Epangelo Ndyoka Tali Ka Eta Oparadisa
Sho Jesus a li kombanda yevi, ye okwa longa aalanduli ye okwiindila Uukwaniilwa waKalunga: “Oshilongo shoye [“uukwaniilwa woye,” KB] nashi ye; ehalo lyoye nali gwanithwe nokombanda yevi wo ngashika megulu.” (Mateus 6:9, 10) Ye okwa kala wo aluhe ta popi kombinga y“evangeli lyoshilongo [“lyuukwaniilwa,” KB].” (Mateus 4:23) Shoshili, ye okwa kala ta popi unene kombinga yUukwaniilwa shi vulithe kombinga yakehe shimwe shi ili. Omolwashike? Oshoka Uukwaniilwa owo oshilongitho shoka Kalunga te ke shi longitha mokukandula po omaupyakadhi ngoka taga ningi onkalamwenyo ondhigu ngeyi. Mokupitila mUukwaniilwa masiku Kalunga ota ka hulitha po iita, ondjala, omauvu nuukolokoshi, note ke eta uukumwe nombili.
Ando ongoye owa halelela okukala muuyuni wa tya ngeyi? Ano ou na okulesha oshifo shika. Omo to ki ilonga kutya Uukwaniilwa owo epangelo, ihe ndyoka ewanawa lyi vulithe kehe epangelo ndyoka lya pangela kombanda yuuntu. Oto ka mona wo omukalo omukumwithi kugwo Kalunga a yelithila aamati ye kashona nakashona ompangela ye mekwatathano lyUukwaniilwa. Natango oto ka mona nkene Uukwaniilwa tau vulu oku ku kwatha nokuli kunena.
Shoshili, ngashingeyi ngoye oto vulu okuninga omupangelwa gwUukwaniilwa waKalunga. Ihe tango manga ino tokola oku shi ninga, ou na okwiilonga oshindji kwaasho. Ano tse otatu ku kumike okukonakona oshifo shino. Ayihe mbyono tashi ku lombwele kombinga yUukwaniilwa, otayi zi mOmbimbeli.
Ila tu taleni tango omolwashike tseni twa pumbwa ngawo Uukwaniilwa waKalunga.
Petameko lyondjokonona yaantu Kalunga okwa shita omuntu u udhithwa nokwe mu tula moparadisa. Pethimbo ndyoka kakwa li ku na ompumbwe yUukwaniilwa.
Ihe Adam naEva, aakuluntu yetu yotango, oya pulakena kuSatana, omuyengeli omunashipotha. Ye okwe ya lombwela iifundja kombinga yaKalunga nokwe ya ningitha ya ningile wo Kalunga oshipotha. Ano oyi ilongele okusa, oshoka “ondjambi yuulunde oyo eso.”—Aaroma 6:23.
Omulunde inu udhithwa ita vulu okumona aanona yu udhithwa. Onkee ano aanona ayehe yaAdam oya valwa inayu udhithwa, nokuyona nokusa.—Aaroma 5:12.
Okuza tuu mpono aantu oya pumbwa Uukwaniilwa waKalunga oku ya kwathela okwaaluka ketulomutima lyuulunde neso. Uukwaniilwa otau ka yelitha wo edhina lyaKalunga kiifundja mbyoka Satana a popya kombinga yalyo.
Jehova Kalunga oku uvanekele kutya “oluvalo” lwi ikalekelwa okwa li talu ka valwa okumangulula uuntu kuulunde. (Genesis 3:15) “Oluvalo” nduka okwa li talu ka kala Omukwaniilwa gwUukwaniilwa waKalunga.
Okwa li ta ka kala lye?
Omimvo 2 000 lwaa mpo dha pita po konima sho Adam a yona, opwa kala omulumentu omudhiginini unene gwedhina Abraham. Jehova okwa lombwela Abraham a thige po oshilando she noku ka kala moshilongo shaPalestina momatsali.
Abraham okwa ningi ashihe shoka Jehova e mu lombwele oku shi ninga, mokukwatela mo sha oshidhigu unene. Jehova okwe mu lombwele okuyamba omwana gwe Isaak kondjambelo.
Jehova kakwa li a hala lelalela eyambo lyomuntu. Ihe okwa li a halele okutseya mpoka pe thike ohole yaAbraham kuye. Abraham okwa li a thikamena okudhipaga Isaak sho Jehova e mu keelele.
Pashilanduliko sheitaalo enene lyaAbraham, Jehova oku uvaneke oshilongo shaPalestina oku shi gandja koluvalo lwe nokwa tile kutya Oluvalo lweuvaneko okwa li talu ka za mezimo lye nomezimo lyomwana gwe, Isaak.—Genesis 22:17, 18; 26:4, 5.
Isaak okwa li e na aakwanambwiyu, Esau naJakob. Jehova okwa tile kutya Oluvalo lweuvaneko otalu ka za muJakob.—Genesis 28:13-15.
Jakob, ngoka Jehova e mu pele wo edhina Israel, okwa li e na aana aamati 12, nayo meni lyethimbo ayehe ya li ye na oyana. Ano oyana yaAbraham oya tameke okwiindjipala.—Genesis 46:8-27.
Sho momukunda mwiyaka mwi ile ondjala onene, Jakob naanegumbo lye oya tembukile kuEgipiti, okeithano lyaFarao, omupangeli gwaEgipiti.—Genesis 45:16-20.
MuEgipiti opwa hololwa kutya Oluvalo lweuvaneko okwa li talu ka kala omukwanezimo gwomwana gwaJakob, Juda.—Genesis 49:10.
Konima yeso lyaJakob oluvalo lwe olwi indjipala ngeyi kutya yo oya li ngaashi oshigwana. Ano Aaegipiti oya ningi uumbanda omolwawo noye ya ningi aapika.—Eksodus 1:7-14.
Lwahugunina Jehova okwa tumu omulumentu omudhiginini unene Moses, a pule Farao gwethimbo ndiya okumangulula oyana yaIsrael.—Eksodus 6:10, 11.
Farao okwa tindi, nomolwaasho Jehova okwe etele omahepeko omulongo kombanda yAaegipiti. Ehepeko lyahugunina okwa tumine omuyengeli gweso mokudhipaga aatango ayehe yaEgipiti.—Eksodus, ontopolwa 7 sigo 12.
Kalunga okwa lombwelele Aaisrael kutya ngele yo taa dhipaga onzigona kuulalelo wawo nombinzi yayo taye yi gwayeke kiikulitho yomiyelo dhawo, omuyengeli gweso okwa li ta ka pitilila po omagumbo gawo. Ano aatango yaIsrael oya hupithwa.—Eksodus 12:1-35.
Pashizemo, Farao okwa lombwele Aaisrael okuthiga po Egipiti. Ihe okuza mpono ye okwa lundulula edhiladhilo lye nokwe ya landula opo e ya galule ko.
Jehova okwe egululile Aaisrael ondjila ya fadhuke po mokupitila mEfuta Etiligane. Ihe sho Farao noongundu dhe dhaakwiita dha kambadhala oku ya landula, yo oya sile mo momeya.—Eksodus 15:5-21.
Jehova okwa falele oyana yaIsrael kondundu yaSinai mombuga. Mpoka ye okwe ya pele Ompango ye nokwa tile kutya ngele taye yi dhiginine, yo okwa li taa ka ninga uukwaniilwa waasaseri noshigwana oshiyapuki. Ano Aaisrael oya li ye na ompito mokweendela ko kwethimbo mokukala oshitopolwa sha simana shUukwaniilwa waKalunga.—Eksodus 19:6, KB; 24:3-8.
Konima Aaisrael sho ya kala pondundu yaSinai konyala uule womvula, Jehova okwe ya falele kuPalestina, oshilongo shoka ye u uvanekelele hekulu yawo Abraham.
MuPalestina Kalunga okwa pitike kutya Aaisrael ya pangelwe kaakwaniilwa. Ngeyi Kalunga okwa li e na nee uukwaniilwa kombanda yevi.
Omukwaniilwa omutiyali gwaIsrael okwa li David, omukwanezimo gwaJuda. David okwa sindi aatondi ayehe yaIsrael nokwa ningi Jerusalem oshilandopangelo shoshigwana.
Iiningwanima yopethimbo lyuukwaniilwa waDavid otayi holola kutya ngele Jehova ta yambidhidha omukwaniilwa, kape na omupangeli gwopevi ngoka ta vulu oku mu sinda.
Jehova okwa tile kutya Oluvalo lweuvaneko kwa li talu ka kala gumwe gwomaakwanezimo lyaDavid.—1 Ondjalulahokololo 17:7, 11, 14.
Salomo, omwana gwaDavid, okwa pangela konima ye. Ye okwa li omukwaniilwa omunongo, naIsrael osha li shaa na uupyakadhi kohi yuukwaniilwa we.
Salomo okwa tungilile wo Jehova otempeli ombwanawanawa muJerusalem. Onkalelo muIsrael kohi yuukwaniilwa waSalomo otayi tu pe edhiladhilo lyomayambeko ngoka tage ke etelwa uuntu kUukwaniilwa waKalunga mboka tau ya.—1 Aakwaniilwa 5:4, 5.
Ihe aakwaniilwa oyendji konima yaSalomo oya li unene yaa na uudhiginini.
Ihe manga aakwanezimo lyaDavid oya li taa pangele natango muJerusalem, Jehova okwa longitha omuprofeti gwe Jesaja mokuhunganeka Omwana gwaDavid gwethimbo lyokomeho ngoka kwa li ta ka pangela ombanda yevi ayihe muudhiginini. Ngoka kwa li ta ka kala Oluvalo lweuvaneko.—Jesaja 9:5, 6.
Omuprofeti Jesaja okwa hunganeka kutya epangelo Lye okwa li tali ka kala lyi na esimano lyi vulithe lyaSalomo.—Jesaja, ontopolwa 11 na 65.
Aamati yaKalunga ngashingeyi, unene nee shi vulithe nokuli nale, oya dhiladhila olye ngoka kwa li ta ka kala Oluvalo nduka.
Ihe komeho yokuya kwOluvalo, aakwaniilwa yaIsrael oya ningi aawinayi ngeyi kutya Jehova momumvo 607 k.E.N. e shi pitika kutya oshigwana sha sindwa kAababilon, nowindji waantu owa falwa muupika kuBabilon. Ashike Kalunga ina dhimbwa euvaneko lye. Oluvalo okwa li talu ka holoka natango mezimo lyaDavid.—Hesekiel 21:30-32.
Oshimoniwa shaIsrael osha holola kutya nonando omukwaniilwa omunandunge nomudhiginini a vulile okweeta omauwanawa, omauwanawa ngoka oga li ga ngambekwa. Aalumentu aadhiginini taa si, naalanduli yawo ngiika kaye shi aadhiginini. Ekandulopo olya li oshike? Oluvalo lweuvaneko.
Konima yomimvo dhomayuvi hugunina Oluvalo olwa holoka. Nduka okwa li lye?
Omuyengeli gwaKalunga okwa gandja eyamukulo komukadhona Omuisrael ngoka ina hokanwa, gwedhina Maria. Ye okwa tile kuye ye ona ka kala e na omwana omumati ngoka nedhina lye onali ka kala oJesus. Omuyengeli okwa ti:
“Oye ta kala omunene, ye e na okwiithanwa Omuna gwOkombandambanda, Omuwa Kalunga note mu pe oshipundi shuukwaniilwa wahe David, ota ningi omukwaniilwa.” —Lukas 1:32, 33.
Ano Jesus okwa li ta ka kala Oluvalo lweuvaneko nahugunina Omukwaniilwa gwUukwaniilwa waKalunga. Ihe omolwashike Jesus kwi ili kaalumentu aadhiginini mboka ya li ko nale?
Jesus okwa valwa pashikumwithalonga. Yina okwa li omukadhona, ihe kakwa li e na he gwomuntu. Jesus okwa li ko nale megulu, nombepo ondjapuki yaKalunga, nenge oonkondo dhe dhokulongitha, oya kutha okukalamwenyo kwaJesus megulu noye ku tula moshivalelo shaMaria. Onkee ano ye ina thigulula uulunde waAdam. Jesus muule wonkalamwenyo ye ayihe ina yona nando.—1 Petrus 2:22.
Sho Jesus a li e na omimvo 30, ye okwa ninginithwa.
Ye okwa lombwele aantu kombinga yUukwaniilwa waKalunga nahugunina okwi itseyitha ye mwene oye Omukwaniilwa gwUukwaniilwa mbwiyaka.—Mateus 4:23, KB; 21:4-11.
Ye okwa longo wo iikumwithalonga oyindji.
Okwa aludha aavu.—Mateus 9:35.
Aanandjala okwe ya palutha paikumwithalonga.—Mateus 14:14-21.
Okwa yumudha nokuli aasi.—Johannes 11:38-44.
Iikumwithalonga mbino otayi holola oludhi lwiinima yini Jesus Omukwaniilwa gwUukwaniilwa waKalunga ta ka ningila uuntu.
Ngoye oto dhimbulukwa tuu nkene Omukwaniilwa David a ninga Jerusalem oshilandopangelo shuukwaniilwa we? Jesus okwa yelitha kutya Uukwaniilwa waKalunga kawa li tau ka kala kombanda yevi, ihe omegulu. (Johannes 18:36) Osho omolwaasho Uukwaniilwa tau lukwa “Jerusalem yomegulu.”—Aaheberi 12:22, 28, KB.
Jesus okwa tseyitha oompango ndhoka mboka ya hala okukala aapangelwa yUukwaniilwa ye na okuvulika kudho. Oompango ndhika ngashingeyi odhi li mOmbimbeli. Oompango dha simana unene oondhoka kutya aantu ye na okukala ye hole Kalunga noye na okukala ye holathane.—Mateus 22:37-39.
Jesus okwa holola wo kutya ye mUukwaniilwa we ka li ta ka pangela oye awike. Aantu yontumba okwa li taa ka hogololwa okuya megulu nomo taa ka pangela pamwe naye. (Lukas 12:32, KB; Johannes 14:3) Yo okwa li taa ka kala ye thike peni? Ehololo 14:1 otali yamukula: 144 000.
Ngele 144 000 oyo ayeke taa yi megulu okupangela pamwe naJesus, oshihupe shuuntu oshi na etegelelo lyini po?
Ombimbeli otayi ti: “Aayuuki yo yene otaa ka kala ye na evi, Notaa ka kala kombanda yalyo sigo aluhe.”—Epsalmi 37:29, NW.
Mbono taa ka kala aluhe kombanda yevi otayi ithanwa “oonzi dhilwe.”—Johannes 10:16.
Ano opu na omategelelo gaali. Opu na 144 000 mboka yi ithanwa kuJehova Kalunga okuya megulu okupangela pamwe naJesus Kristus. Ihe yamwe omamiliyona oye na etegelelo mokukala aluhe nomwenyo kombanda yevi ye li aapangelwa yUukwaniilwa we.—Ehololo 5:10, NW.
Satana okwa tonda Jesus nokwe mu kondjitha. Konima sho Jesus u uvithile uule womimvo ndatu netata, Satana okwa kwatithile Jesus nokwe mu alelithile komuti gwomahepeko
a dhipagwe. Omolwashike Kalunga e shi pitike?
Ngoye oto dhimbulukwa kutya tseni atuhe ohatu yono notwi ilongele okusa molwaasho tseni aakwanezimo yaAdam.—Aaroma 6:23.
Oto dhimbulukwa wo kutya Jesus, molwomukalo gwoshikumwithalonga kugwo ye a valwa, okwa li u udhithwa na ini ilongela okusa. Nonando ongawo Kalunga okwa pitika Satana a ‘nyanyagule Jesus moshithi shompadhi,’ moku mu dhipaga. Ihe Kalunga okwe mu ningi ishewe omunamwenyo oye ombepo ndjoka itaayi si. Omolwashoka ye natango okwa li e na uuthemba konkalamwenyo yomuntu u udhithwa, ngashingeyi okwa vulile oku wu longitha mokukulila aantu kuulunde.—Genesis 3:15; Aaroma 5:12, 21; Mateus 20:28.
Moku tu kwathela moku shi uva ko thiluthilu sho eyambo lyaJesus tali ti, Ombimbeli
otayi shi popi mokupi-
tila momathaneko gehunganeko.
Pashiholelwa, ngoye oto dhimbulukwa tuu nkene Jehova a tile kuAbraham mokumakela ohole ye a gandje omwana gwe eyambo?
Shika osha li ethaneko lyehunganeko lyeyambo lyaJesus. Shika osha holola kutya ohole yaJehova kuuntu osho ya li onene ngeyi kutya ye okwa pitika kutya Omwana gwe, Jesus, a se molwetu opo tse tu vule okumona omwenyo.—Johannes 3:16.
Ngoye oto dhimbulukwa tuu nkee Jehova a mangulula Aaisrael okuza muEgipiti nokwa hupitha aatango yawo kokweetha omuyengeli gweso e ya pitilile po?—Eksodus 12:12, 13.
Shika osha li ethaneko lyehunganeko. Ngaashi naanaa ombinzi yonzigona kaatango yAaisrael ya ti omwenyo, ombinzi yaJesus ya tilwahi otayi ti omwenyo kwaamboka taye mu itaale. Nosho wo naanaa ngaashi iiningwanima yuusiku mbwiyaka kAaisrael ya li tayi ti emangululo, eso lyaJesus otali longo emangululo kuuntu kuulunde neso.
Shino omolwaasho Jesus i ithanwa “Onzigona yaKalunga, tayi kutha po oondjo dhuuyuni.”—Johannes 1:29.
Ihe, manga Jesus a li kombanda yevi, ye okwa gongelele wo aalongwa noku ya longa okuuvitha onkundana ombwanawa yUukwaniilwa, nonando okonima yeso lye.—Mateus 10:5; Lukas 10:1.
Yo oya li aantu yotango mboka ya hogololwa kuKalunga okupangela pamwe naJesus mUukwaniilwa we.—Lukas 12:32, KB.
Ngoye oto dhimbulukwa tuu kutya Kalunga oku uvanekelele Aajuda kutya yo oya li taa ka kala “uukwaniilwa waasaseri” ngele otaa dhiginine Ompango? Ngashingeyi yo oya li ye na nee ompito mokuninga oshitopolwa shUukwaniilwa waKalunga nokulonga ye li aasaseri yomegulu ando
oya taambele Jesus. Ihe oyendji
yomuyo oye ekelehi Jesus.
Okuza tuu pethimbo ndiyaka Aajuda kaya li we oshigwana oshihogololwa shaKalunga; Palestina inashi kala we Oshilongo shEuvaneko.—Mateus 21:43; 23:37, 38.
Okuza kethimbo lyaJesus sigo ongashingeyi Jehova ota gongele mboka taa ka pangela pamwe naJesus megulu. Kunena opu na natango omayuvi gamwe yomuyo kombanda yevi. Mboka ohatu ya ithana oshihupe shaagwayekwa.—Ehololo 12:17.
Ngashingeyi ngoye owa tameke nee okumona Uukwaniilwa waKalunga owo oshike. Owo epangelo megulu naJesus Kristus oye Omukwaniilwa, naantu 144 000 ya za kevi otaa ki itula puye. Mbuka otau ka pangela kombanda yuuntu uudhiginini wokombanda yevi notau ka kala wu na oonkondo dhokweetitha ombili kombanda yevi.
Jesus konima
yeso lye okwa yumudhwa ihe ye okwa londo megulu. Nkoka ye a ka tegelela kuKalunga mokutya uunake ethimbo lya thika kuye a tameke okupangela oye Omukwaniilwa gwUukwaniilwa. (Epsalmi 110:1) Shika osha li tashi ka kala uunake?
Omathimbo gamwe Jehova okwa yagumithile aantu oondjodhi opo e ya hokololele iinima kombinga yUukwaniilwa we.
Methimbo lyaDaniel Jehova okwa yagumithile Nebu-
kadnesar, omukwaniilwa gwaBabilon, ondjodhi ya tya ngeyi. Ndjoka oya li yomuti omunene.—Daniel 4:7-34.
Omuti ogwa kewa po noshithindi shagwo osha mangwa uule womimvo heyali.
Omuti ogwa thaneke omukwaniilwa Nebukadnesar. Ngaashi naanaa oshi-
thindi sha mangelwe uule womimvo heyali, osho ngeyi omukwaniilwa Nebukadnesar okwa kalele omuyanankwengu uule womimvo heyali. Nopo ihe uundjolowele we wopandunge owa aluka.
Shika osha li ethaneko lyehunganeko. Nebukadnesar okwa thaneke epangelo lyaJehova lyuuyuni. Tango olya longithwa kaakwanezimo yOmukwaniilwa David muJerusalem. Sho Babilon sha sindana Jerusalem mo 607 k.E.N., omukweyo ngwiya gwaakwaniilwa ogwa teka. Kakwa li tapu ka kala we omukwaniilwa mezimo lyaDavid “sigo oongoka te ya po, a gwana.” (Hesekiel 21:32) Okwa li oJesus Kristus.
Ethimbo lyi thike peni konima 607 k.E.N. kwa li Jesus ta ka tameka nokupangela? Omimvo heyali dhopahunganeko. Shika otashi ti, omimvo 2 520. (Ehololo 12:6, 14) Na omimvo 2 520 okuza 607 k.E.N. otadhi tu eta po 1914 E.N.
Ano Jesus mo 1914 okwa tameke okupangela megulu. Shika osha ti shike?
Ombimbeli otayi tu yelithile mokupitila memoniko ndyoka omuyapostoli Johannes a mwene.
Ye okwa mwene nkee omukiintu megulu a vala okanona okamati.—Ehololo 12:1-12.
Omukiintu okwa thaneke ehangano lyaKalunga lyomegulu, ndyoka lya thikama po okuza maamati aayengeli ayehe yaKalunga megulu. Okanona okamati otaka thaneke Uukwaniilwa waKalunga. Mboka owa “valwa” mo 1914.
Ano oshike sha ningwa po? Oshinima shotango sho Jesus Omukwaniilwa a ninga, osha li okuumba mo megulu Satana naayengeli mboka ye ya moshipotha pamwe naye, ya ye pevi.—Ehololo 12:9.
Ombimbeli otayi tu lombwele shoka sha li oshilanduliko: “Onkee ano nyanyukweni, one omagulu naamboka mwa kala mugo! Yaye evi nefuta, oshoka ondiaboli ya kulukile kune, e na ondjahi onene, oshoka e shi shi, e na ethimbo efupi lyowala.”—Ehololo 12:12.
Sho Jesus a tameke okupangela megulu, oshilanduliko aatondi ye ya ya meipyakidhilo unene kombanda yevi. Ye, naanaa ngaashi Ombimbeli ya hunganeke, a tameke okupangela mokati kaatondi ye.—Epsalmi 110:1, 2.
Shika osha li shi na okutya shike kuuntu?
Jesus okwe tu lombwele: iita, oondjala, omauvu nomakakamo gevi.—Mateus 24:7, 8; Lukas 21:10, 11.
Iinima mbika twe yi mona tayi ningwa okuza 1914, na shika natango etompelo molwashoka tse tu shi shi kutya Uukwaniilwa owa tameke nee okupangela.
Opwa li wo tapu ka kala “aantu . . . ye na ethininiko notaa si uumbanda” manga “aantu . . . taa si ehaluko mokutila.” (Lukas 21:25, 26) Shika otwe shi mona wo okuza 1914.
Omuyapostoli Paulus okwa gwedha po: “Aantu taa ka kala nokwiihola noye na uuhalu weliko, . . . ihaa vulika kaakuluntu, . . . aayoni yeuvaneno, aanakatsila, aakaaneidhiliko.”—2 Timoteus 3:1-5.
Ngashingeyi ngoye ou shi shi nee omolwashike onkalamwenyo ondhigu ngawo kunena. Satana okwi ipyakidhila unene. Ihe Uukwaniilwa waKalunga nawo wo owi ipyakidhila.
Okathimbo konima 1914 oshihupe shaamboka taa tegelele okupangela pamwe naJesus megulu, oya tameka okuuvitha onkundana ombwanawa kutya Uukwaniilwa owa dhikwa. Oshilonga shika ngashingeyi otashi ningwa kombanda yevi alihe, naanaa ngaashi Jesus a ti.—Mateus 24:14, KB.
Elalakano lyoshilonga shika sheuvitho oshike?
Shotango, omokulombwela aantu Uukwaniilwa waKalunga.
Oshitiyali, okukwathela aantu ya tokole ngele yo oya hala okukala aapangelwa yUukwaniilwa.
Jesus okwa ti kutya methimbo lyetu uuntu auhe otau ka topolwa m“oonzi” n“iikombo.”—Mateus 25:31-46.
“Oonzi” okwa li tadhi ka kala mboka ye mu hole noye hole aamwahe ye. “Iikombo” okwa li tayi ka kala mboka kaye ya hole.
“Oonzi” okwa li tadhi ka mona omwenyo gwaaluhe, ihe ha “iikombo.”
Oshilonga shika sheyoololo otashi ningwa tashi pitile meuvitho lyonkundana ombwanawa yUukwaniilwa.
Mpaka ehunganeko lyomuprofeti Jesaja.
“Pomahulilo gomasiku ondundu yongulu yOmuwa otayi thikama ya kolelela koondungu dhoondundu, ya lundu adhihe, noko taku
matukile aapagani ayehe.”—Jesaja 2:2.
Uuntu ngashingeyi owu li
m“omahulilo gomasiku.”
“Ongulu” yaJehova yegalikano oya “lundu” kombanda yomaitaalo giifundja.
“Oko taku ka ya iilongo oyindji notaa ti: Ileni, tu ka londeni kondundu yOmuwa, omongulu yaKalunga kaJakob, oye e tu longe okutseya oondjila dhe, tse tu ende nomapola ge.”—Jesaja 2:3.
Eeno,
aantu oyendji otaa zi miigwana ayihe taye ya okugalikana Jehova notaa hiya yamwe yi itule kuyo. Yo otayi ilongo okulonga pamukalo ngoka Jehova a hokwa.
“Oyo notaa hambulula omagongamwele gawo omatemo nomagonga gawo iimwetho; nena itaa ganeka we oshikaha shokukondjithathana, nongaashi ihaa kala we okwiilonga uukwiita.”—Jesaja 2:4.
Aagalikani yaJehova oya hangana noyo aanambili.
Oshilanduliko sheipyakidhilo ndika kUukwaniilwa waKalunga okutya ngashingeyi konyala opu na aantu omamiliyona gatatu kombanda yevi alihe oyo aapangelwa yUukwaniilwa.
Yo oya gongala ya dhingilila oshihupe, iilyo mbyoka ya hupa po yongundu ndjoka ya tegelela okuya megulu nokupangela pamwe naKristus.
Yo ohaa mono oondya dhopambepo kehangano lyaKalunga.—Mateus 24:45-47.
Yo oye li Uukriste uumwayinathana wopaigwana mboka u holathane lela.—Johannes 13:35.
Yo otaa nyanyukilwa egundjilo lyomomutima netegelelo lyonakuyiwa.—Aafilippi 4:7.
Meni lyokathimbo onkundana ombwanawa otayi ka kala yu uvithwa. “Oonzi” otadhi ka kala dha gongelwa. Ano Uukwaniilwa otau ka ninga shike?
Ngoye oto dhimbulukwa tuu kutya Omukwaniilwa omudhiginini David okwa sinda aatondi ayehe yoshigwana shaKalunga? Eeno, Omukwaniilwa Jesus ota ka ninga sha faathana.
Omukwaniilwa Nebukadnesar oshikando shimwe okwa yaguma ondjodhi yoshiyelekela oshinenenene shoka sha thaneka omaukwaniilwa guuyuni agehe omethimbo lye sigo okethimbo lyetu.
Ye nokwa mono emanya tali zi
ko lya kewa kondundu, nalyo olya
tatula po oshiyelekela. Emanya olya thaneke Uukwaniilwa waKalunga.
Shika otashi ti ehanagulo lyonka-
lelo yongashingeyi yuukolokoshi.
—Daniel 2:44.
Mpaka iinima yimwe mbyoka tayi ka ekelwahi kUukwaniilwa.
Omalongelokalunga giifundja otaga ka kana po, ongemanya enene lyoshini ndyoka lyu umbilwa mefuta.
—Ehololo 18:21.
Shika omolwaasho ayehe mboka
ye hole Kalunga taa kumikwa okuthiga po omalongelokalunga giifundja NGASHINGEYI.—Ehololo 18:4.
Nopo ihe Omukwaniilwa Jesus ota ka ‘dhenga . . . iigwana; oye te ya litha nondhimbo yosheela.’—Ehololo 19:15.
Pashilanduliko, nando Oonzapo dhaJehova ohadhi gandja oompale nokuvulika koompango dhoshilongo, yo itayi itula mo moopolitika.
Lwahugunina Satana ye mwene, “oshikoko” oshinene, ota ka umbilwa molumbogo.—Ehololo 20:2, 3.
“Oonzi” ashike, oomboka yi igandja kohi yaJesus Omukwaniilwa, taa ka hupa po kuudhigu mbuno.—Mateus 25:31-34, 41, 46.
Omuyapostoli Johannes okwa monene emoniko ly“oonzi” ndhoka dha hupa po kuudhigu.
“Tala ihe, ongundu onene, ya nyenge okuyalulwa, oyomaapagani ayehe noyomiilongo ayihe noyomiigwana ayihe noyomomalaka agehe ya thikama ya taalela oshipangelapundi nOnzigona ya zala oonguwo oonde oontokele noya li ye na omayale miikaha yawo.”—Ehololo 7:9.
“Ongundu onene” oya thikama po okuza mwaayehe mboka yi inyenga nawa keuvitho lyonkundana ombwanawa.
Yo otaa “zi muudhigu uunene.”—Ehololo 7:14, NW.
“Omayale” otaa holola kutya yo otaa hambelele Jesus Omukwaniilwa gwawo.
“Oonguwo . . . oontokele” dhawo otadhi holola kutya yo oyi itaala meyambo lyaJesus.
“Onzigona” oJesus Kristus.
Ano yo otaa nyanyukilwa omayambeko geni po? Oto dhimbulukwa tuu nkene Israel sha li nelago sho Omukwaniilwa omudhiginini Salomo a li ta pangele? Shika otashi tu pe ondunge kombinga yelago kombanda yevi kohi yOmukwaniilwa Jesus.
Otapu ka kala ombili yo yeneyene mokati kuuntu nopokati komuntu noshinamwenyo, naanaa ngaashi Jesaja a hunganeka.—Epsalmi 46:10; Jesaja 11:6-9.
Ngaashi naanaa Jesus a aludha aavu sho ye a li kombanda yevi, ye ota ka kulila uuntu auhe komauvu.—Jesaja 33:24.
Ngaashi naanaa ye a palutha oongundu, ye ota ka mangulula uuntu auhe kondjala.—Epsalmi 72:16.
Ngaashi naanaa ye a yumudha aasi, ye ota ka yumudha aasi mboka kaya li ye na ompito ombwanawa opo yi igandje kohi yUukwaniilwa waKalunga.—Johannes 5:28, 29.
Ye ota ka shunitha uuntu kashona nakashona kewaneneno ndyoka lya kanithwa kuAdam.
Shika kashi shi tuu onakuyiwa onkumwithi? Ando ngoye shika owa halelela oku ke shi mona? Ano ou na okwiitula po ngashingeyi mokwiigandja kohi yUukwaniilwa waKalunga nokuninga yimwe yom“oonzi.”
Konakona Ombimbeli nokwiilonga okutseya Jehova Kalunga naJesus Kristus.—Johannes 17:3.
Endathana nayamwe mboka yo yi igandja kohi yUukwaniilwa.—Aaheberi 10:25, EE.
Ilonga okutseya oompango dhUukwaniilwa na vulika kudho.—Jesaja 2:3, 4.
Onkalamwenyo yoye yi gandja kokulongela Jehova, ndele ininginithitha.—Mateus 28:19, 20.
Yanda iinima iiwinayi, ngaashi uulunga, iifundja, onyata nuukolwe, mbyoka itayi hokiwa kuJehova Kalunga.—1 Aakorinto 6:9-11.
Kutha oshitopolwa keuvitho lyonkundana ombwanawa yUukwaniilwa.—Mateus 24:14, KB.
Ano nekwatho lyaKalunga ngoye oto ka mona nkene Oparadisa ndjoka Adam a kanithile oluvalo lwe, tayi shunithwa po ishewe, nankene euvaneko tali landula ko tali gwanithwa: “Ondu uvu ewi enenenene moshipangelapundi lya ti: Tala ko, egumbo lyaKalunga li li paantu, noye ta kala nayo, oyo notaa kala oshigwana she, Kalunga mwene ota kala pamwe nayo, Kalunga kawo; nota theta po omahodhi momeho gawo, neso kali kala we nenge oluhodhi nenge elilagano, nenge uuwehame kau kala mo we, oshoka shiyaka shotango osha hulu po.”—Ehololo 21:3, 4.
[omusholondondo/okaalita/oshimpungu pepandja 20]
607 k.E.N. 1914 E.N.
k.E.N. | E.N.
500 1 000 1 500 2 000 2 520
[Omathano pepandja 11]
Abraham
Isaak
Jakob
Juda
David
[Ethano pepandja 14]
144 000
[Ethano pepandja 16]
Adam
Jesus