Ilonga sha mOohapu dhaKalunga
Oshike tashi ka ningwa mEsiku lyEpangulo?
Moshitopolwa shika omu na omapulo ngoka tashi vulika wi ipula kombinga yago notashi ku ulukile mpoka to vulu okwaadha omayamukulo gago mOmbiimbeli yoye. Oonzapo dha- Jehova otadhi ka kala dha nyanyukwa okukundathana nangoye omayamukulo.
1. Esiku lyEpangulo oshike?
Ngaashi shu ulikwa methano kolulyo, aantu oyendji ohaya dhiladhila kutya mEsiku lyEpangulo aantu omabiliyona otaye ke etwa komeho goshipangelapundi shaKalunga ya pangulwe shi ikolelela kiilonga yawo yonale. Ohaya dhiladhila kutya yamwe otaya ka kala nomwenyo megulu omanga yalwe taya ka pya moheli. Ihe Ombiimbeli otayi holola kutya elalakano lyEsiku lyEpangulo okumangulula aantu monkalo yokwaanuuyuuki. (Episalomi 96:13) Kalunga okwa langeka po Jesus e li Omupanguli ngoka ta ka galulila uuyuuki kombanda yevi.—Lesha Jesaja 11:1-5; Iilonga 17:31.
2. Esiku lyEpangulo otali ka eta ngiini uuyuuki?
Sho omuntu gwotango, Adam, a li a tsu ondumbo naKalunga, okwe etele oluvalo lwe uulunde, okumona iihuna neso. (Aaroma 5:12) Opo Jesus u ukithe oshinima shoka, oku na oku ka yumudha aantu omabiliyona mboka ya sa. Embo lyEhololo otali holola kutya shika otashi ka ningwa pethimbo lyelelo lyaJesus Kristus lyoomvula eyuvi.—Lesha Ehololo 20:4, 11, 12.
Mboka taya ka yumudhwa itaya ka pangulilwa iilonga mbyoka ya li ya longo manga inaaya sa, ihe otaya ka pangulilwa iilonga mbyoka taya ka longa konima sho “omambo” ngoka ga popiwa mEhololo ontopolwa 20 taga ka pandjwa. (Aaroma 6:7) Omuyapostoli Paulus okwa ti kutya mokati kaamboka taya ka yumudhwa notaya ka kala ye na ompito okwiilonga kombinga yaKalunga, omu na ‘aawanawa naawinayi.’—Lesha Iilonga 24:15.
3. MEsiku lyEpangulo otamu ka ningwa shike?
Mboka ya sa inaa tseya Jehova Kalunga nandonando noinaye mu longela, otaya ka mona ompito yokuninga omalunduluko nokulonga uuwanawa. Ngele oya longo uuwanawa, eyumudho lyawo otali ka tya ‘okuyumudhilwa omwenyo.’ Ihe yamwe yomwaamboka taya yumudhwa itaya ka kala ya hala okwiilonga oondjila dhaJehova. Okuyumudhwa kwawo otaku ka tya ‘okuyumudhilwa epangulo.’—Lesha Johannes 5:28, 29; Jesaja 26:10; 65:20.
Pehulilo lyomimvo eyuvi dhEsiku lyEpangulo, Jehova ota ka galulila aantu aavuliki monkalo ombwanawa moka ya li petameko. (1 Aakorinto 15:24-28) Kali shi tuu etegameno ewanawa kaantu ayehe aavuliki! Memakelo lyahugunina, Kalunga ota ka piitha mo Satana Ondiaboli mondholongo, ngoka a kala edhililwa moka uule womimvo eyuvi. Satana ota ka kambadhala ishewe okupukitha aantu e ya gamune ko kuJehova, ihe mboka taya tindi okupukithwa kuSatana otaya ka kala nomwenyo sigo aluhe kombanda yevi.—Lesha Jesaja 25:8; Ehololo 20:7-9.
4. Omesiku lilwe lini lyepangulo moka aantu taya ka mona uuwanawa?
Ombiimbeli otayi longitha wo uutumbulilo “esiku lyepangulo” okuulika koshiningwanima shoka tashi ke eta ehulilo lyuuyuni. Esiku ndyoka lyepangulo otali ke ya ombadhilila ngaashi Eyelu lyopethimbo lyaNoowa, ndyoka lya li lya kombo po aakolokoshi ayehe. Lago enene, konima yehanagulo ‘lyaakeenakonasha naKalunga,’ ndyoka li li popepipepi nokuningwa, Kalunga ote ke e ta uuyuni uupe moka “tamu ka kala uuyuuki.”—Lesha 2 Petrus 3:6, 7, 13.
Ngele owa hala okumona uuyelele owundji, tala pepandja 213-215 membo Omalongo gashili gOmbiimbeli ogeni naanaa?, lya nyanyangidhwa kOonzapo dhaJehova.
[Ethano pepandja 16]
“Epangulo lyahugunina” kuGustave Doré, 1832-1883
[Edhina lyomuthaneki]
Engravings by Doré