Oshileshwa 10

Iilonga Mbyoka Kalunga E Tonde

Ou na okukala wu uvite ngiini kombinga yiinima mbyoka Kalunga ta ti iiwinayi? (1)

Eihumbato lyopamilalo lyoludhi luni lya puka? (2)

Ongiini Omukriste e na okutala ko iifundja? (3) okundombola? (3) okuyaka? (3) elongithonkondo? (4) uumpulile? (5) uunkolwe? (6)

Omuntu ota vulu ngiini okumanguluka kiilonga iiwinayi? (7)

1. Aapiya yaKalunga oye hole shoka oshiwanawa. Ihe oye na okwiilonga wo okutonda shoka oshiwinayi. (Epsalmi 97:10) Shoka otashi ti okuyanda iilonga yontumba mbyoka Kalunga e tonde. Iilonga yilwe yomwaambika oyini?

2. Oluhondelo: Elalathano komeho yondjokana, eyonondjokana, okulala noshimuna, okulala nomukwanezimo, mbika ayihe oyo omayono ga kwata miiti kuKalunga. (Levitikus 18:6; Aaroma 1:26, 27; 1 Aakorinto 6:9, 10) Ngele yaali inaya hokana ihe oye li pamwe, yo oye na okutopoka nenge ya hokane paveta.—Aaheberi 13:4.

3. Iifundja, Okundombola, Okuyaka: Jehova Kalunga iha vulu okufundja. (Titus 1:2) Aantu mboka ya hala okuhokiwa kuye oye na okuyanda iifundja. (Omayeletumbulo 6:16-19; Aakolossa 3:9, 10) Oludhi kehe lwokundombola olwa nyatekwa kolwiho. Onkee ano Aakriste ihaya kutha ombinga moludhi kehe lwokundombola, ngaashi olotteri, ethigathanopo lyoonkambe nobingo. (Aaefeso 5:3-5) Aakriste ihaya yaka. Yo ihaya landa owina iinima ya yakwa nenge ya kuthe iinima kaaye na epitikilo.—Eksodus 20:15; Aaefeso 4:28.

4. Ongeyo, Elongithonkondo: Ongeyo ihaayi pangelwa otayi vulu okufala miilonga yelongithonkondo. (Genesis 4:5-8) Omulongithi gwonkondo ita vulu okukala kuume kaKalunga. (Epsalmi 11:5; Omayeletumbulo 22:24, 25) Oshi li sha puka okukwatela onkone nenge okugalulila uuwinayi omolwiinima iiwinayi mbyoka yalwe tashi vulika taye tu ningile.—Omayeletumbulo 24:29; Aaroma 12:17-21.

5. Uulodhi nUumpulile: Aantu yalwe ohaya pula oonkondo dhoombepo opo dhi kambadhale okwaaludha omikithi. Yalwe ohaya tikile aatondi yawo opo ye ehame nenge ye ya dhipage nokuli. Omunankondo ngoka e li konima yiilonga ayihe mbika oSatana. Onkee ano Aakriste kaye na okukutha ombinga mukehe shimwe shomuyo. (Deuteronomium 18:9-13) Okukala popepi naJehova oko egameno ewanawa komatikilo ngoka tashi vulika tu tikilwe kuyalwe.—Omayeletumbulo 18:10.

6. Uunkolwe: Kashi shi epuko okunwa kashona omaviinu, omalovu, nenge oshikunwa shilwe shoalkoholi. (Epsalmi 104:15; 1 Timoteus 5:23) Ihe okunwa unene sha pitilila nosho wo uunkolwe osha puka momeho gaKalunga. (1 Aakorinto 5:11-13; 1 Timoteus 3:8) Okunwa sha pitilila otashi vulu okuyona uukolele woye nokuhanagula po uukwanegumbo woye. Otaku vulu wo oku ku ningitha u iyethele nuupu lela momamakelo galwe.—Omayeletumbulo 23:20, 21, 29-35.

7. Aantu mboka taya longo iinima mbyoka Kalunga ta ti iiwinayi “itaa ka thigulula [uukwaniilwa waKalunga, KB].” (Aagalati 5:19-21) Ngele ou hole shili Kalunga nowa hala oku mu nyanyudha, oto vulu okumanguluka ko kiilonga mbika. (1 Johannes 5:3) Ilonga okutonda shoka Kalunga ta ti oshiwinayi. (Aaroma 12:9, OB-1986) Endathana naantu mboka ye na omikalondjigilile dhometilokalunga. (Omayeletumbulo 13:20) Ookuume ya pyokoka yopaKriste otaya vulu okukala onzo yekwatho. (Jakob 5:14) Komeho gaayihe, igameka kekwatho lyaKalunga okupitila megalikano.—Aafilippi 4:6, 7, 13.

[Pictures on page 20, 21]

Kalunga oku tonde uunkolwe, okuyaka, okundombola nosho wo iilonga yelongithonkondo