Ontopolwa 2

Omutondi gwOmwenyo Gwaaluhe

1. Molwashoka opu na elago nombili onshona ngawo, omapulo geni po taga holoka?

ELAGO kombanda yevi olyo oshinima shoka sha halika konyala kwaayehe. Ano omolwashike oyendji yaa na elago ngawo? Epuko olyashike? Omolwashike iigwana tayi hingi iita naantu ye li po ye tondathane nonando konyala ayehe oya hala ombili? Opu na oonkondo ndhoka tadhi ya inyengitha okulonga iilonga mbika iiwinayi? Otashi vulika ngiika iigwana tayi pangelwa koonkondo ndhoka ihaadhi monika?

2. Iilonga yuuwinayi yini po mondjokonona ya kumitha oyendji ngele pamwe aantu otaa pangelwa koonkondo dhuuwinayi ihaadhi monika?

² Oyendji oya kumwa kwaashoka uuna yo taa dhiladhila kuunyanyalithi uunene wuuntu—oohasa oontilithi ndhoka hadhi longithwa miita okusitha aantu oshimpwininika nenge oku ya fika po, osho wo ooboma dhokufika nooboma dhoatoma. Dhiladhila wo koshitago shomutemo, ookamba dhoonkwatwa, edhipago enenenene lyaantu yowala omamiliyona, ngaandyoka lya ningwa muKambodja momimvo ndhoka opo dha piti po. Oto dhiladhila kutya uuwinayi auhe mbuka owe ya po owala ngeya? Nando omuntu okuye mwene ta vulu okulonga iilonga mbika iihaluthi, ngele to dhiladhila kiilonga ye yiihuna, kungoye inashi fa mbela kutya ota nwethwa mo koonkondo dhuuwiinayi ndhoka ihaadhi monika?

3. PaMbimbeli, olye ano omupangeli guuyuni?

³ Inashi pumbiwa okutengeneka kwaashoka. Ombimbeli otayi shi holola sha yela kutya omuntu omunandunge gwopambepo ihaa monika oye ta pangele aantu osho wo iigwana. MOmbimbeli Jesus Kristus okwa luku omuntu nguka omunankondo “omupangeli guuyuni mbuka.” (Johannes 12:31; 14:30; 16:11) Oye lye?

4. Ondiaboli oyu ulukila Jesus shike, noshike ya li ya gandja kuye?

⁴ Okuuva ko naanaa kutya oye lye, natu dhiladhileni monima kwaashoka sha ningilwe po petameko lyuukalele waJesus mpaka kombanda yevi. Ombimbeli otayi tu hokololele nokutya Jesus, konima yeninginitho lye, ye okwa yile mombuga moka ye a makelwa komushitwa ihaa monika nguka a lukwa Satana Ondiaboli. Ombinga yimwe yemakelo ndyoka oya hokololwa ngaashi tashi landula: “Omuhindadhi okwe mu kutha ko ishewe ya yi naye kondundu ondeendeka, e te mu ulukile iilongo ayihe yomuuyuni nuuyamba wayo nokwa ti kuye: Ayihe mbika otandi yi ku pe, ngele to [tsu] oongolo noto galikana ndje.”—Mateus 4:8, 9.

5. (a) Oshike tashi holola kutya omapangelo agehe gomuuyuni ogo eliko lyOndiaboli? (b) PaMbimbeli, olye ano “kalunga kuuyuni mbuka”?

⁵ Tala kwaashoka Ondiaboli ya gandja kuJesus Kristus. Osha li “iilongo ayihe yomuuyuni.” Omapangelo agehe ngoka gomuuyuni oga li shili eliko lyOndiaboli? Eeno, oshoka ando ongiini ye a li ta vulu oku ga gandja kuJesus? Jesus ina tinda nando kutya kage shi gaSatana, ando shoka ye a ningi ando oga li gaa shi gaSatana. Muushili wo wene Satana oye omupangeli gwiigwana ayihe yomuuyuni ihaa monika! Ombimbeli otayi ti sha yela: “Uuyuni auhe owa kala muuwinayi.” (1 Johannes 5:19) Dhoshili, oohapu dhaKalunga otadhi luku Satana “kalunga kuuyuni mbuka.”—2 Aakorinto 4:4.

6. (a) Uushili mbuno kombinga yepangelo lyaSatana otau tu kwatha okuuva ko shike? (b) Oshike Satana a hala oku tu ningila, noshike ano tse tu na okuninga?

⁶ Uushili mbuka otau tu kwatha okuuva ko molwashike Jesus a ti: “Uukwaniilwa wandje kau shi womuuyuni mbuka.” (Johannes 18:36) Shika otashi tu kwatha wo okuuva ko kutya omolwashike iigwana yi tondathane notayi kondjitha okuhanagulathana po omanga aantu ayehe yolela ya hala okukala nomwenyo mombili. Eeno, “Satana . . . [ota] hongolola evi alihe.” (Ehololo 12:9) Ye ota hala wo oku tu hongolola. Ye ina hala nando tse tu taambe omagano gaKalunga, omwenyo gwaaluhe. Ano tse tu na okukondja ekondjo opo twaa nwethwe mo nayi kuye. (Aaefeso 6:12) Tu na okutseya nawa Satana nomikalo dhe opo tu vule okukondjitha oonkambadhala dhe oku tu pukitha.

OLYE NGOKA ONDIABOLI

7. Omolwashike ihaatu vulu okumona Ondiaboli?

⁷ Satana Ondiaboli oye omuntu shili. Ye ke shi owala uuwinayi mboka u li maantu ayehe, ngaashi shi itaalwa kuyalwe. Omolwashoka aantu itaa vulu okumona Kalunga, nOndiaboli itaa vulu wo oku yi mona. Kalunga nOndiaboli ayehe yaali oyo aantu yopambepo, mboka ye li monkalamwenyo yopombanda yi vule yomuntu noihaa monika komeho getu.—Johannes 4:24.

8. Omolwashike aantu oyendji haa dhiladhila kutya Kalunga oye a shiti Ondiaboli?

⁸ ‘Ihe ngele Kalunga oye omunahole,’ ngiika gumwe ta pula, ‘omolwashike ano ye a shiti Ondiaboli?’ (1 Johannes 4:8) Oshili oyo kutya Kalunga ka shitile Ondiaboli. ‘Ihe ngele Kalunga oye a shiti ayehe,’ omuntu tashi vulika ta ti, ‘alikana oye a li e na okushita Ondiaboli. Olye ishewe a li ta vulu? Ano openi pwa za Ondiaboli?’

9. (a) Aayengeli aantu yoludhi luni po? (b) Iitya “ondiaboli” na“satana” otayi ti ngiini?

⁹ Ombimbeli otayi yelitha kutya Kalunga okwa shiti aantu oyendjiyendji yopambepo ye mu fa. MOmbimbeli oombepo ndhino odha lukwa aayengeli. Dho odha lukwa wo ‘aana aamati yaKalunga.’ (Job 38:7, KB; Epsalmi 104:4; Aaheberi 1:7, 13, 14) Kalunga okwe ya shitile ayehe ya gwanenena. Kakwa li nando gumwe gwomuyo a li ondiaboli nenge satana. Oshitya “ondiaboli” otashi ti omulundili noshitya “satana” otashi ti omupatanithi.

10. (a) Olye a shiti Satana Ondiaboli? (b) Ongiini omuntu omwaanawa ta vulu okwiininga ye mwene omuyoni?

¹⁰ Ihe konima gumwe gwomaana aamati yaKalunga mbaka yopambepo, okwi iningi ye mwene Ondiaboli, otashi ti, omuniifundja omutondadhi nomulundili gwayalwe. Ye okwi iningi wo ye mwene Satana, tashi ti, omupatanithi gwaKalunga. Ye ka shitilwe ngawo, ihe konima okwa ka ninga omuntu gwoludhi ndoka. Oku shi yelitha: Omufuthi ka valelwe omufuthi. Ye otashi vulika a za megumbo ewanawa, a li naakuluntu aayuki naamwayina aalumentu naakiintu aavuliki kompango. Ihe okuhala kwe mwene iinima mbyoka hayi landwa niimaliwa, okwe mu ningi omufuthi. Ano ongiini gumwe gwomaana aamati yaKalunga yopambepo i iningi ye mwene Satana Ondiaboli?

11. (a) Ompangela yaKalunga yini po ya kala ya tseyika komuyengeli omunashipotha? (b) Ehalo lyomuyengeli nguno olya li shike nolye mu longitha shike?

¹¹ Omuyengeli ngoka a ningi Ondiaboli, okwa li po sho Kalunga a shiti evi nokonima aantu yaali yotango, Adam naEva. (Job 38:4, 7) Ano ye okwa li u uvu nkene Kalunga te ya lombwele ya mone aanona. (Genesis 1:27, 28) Ye okwa kala e shi shi nokutya mepitathimbo evi alihe otali ka kala lyu udhithwa aantu aayuki mboka taa galikana Kalunga. Shika osha li ompangela yaKalunga. Ihe omuyengeli nguka okwa dhiladhila unene keopalo lye nokuunongo we mwene nokwa halele okupewa egalikano ndyoka lya li tali ka pewa Kalunga. (Hesekiel 28:13-15; Mateus 4:10) Peha lyokukandula po ehalo ndika lyepuko momadhiladhilo ge, ye okwa kala owala a tsikila okudhiladhila kwaashoka. Shika oshe mu longitha sha opo ye a mone esimaneko nesimano ndyoka ye a halele. Oshike ye a ningi?—Jakob 1:14, 15.

12. (a) Ongiini omuyengeli nguno a popi naEva, nokwe mu lombwele shike? (b) Omuyengeli nguno okwa ningi ngiini Satana Ondiaboli? (c) Ondiaboli inayi fa nando oshike?

¹² Omuyengeli omunashipotha okwa longitha eyoka lyowala okupopya naEva, omukiintu gwotango. Omukalo gwe gwokulonga otagu tsu kumwe lela naangoka gwomuntu onkulungu ngoka ta vulu okupopya sha fa andola oshinamwenyo nenge oshipopitha shoka shi li popepi tashi popi. Ihe muushili wo wene osha li omuyengeli ngoka omunashipotha, oongoka a popiwa mOmbimbeli “eyoka ndyoka ekulu” ngoka a popya naEva. (Ehololo 12:9) Ye okwa ti nokutya Kalunga ine mu lombwela oshili, nokwe mu indika ontseyo ndjoka e yi pumbwa shili. (Genesis 3:1-5) Shika osha li iifundja iinyanyalithi noye mu ningitha ondiaboli. Nomwaashoka ye okwa ningi wo omupatanithi gwaKalunga, nenge Satana. Ngaashi to vulu oku shi mona, osho epuko okudhiladhila kutya Ondiaboli oyo oshishitwa shoka shi na ooniiga nokapani shoka tashi tonatele olumbogo lwomulilo gwomahepeko. Oye shili omuyengeli omunankondoelela, ihe oye omukolokoshi.

ONZA YOMAUPYAKADHI GUUYUNI

13. (a) Eva okwi inyengithwa ngiini kiifundja yOndiaboli? (b) Omapopyo geni po ga ningwa kOndiaboli?

¹³ Iifundja mbyoka Ondiaboli ya lombwele Eva, oya li ya pondola ngaashi yo ya dhiladhilile. Ihe ye okwe yi itaale nomwaashoka ina vulika kuKalunga. Niishewe ye okwa li a taagulukitha omulumentu gwe oshipango shaKalunga. (Genesis 3:6) Ondiaboli oya popya kutya aantu otaa vulu okwiithikamena noyaa na Kalunga. Ye okwa ti kutya aantu otaa vulu okwiipangela yo yene neenditho nawa, noyaa na ekwatho lyaKalunga. Ondiaboli oya popya wo kutya yo otayi vulu okwiitekitha oluvalo aluhe lwaAdam naEva muKalunga.

14. Omolwashike Kalunga inaa hanagula po Satana mokathimbo hoka?

¹⁴ Osho lela, Kalunga okwa li ta vulu okuhanagula po Satana mokathimbo hoka. Ihe shika ando inashi yamukula nando omapulo ngoka ge etwa po kuSatana, omapulo ngoka ngiika andola itaga dhimbiwa po kaayengeli mboka ya tala ashihe. Ano Kalunga okwe ethele Satana ethimbo opo a kambadhale okuulika omapopyo ge. Iilanduliko oya li shike?

15, 16. (a) Okweenda kwethimbo oku ulike shike kombinga yomapopyo gOndiaboli? (b) Oshiningomwa shini po shi li popepi?

¹⁵ Okweenda kwethimbo oku ulike kutya aantu inaa vula okwiipangela muuwanawa noyaa na ekwatho lyaKalunga. Oonkambadhala dhawo odha nyengwa thiluthilu. Aantu oya kala nokuhepekwa oshitilithi kohi yomapangelo gaantu ngoka, paManyolo, ge na Ondiaboli konima yago oku ga pangela. Niishewe ethimbo ndyoka Kalunga a gandja kuSatana, olya holola sha yela kutya Satana ina vula okwiitekitha aantu ayehe muKalunga. Aluhe opwa kala aantu mboka ya dhiginina kepangelo lyaKalunga. Pashiholelwa, lesha mOmbimbeli nkene Satana a kambadhala okukeelela Job kaa longele Kalunga, ihe ina pondola.—Job 1:6-12.

¹⁶ Ano omapopyo gOndiaboli ogu ulikwa ogo iifundja. Ye okwi ilongele shili ehanagulo oshoka okwa penduthila Kalunga oshipotha shuukolokoshi. Elago enene, ngashingeyi ethimbo olya thikana opo Kalunga a hulithe po epangelo lyaSatana. Mpoka Ombimbeli tayi popi onkatu yotango oku shi ninga, otayi hokolola olugodhi megulu lwa simana ndoka nokuli aantu yokombanda yevi inaa vula oku li mona nenge oku li uva. Lesha neitulomo metseyitho lyOmbimbeli tali landula:

17. (a) Ombimbeli oya hokolola ngiini olugodhi megulu? (b) Oshilanduliko kwaashoka osha li shike kwaamboka yomegulu osho wo kwaamboka yokombanda yevi?

¹⁷ “Megulu nomwa tukuluka olugodhi; Mikael [Jesus Kristus ngoka a yumuka kuusi] naayengeli ye ya kondjitha oshikoko. Oshikoko naayengeli yasho noya kondjo noya nyengwa, neha lyawo inali monika we megulu. Noshikoko oshinene shu umbwa mo, eyoka ndyoka ekulu, lyi ithanwa ondiaboli naSatana, oongoka ta hongolola evi alihe, oku umbilwa pevi, naayengeli yu umbilwa ko pamwe naye. Onkee ano nyanyukweni, one omagulu naamboka mwa kala mugo! Yaye evi nefuta, oshoka ondiaboli ya kulukile kune, e na ondjahi onene, oshoka e shi shi, e na ethimbo efupi lyowala.”—Ehololo 12:7-9, 12.

18. (a) Olugodhi megulu olwa kondjwa uunake? (b) Okuza mpoka sho Satana u “umbwa mo,” oshike sha ningwa po mpaka kombanda yevi?

¹⁸ Uunake olugodhi nduka megulu lwa ningwa? Paunzapo, osha li opethimbo lyIita yOtango yUuyuni, mbyoka ya tameke mo 1914. Ngaashi Ehololo tali holola, olyo ethimbo Satana u umbwa megulu, shoka tashi ti okuza mpoka tse otu li ‘methimbo efupi lyowala’ lye. Ano, shika osho “omasiku omahugunina” guuyuni waSatana. Eindjipalo lyokwaanuuyuki, ehaluko, iita, oompumbwe dhiikulya, omikithi noonkalo tuu dhilwe oontilithi ndhoka tu li mudho, odho oshuuliki mwaashoka.—Mateus 24:3-12; Lukas 21:26; 2 Timoteus 3:1-5.

19. (a) Omushike Satana i itula nena okulonga noonkondo? (b) Oshike tashi ka kala shopandunge kutse oku shi ninga?

¹⁹ Molwashoka Satana oku shi shi kutya “ethimbo efupi lyowala” lye oli li pokuhula po, ye ota kondjo noonkondo adhihe shi vulithe nale a keelele aantu yaa longele Kalunga. Ye okwa hala okuhila aantu oyendji ngaashi ta vulu ya ye pamwe naye mehanagulo. Ombimbeli otayi mu hokolola shili ongonime hayi ulu ndjoka tayi kongo ngoka tayi mu ninagula po. (1 Petrus 5:8, 9) Ngele twa hala okuhupa momakaha ge, tu na okwiilonga okutseya omikalo dhe dhokuhomona, nokutseya omomikalo dhini po ha pukitha aantu.—2 Aakorinto 2:11.

NKENE SATANA HA HONGOLOLA AANTU

20. (a) Ehomono lyaSatana olya li lya sindana ngiini? (b) Omolwashike tatu vulu okutegelela kutya oondunge dhe olundji ohadhi kala dha fa dhu uka nenge nokuli dha fa dhi na ekwatho?

²⁰ Ino dhiladhila kutya omikalo dhaSatana dhokuhongolola aantu ohadhi kala aluhe dhi wetike. Ye omukotokeli a shiga ko. Okuza uule wethimbo lyoomvula dhomayuvi, omikalo dhe odha kala shili ngawo pamakoto onkee ano aantu oyendji nena inayi itaala nokuli kutya ye oko e li. Kuyo, uukolokoshi nuuwiinayi owo owala oonkalo dhopanshitwe ndhoka tadhi kala po sigo aluhe. Omikalo dhaSatana otadhi tsu kumwe naandhoka dhaawiliki yiilonga yomuyonena mboka tayi iningi ongaantu aawanawa, ihe otaa longo iilonga yiihuna yowala muufuthi. Ombimbeli otayi yelitha: “NaSatana mwene ti ishitukitha omuyengeli guuyelele.” (2 Aakorinto 11:14) Omolwashoka otatu vulu okutegelela kutya oondunge dhaSatana dhokuhongolola aantu olundji ohadhi kala dha fa dhu uka nenge nokuli dha fa dhi na ekwatho.

21. Ondunge yimwe yini po Satana ha longitha?

²¹ Oto ka dhimbulukwa kutya Satana okwi iningi ongaango kuume kaEva. Nopo ihe pamakoto okwe mu ningitha a longe sha shoka ye a dhiladhila kutya otashi mu etele uuwanawa. (Genesis 3:4-6) Nosho ngawo shi li nena. Pashiholelwa, naakalelipo ye yopantu, Satana ota gwaaleke aantu okutula tango iinima yomapangelo gopantu komeho nokuli pehala lyiilonga yawo kuKalunga. Shika osha vala ombepo yuukwashigwana, ndjoka ye eta iita iitilithi. Momathimbo ngaka opo ga piti po, Satana okwi inyengitha aantu okweeta po oondunge dhi ili nodhi ili mokukonga kwawo ombili negameno. Yimwe oyo Iigwanahangano. Ihe oye eta ngaa uuyuni wombili? Shivalelwe! Ihe shika osha li owala omukalo gwokuhongolola omadhiladhilo gaantu kelongekidho lyaKalunga ndyoka tali etele uuntu ombili, olyo uukwaniilwa we mbono tau ya u li miikaha yaJesus Kristus, “Omuwa-omunambili.”—Jesaja 9:5; Mateus 6:9, 10, faathanitha KB.

22. Ontseyo yini po Satana a hala oku tu keelela?

²² Ngele twa hala okutaamba omwenyo gwaaluhe, tu na okumona ontseyo yashili yokutseya Kalunga, Omwana-Omukwaniilwa gwe nUukwaniilwa we. (Johannes 17:3) Kala wo u shi shi shili kutya Satana Ondiaboli ina hala u mone ontseyo ndjika, nokutya ota ka longa shaa shoka ta vulu oku ku keelela waa yi mone. Ye ote ke shi ninga ngiini? Omukalo gumwe ogwo oku ku patanithitha, tashi vulika molupe lwesheko. Ombimbeli otayi tu lombwele: “Ayehe mboka ya hala okukala pakutila Kalunga muKristus Jesus, otaa ka hepekwa.”—2 Timoteus 3:12.

23. (a) Satana ota longitha nokuli ngiini ookuume naakwanezimo ye tu keelele? (b) Omolwashike waa na nando okwiigandja kepatanitho?

²³ Nokuli nookuume koye yopothingo nenge aakwanezimo lyoye otashi vulika taye ke ku lombwela nokutya yo inaye shi hokwa u konakone Omanyolo. Jesus Kristus mwene okwa londodha: “Naanegumbo lyomuntu mwene otaa ningi aatondi ye. Oongoka e hole he nenge yina e mu vulile ndje, oye ino opalela ndje; naangoka e hole omwana omumati nenge omwana omukadhona e mu vulile ndje, oye ino opalela ndje.” (Mateus 10:36, 37) Otashi vulika aanegumbo ya kambadhale oku ku keelela pauyukielela, oshoka inaa tseya oshili ndjoka onkumithi yi li mOmbimbeli. Ihe Kalunga ote ke ku tala ko ngiini ngele to etha po okukonakona oohapu dhe uuna to patanithwa? Nongele ngoye to etha po okukonakona, ongiini to ka kwathela ookuume naaholike yoye mboka opo yu uve ko kutya ontseyo yashili yOmbimbeli oyo oshinima shoka tashi ti omwenyo nenge eso? Ngele owa dhiginine mbyoka wi ilongo mOohapu dhaKalunga, ngiika konima oto ke ya nwetha mo yi ilonge wo oshili.

24. (a) Omikalo dhimwe dhini po Ondiaboli hayi longitha okukeelela aantu yaa mone ontseyo ndjoka tayi gandja omwenyo? (b) Oto dhiladhila osha simana ngiini okukonakona Oohapu dhaKalunga?

²⁴ Kombinga yimwe, Satana ota vulu oku ku fala momamakelo wi inyateke nongaaka waa opalele Kalunga. (1 Aakorinto 6:9-11) Nenge tashi vulika e ku dhiladhilithe kutya owi ipyakidhila noku na ethimbo lyokukonakona Ombimbeli. Ihe oto dhiladhila kutya ope na sha shoka sha simana shi vulithe okumona ontseyo yoludhi nduka? Ino pitika nando sha shi ku keelele waa mone ontseyo ndjika—ontseyo ndjoka tayi vulu oku ku fala u ka mone omwenyo gwaaluhe moparadisa kombanda yevi!

25. Ondiaboli oshike itayi ka vula oku tu ningila ngele tatu yi kondjitha aluhe?

²⁵ Ombimbeli otayi tu kumagidha: “Kondjitheni ondeveli.” Ngele to shi ningi, ‘ye ote ku yi ontuku.’ (Jakob 4:7) Otashi ti kutya Satana ota ka sa uunye noku ku etha u kale mombili ngele we mu ikandula? Aawe, ye ota ka kambadhala mukehe okampito e ku tompe u longe shoka a hala. Ihe ngele oto mu kondjitha aluhe, ke na mpoka ne ke shi pondola oku ku fala mo mondjila yuuniita naKalunga. Ano kala nuulaadhi wokumona ontseyo yOmbimbeli ndjoka ya simana monkalamwenyo nokuvulika kwaashoka wi ilonga. Shika osha pumbiwa unene ngele ino hala okuhongololwa kulimwe lyomomakoto gamwe gaSatana, elongelokalunga lyiifundja.

[Picture on page 16, 17]

Satana okwa li ngaa ta vulu okugandja omapangelo agehe ngoka gomuuyuni kuKristus ando oga li gaa shi ge?

[Picture on page 19]

Omufuthi nguka ina valwa omufuthi, ngaashi naanaa Ondiaboli inayi shitwa “ondiaboli”

[Picture on page 20, 21]

Iita megulu oye eta kutya Satana noondemoni dhe yu umbilwe kevi. Ngashingeyi oto mono iilanduliko

[Picture on page 24]

Ngoye oto ka mona omapataneko ngele to tsikile okukonakona Ombimbeli