Ontopolwa 11

Omolwashike Kalunga E Ethele Uukolokoshi?

1. (a) Nena onkalo oya tya ngiini kombanda yevi? (b) Enyenyeto olini po li niwe kuyamwe?

APEHE NGAA mpono to tala muuyuni, oto mono iilonga yomuyonena, uutondwe nuupyakadhi. Olundji aantu mboka yaa na ondjo yasha oyo mboka taye ehamekwa. Aantu yamwe otaa pe Kalunga uusama. Otaa ti: ‘Ngele okwa kala Kalunga, ano molwashike ye e ethele iinima ayihe mbika iitilithi yi ningwe?’

2. (a) Oolye haa longo iinima yuukolokoshi? (b) Ongiini tashi vulika oshindji sheehameko kombanda yevi shi keelelwe?

² Ihe oolye haa longele yamwe iinima mbika yuukolokoshi? Aantu, haKalunga. Kalunga ota tokola uukolokoshi. Dhoshili, oshindji shomeehameko ge li kombanda yevi osha li tashi vulu okukeelelwa ando aantu oya vulikile kiipango yaKalunga. Ye okwe tu lombwele tu kale tu holathane. Ye okwi indike edhipago, eyako, oluhondelo, olwiho, uunkolwe nomayono gamwe gi ili ngono hage ehameke aantu. (Aaroma 13:9; Aaefeso 5:3, 18) Kalunga oku umbile Adam naEva nuuluyi nonolutu olukumithi naashihe shoka sha li tashi ya vulitha okunyanyukilwa omwenyo lelalela. Ye ka halele nando yo nenge oluvalo lwawo ye ehamekwe nenge ando ya mone iihuna.

3. (a) Olye e lile po uukolokoshi? (b) Oshike tashi holola kutya Adam naEva oya li taa vulu okuthikamena emakelo lyaSatana?

³ Osha li Satana Ondiaboli ngoka a tamekele uukolokoshi kombanda yevi. Ihe Adam naEva oya li wo aasama. Kaya li nando aankundi kutya ando oya li ya nyengwa okuthikamena Ondiaboli sho ye ya makele. Oya li taa vulu okulombwela Satana a ‘ze po’ ngaashi tuu sha ka ningwa komulumentu ngoka a li u udhithwa, Jesus. (Mateus 4:10) Ihe yo kaya li ye shi ninga. Onkee ano yo kaya li we ya gwanenena. Aanona yawo ayehe, twa kwatelwa mo wo, oya thigulula okwaanegwaneneno, hoka kwe eta po omikithi, oluhodhi neso. (Aaroma 5:12) Ihe molwashike Kalunga e ethele omeehameko ga tsikile?

4. Oshike tashi tu kwatha okuuva ko molwashike Kalunga omunahole a li a vula okweetha uukolokoshi okathimbo?

⁴ Otashi vulika tango omuntu a dhiladhile kutya itashi vulika kwa li pu kale omatompelo omawanawa kuKalunga okweetha omeehameko agehe ngoka ga hepeke aantu momathelemumvo agehe ga piti po. Ihe etokolo ndyono olyu uka tuu? Aakuluntu mboka ye hole aanona yawo kaye na nando esiku limwe ye ethele ya tandwe etando lye ehameka okukandula po uupyakadhi wontumba nowongandi? Eeno, eethiwo lyuuwehame wopokathimbo, olundji olya vulitha aanona ya kale ye na uukolele uuwanawa konima monkalamwenyo yawo. Eethiwo lyuukolokoshi kuKalunga olye eta po uuwanawa uni po?

OMPATA YI NA OSHILONGA OYA LI YI NA OKUHULITHWA PO

5. (a) Ongiini Satana a patana shoka sha popiwa kuKalunga? (b) Satana oku uvanekele Eva shike?

⁵ Oshipotha shuunandumbo naKalunga muEden osha tukulutha ompata nenge epulo li na oshilonga. Otwa pumbwa oku yi konakona tu uve ko molwashike Kalunga e ethele uukolokoshi. Jehova okwa lombwele Adam kaa lye komuti gwontumba moshikunino. Oshike sha li sha ka ningwa po ngele Adam a li kugwo? Kalunga okwa ti: “U na okusa.” (Genesis 2:17) Ihe Satana okwa popi shi ili lela. Ye okwa lombwele omukiintu gwaAdam, Eva, a lye komuti gwi indikwa. “Aawe, mu valelwe mu se,” Satana osho a ti. Dhoshili, opo nduno ye a lombwele Eva: “Oshoka Kalunga oku na owino, shimpa tamu gu li, omeho geni taga tonata notamu fe Kalunga okudhimbulula—okutseya—uuwanawa nuuwinayi.”—Genesis 3:1-5.

6. (a) Omolwashike Eva inaa vulika kuKalunga? (b) Osha li tashi ti ngiini sho yo ya li komuti gwi indikwa?

⁶ Eva ina vulika kuKalunga nokwa li komuti gwi indikwa. Omolwashike? Eva okwi itaala Satana. Okwa dhiladhila pakwiihola mwene kutya okwaavulika kuKalunga otashi mu etele uuwanawa. Okwa dhiladhila kutya ye nenge Adam itaa kala we nokutegelelelwa sha kuKalunga. Itaa ka pumbwa we okwiigandja kiipango ye. Oya li taa vulu okwiiyuthila yo yene “uuwanawa nuuwinayi.” Adam okwi itula muEva nokwa li wo komuti gwi indikwa. Okupopya uulunde wopetameko womuntu mokuyona kuKalunga, etyokosha lyopevi moThe Jerusalem Bible otali ti: “Owa li ekondjo okwiitokolela mwene shoka oshiwanawa naashoka oshiwinayi, nokulonga naanaa ngawo, nena owa li epopyo lyokukala ya manguluka thiluthilu komikalo omiwanawa . . . Uulunde wotango owa li ehomono kepangelo lyaKalunga ndyoka enenenene.” Sha hala kutya, owa li ehomono kuuthemba waKalunga okukala omupangeli nenge omukuluntu gwaantu gwopombandambanda.

7. (a) Ompata yini po ya tukuluthwa kokwaavulika kwomuntu? (b) Omapulo geni po ge na sha nompata ndjika ge na okuyamukulwa?

⁷ Ano mokulya oshiimati shi indikwa, Adam naEva oyi ikutha yo yene kohi yepangelo lyaKalunga. Yo oya li ya landula edhiladhilo lyawo yene, okulonga “uuwanawa” nenge “uuwinayi” pamatokolo gawo yene. Ano ompata nenge epulo li na oshilonga ndyoka lya tukuluthwa po olya li: Kalunga oku na tuu uuthemba okukala omupangeli gwaantu gwopombandambanda? Noohapu dhimwe, Jehova oye Ngoka e na okutokola shoka oshiwanawa nenge oshiwinayi kaantu? Oye Ngoka e na okuutha iilonga nenge omikalo ndhoka dhu uka naandhoka inaadhi uka? Nenge omuntu ta vulu okwiipangela ye mwene nawa? Omukalo gwokupangela ogwalye naanaa gwo opalela? Otashi vulika tuu aantu, mewiliko lyaSatana ihaali monika, yi ipangele nawa nopwaa na ewiliko lyaJehova? Nenge eenditho lyaKalunga olya pumbiwa sigo tuu pwa dhikwa epangelo lyuuyuki ndyoka tali eta ombili tayi kalelele kombanda yevi? Omapulo agehe ga tya ngaaka oga tukuluthwa po mehomono ndika kepangelo lyaKalunga enenenene, kuuthemba we okukala omupangeli oye awike gwaantu gwopombandambanda.

8. Omolwashike Jehova inaa hanagula po aanashipotha mbala mokathimbo hoka?

⁸ Nokuli Jehova okwa li ta vulu okuhanagula po aanashipotha mbeya yatatu konima yoshipotha. Kapwa li nando omalimbililo gasha mwaashono kutya ye oku na oonkondo e vule Satana nenge Adam naEva. Ihe ando okwe ya hanagulile po, ando shika inashi hulitha po oshinima pamukalo gwolela. Pashiholelwa, ando inashi yamukula epulo ngele aantu otaa vulu okwiipangela yo yene neenditho nawa nopwaa na ekwatho lyaKalunga. Ano Jehova okwe etha ethimbo lyontumba a hulithe po ompata yi na oshilonga ndjoka ya li ya tukuluthwa po.

OMPATA OTAYI HULITHWA PO

9, 10. Oshike sha li oshilanduliko shoonkambadhala dhaantu okwiipangela yo yene nopwaa na ewiliko lyaKalunga?

⁹ Nena sho pwa piti ethimbo, otu wete shike? Ngoye oto ti ngiini? Oomvula 6 000 dhondjokonona ndhoka dha piti po odha holola kutya aantu otaa vulu okwiipangela yo yene neenditho nawa nopwaa na ewiliko lyaKalunga? Aantu oya gandja tuu epangelo ewanawa ndyoka li li elaleko nuuyamba nolyelago kwaayehe? Nenge ondjokonona otayi holola tuu kutya oohapu dhomuprofeti Jeremia odhu uka: “Ihadhi kala momapangelo ge mwene nenge moonkondo dhomulumentu te ende, ku uthe ando oonkatu dhe, e dhi fale kethikilo”?—Jeremia 10:23.

¹⁰ Mondjokonona ayihe opwa kala nokukambadhalwa nomapangelo gi ili nogi ili, ihe inapu kala nando olimwe ndyoka ando lye etele aapangelwa yalyo ayehe egameno nelago lyashili. Aantu yamwe otayu ulike komandhindhiliko gehumokomeho. Ihe omuntu ota vulu tuu okupopya ehumokomeho lyashili ngele uutati noshikuti ya pingenwa po komboma yoatoma, nomanga uuyuni u li po nena metilo enene molwiita ishewe yuuyuni? Ehumokomeho olyashike ngele aantu otaa endaenda komwedhi ihe taa nyengwa okukala pamwe nombili kombanda yevi? Otashi etele omuntu uuwanawa washike okutunga omagumbo ge na iinima yoshinanena yoludhi kehe omanga aanegumbo mboka ye li mo taa topagulwa kumwe komaupyakadhi? Iihuna momapandaanda, omahanagulo giiniwe nogoomwenyo nuukwaanompango hoka ku li apehe, otayi vulu tuu okwiitadhelwa? Nandonando! Ihe ayihe mbyoka oshilanduliko shoonkambadhala dhaantu okwiipangela yo yene nopwaa na ekwatho lyaKalunga.—Omayeletumbulo 19:3.

11. Ano osha yela kutya aantu oya pumbwa shike?

¹¹ Uunzapo owu na okukala wa yelela ayehe. Oonkambadhala dhomuntu okwiipangela mwene a manguluke muKalunga, odha nyengelelwa. Odhe eta eehamo enene maantu. “Omuntu ta pangele omukwawo noku mu pangelela oshiponga,” Ombimbeli osho tayi yelitha. (Omuuvithi 8:9) Osha yela lela kutya aantu oya pumbwa ewiliko lyaKalunga okuukitha iinima yawo. Ngaashi naanaa Kalunga a shiti omuntu nompumbwe yokulya iikulya nokunwa omeya, osho tuu omuntu a shitwa nompumbwe yokuvulika kiipango yaKalunga. Ngele omuntu ta kala kee na ko nasha niipango yaKalunga, ota ka gwila muudhigu, ngaashi naanaa te ke ehama ngele ta kala kee na ko nasha niikulya nomeya mbyoka ya pumbiwa kolutu lwe.—Omayeletumbulo 3:5, 6.

OMOLWASHIKE OLULE NGAWO?

12. Omolwashike Kalunga e ethele ethimbo ele ngawo okuhulitha po ompata?

¹² Ihe otashi vulika omuntu ta pula: ‘Omolwashike Kalunga e ethele ethimbo li thike mpono, oomvula 6 000 lwaampono, okuhulitha po ompata ndjika? Kaya li tayi vulu okuhulithwa po nale pamukalo gwa gwana?’ Kadhi shi dhoshili. Ando Kalunga okwe shi ningile nale, ando osha kala owala uusama kutya aantu inaa pewa ethimbo lya gwana okuyelekela. Ihe ngashingeyi aantu oya kala ye na ethimbo lya pitilila lya li lye ya gwanena okweeta po epangelo ndyoka tali gwanitha oompumbwe dhaapangelwa yalyo ayehe, nosho wo okulonga kwawo okumona uunongononi mboka tau vulu okweetela ayehe uuwanawa. Momathelemumvo agehe ga piti po aantu oya kala nokukambadhala nomukalo gwepangelo kehe. Nokoshitopolwa shuunongononi oya humu komeho paundhindhilikwedhi. Oya longitha oatoma noye ende komwedhi. Ihe oshilanduliko oshike? Oshe eta po tuu onkalelo ompe onkumithi ndjoka yi li uuyamba kuuntu?

13. (a) Nena onkalo oya tya ngiini nonando uunongononi waantu wa humu ko? (b) Otayi ulike naanaa shike?

¹³ Nandonando! Pehala lyaashono, opu na owala iiponga nomaupyakadhi ngoka inaaga kala ko nale kombanda yevi. Dhoshili, iilonga yomuyonena, enyateko, iita, etekopo lyomagumbo nomaupyakadhi gamwe gi ili oyo ya ningi nena iiponga iinenenene, onkene aanongononi oyi itaala kutya okukalapo kwomuntu oku li moshiponga. Eeno, konima yoomvula dhi thike po 6 000 lwaampono dhiiningomwa moshinima sheipangelo mwene, nokonima sho pwa thikwa ponkatu yopombanda “mehumokomeho” lyopaunongononi, ngashingeyi uuntu owa taalela eiyonopo mwene! Alikana osha yela ngiini kutya aantu itaa vulu okwiipangela yo yene noyaa na Kalunga! Niishewe, kapu na gumwe ta vulu okunyenyeta kutya Kalunga ine etha ethimbo lya gwana okuhulitha po ompata ndjika.

14. Omolwashike tu na okukonakona ompata yimwe yi na oshilonga ndjoka ya tukuluthwa kuSatana?

¹⁴ Kalunga okwa li e na shili omatompelo omawanawa okweethela aantu, kohi yepangelo lyaSatana, ye ete uukolokoshi mbono wa kala po olule ngawo. Satana okwa tukulutha ompata yimwe natango koshipotha she ndjoka ya li tayi pula ethimbo okuhulithwa po. Ngele tatu konakona ompata ndjika, otashi ke tu kwatha okuuva ko molwashike Kalunga e ethele uukolokoshi. Unene tuu, u na okukala u na ohokwe mompata ndjika, oshoka ongoye mwene u na sha nayo.

[Picture on page 100]

Netompelo ewanawa, aakuluntu otaye etha okanona kawo okaholike ka tandwe etando lye ehama. Kalunga wo okwa li e na omatompelo omawanawa okweetha aantu ye ehame okathimbo

[Picture on page 101]

Mokulya oshiimati shi indikwa, Adam naEva oye ekelehi epangelo lyaKalunga. Oya li ya tameke okwiitokolela yo yene shoka oshiwanawa naashoka oshiwinayi

[Pictures on page 103]

Ngaashi naanaa omuntu a shitwa nompumbwe yokulya iikulya nokunwa omeya, okwa shitwa wo nompumbwe yokuwilikwa kuKalunga