Oompwidhuli Otadhi Humitha Komeho Oshipotha shOkukondjitha Kalunga

Ihe omolwashike mbela Satana noompwidhuli dhe taya longo noonkondo unene ngawo okupukitha aantu? Omolwashoka oya hala tu ikute moshipotha shawo. Oya hala tu ya galikane. Oya hala twi itaale iifundja yawo nokulonga iinima mbyoka Jehova e tonde. Oyindji yomiinima mbika oya kwatela mo omikalo dha kwatathana noonakusa.

Eso lyomuholike olyo oshimoniwa shuuwehame wopamaiyuvo, nokunika oluhodhi oshi li paunshitwe noshu uka. Konima yeso lyakuume ke Lasarus, Jesus “okwa lili.”—Johannes 11:35.

Oku na omikalo odhindji dhi na sha neso, nomikalo dha tya ngeyi odha yoolokathana unene muuyuni auhe. Odhindji dhomudho itadhi kondjithathana nomakotampango gOmbimbeli. Ihe omikalo dhimwe odha kankamena kedhiladhilo kutya oonakusa oye na omwenyo notaya vulu okumona aanamwenyo. Iituthi yoosa, oluhodhi lwa pitilila, nomikalo dhomafumviko dha ningikika, ayihe mbino oyi ikwatelela kuumbanda wokwaayemateka oombepo dhoonakusa. Ihe molwaashoka oonakusa “kaye shi sha,” mboka haa ningi iinima ya tya ngeyi otaya humitha komeho iifundja yaSatana.—Omuuvithi 9:5.

Omikalo nenge iituthi yimwe ohayi zi meitaalo kutya oonakusa oya pumbwa ekwatho lyaanamwenyo nonokutya otaye ke etela aanamwenyo oshiponga ngele itaya ngungumanekwa. Miilongo yimwe omadhano giituthi nomayambo ohaga dhanwa sigo omasiku 40 nenge omvula yimwe konima yeso lyomuntu. Shika ohashi ningwa nedhiladhilo lyokukwathela nakusa a ‘taagulukile’ moshilongo shoombepo. Omukalo gumwe gwaapuhe ogwo okugandja iikulya niikolitha koonakusa.

Iinima mbika oya puka oshoka otayi humitha komeho iifundja yaSatana shi na sha noonakusa. Mbela Jehova ota ka nyanyukilwa ngaa okukala tu na sha nomikalo dha kankamena komalongo goompwidhuli? Nandonando!—2 Aakorinto 6:14-18.

Aapiya yaKalunga kashili kaye na oshitopolwa shasha momikalo ndhoka tadhi ambidhidha iifundja yaSatana. Pehala lyaashono, yo otaya gandja eitulomo lyawo lyopahole kokukwathela aanamwenyo noku ya hekeleka. Yo oye shi shi kutya ngele omuntu a si, oJehova owala ta vulu oku mu kwatha.—Job 14:14, 15.

Uumpulile Otau Pangulwa kuKalunga

Aantu yamwe ohaya kwatathana noompwidhuli shu ukilila nenge mokupitila momupopi noombepo gwopantu. Shika ohashi ithanwa uumpulile. Uunganga, uulodhi, omaanekelo, nokupula omayele koonakusa, ayihe mbino oyo omikalo dhuumpulile.

Ombimbeli otayi pangula iinima mbika, sho tayi ti: “Mwaa monikile mungoye nando omuntu . . . ku na uunganga, nenge [ta] anekele, nenge ta hunganeke iihunganeko, nenge ta logo, nenge ta pangitha uunganga ta pula aathithi, nenge ta li po ohula. Oshoka kehe ta longo mbyoka, oye iihuna koshipala shOmuwa.”—Deuteronomium 18:10-12.

Omolwashike mbela Jehova te tu londodhele ngawo noonkondo tu kondjithe omikalo ndhika?

Shi na ko nasha nonkalonawa yetu yene, Jehova ote tu londodha tu kondjithe omikalo adhihe dhuumpulile. Ye oku hole aantu noku na ko nasha nayo, ihe oku shi shi kutya mboka taya kwatathana noompwidhuli otaya ka hepekwa shili.

Gumwe gwomaantu ya tya ngeyi okwa li Nilda, ngoka a li omupopi noombepo muBrasilia. Oompwidhuli odhe etele onkalamwenyo ye oluhepo. Ota hokolola: “Oombepo . . . odha li dhi na ndje nodha teleganitha ndje. Onda kala nokutelegana pokati koonkalo dhokutseya sha nodhokwaatseya sha, nonda li nda tulwa moshipangelo omolwomaupyakadhi gomutse. Oompwidhuli odha hepeke ndje unene nomolwaashono oonelve dhandje dha li dhe ehamekwa kwaashono. Onda kutha omiti dhokukodheka e tandi tameke okulongitha aluhe iikolitha nokuhila omakaya. Shika osha tsikile uule woomvula.”

Hugunina, kekwatho lyaJehova nOonzapo dhe kombanda yevi, Nilda okwa manguluka ko kenwethomo lyoompwidhuli nongashingeyi oku li monkalamwenyo ya lalekwa nuuyamba noyuukolele. Ota ti: “Otandi kumagidha ayehe yaaha kwatathane nando noombepo [oombwinayi] nando okashona.”