekathana?”
Omushiti gwetu ohe tu kwathele tu tseye shoka shi li mondjila naashoka sha puka. Nonando ihashi kala aluhe oshipu okuvulika komithikampango dhaJehova, ohashi eta iizemo iiwanawa. Otatu vulu okukala tu na einekelo kutya otashi ke tu etelela aluhe enyanyu tali kalelele.