Koleka einekelo lyoye mehangano lyaJehova

1. Oshigwana shaJehova osha li sha unganekwa ngiini methelemumvo lyotango?

UUNA Jehova a pe oshigwana she oshinakugwanithwa, okwa tegelela shi shi gwanithe po momukalo gwa unganekwa. (1 Kor. 14:33) Pashiholelwa, Kalunga okwa hala onkundana ombwanawa yi uvithwe muuyuni awuhe. (Mat. 24:14) Jehova okwa pa Jesus oshinakugwanithwa shokuwilika iilonga mbyoka. Jesus okwa li a shilipaleke kutya otashi longwa momukalo gwa unganekwa. Methelemumvo lyotango, sho omagongalo ga li ga totwa miitopolwa yi ili noyi ili, aakuluntugongalo oya li ya langekwa po ya gandje ewiliko noya kwatele komeho. (Iil. 14:23) Olutu lwaakuluntugongalo yomuJerusalem, ndoka lwa li lwa thikama po maayapostoli naakuluntu yomuJerusalem, olwa ningi omatokolo gontumba, ngoka omagongalo agehe ga li ga tegelelwa ga tse kumwe nago. (Iil. 15:2; 16:4) Oshizemo, omolwokuvulika kwawo komalombwelo ngoka ga li ga pewa, “omagongalo oga kolekelwa meitaalo nomwaalu gwooitaali ogwi indjipala.” — Iil. 16:5.

2. Okuza mo 1919, ongiini Jehova a kala ta wilike oshigwana she noku shi pa iikulya yopambepo?

² Jehova ota tsikile okuunganeka oshigwana she nokuli nokunena. Okuza mo 1919, Jesus okwa kala ta longitha okangundu kaalumentu aagwayekwa, ka unganeke iilonga yokuuvitha nokugandja iikulya yopambepo kaalanduli ye.a (Luk. 12:42) Osha yela kutya Jehova ota yambeke iilonga yokangundu hoka. — Jes. 60:22; 65:13, 14.

3-4. (a) Gandja oshiholelwa sha nkene hatu mono uuwanawa sho twa unganekwa. (b) Oshike tatu ka kundathana moshitopolwa shika?

³ Ando katwa li twa unganekwa, andola itatu vulu okugwanitha po iilonga mbyoka Jesus e tu pa. (Mat. 28:19, 20) Pashiholelwa, dhiladhila nee andola aantu inaaya pewa iitopolwa moka ye na okuuvithila, ando kehe gumwe oha uvithile owala kehe mpoka a hala. Iitopolwa yimwe andola ohayi longwa olundji kaauvithi yi ili noyi ili, omanga yilwe itaayi longwa nandonando. Mbela owu shi po ishewe omikalo dhimwe moka hatu mono uuwanawa, molwaashoka twa unganekwa?

⁴ Ngaashi owala Jesus a li a unganeke aalanduli ye sho a li kombanda yevi, nokunena ota tsikile okuunganeka oshigwana shaKalunga. Moshitopolwa shika, otatu ka kundathana oshiholelwa shoka Jesus a tula po, nankene ehangano lyetu hali landula oshiholelwa she. Otatu ka kundathana wo nkene tatu vulu okuulika kutya otwa inekela ehangano lyaJehova.

EHANGANO LYETU OHALI LANDULA OSHIHOLELWA SHAJESUS

5. Omomukalo guni hatu landula oshiholelwa shaJesus? (Johannes 8:28)

⁵ Jesus okwa li a ilongo kuHe gwomegulu shoka e na okuninga naashoka e na okupopya. Ehangano lyaJehova ohali landula oshiholelwa shaJesus, moku tu pa omalombwelo ga ikolelela kOohapu dhaKalunga, noku tu kwathela tu tseye shoka shi li mondjila naashoka sha puka. (Lesha Johannes 8:28; 2 Tim. 3:16, 17) Ohatu dhimbulukithwa aluhe tu leshe Oohapu dhaKalunga nokutula miilonga shoka twa ilonga mo. Uuwanawa wuni hatu mono, uuna twa vulika komayele ngoka?

6. Omomukalo gumwe gwa simana guni hatu mono uuwanawa mokukonakona Ombiimbeli?

⁶ Ohatu mono uuwanawa owundji, uuna tatu konakona Ombiimbeli, tatu longitha iileshomwa yetu yopaKriste. Pashiholelwa, ohatu vulu okuyelekanitha shoka Ombiimbeli tayi ti newiliko ndyoka hatu pewa kehangano. Uuna tu wete kutya ewiliko ndyoka hatu pewa olya kankamena kOmbiimbeli, ohashi koleke einekelo lyetu mehangano lyaJehova. — Rom. 12:2.

7. Etumwalaka lini Jesus a li a uvitha, nongiini ehangano lyaJehova hali landula oshiholelwa she?

⁷ Jesus okwa li a uvitha “elaka etoye lyOshilongo shaKalunga.” (Luk. 4:43, 44) Okwa li wo a lombwele aalongwa ye ya uvithe kombinga yUukwaniilwa. (Luk. 9:1, 2; 10:8, 9) Kunena, ayehe mboka ye li mehangano lyaJehova ohaya uvitha etumwalaka lyUukwaniilwa, kutya nduno ohaya kala peni, nenge oye na iinakugwanithwa yi thike peni.

8. Uuthembahenda wuni tu na?

⁸ Otwe shi tala ko shi li uuthembahenda okuuvithila yalwe oshili kombinga yUukwaniilwa waKalunga. Hakehe gumwe e na uuthembahenda mboka. Pashiholelwa, sho Jesus a li kombanda yevi, ka li a pitike oombepo dhoompwidhuli dhi gandje uunzapo kombinga ye. (Luk. 4:41) Kunena, manga omuntu inaa uvitha pamwe noshigwana shaJehova, oku na okutalika ngele okwa gwana ngaa okupewa uuthembahenda mboka. Ohatu ulike kutya otwa pandula uuthembahenda wokugandja uunzapo, kashi na nduno mbudhi kutya openi nuunake. Ngaashi Jesus, elalakano lyetu okukuna nokutekela oombuto dhoshili yUukwaniilwa momitima dhaantu. — Mat. 13:3, 23; 1 Kor. 3:6.

9. Ehangano lyaKalunga olya ningitha ngiini edhina lye li tseyike?

⁹ Jesus okwa li a tseyitha edhina lyaKalunga. Jesus okwa li a galikana kuHe a ti: “Ngame onde ya tseyithile edhina lyoye.” (Joh. 17:26) Metsokumwe noshiholelwa shaJesus, ehangano lyaJehova ohali ningi ngaashi tali vulu, li kwathele aantu ya tseye edhina lyaKalunga. Ombiimbeli yo-New World Translation of the Holy Scriptures oya dhana onkandangala ya simana mokukaleka edhina lyaKalunga pehala mpoka li na okukala. Ombiimbeli ndjoka ngashingeyi oya tolokwa ya ihwapo, nenge iitopolwa yayo yimwe, momalaka ge vulithe po 270. Moshigwedhelwako A4 nosho wo A5 mOmbiimbeli ndjoka, oto ka mona mo uuyelele wu na ko nasha nokushunwa mo kwedhina lyaKalunga mOmbiimbeli. Oshigwedhelwako C, shoka tashi adhika mOmbiimbeli yokukonakonwa yOshiingilisa, otashi gandja uumbangi owundji mboka tawu ulike kutya edhina lyaKalunga oli na okuholoka lwiikando 237 mOmanyolo gopaKriste gOshigreka.

10. Oshike to ilongo kwaashoka sha popiwa komukiintu gumwe gwokoMyanmar?

¹⁰ Ngaashi Jesus, otwa hala okukwathela oyendji ngaashi tashi vulika, ya tseye edhina lyaKalunga. Omukiintu gumwe gwomimvo 67 gwokoMyanmar, sho a ilongo kutya Kalunga oku na edhina okwa tameke okulila e ta ti: “Shika osho oshikando shotango monkalamwenyo yandje tandi uvu kutya edhina lyaKalunga oJehova. . . . Omwa longa ndje oshinima sha simanenena, shoka nda li kaandi shi.” Ngaashi twe shi mona moshimoniwa shika, uuna aanamitima omiwanawa ya ilongo edhina lyaKalunga, otashi vulu okulundulula onkalamwenyo yawo.

TSIKILA OKUULIKA KUTYA OWA INEKELA EHANGANO LYAJEHOVA

11. Aakuluntugongalo ohaya ulike ngiini kutya oya inekela ehangano lyaJehova? (Tala wo ethano.)

¹¹ Omomukalo gumwe guni aakuluntugongalo taya vulu okuulika kutya oya inekela ehangano lyaKalunga? Uuna aakuluntugongalo ya pewa omalombwelo, oye na oku ga lesha nuukeka, nokuninga ngaashi taya vulu ye ga tule miilonga. Pashiholelwa, ihaya pewa owala omalombwelo gankene ye na okukwatela komeho iitopolwa yokugongala nosho wo nkene ye na okugalikana pokugongala, ihe ohaya pewa wo omalombwelo gankene ye na okusila oshimpwiyu oonzi dhaKristus. Uuna aakuluntugongalo ya tula miilonga omalombwelo ngoka ga za kehangano, aamwatate naamwameme ohaya kala ye uvite kutya Jehova oku ya hole note ya sile oshimpwiyu.

12. (a) Omolwashike tu na okulongela kumwe naamboka haya kwatele komeho? (Aahebeli 13:7, 17) (b) Omolwashike twa pumbwa okugandja eitulomo komaukwatya omawanawa gaamboka haya kwatele komeho?

¹² Uuna aakuluntugongalo ye tu pe omalombwelo, otu na okuvulika kugo nehalo ewanawa. Ngele otwa ningi ngawo, otashi ka kala oshipu kwaamboka taya kwatele komeho, ya gwanithe po iilonga yawo. Ombiimbeli otayi tu ladhipike tu kale hatu vulika nokulandula omalombwelo gaamboka taya kwatele komeho. (Lesha Aahebeli 13:7, 17.) Ihe omathimbo gamwe ohashi kala oshidhigu okuvulika. Omolwashike mbela? Omolwaashoka aalumentu mboka taya kwatele komeho, inaya gwanenena. Ngele otwa kala hatu gandja eitulomo komaukwatya gawo omawinayi pehala lyokugandja eitulomo komaukwatya gawo omawanawa, otatu ka iyadha tatu ambidhidha aatondi yetu. Omomukalo guni mbela? Ngele otwa kala hatu dhiladhilile muuwinayi aakuluntugongalo, otashi ke tu ningitha tu kale twa limbililwa ehangano lyetu e tatu kala inaatu inekela we muJehova. Oshike tatu vulu okuninga, opo tu ndhindhilike mo nokuyanda omitotolombo dhaatondi yetu?

INO ETHA YALWE YE KU NINGITHE WU KALE INOO INEKELA WE EHANGANO LYAJEHOVA

13. Aapataneki yaKalunga ohaya kambadhala ngiini okupopila muuwinayi ehangano lye?

¹³ Aapataneki yaKalunga ohaya kambadhala okupopila muuwinayi ehangano lye, uuna tali ningi shoka shi li mondjila. Pashiholelwa, otwa ilonga mOmanyolo kutya Jehova okwa tegelela aalongeli ye ya kale ya yogoka palutu, pamikalo nopambepo. Okwa tegelela kehe ngoka ta longo shoka inaashi yogoka noina iyela ombedhi, a kondwe mo megongalo. (1 Kor. 5:11-13; 6:9, 10) Ihe sho tatu vulika kelombwelo ndyoka lyopamanyolo, aapataneki ohaye tu lundile kutya katu hole aantu, ohatu ya pe uusama noihatu idhidhimikile aantu mboka ya yooloka ko kutse.

14. Olye onzo yomahokololo giifundja kombinga yehangano lyaJehova?

¹⁴ Kala wu shi kutya olye ha ponokele ehangano lyaJehova. Satana Ondiyapoli oye ha humitha komeho iifundja kombinga yehangano lyaJehova. Oye ‘he yiifundja ayihe.’ (Joh. 8:44; Gen. 3:1-5) Onkee ota ka longitha aapataneki yetu ya humithe komeho omahokololo giifundja kombinga yehangano lyaJehova. Shoka osho sha li sha ningilwa Jesus nosho wo Aakriste yopetameko.

15. Aawiliki yomalongelokalunga oya li ya ningile Jesus naalanduli ye shike?

¹⁵ Methelemumvo lyotango, nonando Omwana gwaKalunga, Jesus, okwa li a gwanenena nokwa longo iikumithalonga, aayambidhidhi yaSatana oya li ya taandeleke iifundja oyindji kombinga ye. Pashiholelwa, aawiliki yomalongelokalunga oya li ya lombwele aantu kutya Jesus oondemoni ohe dhi tidha mo koonkondo “dhomupangeli gwoondemoni.” (Mark. 3:22) Sho Jesus a li ta pangulwa, aawiliki yomalongelokalunga oya ti kutya okwa sheke Kalunga noya li ya hwahwameke ongundu yaantu yi tye kutya okwa gwana okudhipagwa. (Mat. 27:20) Lwanima, sho aalanduli yaKristus ya uvitha onkundana ombwanawa, mboka ya li taye ya pataneke “oya sikumudha aapagani” ye ya hepeke. (Iil. 14:2, 19) Shi na ko nasha nIilonga 14:2, Oshungolangelo 1 Desemba 1998 oya yelitha tayi ti: “[Molwaashoka kaya li ya] mbilipalelwa kokweekelahi kwawo yene etumwalaka, aapataneki Aajuda oya ningi oshikonga okunyateka edhina lyawo, e taya kambadhala okuningitha aakalimo Aapagani okayoya okutonda Aakriste.”

16. Oshike tu na okudhimbulukwa, uuna twa uvu omahokololo giifundja?

¹⁶ Satana ota tsikile okufundja sigo okunena. Natango ota “pukitha uuyuni auhe.” (Eh. 12:9) Ngele owa uvu omapopyo giifundja kombinga yehangano, nenge yaamwatate mboka taya kwatele komeho, dhimbulukwa nkene aatondi yaKalunga ya li ya ungaunga naJesus nosho wo naalongwa ye yomethelemumvo lyotango. Kunena, oshigwana shaJehova ohashi hepekwa nohashi lundilwa, ngaashi naanaa Ombiimbeli ya hunganeka. (Mat. 5:11, 12) Itatu ka pukithwa komahokololo giifundja, ngele otwa ndhindhilike kutya otaga zi kulye, nokukatuka onkatu meendelelo. Onkatu ndjoka oyini?

17. Ongiini tatu vulu okuyanda okweetelwa oshiponga komahokololo giifundja? (2 Timoteus 1:13) (Tala wo oshimpungu “Shoka wu na okuninga, uuna wa uvu omahokololo giifundja.”)

¹⁷ Yanda omahokololo giifundja. Omuyapostoli Paulus okwa gandja omalombwelo ga yela kombinga yaashoka tu na okuninga po, ngele otwa uvu omahokololo giifundja. Okwa li a lombwele Timoteus a ‘indike aantu ya ethe po oongano dhawo noya yande oongano dhaa na ekwatho lyasha.’ (1 Tim. 1:3, 4; 4:7) Okanona okashona otashi vulika ka toole oshinima pevi e take shi tula mokana, ihe omukuluntu ngoka e shi kutya osha nika oshiponga ite ke shi ninga nando. Ihatu taamba ko omahokololo giifundja, oshoka otu shi kutya oga za konzo yini. Pehala lyaashono, ohatu dhiginine “oohapu dhoshili.” — Lesha 2 Timoteus 1:13.

18. Ongiini tatu vulu okuulika kutya otwa inekela ehangano lyaJehova?

¹⁸ Otwa konakona owala omikalo ndatu dhomomikalo odhindji, moka ehangano lyaKalunga hali holele Jesus. Sho to konakona Ombiimbeli, ndhindhilika omikalo dha gwedhwa po, moka ehangano hali landula oshiholelwa shaJesus. Kwathela yalwe megongalo lyeni ya kale ya inekela ehangano lyaJehova. Tsikila okuulika einekelo lyoye mokulongela Jehova nuudhiginini, nokukala popepi nehangano lye ndyoka ta longitha, opo a gwanithe po ehalo lye. (Eps. 37:28) Natu tsikileni okukala twa lenga uuthembahenda mboka tu na wokweendathana noshigwana shaJehova oshinahole noshidhiginini.