Oshileshwa 4

Ondiaboli Oyo Lye?

Satana Ondiaboli—okwa zi peni? (1, 2)

Satana oha pukitha aantu ngiini? (3-7)

Omolwashike u na okukondjitha Ondiaboli? (7)

1. Oshitya “ondiaboli” otashi ti gumwe ngoka ha popi iifundja iinyanyalithi kombinga yomuntu omukwawo. “Satana” otashi ti omutondi nenge omupataneki. Mbika oyo iitya mbyoka tayi ulike komutondi omunene gwaKalunga. Tango, ye okwa li omuyengeli a gwanenena megulu pamwe naKalunga. Ihe konima yethimbo okwa kala i ihole unene nokwa li a hala egalikano ndyoka paulelalela li na okupewa Kalunga.—Mateus 4:8-10.

2. Omuyengeli nguka, Satana, okwa popi naEva okupitila meyoka. Moku mu lombwela iifundja, ye okwe mu ningitha kaa vulike kuKalunga. Kungeyi Satana okwa homona shoka tashi ithanwa “uunamapangelo” waKalunga, nenge ondondo ye e li Omukombandambanda. Satana okwa tula momalimbililo omukalo gwokupangela gwaKalunga ngele ogwo opala notagu etele tuu aalelwa Ye uuwanawa. Satana okwa ti wo kutya kapu na omuntu ta ka kala omudhiginini muKalunga. Mokuninga ngeyi, Satana okwi iningi ye mwene omutondi gwaKalunga. Omolwaashono i ithanwa Satana Ondiaboli.—Genesis 3:1-5; Job 1:8-11; Ehololo 12:9.

3. Satana ota kambadhala okuheka aantu ye mu galikane. (2 Aakorinto 11:3, 14) Omukalo gumwe ha pukitha nagwo aantu ogwo okupitila momalongelokalunga giifundja. Ngele elongelokalunga lyontumba otali longo iifundja kombinga yaKalunga, otali longo shili metsokumwe nelalakano lyaSatana. (Johannes 8:44) Aantu mboka ye li iilyo yomalongelokalunga giifundja otashi vulika yi itaala shili kutya yo otaya galikana Kalunga kashili. Ihe muushili wo wene otaya longele Satana. Oye ‘kalunga kuuyuni mbuka.’—2 Aakorinto 4:4.

4. Uumpulile owo omukalo gulwe natango Satana ha tula nagwo aantu mepangelo lye. Otashi vulika tayi ithana oombepo dhi ya gamene, dhi ehameke yalwe, dhi hunganeke onakuyiwa, nenge dhi longe iikumithalonga. Satana oye oonkondo dhuuwinayi dhi li konima yiilonga ayihe mbika. Opo tu nyanyudhe Kalunga, katu na okukala tu na sha nuumpulile.—Deuteronomium 18:10-12; Iilonga 19:18, 19.

5. Satana oha pukitha wo aantu okupitila muuntsa wopamihoko wa pitilila nomokugalikana omahangano gopapolotika. Yamwe otaya dhiladhila kutya oshigwana shawo nenge omuhoko gwawo ogwo omwaanawa gu vule dhilwe. Ihe shika kashi shi shoshili. (Iilonga 10:34, 35) Aantu yalwe oyi inekela omahangano gopapolotika opo ga kandule po omaupyakadhi guuntu. Mokuninga ngawo, yo otaye ekelehi Uukwaniilwa waKalunga. Owo auke u li ekandulopo lyomaupyakadhi getu.—Daniel 2:44.

6. Omukalo gulwe natango Satana ha pukitha nagwo aantu ogwo oku ya makela nomahalo guulunde. Jehova ote tu lombwele tu yande iilonga yuulunde molwaashoka ye okwa tseya kutya yo otayi ke tu etela oshiponga. (Aagalati 6:7, 8) Aantu yamwe otashi vulika ya hala u ye pamwe nayo miilonga ya tya ngaaka. Ihe dhimbulukwa, dhoshili, ngoka a hala u ninge iinima mbika oSatana.—1 Aakorinto 6:9, 10; 15:33.

7. Satana otashi vulika a longithe omahepeko nenge omapataneko opo e ku ethithe po Jehova. Otashi vulika yamwe yomaaholike yoye ya geye unene molwaashoka to konakona Ombimbeli. Yalwe otashi vulika ye ku sheke. Ihe okulye mbela u na ongunga yomwenyo gwoye? Satana okwa hala oku ku tilitha opo u ethe po okwiilonga kombinga yaJehova. Ino etha Satana a sindane! (Mateus 10:34-39; 1 Petrus 5:8, 9) Mokukondjitha Ondiaboli, ngoye oto vulu okunyanyudha Jehova nokuulika kutya oto yambidhidha uunamapangelo We.—Omayeletumbulo 27:11, NW.

[Pictures on page 9]

Omalongelokalunga giifundja, uumpulile nuukwashigwana otayi pukitha aantu

[Picture on page 9]

Kondjitha Satana mokutsikila nokwiilonga kombinga yaJehova