Ontopolwa 21
Esiku lyEpangulo noKonima Yalyo
1. Oshike shi li etaloko lyaapuhe kombinga yEsiku lyEpangulo?
ETHANO LINI PO iitya Esiku lyEpangulo ya pendutha momadhiladhilo goye? Yamwe otaa dhiladhila oshipangelapundi oshinene nokomeho yasho omukweyo omuleeleka gwaayumuki. Uuna omuntu kehe te ende po poshipangelapundi, ye ota pangulwa pailonga ye yomethimbo lyonale, mbyoka ayihe ya nyolwa membo lyOmupanguli. Pailonga ye omuntu ota tumwa a ye kegulu nenge koheli ya hanya.
2. (a) Olye a longekidha Esiku lyEpangulo? (b) Olye a tulwa po kuye oye omupanguli?
2 Ihe Ombimbeli otayi gandja ethano limwe li ili lela lyEsiku lEpangulo. Lyo kali shi esiku ndyoka li na okutilika. Tala shoka Ombimbeli tayi ti kombinga yaKalunga: “Oshoka i iyuthile esiku lyokupangula uuyuni, te u pangulitha uuyuuki komulumentu tuu ngoka, ye mwene e mu hogolola, sho kwe mu yumudha, oye nota hala okupa ayehe eitaalo.” (Iilonga 17:31) Dhoshili, omupanguli ngoka a langekwa kuKalunga, oJesus Kristus.
3. (a) Omolwashike tatu vulu okukala nuushili kutya epangulo lyaKristus otali ka kala eyuki? (b) Opashike aantu taa ka pangulwa?
3 Otatu vulu okukala nuushili kutya Kristus ota ka kala e na epangulo lye eleka nolyu uka. Ehunganeko kombinga ye muJesaja 11:3, 4 otali tu shilipaleke mwaashika. Ano mekondjithathano lyomadhiladhilo gaapuhe, ye ita ka pangula aantu pamayono gawo gonale, ngoka tashi vulika oyendji ye ga longo mokwaa shi sha. Ombimbeli otayi yelitha kutya peso omuntu okwa manguluka muulunde mboka e u longo. Yo otayi ti: “Oongoka a sa, oye a kwatunuka muulunde.” (Aaroma 6:7) Shika otashi ti kutya omuyumudhwa ota ka pangulwa pailonga mbyoka ta longo pethimbo lyEsiku lyEpangulo, hamwaashoka a longele omanga ye inaa sa.
4. (a) Esiku lyEpangulo otali ka kala uule u thike peni? (b) Oolye taa ka pangula pamwe naKristus?
4 Onkee ano Esiku lyEpangulo kali shi esiku lyo lyene lyoowili 24. Ombimbeli otayi shi holola sha yela sho yo tayi popi kombinga yaamboka taa ka pangula pamwe naJesus Kristus. (1 Aakorinto 6:1-3) “Ongame nda mono iipangelapundi,” osho omunyoli gwOmbimbeli ta ti, “oyo ya kuutumba ko noya pewa epangulo lyokupangula.” Aapanguli mbano oyo aalanduli aadhiginini aagwayekwa yaKristus, mboka kuyo Ombimbeli tayi tsikile tayi ti: “Oyo ya ningi omwenyo noya lele [oyo aakwaniilwa] pamwe naKristus omimvo dheyuvi.” Esiku lyEpangulo otali ka kala ano uule woomvula 1 000. Lyo olyo ngaa ethimbo lyoomvula 1 000 pethimbo ndyoka Kristus naalanduli ye aadhiginini aagwayekwa 144 000, taa ka pangela “evi epe” oyo “omagulu omape.”—Ehololo 20:4, 6, faathanitha NW; 2 Petrus 3:13.
5, 6. (a) Omunyoli gwEpsalmi mOmbimbeli ota hokolola ngiini Esiku lyEpangulo? (b) Omwenyo gwokombanda yevi otagu ka kala ngiini pethimbo lyEsiku lyEpangulo?
5 Tala komapandja ngaka. Otaga pe omuntu edhiladhilo kwaashoka nkene Esiku lyEpangulo tali ka kala ekumithi kuuntu. Omunyoli gwEpsalmi mOmbimbeli okwa nyola kombinga yethimbo ndyoka ewanawa: “Nelundu nali nyanyukwe noshaa shoka shi li ko, nomiti adhihe dhomomugulu nadhi ligole okoshipala shOmuwa, oshoka oye te ya, oshoka te ya okupangula evi; ta ka pangula evi alihe pauyuuki niigwana pashili.”—Epsalmi 96:12, 13.
6 Pethimbo lyEsiku lyEpangulo mboka taa hupu puHarmagedon otaa ka longa okuninga evi oparadisa. Omoparadisa tuu ndjika oonakusa taa ka hambelelwa ngele taa galuka. (Lukas 23:43) Enyanyu otali ka kala enene ngiini uuna omaukwanegumbo ngoka ga kala olule ga topaulwa kumwe keso, taga ka hangana ishewe! Eeno, otashi kala ngiini ano oshinyanyudhi okukala mombili, okunyanyukilwa uukolele uuwanawa nokutaamba elongo kombinga yoompangela dhaKalunga! Ombimbeli otayi ti: “Uuna omapangulo goye taga adha evi, oonakukala moshilongo otaye ki ilonga okutseya uuyuki.” (Jesaja 26:9, NW) Pethimbo lyEsiku lyEpangulo aantu ayehe otaye ki ilonga Jehova, notaa ka mona ompito yu udha okuvulika kuye noku mu longela.
7. Pethimbo lyEsiku lyEpangulo, oshike tashi ka ningilwa aantu mboka taa hogolola okulongela Kalunga naamboka taa tindi oku shi ninga?
7 Oshi li kohi yoonkalo ndhoka dhoparadisa kutya Jesus Kristus naakwaniilwa ye 144 000 pamwe naye taa ka pangula uuntu. Aantu mboka ya hogolola okulongela Jehova, ano otaa ka vula okutaamba omwenyo gwaaluhe. Ihe nokuli moonkalo oombwanawa lela, yamwe otaa ka tinda okulongela Kalunga. Enyolo otali ti: “Omukeenakalunga nando na silwe ohenda, iti ilongo okutseya uuyuuki; mevi lyomikalo dhuuyuuki ohaa kolokosha.” (Jesaja 26:10) Konima sho aakolokoshi ya tya ngaaka ya pewa ompito yu udha okulundulula omikalo dhawo nokwiilonga uuyuki, ano yo otaa ka hanagulwa po. Nokuli yamwe otaa ka dhipagwa omanga Esiku lyEpangulo inaali hula po. (Jesaja 65:20) Itaa ka ethiwa ya tsikile okukala po okunyateka oparadisa kombinga yevi.
8. Oshike mbela sha li onkalo yopauyogoki yaalumentu yomuSodom?
8 Otashi ka kala shili uuthembahenda uukumithi okuyumuka kombanda yevi pethimbo lyEsiku enene lyaJehova lyEpangulo. Ihe Ombimbeli otayi holola kutya otashi ka kala uuthembahenda mboka itaau ka nyanyukilwa kwaayehe. Pashiholelwa, dhiladhila kaantu yomuSodom shonale. Ombimbeli otayi ti kutya aalumentu yomuSodom oya kambadhala okulala ‘naalumentu’ mboka ya talele po Lot. Eihumbato lyawo lyokwaanuuyogoki olya li lya kwata miiti ngaaka opo nokuli sho yo ya tsikithwa pashikumitha, ‘oya kala taa kongo osheelo [shegumbo] osima’ opo yo ya vule okuya mo ya ka lale naayenda yaLot.—Genesis 19:4-11, OB-1986.
9, 10. Omanyolo otaga ulike shike kombinga yetegameno lyokuyumuka kaantu mboka aakolokoshi yomuSodom?
9 Mbela aantu aakolokoshi ya tya ngaaka aanyanyalithi otaa ka yumuka ngaa pethimbo lyEsiku lyEpangulo? Omanyolo otaga holola kutya osha yela mo kutya yo itaa ka yumuka. Pashiholelwa, gumwe gwomaalongwa yaJesus a nwethwa mo, Judas, okwa nyola tango kombinga yaayengeli mboka ya thigi po ehala lyawo megulu okuya ya lale naana aakadhona yaantu. Opo nduno ye okwa gwedha po: “Ngashika Sodom naGomorra niilando yomuushiinda wayo ya hondele komukalo gwaamboka noyi igandja muuhalu wonyama, oombuka womikalo dhaa shi dhuushitwe, oye li po endhindhiliko lyi igalala, sho taa hepekithwa ehepeko lyomulilo gwaaluhe.” (Judas 6, 7; Genesis 6:1, 2) Eeno, molwokwaanuuyogoki kwawo kwa pitilila aantu yomuSodom niilando yomuushiinda oya mono ehanagulo moka sha yela mo kutya yo itaa ka yumuka we nando.—2 Petrus 2:4-6, 9, 10a.
10 Jesus naye wo okwa holola kutya Aasodom otashi vulika yaa ka yumuke. Sho ye a popi kombinga yaKapernaum, shimwe shomiilando moka ye a longo iikumithalonga, ye okwa ti: “Ando muSodom mwa li mwa ningilwa iilonga mbyoka yoonkondo ya ningilwa mungoye [Kapernaum], andola ya thikama nonena. Ihe otandi mú lombwele: Evi lyaSodom otali ningi ihwepo li ku vule esiku ndyoka lyepangulo.” (Mateus 11:22-24) Jesus okwa thindi egwano lyokupewa uusama ndika lyaantu yomuKapernaum mokutya kutya otashi ka kala ihwepo kAasodom yonale mboka, momadhiladhilo gaapulakeni ye Aaisrael, ya li lelalela inaaya gwana okutaamba eyumuko mEsiku lyEpangulo.
11. Omolwashike tashi ka kala oshipu noonkondo ‘kaayuuki’ mEsiku lyEpangulo shi vulithe kukehe gumwe ‘gwomaalunde’?
11 Tse otatu ka kala nduno twa hala okulonga shili ashihe shoka tatu vulu opo tu kale nomwenyo ngaaka tu gwane okuyumuka. Ihe otashi vulika ku pulwe natango: Itashi ka kala nando mbela oshidhigu unene kuyamwe yomaasi aayumuki okwiilonga uuyuki noku wu longa shi vulithe shoka tashi ka kala kuyalwe? Dhiladhila owala kwaashino tashi landula: Manga aantu “aayuuki” ya tya ngaaka ngaashi Abraham, Isaak, Job, Debora, Rut naDaniel inaaya sa, yo ayehe oya kala ya tegelela okuya kwaMessias. Alikana yo otaa ka kala ya nyanyukwa ngiini oku ki ilonga kombinga ye pethimbo lyEsiku lyEpangulo, nokwiilonga kutya ye ota pangele megulu! Ano pethimbo mpono otashi ka kala oshipu noonkondo kaantu mboka “aayuuki” okulonga uuyuki shi vulithe shoka tashi ka kala kukehe gumwe ‘gwomaalunde’ mboka taa ka yumuka.—Iilonga 24:15.
OKUYUMUKILA “OMWENYO” ‘NEPANGULO’
12. PaJohannes 5:28-30, oolye taa ‘yumukile omwenyo’ noolye taa ‘yumukile epangulo’?
12 Sho Jesus a hokolola onkalo yEsiku lyEpangulo, ye okwa ti: “Ayehe mboka ya kala moombila, otaa uvu ewi lye, e tamu holoka mo mboka ya longa uuwanawa okuyumukila omwenyo, naamboka ya longa uuwinayi okuyumukila epangulo . . . Ongaashi tandi uvu, osho tandi pangula; nepangulo lyandje olyu uka, oshoka ongame itandi landula ehalo lyandje mwene, aawe, ehalo lyaanguka a tuma ndje.” (Johannes 5:28-30) ‘Okuyumukila omwenyo nokuyumukila epangulo’ huka oshike? Noolye taye ku mono?
13. Otashi ti ngiini omuntu ngele ta ‘yumukile omwenyo’?
13 Otwa mono sha yela kutya uuna oonakusa taa zi mo moombila, yo itaa pangulwa pailonga yawo yomethimbo lya piti. Ihe yo otaa pangulwa pailonga mbyoka ya longo pethimbo lyEsiku lyEpangulo. Ano sho Jesus a popi “mboka ya longa uuwanawa” “naamboka ya longa uuwinayi,” ye oku ulike kuuwanawa nokuuwinayi mboka ya li taa ka longa pethimbo lyEsiku lyEpangulo. Molwuuwanawa mboka ya longo, oyendji yomaayumuki mboka otaa ka gwanenena pantu kehulilo lyoomvula 1 000 dhEsiku lyEpangulo. Okuyumuka kwawo otaku ka kala ano “okuyumukila omwenyo,” oshoka yo otaa ka thika momwenyo gwa gwanenena gwaa na oondjo.
14. Otashi ti ngiini omuntu ngele ta ‘yumukile epangulo’?
14 Ihe ongiini kwaamboka ya “longa uuwinayi” pethimbo lyEsiku lyEpangulo? Okuyumuka kwawo otaku ka kala “okuyumukila epangulo.” Otashi ti ngiini? Otashi ti okupangulilwa eso. Aantu mbaka otaa ka hanagulwa po ano kutya nduno opethimbo nenge okehulilo lyEsiku lyEpangulo. Shika omolwashoka yo ya longo uuwinayi, yo oya tindi owina okwiilonga uuyuki noku u longa.
UUNA ESIKU LYEPANGULO TALI TAMEKE
15. Oshike tashi ningwa po mbala omanga Esiku lyEpangulo inaali tameka?
15 Omuyapostoli Johannes okwa mono emoniko kwaashoka tashi ningwa mbala komeho yEsiku lyEpangulo. Ye okwa nyola: “Ongame nda mono oshipangelapundi oshinene oshitokele naanguka a kuutumba ko, oye ngoka evi negulu lya yi ontuku oshipala she, . . . Ongame nonda mono oonakusa, aanene naashona ya thikama montaneho yoshipangelapundi, . . . oonakusa noya [pangulwa].” (Ehololo 20:11, 12) Omanga Esiku lyEpangulo inaali tameka, onkalelo yongashingeyi ndjika ya thikama ‘mevi negulu,’ otayi hulu po. Aantu owala mboka taa longele Kalunga, taa ka hupa, omanga aakolokoshi ayehe taa ka hanagulwa po puHarmagedon.—1 Johannes 2:17.
16. (a) Kakele koonakusa, oolye ishewe taa ka pangulwa pethimbo lyEsiku lyEpangulo? (b) Omushike yo taa ka pangulwa?
16 Onkee ano ha“oonakusa” aayumudhwa owala taa ka pangulwa pethimbo lyEsiku lyEpangulo. “Aanamwenyo” mboka taa hupu puHarmagedon, opamwe naanona yawo, nayo wo otaa ka pangulwa. (2 Timoteus 4:1) Memoniko lye, Johannes okwa mono nkene yo taa pangulwa. “Nooraamata odha pandjwa,” osho a nyola. “Oonakusa noya pangulilwa mbyoka ya nyolelwa moraamata piilonga yawo. Efuta olya gandja mo oonakusa yalyo, eso noshaasi oya gandja mo oonakusa yayo, oyo noya pangulilwa okehe tuu ngoka piilonga yawo.”—Ehololo 20:12, 13.
17. “Ooraamata” oshike moka tamu ka pangulwa “aanamwenyo” “naasi”?
17 “Ooraamata” ndhoka dha pandjwa oshike padho “oonakusa” osho wo “aanamwenyo” taa pangulwa? Paushili, dho odhindji shaa shi owala Ombimbeli Ondjapuki ndjika tu na ngashingeyi. Odho omanyolo nenge omambo ga nwethwa mo ngoka ge na oompango nomalongo gaJehova. Ayehe kombanda yevi otaa ka vula okwiilonga ehalo lyaKalunga moku ka lesha omanyolo ngoka. Opo nduno ayehe kombanda yevi taa ka pangulwa paompango nopalongo ‘mooraamata’ ndhika. Mboka taa vulika kwaambyono ya nyolwa mo, otaa ka mona uuwanawa wekuliloyambo lyaKristus nokweendela ko kashona nakashona sigo egwaneneno lyopantu.
18. (a) Onkalo otayi ka kala ngiini kehulilo lyEsiku lyEpangulo? (b) Ongiini “aasi” ya ningi omwenyo kehulilo lyoomvula 1 000?
18 Kehulilo lyoomvula 1 000 dhEsiku lyEpangulo itapu ka kala we nando ogumwe kombanda yevi monkalo yeso molwuulunde waAdam. Ayehe otaa ka kala shili momwenyo gwopandunge gu udha. Ombimbeli otayi ulike kwaashoka sho tayi ti: “Aasi ooyakwawo [kakele ko 144 000 mboka taa yi megulu] inaa ninga omwenyo, sigo omimvo ndhoka dheyuvi dha hulu po.” (Ehololo 20:5) Eulikilo mpaka ‘kaasi ooyakwawo’ itashi ti kutya yamwe otaa yumudhwa kehulilo lyoomvula 1 000 dhEsiku lyEpangulo. Ihe otashi ti kutya ayehe oya ningi omwenyo molwashono yo oya thiki hugunina megwaneneno lyopantu. Yo otaa ka kala monkalo ya gwanenena moka wo mwa li Adam naEva moshikunino shaEden. Opo nduno tapu ka ningwa shike?
KONIMA YESIKU LYEPANGULO
19. Kehulilo lyEsiku lyEpangulo Kristus ota ningi shike?
19 Ngele Jesus Kristus a longo ashihe shoka Kalunga e mu pele e shi longe, ye ota ka “gandja [uukwaniilwa] kuKalunga naHe.” Shika okehulilo lyoomvula 1 000 dhEsiku lyEpangulo. Pethimbo ndyoka aatondi ayehe otaa ka kala ya hanagulwa po. Omutondi gwahugunina oye eso ndyoka lya thigululwa kuAdam. Otali ka hanagulwa po! Opo nduno Uukwaniilwa otau ka ninga eliko lyaJehova Kalunga mwene. Ye ote ke u pangela shu ukilila oye Omukwaniilwa.—1 Aakorinto 15:24-28, faathanitha KB.
20. (a) Jehova ota ka ninga shike okuutha omadhina gaamboka ye na okunyolelwa “moraamata yomwenyo”? (b) Omolwashike emakelo lyahugunina kuuntu lye eleka?
20 Ongiini Jehova tu utha omadhina gaamboka ye na okunyolelwa “moraamata yomwenyo”? (Ehololo 20:12, 15) Omokumakelwa kwuuntu. Dhimbulukwa kutya Adam naEva oya nyengwa pethimbo ndyoka lyemakelo nonokutya Job okwa kala muudhiginini we sho a makelwa. Ihe aantu oyendji mboka taa ka kala ko sigo okehulilo lyoomvula 1 000, eitaalo lyawo kalya li natango lya makelwa. Komeho yokuyumuka kwawo kaya li ya tseya oompangela dhaJehova. Oya li ombinga yonkalelo yuukolokoshi yaSatana; yo oya li “aalunde.” Nokonima yokuyumuka kwawo osha li oshipu kuyo okulongela Jehova molwashoka yo oya kala mOparadisa nopwaa na epataneko lyasha lyOndiaboli. Ihe aantu mbaka omamiliyona omayuvi, mboka ya gwanenena pethimbo ndyoka, otaa ka longela tuu Jehova ngele Satana a pewa ompito okukambadhala oku ya keelela yaa shi ninge? Satana ota vulu tuu oku ya ningila shoka ye a ningile Adam naEva mbeya ya li ya gwanenena?
21. (a) Ongiini Jehova te ke etha uuntu u makelwe? (b) Ngele emakelo lya gwanithwa, oshike tashi ka ningilwa ayehe mboka ya li mo?
21 Okuyamukula omapulo ngoka, Jehova ota mangulula Satana noompwidhuli dhe ya ze molumbogo moka ya kala uule woomvula 1 000. Oshilanduliko oshike? Ombimbeli otayi holola kutya Satana ota pondola okwiitekitha aantu yamwe kuJehova. Omwaalu gwawo ogu thike “pehekevi lyopefuta,” shoka tashi ti kutya omwaalu inaagu uthwa. Konima yemakelo ndika, Satana noompwidhuli dhe naayehe mboka ya nyengwa memakelo, oyu umbilwa “mefuta lyomulilo” lyopathaneko, eso etiyali (lyaaluhe). (Ehololo 20:7-10, 15) Ihe mboka omadhina gawo ga nyolelwa “moraamata yomwenyo” otaa ka kala po moparadisa ombwanawa kombanda yevi. Uushili mbuka kutya omadhina gawo oga nyolelwa “moraamata yomwenyo” otashi ti kutya Jehova ote ya pangula kutya oyo aayuki ya gwanenena momutima, moondunge nomolutu nongaaka yo oya gwana okukala sigo aluhe moparadisa kombanda yevi.
ESIKU LYEPANGULO LYONGASHINGEYI
22. Tu na okuhupa mushike ngashingeyi ngele twa hala okumona Esiku lyEpangulo nemakelo lyuuntu lyahugunina?
22 Ombimbeli otayi gandja ano uuyelele kombinga yiiningomwa mbyoka tayi ka ningwa konima yoomvula dhi vulithe 1 000 monakuyiwa. Notayi holola kutya tse katu na etompelo lyasha okutila onakuyiwa. Ihe epulo olyo: Oto ka kala po okunyanyukilwa iinima iiwanawa mbyoka Jehova Kalunga a pungulila aantu? Shika oshi ikolelela mwaashoka ngele oto ka hupa mesiku lyepangulo ndika lya tetekele, “esiku lyepangulo nolyehanagulo lyaantu aakaanakonashanakalunga” lyongashingeyi.—2 Petrus 3:7.
23. (a) Omoongundu mbali dhini po ngashingeyi aantu taa yoololwa? (b) Oshike tashi ka ningilwa ongundu kehe, nomolwashike?
23 Eeno, okuza pokugaluka kwaKristus nokukuutumba koshipangelapundi she megulu, uuntu auhe otau pangulwa. “Esiku lyepangulo” ndika lyongashingeyi olya tetekele Esiku lyEpangulo lyoomvula 1 000. Pethimbo lyepangulo lyongashingeyi aantu otaa yoololwa ngaashi “iikombo” kolumoho lwaKristus nenge “oonzi” kolulyo lwe. “Iikombo” otayi ka hanagulwa po molwashoka yo inayi kwatha ‘aamwahe’ aagwayekwa yaKristus moshilonga shawo kuKalunga. Mokweenda kwethimbo, “iikombo” mbika oya holola kutya yo aalunde inaayi itedhulula, aakolokoshi, noya kukuta miilonga yawo yokwaanuuyuki. Kombinga onkwawo, “oonzi” otadhi ka lalekwa nuuyamba nomwenyo kohi yepangelo lyUukwaniilwa molwashoka yo oya ambidhidha momukalo kehe ‘aamwahe’ yaKristus.—Mateus 25:31-46.
[Pictures on page 178]
Omolwashike Jesus a tile kutya otashi ka kala ihwepo kwaamboka yomuSodom mEsiku lyEpangulo?