Olye Ta Pangele Lelalela Uuyuni?

Aantu oyendji otaa ka yamukula epulo ndika li li pombanda noshitya shimwe—oKalunga. Ihe osha simana okumona kutya kapu na nando oompoka Ombimbeli tayi popi kutya Jesus Kristus nenge He oyo aapangeli yashili yuuyuni mbuka. Mepingathano naashika, Jesus okwa ti: “Omupangeli guuyuni mbuka ota ka umbilwa pondje.” Nokwa gwedha ko: “Omupangeli guuyuni te ya, oye noke na nando osha mungame.”—Johannes 12:31, OB-1986; 14:30; 16:11.

Ano omupangeli guuyuni mbuka oye omupataneki gwaJesus. Oye lye mbela?

Oonkalo dhUuyuni Otadhi Gandja Eyamukulo

Uuyuni owa hepekwa shinyanyalitha mondjokonona ayihe, nonando aantu mboka ye na omadhiladhilo omawanawa oya kala taa ningi oonkambadhala. Shika otashi kumitha aantu mboka taye shi dhiladhila, ngaashi naanaa nakusa omunyoli omukuluntu David Lawrence: “‘Ombili kombanda yevi’—konyala kehe gumwe okwe yi hala. ‘Esimano kaantu e ya hokwa’—konyala aantu ayehe muuyuni oye na omaiyuvo ga tya ngawo mokati kawo. Oshike nduno sha puka? Omolwashike iita tayi mbandameke aantu ngele yo ayehe oye na omahalo ga tya ngaaka?”

Otashi monika sha fa tashi kondjithathana, hasho mbela? Nonando ehalo lyaantu lyopaunshitwe olyo okukala mombili, yo otaa tondathana notaa dhipagathana—notashi ningwa nonyanya nokuli. Pashiholelwa, dhiladhila kiilonga yinyanyalitha noonkondo mbyoka ya longwa owina. Aantu oya kala haa longitha oondjugo dhoogasa, ookamba dhoonkwatwa, iikuti yomulilo, oomboma dhopeke nomikalo dhilwe dhinyanyalitha okuhepekathana nokudhipagathana kaaye na ohenda.

Owe shi itaala kutya aantu mboka ya hala noonkondo ombili nelago, otaa vulu kuyo yene okuningila yalwe uuwinayi uunene noonkondo wa tya ngaaka? Oonkondo dhini tadhi ningitha aantu ya longe iilonga yinyanyalitha ya tya ngaaka nenge tadhi ya tula moonkalo moka yo ye uvite kutya oye na okulonga iilonga ya tya ngaaka? Oho kala mbela to shi ipula ngele oku na oonkondo oombwinayi ihaadhi monika ndhoka tadhi nwetha mo aantu ya longe iilonga ya tya ngaaka yuukolokoshi?

Aapangeli yUuyuni Taa Dhimbululwa Mo

Inashi pumbiwa u kale to fekafekele, oshoka Ombimbeli otayi ulike sha yela kutya omunandunge ngoka ihaa monika oye ta pangele aantu niigwana. Otayi ti: “Uuyuni auhe ou li mepangelo lyomuhindadhi.” NOmbimbeli otayi ti kutya oye lye sho tayi ti: “[Oti] ithanwa ondiaboli naSatana, oongoka ta hongolola evi alihe.”—1 Johannes 5:19, OB-1986; Ehololo 12:9.

Sho oshikando shimwe Jesus a ‘makelelwe kOndiaboli,’ Jesus ina tya kutya Satana ke shi omupangeli guuyuni mbuka. Ombimbeli otayi yelitha shoka sha ningwa po: “Omuhindadhi okwe mu kutha ko ishewe ya yi naye kondundu ondeendeka, e te mu ulukile iilongo ayihe yomuuyuni nuuyamba wayo nokwa ti kuye: Ayihe mbika otandi yi ku pe, ngele to [tsu] oongolo noto galikana ndje. Jesus nokwa ti kuye: Za po, Satana.”—Mateus 4:1, 8-10.

Dhiladhila kombinga yaashika. Satana okwa makele Jesus moku mu pa “iilongo ayihe yomuuyuni.” Ihe okugandja kwaSatana okwa li mbela emakelo lyoshili andola okwa li Satana haaye shili omupangeli gwiilongo mbika? Aawe, kakwa li. Ndhindhilika wo kutya Jesus ina patana kutya omapangelo agehe ngaka gomuuyuni ogaSatana, shoka ye a li e na okuninga andola Satana haye a li te ga pangele. Ano Satana Ondiaboli oye shili omupangeli guuyuni ihaa monika! Dhoshili, Ombimbeli otayi mu ithana “kalunga kuuyuni mbuka.” (2 Aakorinto 4:4) Ihe ongiini mbela omuntu omwiinayi a tya ngaaka a li e ya pondondo yoonkondo yi thike mpono?

Ngoka a ningi Satana okwa li omuyengeli a shitwa kuKalunga, ihe okwa tameke okukala a hala ondondo yaKalunga. Okwa pataneke uuthemba waKalunga wokupangela. Opo e shi pondole ye okwa longitha eyoka li ninge ongoshinima tashi popi okuyula omukiintu gwotango, Eva, nomusamane gwe, Adam, opo ya vulike kuye pehala lyokuvulika kuKalunga. (Genesis 3:1-6; 2 Aakorinto 11:3) Okwa ti wo kutya ye ota vulu okupilula ko oluvalo aluhe lwaAdam naEva kuKalunga ndoka inaalu valwa natango. Ano Kalunga okwa gandja ethimbo kuSatana opo a kambadhale okugandja uunzapo shi na ko nasha nepopyo lye, ihe Satana ine shi pondola.—Job 1:6-12; 2:1-10.

Osha simana okumona kutya Satana haye awike mokupangela uuyuni kwe. Ye okwe shi pondola okwiitaalitha yamwe yomaayengeli ye mu djoine muuniita we naKalunga. Mbaka oya ningi oompwidhuli, ooyakwawo yopambepo. Ombimbeli oyo tayi popi sho tayi ladhipike Aakriste: ‘Thikameneni omakotokelo gaSatana. Oshoka ekondjo lyetu kali shi okukondjitha onyama nombinzi, aawe, otu na okukondjitha . . . aapangeli yuuyuni womilema ndhika, oombepo dhuuwinayi meyalelo.’—Aaefeso 6:11, 12.

Kondjitha Oombepo dhUuwinayi

Aapangeli yuuyuni aawinayi mboka ihaaya monika oya tokolelela okupukitha aantu ayehe, noku ya pilula ko kegalikano lyaKalunga. Omukalo gumwe oombepo dhuuwinayi hadhi ningi shika ogwo okuhumitha komeho edhiladhilo lyokukala nomwenyo konima yokusa, nokuli nonando Oohapu dhaKalunga otadhi ulike sha yela kutya oonakusa kaye shi sha. (Genesis 2:17; 3:19; Hesekiel 18:4; Epsalmi 146:3, 4; Omuuvithi 9:5, 10) Ano mokuyelekela ewi lyaangoka a sa, ombepo yuuwinayi otashi vulika tayi popi naakwawo mboka ye na omwenyo nenge ookuume ke okupitila momupopi noombepo nenge ‘mewi’ tali zi moshilongo shoombepo ihaashi monika. “Ewi” otali ifetha lya fa lyaangoka a sa nale, ihe muushili wo wene olyompwidhuli!

Ano ngele sikulimwe to uvu “ewi” lya tya ngaaka, ino pukithwa. Ekelahi ashihe shoka tali popi, e to endulula oohapu dhaJesus: “Za po, Satana!” (Mateus 4:10; Jakob 4:7) Ino pitika nando okatalekonawa ke na ko nasha noshilongo shoombepo ke ku ningithe u kale u na ekwatathano noombepo dhuuwinayi. Ekwatathano ndika ohali ithanwa uumpulile, na Kalunga ota londodha aagalikani ye ye u kondjithe moombinga dhawo adhihe. Ombimbeli otayi pangula kehe ngoka “ta hunganeke iihunganeko . . . nenge ta pangitha uunganga ta pula aathithi, nenge ta li po ohula.”—Deuteronomium 18:10-12; Aagalati 5:19-21; Ehololo 21:8.

Molwashoka uumpulile ohau fala omuntu mokunwethwa mo koompwidhuli, tse otu na okukondjitha iilonga yawo ayihe, nando onayi kale tayi monika wo ya fa iiwanawa noonkondo nenge iituntuli. Iilonga mbika oya kwatela mo etalo lyokufekafeka lyopaumpulile, okulongitha iipelende yOuija, eanekelo, okukonakona omisinda peke lyagumwe, nuunongo woonyothi. Oompwidhuli odha kala wo hadhi etitha ekudhilo nomamoniko galwe gopanyama momagumbo ngoka dho dha ninga omahala gadho gokukala.

Kakele kaashono, oombepo dhuuwinayi ohadhi longitha nayi egamo lyaantu lyokuyona mokuhumitha komeho iileshomwa, ookino nooprograma dhotelevisi ndhoka tadhi ulike iilonga yopamilalo mbyoka ya nyata nokayi shi yopaunshitwe. Oompwidhuli odhi shi shi kutya ngele omadhiladhilo ga puka itaga tidhwa mo, otaga ka nwetha mo aantu opo ya longe okwaahenuuyogoki—ngaashi naanaa oompwidhuli dho dhene.—Genesis 6:1, 2; 1 Aatessalonika 4:3-8; Judas 6.

Dhoshili, oyendji otashi vulika haa sheke edhiladhilo kutya uuyuni mbuka otau pangelwa koombepo dhuuwinayi. Ihe okwaaitaala kwawo itaku tu kumitha, oshoka Ombimbeli otayi ti: “Satana mwene ti ishitukitha omuyengeli guuyelele.” (2 Aakorinto 11:14) Epukitho lye enene lyopamakoto olya li okuposipaleka oyendji kaaya mone uushili kutya ye noompwidhuli dhe oko ye li shili. Ihe ino pukithwa! Ondiaboli noompwidhuli dhayo oyoshili, nou na oku ya kondjitha aluhe.—1 Petrus 5:8, 9.

Lagonene, ethimbo oli li ngashingeyi popepi sho Satana nooyakwawo itaaya ka kala po we! “Uuyuni [mwa kwatelwa aapangeli yawo yoompwidhuli] notau hulu po,” Ombimbeli osho tayi shilipaleke, “ihe oongoka ta gwanitha ehalo lyaKalunga, oye ha kala aluhe.” (1 Johannes 2:17) Epepelelo otali ka kala li thike peni sho enwethomo ndika ewinayi tali kuthwa po! Natu kale ano mokati kaamboka taa longo ehalo lyaKalunga nokunyanyukilwa omwenyo sigo aluhe muuyuni waKalunga uupe wuuyuki.—Epsalmi 37:9-11, 29, OB-1986; 2 Petrus 3:13; Ehololo 21:3, 4.

Kakele kaambyoka yu ulikwa shimwe shi ili, iitothwa mo ayihe yOmishangwa oya kuthwa mOmbimbeli yOshindonga.

[Ethano pepandja 4]

Satana okwa li mbela ta vulu okupa Jesus omapangelo agehe ngano gomuuyuni andola oga li kaage shi ge?