ONTOPOLWA 5

Putudha okanona koye okuza kuuhanona

1, 2. Okulye aavali ye na okukonga ekwatho mokuputudha aanona yawo?

OMUVALI gumwe ngoka u ulike olupandu omimvo 3 000 dha piti okwa li a popi a ti: “Aanona oyo omagano ga za kOMUWA.” (Episalomi 127:3) Odhoshili kutya enyanyu lyokukala omuvali oli li omagano ge na ondilo ga za kuKalunga ngoka aaihokani oyendji ye na. Ihe mboka ye na aanona ohaye shi dhimbulula mo mbala kutya okukala omuvali owu na iinakugwanithwa.

² Unene tuu kunena oshi li oshidhigu noonkondo okuputudha aanona. Ihe nonando ongaaka, aavali oyendji oye shi pondola nomupisalomi a nwethwa mo okwa nyola a ti: “OMUWA ngele ita tungu egumbo, aatungi yalyo otaa ihepeke owala.” (Episalomi 127:1) Aavali otaye ke shi enditha owala nawa uuna taya landula lela omalombwelo gaJehova. Ombiimbeli otayi ti: “Inekela OMUWA nomutima gwoye aguhe noino igameka koondunge dhoye mwene.” (Omayeletumbulo 3:5) Mbela oto ka pulakena nehalo ewanawa komayele ngoka Jehova a gandja sho to putudha aamwoye momukokomoko gwoomvula 20?

OKUTAAMBA KO OMAYELE GOMBIIMBELI

3. Aasamane oye na oshinakugwanithwa shashike mokuputudha aanona?

³ Momaukwanegumbo ogendji muuyuni, aasamane oya tala ko okuputudha aanona ku li oshinakugwanithwa shaakulukadhi. Oohapu dhaKalunga otadhi ulike shili kutya tate oye e na oshinakugwanithwa shokunyangela egumbo lye. Otadhi ti wo kutya oku na iinakugwanithwa yilwe megumbo. Ombiimbeli otayi ti: “Opaleka iilonga yoye pondje, ngoye u tule epya lyoye melandulathano; opo ihe oto ka tunga egumbo lyoye.” (Omayeletumbulo 24:27) Pataloko lyaKalunga, aavali ayehe yaali oye na okuputudha okanona. — Omayeletumbulo 1:8, 9.

4. Aasamane oye na okutala ko ngiini aanona yawo?

⁴ Aanona yoye oho ya tala ko ngiini? Aasamane yamwe ihaya tala ko aanona yawo ye li aakwawo. Aanona aakwawo yayina molwaashoka yina naye ke shi omukwawo gwomusamane gwe, ihe ogwomezimo moka a za. Onkee ano aasamane oya tala ko aatekulu mboka ya valwa kaamwayina aakiintu oyo ya simana unene ye vulithe paanona yawo yene. Ihe shika itashi tsu kumwe nomakotampango gOmbiimbeli. Olundji Ombiimbeli otayi tsu omuthindo ekwatathano ndyoka li na okukala pokati kaavali naanona yawo. (Deuteronomium 6:6, 7; Aaefeso 6:4) Ootate, talii ko aanona yeni ye li “omagano ga za kOMUWA” noye li aakweni.—Episalomi 127:3; Omayeletumbulo 31:2.

5. Aaihokani oye na okutala kushike opo ya tokole kutya otaya ka vala aanona yangapi?

⁵ Mbela meputuko lyeni omukiintu okwa tegelelwa a vale aanona oyendji? Paushili, aaihokani oyo ye na okutokola kutya oya hala aanona yangapi. Ongiini ngele aavali kaye na iikulya, omizalo niimaliwa yokutuma aanona oyendji kosikola? Osha yela kutya, aaihokani oye na okukaleka iinima mbyoka momadhiladhilo, uuna taya tokola kutya oya hala aanona yangapi. Aaihokani yamwe mboka itaaya vulu okuyambidhidha aanona yawo ohaya pula aakwanezimo yawo ya putudhe yamwe yomuyo. Mbela shoka oshi li mondjila? Hasho naanaa, molwaashoka aavali oyo ye na oshinakugwanithwa shokuputudha aanona yawo. Ombiimbeli otayi ti: “Ihe ngele ope na omuntu ngoka itaa sile aanezimo lye oshimpwiyu, unene aanegumbo lye, oye okwi idhimbike eitaalo nomwiinayi e vulike komupagani.” (1 Timoteus 5:8) Aaihokani mboka ye na ko nasha ohaya pangele kutya ‘uukwanegumbo’ wawo otawu ka kala wu thike peni opo ya vule ‘oku wu sila oshimpwiyu.’ Mbela otaya vulu okulongitha iingambeki yoluvalo opo kaaya vale aanona oyendji? Shoka ehogololo lyaaihokani yo yene, nongele oya ningi etokolo moshinima shika oye na wo okuhogolola kutya otaya ka longitha iingambeki yoluvalo yoludhi luni. Ombiimbeli otayi ti: “Kehe gumwe oku na okuhumbata ye mwene omutenge gwe.” (Aagalati 6:5) Onkee ano, okungambeka oluvalo hoka kwa kwatela mo omukalo kehe gwokukutha mo ela otaku kondjithathana nomakotampango gOmbiimbeli. Jehova Kalunga oye “oluthithiya lwomwenyo.” (Episalomi 36:9) Onkee ano, okuhulitha po omwenyo ngoka gu li moshivalelo oshi li eyono lya kwata miiti koshipala shaJehova nosha faathana owala nokudhipaga.—Eksodus 21:22, 23; Episalomi 139:16; Jeremia 1:5.

GWANITHA PO OOMPUMBWE DHOKANONA KOYE

6. Uunake aavali ye na okutameka okuputudha okanona kawo?

⁶ Omayeletumbulo 22:6 otaga ti: “Putudha omumati pandjila ndjoka e na okweenda nayo.” Okuputudha aanona oku li oshilonga sha simanenena shaavali. Ihe uunake ye na okutameka noshilonga shoka? Okuza pokuvalwa kwokanona. Omuyapostoli Paulus okwa ti kutya Timoteus okwa putudhwa “okuza kuunona.” (2 Timoteus 3:15) Oshitya shOshigreka shoka sha longithwa movelise ndjoka otashi ulike kokahanona nenge kokanona inaaka valwa natango. (Lukas 1:41, 44; Iilonga 7:18-20) Onkee ano, Timoteus okwa li a putudhwa sho a li okanona lela, shoka shi li nawa. Owu na okutameka okuputudha okanona omanga okahanona. Nokuli nuunona uushona ohawu kala wa hala okutseya iinima.

7. (a) Omolwashike sha simana kaavali ayehe ya kale ye na ekwatathano lyopothingo nokanona? (b) Ekwatathano lya tya ngiini lya kala pokati kaJehova nOmwana epona?

⁷ Omukulukadhi gumwe okwa ti: “Onda li nda hokwa okutala okamwandjemati sho opo ka valwa.” Aavali oyendji osho haya kala ye uvite ngaaka. Ekwatathano ewanawa ndyoka hali kala pokati kameme nokanona ohali ende tali koko sho haya kala pamwe uule wethimbo. Okuyamitha kontulo ohaku kokeke ekwatathano ndyoka. (Yelekanitha 1 Aatessalonika 2:7.) Meme oha gwanitha po oompumbwe dhokanona ke dhopamaiyuvo ngele te ka hempe nokupopya nako. (Yelekanitha Jesaja 66:12.) Ihe ongiini kombinga yatate? Oku na wo okukala e na ekwatathano nokanona ke hoka opo ka valwa. Jehova okwa tula po oshiholelwa oshiwanawa moshinima shika. Membo lyOmayeletumbulo otatu ilongo mo ekwatathano lyaJehova nOmwana epona ngoka ta popiwa taku ti: “OMUWA okwa shiti ndje omutango gwiilonga ye . . . Onde mu nyanyudha esiku nesiku.” (Omayeletumbulo 8:22, 30; Johannes 1:14) Sha faathana, tate ngoka omunambili oha kokeke ekwatathano lyopahole nokanona ke okuza pevalo lyako. Tate gumwe okwa ti: “Ulukila okanona koye ohole ya gwana. Okanona ihaka si nando kokupapatelwa nokuthipwa komilungu.”

8. Oshinakugwanithwa shini aavali ye na shoka hashi tameke esiku okanona ka valwa?

⁸ Okahanona oka pumbwa oshindji shi vulithe mpoka. Esiku taka valwa, uuluyi wako owi ilongekidha okutaamba nokupungula uuyelele mboka taku uvu naavali oyo ye na oshinakugwanithwa shoka. Tala koshiholelwa ngele taki ilongo okupopya. Aakonakoni oya ti kutya okanona ohaki ilongo nawa okupopya nokulesha “okupitila mokukala ke na ekwatathano lyopothingo naavali yako omanga okashona lela.” Kala ho popi nokuleshela okanona koye okuza kuuhanona. Otaka tameke oku ku holela mbala ngele to popi nokonima yethimbo efupi oto ka longo okulesha. Otashi vulika nokuli ka kale ke shi okulesha manga inaaka tameka osikola. Shoka otashi ka kwathela unene ngele owu li moshilongo moka mu na aalongi aashona nosho wo oongundu dhu udha aalongwa.

9. Oshinima shini sha simanenena aavali ya pumbwa okudhimbulukwa?

⁹ Tangotango aavali Aakriste oye na okugwanitha po oompumbwe dhopambepo dhokanona kawo. (Tala Deuteronomium 8:3.) Omolwashike mbela? Opo ye ka kwathele ka kokeke uukwatya wOpakriste nokuzala “omuntu omupe.” (Aaefeso 4:24) Opo ya pondole, oya pumbwa okulongitha iitungitho ya kola nokutunga momukalo gu uka.

OSHILI YI NONGEKA AAMWOYE

10. Omaukwatya geni aanona ya pumbwa okukokeka?

¹⁰ Ongushu yetungo ohayi ikwatelele unene kiitungitho mbyoka ya longithwa. Omuyapostoli Paulus okwa ti kutya ‘oshingoli, oshisiliveri nomamanya ge na ondilo’ oyi li iitungitho ya dhenga mbanda ngele tashi ya pokutunga Omukriste. (1 Aakorinto 3:10-12) Iinima mbyoka otayi thaneke uukwatya ngaashi, eitaalo, owino, oondunge, uudhiginini, esimaneko nohole yokupandula Jehova nosho wo oompango dhe. (Episalomi 19:7-11; Omayeletumbulo 2:1-6; 3:13, 14) Ongiini aavali taya vulu okukwathela aanona yawo manga kuyele ya kokeke uukwatya mbuka? Omokulandula omalombwelo ngoka ge li mOmbiimbeli.

11. Ongiini aavali Aaisraeli ya li ya kwathele oyana ya kokeke uukwatya wopakalunga?

¹¹ Konima yokathimbo manga oshigwana shAaisraeli inaashi ya mevi lyeuvaneko, Jehova okwa li a lombwele aavali a ti: “Oohapu ndhika tandi dhi ku lombwele nena. Dhi nongeka aamwoye. Dhi hokolola, uuna u li moyaandjeni nuuna u li mepola, uuna to vululukwa nuuna to longo.” (Deuteronomium 6:6, 7) Eeno, aavali oye na okukala oshiholelwa oshiwanawa koyana, ye na uukuume nayo, haya popi nayo noku ya longa oshili.

12. Omolwashike sha simanenena aavali ya kale oshiholelwa oshiwanawa?

¹² Kala oshiholelwa oshiwanawa. Tango, Jehova okwa li a lombwele aavali a ti: “Ino dhimbwa oohapu ndhika tandi . . . ku lombwele.” Okwa gwedha ko a ti: “Dhi nongeka aamwoye.” Onkee ano, uukwatya wopakalunga owu na okukala tango momutima gwomuvali. Oku na okukala e hole oshili nokukala muyo, opo ihe ota ka adha omutima gwokanona. (Omayeletumbulo 20:7) Omolwashike mbela? Omolwaashoka aanona ohaya nwethwa mo unene kwaashoka haya mono shi vulithe shoka hayu uvu.—Lukas 6:40; 1 Aakorinto 11:1.

13. Ongiini aavali Aakriste taya vulu okuholela Jesus, mokugandja eitulomo kaanona yawo?

¹³ Kala wu na uukuume naamwoye. Jehova okwa li a lombwele aavali Aaisraeli a ti: ‘Dhi hokololela aamwoye uuna u li moyaandjeni nuuna u li mepola.’ Shika otashi pula aavali ya kale naanona yawo, nonando oye na omaipyakidhilo ogendji. Jesus okwa li a longitha ethimbo lye a kale pamwe nuunona. Lwopehulilo lyuukalele we ‘aantu oye eta uunona kuye, e u gume.’ Jesus okwa li inyenge ngiini? “Okwe u papata momaako ge nokwe u tenteke iikaha ye e te u yambeke.” (Markus 10:13, 16) Dhiladhila owala kutya pethimbo mpoka Jesus okwa li e li pokudhipagwa. Nonando ongaaka, okwa li a longitha ompito ndjoka okukala naanona nokugandja eitulomo kuyo. Jesus ina tulila po tuu aavali oshiholelwa sha dhenga mbanda!

14. Omolwashike shi li nawa aavali ya kale pamwe noyana?

¹⁴ Kala ho kundathana naamwoye. Ngele oho kala naamwoye otashi ku kwathele wu kale ho kundathana nayo. Shi thike ngaa mpoka ho kundathana nayo, opo ngaa pu thike okukala wu shi omaukwatya gawo nawa. Dhimbulukwa ihe kutya oonkundathana kadhi shi okupopya kowala. Omukulukadhi gumwe muBrasilia okwa ti: “Onda li ndi na okwiilonga okukala handi pulakene nawa.” Oku shi ninga okwe mu etela uuwanawa molwaashoka omwanamati okwa li a tameke okukala he mu lombwele omaiyuvo ge.

15. Oshike twa pumbwa okukaleka momadhiladhilo uuna tashi ya pomainyanyudho?

¹⁵ Aanona oya pumbwa ethimbo lyokwiinyanyudha ngaashi ‘ethimbo lyokuyola nethimbo lyokudhana.’ (Omuuvithi 3:1, 4; Sakaria 8:5) Ohashi kala nawa uuna aavali naanona taya nyanyukilwa pamwe. Shoka shiyemateka osho kutya momagumbo ogendji okutala o-TV oko owala ethimbo lyokwiinyanyudha. Nonando oopoloholama dhimwe ko-TV otashi vulika dhinyanyudha, odhindji dhomudho odhi na enwethemo ewinayi, noku dhi tala ohaku imbi oonkundathana muukwanegumbo. Onkee ano, omolwashike itaamu kutha ombinga momainyanyudho ngoka taga tungu? Otamu vulu okukala hamu imbi, hamu dhana omaudhano gi ili nogi ili, hamu endathana nookuume keni nohamu talele po omahala gontumba. Iinima ya tya ngaaka ohayi eta oompito dhokukundathana.

16. Aavali oye na okulonga oyana shike kombinga yaJehova nongiini ye na oku shi ninga?

¹⁶ Kala ho longo aamwoye Oohapu dhaKalunga. Jehova okwa ti: “Oohapu ndhika dhi nongeka aamwoye.” Ontopolwa ndjika otayi ku yelithile shoka wu na okulonga aamwoye nankene wu na oku shi ninga. Tango owu na ‘okuhola OMUWA Kalunga koye komutima gwoye aguhe, komwenyo gwoye aguhe nonoonkondo dhoye adhihe.’ (Deuteronomium 6:5) Opo ihe ‘oohapu ndhoka to dhi nongeke aamwoye.’ Kungeyi, oto ka longa aamwoye ya kale ye hole Jehova nosho wo iipango ye nomutima aguhe. (Yelekanitha Aahebeli 8:10.) Okunongeka aamwoye “uuna u li moyaandjeni nuuna u li mepola, uuna to vululukwa nuuna to longo,” otashi ti kutya owu na oku ya longa aluhe. Jehova ota lombwele aavali kutya oye na okupopya aluhe kombinga yoyana opo ye ya kwathele ya kokeke omaukwatya gopakalunga. Shika osha kwatela mo okukala mu na ekonakonombiimbeli nayo ihaali faula.

17. Uukwatya wuni aavali ye na okukokeka moyana nomolwashike?

¹⁷ Aavali oyendji oye shi shi kutya kashi shi oshipu okwaadha omutima gwokanona. Omuyapostoli Petrus okwa li a ladhipike Aakriste a ti: “Kaleni onguuhanona mwa sa enota aluhe lyomahinihini gopambepo.” (1 Petrus 2:2) Molwaashoka hakehe gumwe ha kala a sa ondjala yiikulya yopambepo, aavali oya pumbwa okutala kutya omomikalo dhini taya vulu okukwathela oyana opo ya kale onguuhanona mboka wa sa enota lyomahini gopambepo.

18. Omikalo dhini dhokulonga dhaJesus ndhoka aavali taya ladhipikwa ya holele?

¹⁸ Jesus okwa li a adha omitima dhaapulakeni ye mokulongitha omayele. (Markus 13:34; Lukas 10:29-37) Okulonga aanona momukalo ngoka oshi li nawa noonkondo. Longa aanona omakotampango gOmbiimbeli mokulongitha omafano nomahokololo taga hokitha ngaashi ngoka ge li mEmbo Lyandje lyOmahokololo gOmbiimbeli.a Aanona naya kuthe ombinga moonkundathana. Naya thaneke nokudhana iinyandwa yopethimbo lyOmbiimbeli. Jesus okwa li wo a longitha omapulo. (Mateus 17:24-27) Aavali naya holele omukalo ngoka pethimbo lyekonakono lyuukwanegumbo. Pehala lyoku ya lombwela oshipango shaKalunga, ya pula kutya omolwashike Jehova e tu pa oshipango shika? Oshike tashi ka ningwa po ngele otatu shi gwanitha? Oshike tashi ka ningwa po ngele otwe shi taaguluka? Omapulo ga tya ngaaka otaga ka kwathela okanona ka mone omatompelo kutya iipango yaKalunga iiwanawa notayi longo.—Deuteronomium 10:13.

19. Uuwanawa wuni aanona taya ka nyanyukilwa, ngele aavali yawo oya landula omakotampango gOmbiimbeli moku ya putudha?

¹⁹ Oto vulu okukwathela aamwoye manga ye li aashona ya kale ye na ekwatathano lyopothingo naJehova Kalunga mokukala wu li oshiholelwa kuyo, kuume kawo, ho kundathana nayo noku ya longa oshili. Ekwatathano ndyoka otali ka kwathela aamwoye ya kale Aakriste ya nyanyukwa. Otaya ka kambadhala okukala paitaalo lyawo, nonando otaya thiminikwa nokumakelwa koomakula. Kwathela aluhe aamwoye ya kale ya lenga ekwatathano lyawo naJehova ndyoka li na ondilo.—Omayeletumbulo 27:11.

EGEELOPUTUDHO OLYA PUMBIWA LELA

20. Egeeloputudho oshike noli na okugandjwa ngiini?

²⁰ Egeeloputudho olyo okuukitha omadhiladhilo nomutima gwokanona, oshinima shoka ka pumbwa aluhe. Paulus okwa li a lombwele ootate kutya ‘inaya hinda oyana noku ya geyitha, ihe naye ya putudhe noku ya kumagidha paukriste.’ (Aaefeso 6:4) Aavali oye na okupa oyana egeeloputudho lyopahole ngaashi owala Jehova he shi ningi. (Aahebeli 12:4-11) Egeeloputudho lyopahole olya kwatela mo okutompathana naamwoye. Onkee ano, aanona otaya lombwelwa ya ‘pulakene omagando.’ (Omayeletumbulo 8:33) Egeeloputudho oli na okugandjwa ngiini?

21. Omakotampango geni aavali ye na okukaleka momadhiladhilo uuna taya gandja egeeloputudho koyana?

²¹ Aavali yamwe ohaya dhiladhila kutya okugandja egeeloputudho koyana okwa kwatela mo okupopya owala newi tali tilitha, nokunyenyeta nenge oku ya tuka nokuli. Ihe Paulus okwa londodha aavali a ti: “Aakuluntu, inamu hinda aana yeni noku ya geyitha.” (Aaefeso 6:4) Aakriste ayehe otaya ladhipikwa ya kale ‘ye na olukeno naayehe nohaya pukulula aatamaneki yawo nombili.’ (2 Timoteus 2:24, 25) Aavali Aakriste ohaya kambadhala okukaleka oohapu ndhika momadhiladhilo uuna taya pe oyana egeeloputudho, nonando oye na okukala ya kwata miiti. Omathimbo gamwe inashi gwana owala okutompathana nokanona, ihe otashi vulika ka pumbwa egeelo lyontumba.—Omayeletumbulo 22:15.

22. Ngele okanona oka pumbwa okugeelwa oke na okulombwelwa shike?

²² Okanona kehe oka pumbwa egeeloputudho lye ke eleka. Aanona yamwe ‘ihaya londodhwa koohapu.’ Otashi vulika haya kala ya pumbwa okukatukilwa onkatu uuna ya yona sha opo oomwenyo dhawo dhi ka hupithwe. (Omayeletumbulo 17:10; 23:13, 14; 29:19) Ihe nando ongaaka, okanona oke na okulombwelwa kutya omolwashike taka geelwa. Ombiimbeli otayi ti: ‘Olunwa negeelo ohali gandja owino.’ (Omayeletumbulo 29:15; Job 6:24) Kakele kaashono, egeelo oli na ongamba. Jehova okwa lombwelele oshigwana she a ti: ‘Otandi ku putudha nuuyuuki.’ (Jeremia 46:28b) Ombiimbeli itayi popile nando okudhenga okanona nonyanya nenge nopwaahe na ohenda, hoka taku vulu oku ka toshagula noku ke ehameka nokuli.—Omayeletumbulo 16:32.

23. Oshike okanona ke na okuuva ko uuna taka geelwa kaavali yako?

²³ Sho Jehova a li a londodha oshigwana she kutya ote ke shi pa egeeloputudho okwa li e shi lombwele tango a ti: “Ino tila . . . oshoka ongame ndi li pungoye.” (Jeremia 46:28a, KB) Sha faathana, konima yegeeloputudho kehe ndyoka aavali taya gandja momukalo gwe eleka, okanona kake na nando okukala ke wete ka fa ke ekelwahi. (Aakolossa 3:21) Pehala lyaashono, oke na okuuva ko kutya egeeloputudho olya ningwa molwaashoka aavali ‘oye li puko,’ sha hala okutya, oye ka lile po.

GAMENA AANONA YOYE KIIPONGA

24, 25. Aavali oya pumbwa okugamena oyana komiyonena dhini kunena?

²⁴ Aakuluntu oyendji ohaya kala ya nyanyukwa uuna taya dhiladhila ethimbo ya li aanona. Ohaya dhimbulukwa sho aavali yawo ya li haye ya gamene nohole moonkalo adhihe. Aavali oya hala oyana ya kale ye uvite ngaaka, ihe muuyuni mbuka wa nayipala oshi li oshidhigu okugamena aanona thiluthilu.

²⁵ Oshinima shimwe shoka sha nika oshiponga noshi indjipala osho oluhondelo. Nokuli naanona aashona ohaya dhana uudhano wa kwatela mo oluhondelo. Ethimbo limwe ngele taya dhana uudhano wokudhika omagumbo ohaya kala tayi idhanene ya fa taya yi momilalo. Oshinima shilwe natango tashi tilitha noshi indjipala methimbo lyetu, osho okulala naanona aashona. Shinikitha oluhodhi, aanona oyendji ohaya hepekwa pamilalo momagumbo gawo kaatseyikile yawo nokwaamboka ye yi inekela. Ongiini aavali taya vulu okugamena aanona yawo koshiponga shika?

26. Omomikalo dhini aanona taya vulu okukala ya gamenwa nongiini ontseyo tayi vulu oku ya hupitha?

²⁶ Aavali oye na okulonga oyana kombinga yomilalo, omanga ye li aashona. Aanona mboka kaaye na ontseyo kombinga yomilalo otaya vulu okuhekelwa nuupu miinima ya nika omilalo kaanona ooyakwawo nenge kaakuluntu mboka haya hepeke aanona pamilalo. Ontseyo otayi vulu oku ya hupitha “mepola lyaawinayi nomaantu mboka haya popi iinima yiifundja.” (Omayeletumbulo 2:10-12) Ontseyo yashike? Ontseyo yomakotampango gOmbiimbeli, kombinga yaashoka shu uka naashoka sha puka. Owu na oku ya longa kutya aakuluntu yamwe ohaya vulu okulongela aanona omuyonena nosho wo kutya kaye na okuvulika kaantu mboka taye ya lombwele iinima inaayi uka. (Yelekanitha Daniel 1:4, 8; 3:16-18.) Omu na okukundathana naanona yeni iikando oyindji kombinga yoshinima shoka. Aanona oyendji ohaya dhimbulukwa nawa oshinima shoka haya lombwelwa olundji. Sho aanona taye ende taya koko, tate ke na okukala ha kalele oyanakadhona ngele tayi iyogo nenge taya zala, nameme oku na wo okusimaneka oyanamati. Shoka otashi ka kwathela aanona ya kale netaloko lyu uka li na ko nasha naantu yuukashike kookantu mboka wa yooloka ko kuwawo. Ihe opo aavali ya mone thiluthilu kutya aanona yawo oya gamenwa oye na oku ya tonatela ethimbo alihe.

KONGA EWILIKO KUKALUNGA

27, 28. Olye e li Onzo onenenene yekwatho kaavali sho ya taalela eshongo lyokuputudha oyana?

²⁷ Odhoshili kutya okuputudha okanona okuza kuuhanona oshi li eshongo, ihe aavali Aakriste kaye na okuhumbata omutenge ngoka oyo ayeke. Nale pethimbo lyAatokolihapu sho Manoak a li a lombwelwa kutya ota ka vala okanona okwa li a pula Jehova nkene e na oku ka putudha. Jehova okwa li a yamukula egalikano lye.—Aatokolihapu 13:8, 12, 24.

²⁸ Kunena sho aavali Aakriste taya putudha aanona yawo otaya vulu wo okupula ekwatho kuJehova megalikano. Kashi shi oshipu okukala omuvali, ihe oshi na ondjambi onene. Aaihokani yamwe Aakriste muHawaii oya ti: “Omu na oomvula 12 okuputudha okanona keni omanga inaaka thika mepipi edhigu lyokamukondapweyu. Ihe ngele omwa longo nuudhiginini komeho yethimbo mokutula miilonga omakotampango gOmbiimbeli, oli li ethimbo lyokukala mwa nyanyukwa nomu uvite ombili sho taya tokola kuyo yene kutya oya hala okulongela Jehova.” (Omayeletumbulo 23:15, 16) Uuna okanona koye ka ningi etokolo ndyoka, otashi ke ku inyengitha wo wu tye: “Aanona oyo omagano ga za kOMUWA.”

[Enyolo lyopevi]

ONGIINI OMAKOTAMPANGO GOMBIIMBELI NGAKA TAGA VULU OKUKWATHELA AAVALI YA PUTUDHE AANONA YAWO?

Inekela muJehova.—Omayeletumbulo 3:5.

Kala wu shi oshinakugwanithwa shoye.—1 Timoteus 5:8.

Jehova oKalunga omunahole.—Omayeletumbulo 8:22, 30.

Aavali oye na oshinakugwanithwa shokulonga oyana.—Deuteronomium 6:6, 7.

Aanona oya pumbwa okupewa egeeloputudho.—Aaefeso 6:4.

[Oshimpungu pepandja 61]

EGEELOPUTUDHO TALI TI SHA

Omukalo gumwe gwokugandja egeeloputudho ogwo okukwathela aanona ya tseye kutya otaya ka mona iilanduliko ngele itayi ihumbata nawa. (Aagalati 6:7; yelekanitha Eksodus 34:6, 7.) Pashiholelwa, ngele okamwoye oka kakeke pokuma, nako opaleke po. Ngele ka ningi gumwe nayi, ka lombwela ka gandje ombili ko kaahe shi ninge we. Omukalo gumwe gwokugandja egeeloputudho ogwo okukala itoo ningile okanona shoka taka pula ngele ihaka vulika. Kungeyi, okanona otaki ilongo okuninga shoka shu uka.

[Omathano pepandja 57]

Aavali, kaleni oshiholelwa oshiwanawa koyana yeni, hamu kala pamwe nayo, hamu popi nayo noku ya longa oshili